Read Northwest Gbaya ESAII 30 Bible Online

ESAII 30 - Northwest Gbaya bible

ESAII 30

¹Ɓɛɛ GASA WAN tɔ̧: «Bɔnɛ a̧a̧ zu o be ŋgazu, nɛ de mɔ kɔ-wa nɛ zu, e'm duk. Wa nɔ nɛ tɔk in o ŋmaa nɛ̀ bó nɛ́ mi a̧ kɔ̧ɔ̧ na, ɓɛɛ wa dee ha̧ ɗaŋmɔ kɔ-wa mɛ dɔk zu ŋmaa.

²Wa zira si Egiptɛ mɛ, wa ak am na, kà be de ká wannu Egiptɛ yee ɗɔŋ wa tɛ biro, in ha̧ wa mɛ duk ɗɔɔ gi̧ɔ̧-tɛ Egiptɛ mbɛt.

³Pɛma wa nɛ wannu Egiptɛ pɛm'i tɛ pi̧ foe zu wa, ɓɛɛ hu̧sa̧-a̧ kɔ-wa ɗɔɔ ŋgai ko Egiptɛ‘i tɛ pi̧ búù zu wa mbɛt.

⁴O be-wan k’ɛ́nɛ́ hɔɔ sɛn Sɔaŋ mɛ, in o betom k’ɛ́nɛ́ hɔɔ sɛn Hanɛs mɛ kaɗi mbɛt.

⁵Gɛ̧ɛ̧mɔ tɛ ba wa ɗoŋ gbula dukbíí nɛ wa e nɛ ta'i, wen gbula dukbíí beka de ŋma kpasamɔ ha̧ wa, kà bó nɛ̀ gbaka wa na mbɛt, ɓɛɛ tɛ pi̧ nɛ́ búù zu wa.»

⁶Wa ɓir yak nɛ tɛ nù, fara nɛ ɗaŋsee in dita-see a̧a̧ sɛnɛ, nɛ fara'i a̧ o nana-dila in o dila ya sɛnɛ, ká bá nɛ̀ o kóró in o ndiɓa-bu̧i̧-bu̧i̧ mbɛt, ɓɛɛ wa tui o demɔ in o mbɔi kɔ-wa yaknɛ nɛ tuifuu in ŋgeloba ha̧ o gbula dukbíí nɛ beka de gba̧a̧-mɔ ha̧ wa na'i.

⁷O wi nɔ‘i nɛ o wi Egiptɛ nɛ duk nɛ gee gbula mɔ, nɛ gba̧a̧-mɔ mɛ tɛ-a bo na; mɛ nɛ wen hegɔ sa'm sa nin-a'e, «Rahab nɛ de gba̧a̧ mɔ na.»

⁸Mɛ̀ nɛ́ kinii, mɛ̀ yɔ́r mɔ'ɔ zu sɛka-ta, mɛ̀ yɔ́r kale mɔ'ɔ zaŋ kalata tɛ fara yiitoo, wen ha̧ wa mɛ duk nɛ mɔɔ-sedaako, wen wa in o bezaŋ-wa kpoo nɛ kpoo.

⁹O wi nɔ‘i nɛ o wi-ŋgazu, in o bezaŋ wi-ndela, nɛ kɔ̧ mɛ zii usamɔ ko GASA WAN na.

¹⁰Ɓɛɛ wa tɔ̧ɔ̧ ha̧ o wi-zɔk-mɔ: «K’ɛ́nɛ́ zɔk mɔ na», in ha̧ o wi-tɔ̧-wen oi nú Sɔ̧: «K’ɛ́nɛ́ tɔ̧ kpasa wen h’ɛ́ɛ́ na, ɓɛɛ ɛ̀nɛ̀ tɔ̧́ nɛ nyɔ̧ɔ̧-wen, in wen-ɔr-mɔ h’ɛ́ɛ́.

¹¹Ɛ̀nɛ̀ é kpasa yuwar duk, ɛ̀nɛ̀ á̧r e kpasa yuwar duk, k’ɛ́nɛ́ tɔ̧ wen ko Sa̧a̧ Wi ko Israɛl h’ɛ́ɛ́ ɓɔna.»

