Read Northwest Gbaya ESAII 23 Bible Online

ESAII 23 - Northwest Gbaya bible

ESAII 23

¹Ŋga wen nɛ tɔ̧ɔ̧ zu Tir nɛ mɔ'ɔ: «O kombon mɛ Tarsis, ɛ̀nɛ̀ áí nú wen zu ye nɛ duk nú-mbaŋ k’ɛ́nɛ́ ɗaŋa!» Nɛ́ tɛ̀ pia ɗoŋ nɛ see-kisi Chipre a̧ wa zia nɛ nyɛrɛ-a.

²O wi-ɔ-nu ŋgere, kíì a̧ de'nɛ́, ɛnɛ o wi-ɗɔr-mɔ saaye Sidɔŋ, nɛ yar nɛ zu gba-tɔp nɛnɛ, hiɗi'nɛ́ a̧ gɔn.

³Nyɔnɔ nɛ wa gun nɛ ká̧ zaŋ Nil, mɛ nɛ Sidɔŋ a̧ mɔi̧ so kpa nɛ yi-mɔ sɛnɛ; ɓɛɛ nɛ́ tɛ̀ ye'i a̧ o nu nɛtɛ nɛtɛ de so gɛnɛ sɛnɛ mbɛt.

⁴Oee búù wa, Sidɔŋ, ŋga ye mɛ nu gba-tɔp! Wen gba-tɔp tɛ ba wen ɓɛɛ tɔ̧a̧‘e: «Zaŋ-am nyim ka'm ko nɛ bem na; mi dai kɔ‘m o be-wiwii ká bó nɛ̀ o be-okoo na mbɛt.»

⁵Ŋgimbi nɛ o be Egiptɛ tɛ zii wen'i in nyɛrɛ mɔ nɛ hɔɔ zu Tir mbɛt, tɛ-wa tɛ gar.

⁶Ɛ̀nɛ̀ kú yi si Tarsis, ɛ́nɛ́ o wi-ɔ-nu ŋgere; ɛ̀nɛ̀ áí nú!

⁷Ye tortɛ k’ɛ́nɛ́ so’ɛ nɛ mɔ‘i! Ye k’ɛ́nɛ́ nɛti ɓeemɛ nɛ o wi-ɗɔr-mɔ kur so sɛnɛ yak nɛ́ɛ̀ de nɛ gɛnɛ'ɛ a̧a̧‘i!

⁸Wi nɛ dee ha̧ ŋgamɔ mɛ tik zu Tir ye-de-wan ha̧ bíí, nɛ̀ o wi-ɗɔr-mɔ mɛ sɛnɛ nɛ o be-wan, in o wi-de-gɛnɛ sɛnɛ nɛ o gasawi zu nu’ɛ nɛ o?

⁹Nɛ GASA WAN nɛ a̧a̧ nɛ ŋgayamɔ lɛŋ a̧ dee mɔ‘i, wen ha̧ gasa-zu mɛ de geemɔ, in ha̧ búù mɛ ba o gasawi zu nu lɛŋ.

¹⁰Boko be Tarsis, mɛ̀ wá fɔ kɔ-mɛ hee wan mɛ ká̧ zaŋ Nil ga, wen ye mɛ nu mbaŋ bo ɓɔna.

¹¹GASA WAN nyɛi̧a er de nɛ ŋgamɔ zu gba-tɔp; a̧ ɗaŋa o mɔɔ-wan, ɓɛɛ a̧ tɔ̧ ha̧ wa mɛ gbin o ŋga ye Kanaŋ a nu.

¹²GASA WAN tɔ̧a̧: «Boko be Sidɔŋ, mɛ́ nɛ̀ wa ɗaŋa kaɗi, kɔ-mɛ in mɔɔ-nyɛŋɛ kaɗa. Kóó mɛ yaka so si Chipre, mɛ beka kpa ɔma-tɛ sɛn hi̧i̧ na mbɛt.

¹³Mɛ̀ zɔ́k mɔ si nu Kaldee, dukbíí nɛ yaa so fara'i bo ɓɔna. Asirii ndaka wa a zaŋbɛɛ hee kóŋgóló-dɔmɔ ga; wa dee so o ŋgárá-pɛm-mɔ mbo nɛ o ŋga ye, ɓɛɛ tom nɔ‘i lɛŋ kifi nɛ gee bɛɛ-nu puturu.

¹⁴Ɛ̀nɛ̀ áí nú, o kombon Tarsis, wen ŋga-fara-duk k’ɛ́nɛ́ ɗaŋa.»

¹⁵Wese'i, tɛ-wi tɛ bi ɗoŋ Tir zaŋ pɛ ɓu-mɔɔrɔ-ɗoŋ-yiitoo, nɛ duk nɛ pɛ-wan ko wannu. Ɓɛɛ sɛn ɗoŋ pɛ ɓu-mɔɔrɔ-ɗoŋ-yiitoo'i, mɔ tɛ hɔ zu Tir hee mɔ'ɔ nɛ gima ko okoo-ɔr-wi tɔ̧ɔ̧ ga:

¹⁶Mɛ̀ bá koloŋ kɔ-mɛ, ɓɛɛ mɛ̀ mbɛ́r zik nɛ ye, mɛ kó-de-mɔ nɛ mbɔɗɔnu nɛ tɛ-wa bìí ɗoŋ mɛ'ɛ. Mɛ̀ mbɛ́r ha̧ ger-a nɔ̧́í̧ nɛ de-a, mɛ ɔli gima nɛ dɔka-a wen ha̧ tɛ-wi mɛ mbaŋ ɗoŋ mɛ.

¹⁷Ɗoŋ pɛ ɓu-mɔɔrɔ-ɗoŋ-yiitoo, GASA WAN tɛ tɛ mɛ zɔk Tir, ɓɛɛ Tir tɛ kpa mɔɔ-oi-dàlà kɔ‘i woyo. A̧ tɛ de dàlà in o wan zu nu’ɛ lɛŋ.

¹⁸Mɔ kpɔk, yi-mɔ in mɔ n'aa tɛ kpa oi-aa tɛ duk ha̧ GASA WAN; bo nɛ wen ha̧ a̧ mɛ ndɛm o mɔɔ nɔ‘i mɔi̧ e na. Mɔ n'aa tɛ kpa lɛŋ tɛ duk wen ha̧a̧ nyɔŋmɔ ha̧ o bíí nɛ ya ti GASA WAN, ha̧ zaŋ-wa mɛ sur in wen pi̧i̧ laa nɛ gɛnɛ-a ɔ ŋgaya sɛn tɛ-wa mbɛt.