Read Northwest Gbaya ESAII 10 Bible Online

ESAII 10 - Northwest Gbaya bible

ESAII 10

¹Bɔnɛ a̧a̧ zu o wi ha̧ ɗaŋ heembea, geŋa nɛ yɔr o ɗaŋ geŋa wen usa bɔnɛ ha̧ o bíí.

²Wa kɔ̧ gɔna kita zu o wisan nɛ yuwar-a na, ɓɛɛ wa kai nɛ mɔ ko o wisan nɛ duk mgbara dukbíí kɔ‘m yinɛ; o ko-gera nɛ mɔɔ-nyɔŋ kɔ-wa. Wa kai nɛ mɔ nɛ ŋgai er o be-oi.

³Ɛ́nɛ́ tɛ de hee ge wese kita ge nde? Ŋgimbi nɛ bɔnɛ tɛ hɔ nɛnɛ‘i, bíí n’ɛnɛ tɛ yu mɔ sitɛ a̧ mɛ gu ɗoŋ-aa nɛ o? Ɛ́nɛ́ tɛ a o kpaamɔ nɔ‘i k’ɛ́nɛ́‘i dee?

⁴Oi mɔ nɛ ɓɔna wen wa nɛ guu nu mgbara o bara, in tika-a mgbara o wi nɛ wa tɛ gbɛ. Ɓɛɛ zu mɔ‘i lɛŋ, nyimsea kɔ̧-a̧ ga̧ na, see-aa ɓɔna kana tɛ kura-a zu wa.

⁵Bɔnɛ a̧a̧ zu o wi Asirii nɛ duk nɛ ŋga nyasi kɔ‘m; wen nyasi nɛ duk er-a'i nɛ ŋga nyimsea kɔ‘m.

⁶Mi tɛ tom a̧ si zu o ɗaŋ tugun bíí nɛ aŋ nyimsea kɔ‘m a ŋgɔn wen ha̧ dukbíí‘i mɛ ɗaŋ o mɔ kɔ-wa kai yaknɛ, ɓɛɛ wa i̧sa̧ wa nɛ naŋ gɔn rɔ́kɔ́tɔ́-rɔ́kɔ́tɔ́ hee ɓɔtɛ yuwar ga.

⁷Ɓɛɛ taamɔ ko wannu Asirii bo a̧‘i na, bo nɛ a̧ taa so mɔ kɔ̧ see-aa hegɔ na; a̧ taa so kɔ̧-a̧ mɛ kum nɛ o tugun bíí lɛŋ a nu,

⁸ɓɛɛ a̧ tɔ̧: «Bo nɛ o gasawi kɔ‘m lɛŋ nɛ o wannu na nde?

⁹Bo nɛ Kalno kifa duk hee Karkɛmis ga na? Hamat bo hee Arpad ga, ɓɛɛ Samarii kifi duk hee Damas mbɛt ga na nde?

¹⁰Kà er-am nɛ kpaa ŋgai zu o dukbíí nɛ mboo so o géé-sɔ, ɓɛɛ nɛ̀ o sɛka-mɔ kɔ-wa gana war ko Jerusalɛm in Samarii,

¹¹bo nɛ mi tɛ ɗaŋ Jerusalɛm in o sɛka-mɔ kɔ‘i hee mɔ'ɔ n'am ɗaŋa so nɛ Samarii in o géé-sɔ̧ kɔ̧-a̧'ɛ ga na.»

¹²Ŋgimbi nɛ GASA WAN be tɛ̀ɛ́ kaɗi tom kɔ‘i zu kaya Siɔŋ in Jerusalɛm kaɗi, a̧ tɛ usi bɔnɛ ha̧ wannu Asirii oi ŋmaŋa-tɛ in gasa-zu kɔ̧-a̧,

¹³wen n'aa duk-tɛ, tɔ̧ nɛnɛ‘e: «Mi de mɔɔ nɔ'ɔ tɛ ŋgai kɔ‘m nɛ tɛ‘m in tɛ iŋa-mgbara-mɔ kɔ‘m; wen mi nɛ wi-iŋ-mɔ; mi ɗaŋa gbisi ko o dukbíí, nɛ́ mɔ'ɔ n'am kaia o kpaamɔ kɔ-wa lɛŋ yaknɛ, ɓɛɛ tɛ ŋgai tɛ‘m, mi gbo o wannu kɔ-wa a nu.

¹⁴Mi kaia o mbɔi ko o dukbíí hee mɔ'ɔ nɛ‘i ba nɛ tua-nɔ̧́í̧'ɛ ga, kóó hee mɔ'ɔ nɛ‘i kai nɛ o kui-nɔ́í nɛ kɔ̧ a̧ gbonɛ'ɛ ga. Mi ɗaŋa mɔ zu nu yinɛ lɛŋ ɓɛɛ ŋma bíí mɛ fo mɔ kóó mɛ́ hú̧í̧ nú tɔ̧́ wen, bó na.»[8]

¹⁵GASA WAN'e nde, kpi̧i̧ tɛ́ zɔ̀n tɛ̀ zu bíí nɛ ba a̧ de nɛ tom nde? Mɔɔ-gɔn-mɔ tɛ gasi zu in wi nɛ ba a̧ gɔn nɛ mɔ nde? Nɛ nyasi a̧ ba er-wi nɛ ba a̧ gusi nɛ mɔ nde? So nɛ te a̧ usi war ha̧ wi-tui-a? Kóó so nɛ dɔra a̧ ba bíí yar nɛnɛ nde?

