Read Northwest Gbaya SIRAK 7 Bible Online

SIRAK 7 - Northwest Gbaya bible

SIRAK 7

¹Tɔ̧ɔ̧ mbɔrɔ nɛtɛ nɛtɛ Ká mɛ de ɗaŋmɔ na, ɓɛɛ ŋma ɗaŋmɔ beka hɔ́ zu mɛ́ na.

²Ɗoŋ-mɛ a nyɛi nɛ gɔɔmɔ, ɓɛɛ a̧ tɛ ar tɛ-a nɛ mɛ́.

³Ká mɛ pɛ kparmɔ zu taŋá ko gɔɔmɔ na, wen ká mɛ tɛ̀ɛ̀ mɔi̧ a̧ war mɔɔrɔ-ɗoŋ-yiitoo gan.

⁴Ká mɛ kɔfi wan er Gasa Wan na; ká mɛ kɔfi kiti-wan er wannu na mbɛt.

⁵Ká mɛ kpai tɛ-mɛ nɛ widemɔ nɛ yuwar-a ti Gasa Wan, koo nɛ wan-ɗuka-taamɔ ti wannu na

⁶Ka mɛ́ nɛ nyɛma mɛ fo gɔɔmɔ yinɛ na, ɓɛɛ ká mɛ kii mɛ duk wigɔnkita na, wen ká kii tɛ̀ɛ̀ de mɛ ti ŋma gasawi, ɓɛɛ mɛ tɛ̀ɛ̀ e tana war kɔ-mɛ dúk.

⁷Ká mɛ de ɗaŋmɔ si tɛ o gasawi-saaye na; ká mɛ fɛŋ zu-mɛ́ ti giiwi na.

⁸Ká mɛ de kpɔk ɗaŋmɔ war yiitoo na, wen koo nɛ kuti-a'i ɓɛɛ nyɛma mɛ gɔn kita zu mɛ́.

⁹Ká mɛ tɔ̧‘e: «Sɔ̧ tɛ zɔk dɔká ha̧a̧mɔ kɔ‘m, ɓɛɛ ŋgimbi n'am tɛ ɗafi nɛ Sɔ̧ Wan-mɛ-ŋgɔn a̧ tɛ kpɛk wa» na.

¹⁰Ká gba̧a̧ tɛ-mɛ mɔk ŋgimbi nɛ mɛ kɔfi Sɔ̧ na; ká mɛ de zɛŋ nɛ ha̧mɔ ha̧ wisan na.

¹¹Ká mɛ zɛkɛɗi wi nɛ a̧-a̧ zaŋ tu̧u̧see na, wen ŋma Wi nɛ gbɔsi wi si ɗɔɔ, ká baa wi e ŋgɔn mbɛt a̧-a̧ sɛnɛ.

¹²Ká mɛ ɓir wen-ndela e nú nyá-mɛ́ na; ká mɛ de ŋma pɛrti mɔ‘i si tɛ sɛm kɔ-mɛ na mbɛt.

¹³Tɛ mɔ lɛŋ, mɛ bá zu-mɛ́ nɛ ndela, wen hɛra tɛ́ nɛnɛ́ gbak na.

¹⁴Ká mɛ búr wen nɛ dɔkaa mgbara o kutiwi na; ká mɛ tɔ̧ nɛ kpɔk wen zaŋ kɔfasɔ̧ kɔ-mɛ na.

¹⁵Ká mɛ sɛ́n ŋga tom, koo tom-fɔ na, wen nɛ Wan-mɛ-ŋgɔn a dee wa.

¹⁶Ká mɛ mɔi̧ in o wi-de-ɗaŋmɔ na; tɛ-mɛ a mbaŋ‘e ɗoŋ nyimsea ko Sɔ̧ nyɛi na.

¹⁷Mɛ mɔk tɛ-mɛ si ɗɔɔ wen bɔnɛ ko wi nɛ yú Gasa Wan na nɛ́ wee in o dɔk. O sɛm, Pɛrnam

¹⁸Ká mɛ bá sɛm kpai nɛ sede na, koo mgbak nya-mɛ́ kpai nɛ sa̧-a̧ lɔr hee wan mɛ Ofir ga na

¹⁹Ká mɛ bɛ̧ baa de koo nɛ a̧-a̧ nɛ ɗuka-taamɔ na, wen demɔ kɔ̧-a̧ gana lɔr.

