Read Northwest Gbaya ESAII 22 Bible Online

ESAII 22 - Northwest Gbaya bible

ESAII 22

¹Wen nɛ tɔ̧ɔ̧ see zu ɗɔŋgɔ Hinɔn. Jerusalɛm, nɛ ge a̧ dea ha̧ o bíí nɛ oi gun mɛ daŋ zu tua ge?

²Ye fo mɔ, de nɛ giti mɔ, de nɛ tortɛ wen ge? Wa gɔma o bíí ye kɔ-mɛ nɛ gba-paa a nu, o bíí ye kɔ-mɛ kuma yi biro.

³O gasa wi-duk-zu o wi-biro kɔ-wa yuu mɔ yak, wa pi̧ gee pi̧i̧ goo na, hegɔ o wisɛn kaia wa nɛ bara-biro. Wa kaia o bíí nɛ wa kpaa lɛŋ nɛ bara, kóó nɛ o wan nɛ yuu so mɔ yak nɛ nyɛi̧a-a mbɛt.

⁴Mɛ nɛ wen zu mɔ‘i sa'm tɔ̧‘e: «K’ɛ́nɛ́ zɔk mɔ pii tɛ‘m na, ha̧‘m hi̧i̧ kɔ̧a̧ nɛ tu̧u̧-see. K’ɛ́nɛ́ ga̧ see-am zu tika-a ko boko-bem ko dukbíí kɔ‘m na.

⁵Wen wese’ɛ nɛ́ wese dita-see, wese tika-a in mɔɔ-kíì.» Nɛ GASA WAN nɛ a̧a̧ nɛ ŋgayamɔ lɛŋ a̧ dee ha̧ wese'i mɛ hɔ. Wese'i, garo tɛ gbin, ɓɛɛ hiɗimɔ tɛ sɔi si zu kaya mɛ.

⁶O wi-biro Elam kaia o ɓaro in kusaa-goo kɔ‘i, wa daŋa o keekee in o nyaŋa, ɓɛɛ o wi-biro Kir kai kɔ‘i nɛ o ŋgee.

⁷O de bɔkɔ-nu kɔ-mɛ hura nɛ o keekee, ɓɛɛ o wi-daŋ-nyaŋa zɔk nɛ nu tua tan ti-wa tɛnɛ.

⁸Ŋgárá-e-nɛ-ta ko Juda gbina. Wese'i, ɛnɛ tɛ zik tɛ‘nɛ́ ma yi si fara-a-boi biro nɛ‘i sa Kombo.[10]

⁹Ɛnɛ zɔka o gbina ŋgeŋ Ye ko David nɛ wa gbina dɔka nyɛmna.

¹⁰Ɛnɛ mɔi̧a yi dun kɔ̧ yì-mɛ-ɗɔɔ, ɛnɛ tɔra o tua Jerusalɛm, ɛnɛ gbina o ŋma tua ɗafi nɛ ŋga fara-pɛm-mɔ.

¹¹Ɛnɛ za̧a̧ kɔ̧ mgbara ŋgeŋ yiitoo ha̧ yì mɛ yor kɔ̧ gba̧‘a̧-a̧. Mɔ kpɔk, ɛnɛ zɔk mɔ sitɛ wi de mɔɔ nɔ‘i na. Ɛnɛ iŋ wi nɛ de ha̧ o mɔɔ nɔ‘i mɛ de nɛ ti mɛ tɛnɛ na.

¹²Wese'i, GASA WAN nɛ a̧a̧ nɛ ŋgayamɔ lɛŋ saa so'nɛ́ mɛ hi̧i̧ kɔ̧a̧ ai nɛ nú, h’ɛ́nɛ́ mɛ kpui zu'nɛ́ in h’ɛ́nɛ́ mɛ pi̧ laa bufu,

¹³ɓɛɛ k’ɛ́nɛ́ nɛ duka-a nɛ desee, gbɛ nɛ o ndai, gɔn nɛ o sami, nyɔŋ nɛ mɔ, nɔ nɛ mɔ tɔ̧ nɛnɛ‘e: «Ɛ̀ɛ̀ nyɔ́ŋ mɔ, ɛ̀ɛ̀ nɔ́ mɔ ŋgaɓo, wen mɔɔsa̧, ɛ́ɛ́ nɛ́ fio.»