¹²Mɛ nɛ wen hegɔ, sa Sa̧a̧ Wi ko Israɛl tɔ̧‘e nde: «Hee mɔ'ɔ n’ɛnɛ pi̧i̧ wen kɔ‘m taŋ e nɛ ta nɛ dee ŋgamɔ in dee ɗaŋmɔ ga,

¹³ɗaŋmɔ k’ɛ́nɛ́ tɛ duk hee ŋma ŋgeŋ nɛ mbaŋa, nɛ hɛɗa mɛ tir a nu ga.

¹⁴A̧ tɛ gba ɗɛsɛ-ɗɛsɛ a nu hee kpánà nɛ‘i beka ba be ŋma gbaa-a mɛ a̧ŋ nɛ wee kà bó nɛ̀ ɗua-a nɛ yi na mbɛt ga.»

¹⁵Wen nɛ GASA WAN Sɔ̧, Sa̧a̧ Wi ko Israɛl tɔ̧ nɛ mɔ'ɔ: Mi tɛ kpasi'nɛ́, ŋgimbi n’ɛnɛ tɛ pii ɗoŋ tɛ‘m in n’ɛnɛ tɛ duk keɗeŋ. Ŋgimbi n’ɛnɛ tɛ duk sɛ́ɛ́m in n’ɛnɛ tɛ e ta nɛ‘m, ɛ̀nɛ̀ tɛ kpa nɛ ŋgai, ɓɛɛ k’ɛ́nɛ́, ɛ́nɛ́ kɔ̧ mɔ‘i na.

¹⁶Ɛ́nɛ́ tɔ̧́‘e: «Ɛ̀ɛ̀ dáŋ nyaŋa, ɛ̀ɛ̀ yú mɔ yak!» Ɛ̀nɛ̀ yú mɔ gɔ! Wen, kóó ɛ̀nɛ̀ daŋ nɛ keekee-nyaŋa nɛ ma yi nyɛmna, o wi-ndak-ɗoŋ‘nɛ́ tɛ ma yi nɛ haya-a gan'nɛ.

¹⁷Ɓɛɛ bíí k’ɛ́nɛ́ booro tɛ yu mɔ ti wisɛn k’ɛ́nɛ́ kpɔk; o wisɛn k’ɛ́nɛ́ mɔɔrɔ tɛ gba'nɛ́ nɛ nu, hɔ ŋgimbi n’ɛnɛ tɛ pɛsi yu mɔ yak lɛŋ, ɓɛɛ oi mɔ nɛ tɛ ɓɔn, nɛ te n’ɛnɛ zu̧u̧ so nɛ̀ mɔɔ-usi-mɔ sɛn zu kaya mɛ‘i ɓɛɛ.

¹⁸GASA WAN pɛm mɛ́ ha̧ mɔ h’ɛ́nɛ́ nɛ̀ ta-tɛ; mɛ nɛ hegɔ n'aa tɛ́ mɛ de ko h’ɛ́nɛ́, wen GASA WAN Sɔ̧ nɛ wi-de-mɔ nɛ yuwar-a. O wi nɛ e ta nɛ a̧ duk kɔ‘i nɛ desee.

¹⁹O bíí Siɔŋ nɛ ɔ Jerusalɛm, ɛnɛ beka hi̧i̧ kɔ̧a̧ ɓɔna; a̧ tɛ zii aia-nú k’ɛ́nɛ́, ɓɛɛ a̧ dee ko h’ɛ́nɛ́. Kà a̧ zii hiɗimɔ k’ɛ́nɛ́, ɓɛɛ a̧ kifa nú h’ɛ́nɛ́ mbɛt.

²⁰GASA WAN tɛ ha̧ nyɔŋmɔ h’ɛ́nɛ́ tɛ ŋgimbi dita-see, a̧ tɛ ha̧ yi h’ɛ́nɛ́ mbɛt, ɓɛɛ wan-usi-mɔ k’ɛ́nɛ́ beka hu̧si tɛ nɛ ɛnɛ na, gbaayí‘nɛ́ tɛ zɔk a̧.