²⁰Ká mɛ de bɔnɛ nɛ widetom nɛ de tom nɛ dea na, koo widetom nɛ e see tɛ tom na.

²¹See-mɛ a kɔ̧ widetom nɛ a̧-a̧ nɛ iŋamɔ; ká mɛ ɓɛ̧ gboo a̧ tɛ bara na.

²²Mɛ nɛ boo nɛ o mɔdai, mɛ dai wa nɛ dea; ká mɛ́ nɛ́ kpáá mɔɔ oi-aa kpàà, nɛ mɛ kasi nɛ dea.

²³Mɛ́ nɛ́ boo nɛ o bem, mɛ usi mɔ ha̧ wa; mɛ há̧ mboozu ha̧ wa dika nɛ bem.

²⁴Mɛ́ nɛ́ boo nɛ o bokóbem, mɛ hakali ká wa tɛ̀ɛ̀ ɗaŋ, ɓɛɛ ká mɛ de zɛ̧ŋ in wa na.

²⁵Mɛ ha̧ bokóbem kɔ-mɛ ha̧ wii há̧ gba-búk-a yú á tɛ-mɛ; mɔ kpɔk, mɛ ha̧ a̧ ha̧ kpasa bii.

²⁶Mɛ nɛ boo nɛ ŋma koo, nɛ see-me baa, ká mɛ ndak a̧ na; ɓɛɛ ká mɛ há̧ tɛ-mɛ lɛŋ ha̧ wan nɛ mɛ nyɛm mɛ kɔ̧ na na.

²⁷Mɛ gasi dáà kɔ-mɛ nɛ see-mɛ lɛŋ, ɓɛɛ ká tɛ-mɛ bi ɗoŋ bɔnɛ ko nàà kɔ-mɛ na.

²⁸Tɛ-mɛ a mbaŋ ɗoŋ aa nde nɛ wa a kòò mɛ́. Nɛ ge a mɛ tɛ ha̧ ha̧ wa oi mɔ nɛ wa dee in mɛ́ɛ́ ge? O wiɗafisɔ̧

²⁹Mɛ yu kii Gasa Wan nɛ see-mɛ lɛŋ, ɓɛɛ mɛ tu̧ tɛ o wiɗafi'A̧.

³⁰Mɛ́ kɔ̧ Wi nɛ ee mɛ́ nɛ ŋgai tɛ-mɛ lɛŋ, ɓɛɛ ká mɛ e o widetom kɔ̧-A̧ tɛ geemɔ na.

³¹Mɛ yú kii Gasa Wan, ɓɛɛ mɛ tu̧ tɛ wiɗafisɔ̧; mɛ há̧ war mɔ kɔ̧-a̧ ha̧ a̧, hee mɔ nɛ yɔra ga: zu-nyɔnɔ, ha̧a̧mɔ-ɗafi-war-tɛ, ɓaa-saɗi-ɗafi-sɔ̧, o sa̧-a̧ ɗafasɔ̧, in o zu-mɔ nɛ ɔ́ sa̧a̧. O wisan in o wi-bɔnɛ

³²Mɛ há̧ mɔ há̧ wisan wen kpaa toka de yoŋgo ko Sɔ̧.

³³Ha̧-a̧mɔ kɔ-mɛ a gbak o wi nɛ yá kpasa lɛŋ, koo nɛ o fio ká mɛ dɔ wa nɛ dee demɔ kɔ-mɛ na.

³⁴Ká mɛ zik ɗoŋ-mɛ ha̧ o wi nɛ hi̧i̧ kɔ̧a̧ na; mɛ kɛ̧ ɗaŋsee in o wi nɛ yá zaŋ ɗaŋsee.

³⁵Ká mɛ nik naŋ-mɛ tɛ zɔka o wizɛ́ɛ́ na, wen nɛ wen o pɛrti deamɔ nɔ‘i a bii tɛ kɔ̧ nɛ mɛ.

³⁶Tɛ mɔ nɛ mɛ de lɛŋ, mɛ ta nɛ sɔŋkur mɔ kɔ-mɛ, hegɔ mɛ beka de ɗaŋmɔ ɓɔna.