Read Northwest Gbaya SIRAK 8 Bible Online

SIRAK 8 - Northwest Gbaya bible

SIRAK 8

¹Kasá zu tɛ dukaa in bii Ká mɛ duk zu-mɛ́ nɛ ŋgaŋa wi na, wen ká mɛ tɛ̀ɛ̀ tik kɔ er-a̧.

²Ká mɛ kpɛr in wanmbɔi na, wen ká a̧ tɛ̀ɛ̀ kpa ŋgai zu mɛ́, wen lɔr dee ha̧ bii nɛ dɔkaa mɛ yɔ, ɓɛɛ a̧ kpai see o wannu mbɛt.

³Ká mɛ kpɛr in wi-bur-wen na, ká mɛ a gua tɛ wee kɔ̧-a̧ na.

⁴Ká mɛ de zɛ̧ŋ in wi nɛ zu bóna na, wen ká dara tɛ̀ɛ̀ dá o zɔmdáà kɔ-mɛ.

⁵Ká mɛ dɔk wen a zu wi nɛ see gɔn wen zu ɗaŋmɔ kɔ‘i na; tɛ-mɛ a mbaŋ‘e ɛɛ lɛŋ nɛ wi-de-ɗaŋmɔ.

⁶Ká mɛ e ŋma bii tɛ geemɔ wen n'a̧-a̧ sɔka na, wen o ŋma bii mgbara yɛ sɔ́k sɔ́k mbɛt.

⁷Ká mɛ kpa desee wen zú fio ko ŋma-mɛ na; tɛ-mɛ a mbaŋ‘e ɛɛ tɛ fe kana fee lɛŋ.

⁸Ká mɛ e nyɛrɛ ko wan-ɗuka-taamɔ tɛ geemɔ na, ɓɛɛ mɛ kii mɛ zii nɛ mgbara o tua-wen kɔ-wa, wen nɛ er-wa a mɛ tɛ yambi iŋamɔ sɛnɛ́ in yuwar dee tom ha̧ o gasawi.

⁹Ká mɛ siŋ nyɛrɛ ko o sɔkawi pi nu na, wen wa mbɛt wa kpaa o nyɛrɛ nɔ‘i nú o dáà kɔ-wa, Nɛ sɛn tɛ wa a mɛ tɛ yambi nɛ zia mgbara mɔ in kpaa de kifanú tɛ ŋgimbi-a.

¹⁰Ká mɛ tusi kɛ̧iwee ko ɗaŋwi na, wen ká leɓewee-a tɛ̀ɛ̀ dɔ́ mɛ.

¹¹Ká mɛ ba zu-mɛ dúk nɛ ŋmaa in wi-ŋgazu na, wen ka a̧ tɛ̀ɛ̀ bá nyak-wen kɔ-mɛ yuɓuri nɛ mɛ woyo.

¹²Ká mɛ há̧ nyamandoe ha̧ wi nɛ gana mɛ nɛ ŋgai na; ka mɛ nɛ ha̧ha̧ a̧, mɛ iŋ kana'e i̧i̧ sede'i yɔɔ ɓɔn kaɗi.

¹³Ká mɛ duk ti há̧ bii bá nɛ ziŋgina nɛ gana zu kpaamɔ kɔ-mɛ na, wen ka mɛ a dea hegɔ mɛ iŋ kana'e wi tɛ yoɓi.

¹⁴Ká mɛ de kita in wigɔnkita na, wen de wen lɛŋ tɛ duk nɛ kɔ̧-a̧ wen zu tom kɔ̧-a̧.

¹⁵Ká mɛ nɛ́ nɔ in winɔ̧see na, wen ká a̧ tɛ̀ɛ̀ dak o ɗaŋmɔ a zu mɛ, wen a̧ tɛ demɔ hee mɔ n'a̧-a̧ kɔ̧a̧ ga, ɓɛɛ mgbele kɔ̧-a̧ dee h’ɛ́nɛ́ mɛ fe kpɔk.

¹⁶Ká mɛ kpa wen in wi-de-nyimsea na, ká mɛ ɓir nɛ ŋga gbara in a̧ na, wen tòk nɛ geemɔ sɛn yi-a̧; a̧ nyɛma mɛ gbɛ́ mɛ sɛn fara nɛ wi ye ɗoŋ mɛ́ bo sɛnɛ na.

¹⁷Ká mɛ ba keta in mgbelewi na, wen a̧ beka hu̧si ndaa wen k’ɛ́nɛ́ na.

¹⁸Ká mɛ de ŋma hu̧sa̧mɔ ti gɔni bii na, wen mɛ iŋ mɔ n'a̧-a̧ tɛ́ ko a zú mɔ‘i na.

¹⁹Ká mɛ hu̧i̧ see-mɛ há̧ bii nɛ tum na, wen ŋma demɔ nɛ wa tɛ de oi-aa ha̧ mɛ bona.