Read Northwest Gbaya SIRAK 9 Bible Online

SIRAK 9 - Northwest Gbaya bible

SIRAK 9

¹O okóò Ká mɛ de gɔya okóò nɛ mɛ kɔ̧a̧ na, wen ká a̧ tɛ̀ɛ̀ de ŋma yɔɔkayamɔ si tɛ-mɛ.

²Ká mɛ ha̧ tɛ-mɛ lɛŋ ha̧ okóò na, wen ká a̧ tɛ̀ɛ̀ daŋ zu mɛ́.

³Ká mɛ kii koo-de-mɔ nɛ mbɔɗonu na, wen ká mɛ tɛ̀ɛ̀ tik yi-yɔk kɔ̧-a̧.

⁴Ká mɛ bá ŋgimbi ka̧ tɛ koo-mbɛr-koloŋ na, wen ká gɔna-yí kɔ̧-a̧ tɛ̀ɛ̀ ɔr mɛ́.

⁵Ká mɛ e yí-mɛ tɛ ŋma be-zɔŋa na, wen ká mɛ́ tɛ̀ɛ̀ tik yi kpɔk nyak-zɔɓɔ in a̧.

⁶Ká mɛ ha̧ tɛ-mɛ ha̧ koo-de-mɔ nɛ mboɗonu na, wen ká mbɔi kɔ-mɛ tɛ̀ɛ̀ kaɗi lɛŋ.

⁷Ká mɛ yar nɛ yuwar saaye kɛ̧i nɛ mɔ dam fara lɛŋ na; ká mɛ yambali nɛ fara nɛ o bii bo sɛnɛ na na.

⁸Mɛ dak yí-mɛ tɛ de okóò; ká mɛ yéŋ gɔni dee na; o bii nɛ dɔkaa yɔa wen zu dee ko okóò; kɔ̧ɔ̧mɔ nyɛ́k si sɛnɛ hee wee ga.

⁹Ká mɛ dúk nu ka̧ tɛ koo-wan-wii na ndo-ndo-ndo. Ká mɛ dúk ka tɛ a̧, nɔ̧́ nɛ dɔ̧ɔ̧ fara gbaŋá na, wen ká see-mɛ tɛ̀ɛ̀ ba a̧, ɓɛɛ ká wɔ-mɔ kɔ-mɛ tɛ̀ɛ̀ de ha̧ mɛ́ mɛ tik. Yuwar dukaa in o ŋmaa

¹⁰Ká mɛ siŋ gba̧‘a̧ sɛm pi nu na, wen mbe sɛm hɛɗi ka tɛ-a̧ na. Mbe sɛm hɔɔ ŋmaa in mbe dɔ̧ɔ̧; ŋgimbi n'a̧-a̧ be tɛ̀ɛ̀ paŋ, mɛ tɛ nɔ̧ a̧ nɛ desee.

¹¹Ká mɛ e see-mɛ tɛ kpaamɔ ko ɗaŋwi na, wen mɛ iŋ ɗaŋ kaɗaa kɔ̧-a̧ na.

¹²Ká mɛ de nyɛŋɛ kpaamɔ ko o wi-de-ɗaŋmɔ na; tɛ-mɛ a mbaŋ‘e wa beka yá nɛ yɔli hɔ nɛnɛ́ wese fio na.

¹³Mɛ yor nyɛi nɛ wi nɛ nyɛma mɛ gbɛ zu, ɓɛɛ kii fio beka de mɛ na. Ka mɛ nɛ ndaɗa in a̧, ká mɛ demɔ nɛ tum na, wen ká a̧ tɛ̀ɛ̀ gbɛ mɛ. Mɛ iŋ‘e mɛ́ nɛ́ nɛ́ nɔ yi o pɛr, ɓɛɛ mɛ yár nɛ zu o garo-pɛm-ye

¹⁴Mɛ ndaɗi in o ŋma-mɛ, ka mɛ nɛ kpaa yuwar-a; mɛ bá keta in o wan-ɗuka-taamɔ.

¹⁵Mɛ tɔ̧ tɔ̧ɔ̧ nyɛrɛ in o wi-iŋ-mgbara-mɔ. Nyɛrɛ kɔ-mɛ lɛŋ a dúk nɛ zu heembea ko Wan-mɛ-ŋgɔn.

¹⁶Mɛ nyɔŋ mɔ kpɔk in o widemɔ nɛ yuwar-a; nyɛŋɛ a pi mɛ́ wen zu yuu kii Gasa Wan.

¹⁷Mɔ nɛ‘i zɔn er widemɔ nɛ er, nɛ tom kɔ̧-a̧; nɛ ko wan ko dukbii, nɛ ɗuka-taamɔ nɛ gbó nɛ zaŋ wen kɔ̧-a̧.

¹⁸Wi-saaye yú wi-bur-wen yuu, ɓɛɛ wa sɛna wi-tɔ̧ hɔrɔp-hɔrɔ́p-wen, wen zu o wen kɔ̧-a̧.