Read Northwest Gbaya ESAII 13 Bible Online

ESAII 13 - Northwest Gbaya bible

ESAII 13

¹Wen ko GASA WAN zu Babilɔŋ, nɛ Esaii bem ko Amɔs ɔɔ zu zɔk nɛnɛ nɛ mɔ'ɔ.

²«Ɛ̀nɛ̀ dé mɔɔ-usi-mɔ zu kaya nɛ mɔ bo sɛnɛ na, ɓɛɛ ɛ̀nɛ̀ gáí mɔ biro; ɛ̀nɛ̀ áŋ er'nɛ́ ha̧ wa gar pii nu tua ko o be-wan.

³Kɔ‘m, mi ha̧ nɛ heembea kɔ‘m ha̧ o sa̧a̧ wi-biro kɔ‘m, in o yaa-ŋgo-biro kɔ‘m n'am hoka.»

⁴Ɛ̀nɛ̀ zíí gasa gitimɔ zu kaya mɛ hee tiger o gba giiwi ga; ɛ̀nɛ̀ zíí o dukbíí nɛtɛ nɛtɛ nɛ wor mɔ‘i; GASA WAN nɛ a̧a̧ nɛ ŋgayamɔ lɛŋ a̧ ɓir yak ti ha̧ o wi-biro kɔ‘i wen biro.

⁵Wa tɛ́ nɛ nyɛi̧a nu mɛ, nɛ ndaa-zan mɛ nɛ oi o mɔɔ-biro ha̧ wa mɛ ya in GASA WAN, wen ha̧ wa mɛ ɗaŋ nu lɛŋ.

⁶Ɛ̀nɛ̀ hí̧í̧ tɛ‘nɛ́ wen wese ko GASA WAN hɛɗa kaɗi, wese'i tɛ tɛ hee wese ko Wan nɛ a̧a̧ nɛ ŋgayamɔ lɛŋ ga.

⁷Mɛ nɛ wen hegɔ sa ɓaa bíí lɛŋ tɛ mɔk; nɔɔ-ŋgiɗi beka bo ɓɔna mbɛt.

⁸Bele zara wa a nu, ɓɛɛ wa bi nɛ mbɔɗɔnu hee naa-zaŋ nɛ hɛɗa mɛ ko bem ga. Wa zika tɛ zɔk yí ŋmaa in o ŋmaa nɛ kíì, ɓɛɛ yí-wa gbɛ̧ kerere hee wee ga.

⁹Wese ko GASA WAN a̧ tɛ‘i, wese'i nɛ ŋga wese nyimsea in ŋgamɔ, nɛ́ wese n'aa tɛ de ha̧ zaŋnu mɛ kifi ŋga-gbárà, in ha̧ a̧ mɛ kum o wi-de-ɗaŋmɔ lɛŋ yinɛ.

¹⁰O sɔra mɛ yiwese in o zuduk-aa beka tok ɓɔna; wese tɛ daŋ, ɓɛɛ baa tum; nyaŋa-zɛ beka tok ɓɔna.

¹¹«Mi tɛ usi bɔnɛ ha̧ o bíí zaŋnu, wen ɗaŋ kɔ-wa, in ha̧ o wi-ɗaŋ, wen gbɛɛ-zu kɔ-wa mbɛt. Mi tɛ de ha̧ ŋmaŋa-tɛ ko o wi-tɔ̧-ɗaŋ-wen mɛ hɔ nduti, ɓɛɛ duka-tɛ ko o wi-ŋgazu tɛ kaɗi.

¹²Mi tɛ de ha̧ o bíí mɛ ɓan hee fuu lɔr mɛ Ofir ga.»

¹³Wese nɛ ŋga nyimsea ko GASA WAN nɛ a̧a̧ nɛ ŋgayamɔ lɛŋ be tɛɛ ba, a̧ tɛ de ha̧ yiwese mɛ nak, in ha̧ nu mbɛt mɛ fo mɔ hɔ gun-aa mɛ. Wese'i tɛ duk nɛ wese kura-see kɔ̧-a̧.

¹⁴Ɓɛɛ sɛn tɛ wese'i, o bíí tɛ duk hee ŋma kalamba a'i ndak ga, wa tɛ duk hee ŋma duk sami nɛ pɛsa sót-sót dam ti mɔ ga. Kóó o nde tɛ si ɗoŋ sitɛ dukbíí kɔ‘i, kóó o nde tɛ yu mɔ si mgbák nu kɔ‘i.

¹⁵Bíí lɛŋ nɛ‘i tɛ kpa, wi tɛ tok wa tok nɛ sɛɛ; ɓɛɛ o wan nɛ‘i tɛ kai, wi tɛ gɔm wa nɛ gba-paa.

¹⁶Wa tɛ mbɔli o bem kɔ-wa ɓɔn yí-wa, wa tɛ kai o mɔɔ kɔ̧ tua kɔ-wa yaknɛ lɛŋ, ɓɛɛ wa ɔɔ in o kóó kɔ-wa mbɛt.

¹⁷«Mi tɛ de ha̧ o wi Mɛd nɛ bo nɛ wɔ sede na, nɛ e lɔr tɛ geemɔ mɛ de ŋmaa in wa.

¹⁸Wa tɛ gbɛ o be-ŋgaiwi lɛŋ nɛ goo, ká bá nɛ̀ o bezaŋ. Ko beka bo yí-wa ha̧ o zɔɗi bem na mbɛt.»

¹⁹Babilɔŋ nɛ dee gan o dɔka nu lɛŋ, nɛ mɔ‘i a̧ duk nɛ mɔɔ-duk-tɛ ko o be Kaldee. Sɔ̧ tɛ ɗaŋ a̧ hee Sɔdɔm in Gɔmɔr ga.

²⁰Babilɔŋ tɛ kifi duk nɛ bɛɛ-oi nɛ o bíí beka ɔ sɛnɛ ɓɔna kpoo nɛ kpoo. O Arab beka de tua-laa kɔ-wa hi̧i̧ kà bó nɛ̀ yora-a ko o wi-dai-mɔ hi̧i̧ na mbɛt.

²¹Nɛ o kóŋgóló-dɔmɔ a̧ tɛ ya hi̧i̧, ɓɛɛ o diri tɛ dun tua lɛŋ. O ndao tɛ ya hi̧i̧, ɓɛɛ o gbadua-zaŋbɛɛ tɛ kpíɗí zaŋgule hi̧i̧.

²²O ɓoŋgo tɛ mɔi̧ si kɔ̧ o gasa tua kɔ-wa, ɓɛɛ o gbóò tɛ yar nɛ kɔ̧ o gasa tua nɔ‘i; ŋgimbi kɔ̧-a̧ a̧ tɛ‘i, zɛ kɔ̧-a̧ dɔk ɓɔna.