¹⁶Mɛ nɛ wen hegɔ nɛ GASA WAN, Sɔ̧ nɛ a̧a̧ nɛ ŋgayamɔ lɛŋ tɛ tom ɔ̧ki̧ pii zu o ŋmaŋa-wi kɔ̧-a̧, ɓɛɛ kɛ̧i̧-wee tɛ nyɔŋ ɗɔɔ gasamɔ kɔ̧-a̧ hee mɔ'ɔ nɛ naa-wan-wee nyɔŋ nɛnɛ'ɛ ga.

¹⁷GASA WAN Sɔ̧ nɛ̀ duk nɛ́ sa̧a̧mɔ ko Israɛl tɛ kifi nɛ wee nɛ tɛ dɔ o tɛn in o tɛn-dara a nu tɛ wese kpɔk.

¹⁸O de kombo in o de te tɛ bìì wee ɗaŋ lɛŋ ŋgɛrɛm-ŋgɛrɛm hee mɔ'ɔ nɛ zɛɛ ɗaŋ nɛ bíí'ɛ ga.

¹⁹Ɓɛɛ oi o te nɛ tɛ ɓɔn kɔ̧ kombo, tɔra wa beka ŋgai na, kóó nɛ be geɗek obem tikiɗi nyɛma mɛ tɔr wa.

²⁰Wese'i, oi o be Israɛl in o wi nɛ mɔ hɔɔ yɔɔ zu wa nutua ko Jakob beka e ta nɛ wi-usi-bɔnɛ ha̧ wa na, ɓɛɛ wa tɛ e ta nɛ kpasa GASA WAN nɛ duk nɛ kpasa Sa̧a̧ Wi ko Israɛl.

²¹O oi bíí ko Jakob tɛ pii ɗoŋ pii tɛ Sɔ̧ Waŋ-ŋgai.

²²Israɛl, kóó dukbíí kɔ-mɛ dɔka hee nyɛmɛ ɗɔɔ gba-tɔp ga, nɛ́ o bíí tikiɗi a̧ tɛ kpasi ɓɛɛ. GASA WAN ee zu mɔ mɛ ɗaŋ wa yinɛ wen ha̧ wa mɛ de mɔ nɛ yuwar-a.

²³Ee-zu ɗaŋa wa nɛ GASA WAN Sɔ̧ nɛ a̧a̧ nɛ ŋgayamɔ lɛŋ ea'i, a̧ tɛ de kana mɔ‘i dam nu'i lɛŋ.

²⁴Mɛ nɛ wen hegɔ sa GASA WAN nɛ a̧a̧ nɛ ŋgayamɔ lɛŋ tɔ̧‘e nde: «Dukbíí kɔ‘m nɛ ɔ sɛn Siɔŋ, k’ɛ́nɛ́ de kíí Asirii nɛ̀ qusi'nɛ́ nɛ ɓira-te usi nɛ bɔnɛ h’ɛ́nɛ́ hee wan nɛ̀ o be Egiptɛ dee so ga na.

²⁵Oi-aa ɓɔna benaŋ tikiɗi ɓɛɛ ŋga nyimsea kɔ‘m tika zu a̧ mɛ ɗaŋ a̧ yinɛ.»

²⁶GASA WAN nɛ a̧a̧ nɛ ŋgayamɔ lɛŋ tɛ gusi o be Asirii hee mɔ'ɔ n'aa gusa so nɛ o be Madiaŋ zu ta Orɛb ɓeemɛ ga, in a̧ tɛ ba te kɔ̧-a̧ nɛ ŋgɔn zu tɔp hee mɔ'ɔ n'aa baa so nɛnɛ zu Egiptɛ ga.

²⁷Wese'i, tui kɔ̧-a̧ beka diti zu ɓaa-mɛ in mɔɔ-ba-tui kɔ̧-a̧ beka diti gun ger-mɛ na mbɛt.

²⁸Wisɛn yaka nɛɛ hɔ Ayat; a̧ kuu Migrɔŋ sɛn Mikmas, ɓɛɛ a̧ á o ŋma wi-biro kɔ̧-a̧ hi̧i̧!

²⁹Wa gbara nɛ kɔ̧ ɓɔ̧ɔ̧ŋ yuwar tɛnɛ, ɓɛɛ wa kai ŋmaa ɔ sɛn Geba. Kíì baa o wi Rama, ɓɛɛ o bíí ko wannu Saul nɛ ɔ Gibea yu mɔ pɛsi yak.

³⁰Bat-Galim hiɗi nɛ mɔ, ɓɛɛ Laisa zii tiger-a. Anatot, mɛ̀ kífì nú!

³¹Madmɛna yuu mɔ, ɓɛɛ o bíí Gebim pɛsi yu mɔ yak mbɛt.

³²Sɔsɔɔ, wa tɛ yor sɛn Nɔb; wa tɛ ba er-wa nɛ ŋgɔn zu kaya Siɔŋ nɛ duk nɛ kaya Jerusalɛm.

³³Kinii GASA WAN Sɔ̧ nɛ a̧a̧ nɛ ŋgayamɔ lɛŋ pɔi o gbaa-er-te a nu, a̧ tɛ gɔm o tɛ nɛ ɔ kusa in o zɔm kusa-a mbɛt a nu,

³⁴ɓɛɛ a̧ pɔia o da̧a̧-mɔ a nu lɛŋ nɛ ada. Libaŋ in demɔ kɔ‘i tɛ ɗaŋ lɛŋ.