¹⁴GASA WAN nɛ a̧a̧ nɛ ŋgayamɔ lɛŋ kana mɔ tɔ̧ nɛnɛ ha̧‘m'e: «Ɗaŋmɔ nɛ wa dea'i, mi beka e ha̧ wa na hɔ wese fio kɔ-wa!» Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ɔ̧ hegɔ.

¹⁵Wen nɛ GASA WAN nɛ a̧a̧ nɛ ŋgayamɔ lɛŋ tɔ̧ɔ̧ nɛ mɔ'ɔ: «Mɛ̀ nɛ́ tɛ Sɛbna, ŋma gasawi nɛ duk zu tua-wan ko wannu, ɓɛɛ mɛ̀ tɔ̧́ ha̧ a̧ hee mɔ'ɔ ga:

¹⁶«Ŋma mɔ kɔ-mɛ fara’ɛ nɛ ge? Ŋma pɛ́r-nam kɔ-mɛ wen ha̧ mɛ mɛ za̧ kɔ̧-fio kɔ-mɛ sɛn zu kaya, in pɛsi-gun-mɛ kɔ̧ ta hɛ̧ɛ̧ nɛ o?

¹⁷GASA WAN tɛ nɔmɔi̧ mɛ, a̧ tɛ hɛr mɛ

¹⁸gɔn pi̧ taŋ hee kii-ta ga si ŋma ɗuka nu mɛ; mɛ tɛ fe ɓɔn hi̧i̧, gu nɛ o zɔm keekee kɔ-mɛ, mɛ yaa-pi̧-búù zu nutua ko wan kɔ-mɛ'ɛ.

¹⁹Mi tɛ ndak mɛ, fo mɛ yinɛ fara kɔ-mɛ.

²⁰Ɓɛɛ kpɔk wese'i, mi tɛ sa wi-de-tom kɔ‘m Eliakim bem ko Hilkia e oi mɛ.

²¹Mi tɛ pi̧ gba-laa kɔ-mɛ tɛ-a, mi tɛ mar kanda kɔ-mɛ guntir-aa, ɓɛɛ mi ha̧a̧ mɔɔ-wan kɔ-mɛ lɛŋ ha̧ a̧. A̧ tɛ duk nɛ dáà ko o be Jerusalɛm in o bíí nutua ko Juda mbɛt.

²²Mi tɛ e mɔɔ-hu̧i̧-nu tua ko David zu kóŋgó-ɓaa-a; kà a̧ hu̧i̧ nu tua kaɗi, wi-kpea-a bo na, ɓɛɛ kà a̧ kpe kaɗi, wi-hu̧i̧-aa bo na mbɛt.

²³Mi tɛ mgboi a̧ hee pɔndi ga zu ŋga fara, ɓɛɛ a̧ tɛ duk nɛ bíí nɛ‘i zɔn zu damti nutua ko dáà kɔ̧-a̧.»

²⁴O pɛ́r-nam mɛ ɗoŋ dáà kɔ̧-a̧, o gasa-a in o geɗek-a gu nɛ o nyɛk, ku̧u̧naŋ tɛ o yee hɔ nɛnɛ tɛ o ɓii nɛtɛ nɛtɛ tɛ duk nɛ́ tui zu a̧.

²⁵GASA WAN nɛ a̧a̧ nɛ ŋgayamɔ lɛŋ tɔ̧a̧: «Wese'i, pɔndi nɛ‘i mgboia so zu ŋga fara'i tɛ wɔkɔɗi dak, ɓɛɛ gbina tik nu; hegɔ o mɔ n'aa duka so tui'i tɛ ɗaŋ.» Nɛ GASA WAN a̧ tɔ̧ wen’ɛ.