²¹Ŋgimbi n’ɛnɛ tɛ nɛ si war wiiko, kóó si war gale, zer'nɛ́ tɛ zii wen nɛ wa tɔ̧ ɗoŋ‘nɛ́‘e: «Yuwar nɛ mɔ‘i, ɛ̀nɛ̀ bá nɛ i̧i̧.»

²²O mɔɔ-kpe-zu o géé-sɔ̧ nɛ wa dee nɛ bu-mbɔi tɛ duk nɛ ndiŋmɔ yí‘nɛ́ in lɔr nɛ wa sɔ̧ɔ̧ sɛnɛ mbɛt. Mɛ tɛ kai o mbula-a a taŋ hee ndiŋmɔ ga, ɓɛɛ mɛ tɛ tɔ̧ ha̧ wa mɛ kai wa a taŋ si zan.

²³Hegɔ GASA WAN tɛ de ha̧ kórò mɛ hɔ a zu kpar-nyɔnɔ nɛ mɛ guna; nyɔnɔ tɛ nu'i tɛ dɛm nɛ dɔka-a, in tɛ duk nɛ de-a mbɛt. Tɛ ŋgimbi'i o mɔ-dai kɔ-mɛ tɛ nyɔŋ de mbɔɗi zɔ̧ tɛ gba de fara-dai-wa.

²⁴O ndai in o tuifuu-wa-fɔ tɛ nyɔŋ nɛ de zɔ̧ nɛ‘i zaŋa nɛ ŋmaa in tɔŋ.

²⁵O yi tɛ fok nɛ zu kusa kaya in nɛ zu o zu-tɔ̧́ mɛ tɛnɛ wese nɛ gasa biro tɛ kum o bíí, ɓɛɛ tɛ kale ŋgimbi'i, o zɔm kusa tua-pɛm-mɔ tɛ gbin a nu.

²⁶Nyaŋa-zɛ tɛ tok hee wese ga, ɓɛɛ wese tɛ kpɔr war mɔɔrɔ-ɗoŋ-yiitoo gan kuti-a. Nɛ ŋgimbi'i a̧ GASA WAN tɛ a nɛ nyina yí-da̧i̧ ko dukbíí kɔ‘i, hɛr nɛnɛ ha̧ da̧i̧‘i mɛ wii.

²⁷Ɛ̀nɛ̀ zíí nin GASA WAN nɛ hu̧r nɛ nyɛi̧a nu mɛ tɛnɛ‘i; nyimsea kɔ̧-a̧ ɔ kpɔra in ɔ ŋgaya. Sɔnti-a kaia, kpo rot nɛ nyimsea; leɓe-a duk hee wee nɛ bíí mɔ'ɛ ga.

²⁸Búk mɛ kɔ̧ nú-a duk hee mbeŋ-yì ga nɛ tɛ ha̧ daŋ hɔ tiger-a. A̧ tɛ zɛk o tugun bíí tɛ mɔɔ-zɛk-mɔ nɛ tɛ kum bíí, ɓɛɛ a̧ pi̧i̧ kana-yɔa-a sɛn nu o dukbíí lɛŋ.

²⁹Ɛnɛ tɛ bìì gima hee wan nɛ‘i bíí mɛ zɛ, wese gbaŋa ŋgimbi nɛ‘i duk nɛ tortɛ'ɛ ga. Ɛnɛ tɛ kpa desee hee ko ŋma bíí nɛ nɛ́ nɔ nyɛm nɛ ɗoŋ ger fol nɛ wa dɔm mɛ daŋ nɛnɛ si zu kaya ko GASA WAN, sitɛ kam-ta ko Israɛl ga.

³⁰GASA WAN tɛ de ha̧ o bíí mɛ zii tiger-a; a̧ tɛ usi er-a n'aa tɛ ba nɛ ŋgɔn mɛ gusi nɛ wa tɛ ŋga nyimsea kɔ̧-a̧, nɛ duk hee wee nɛ dɔ zɔ̧ in ŋga búk-kóro-ɓɔrɔ ga.

³¹Tɛ Asirii tɛ nak tɛ zia tiger GASA WAN. GASA WAN tɛ gus'aa nɛ nyasi kɔ‘i.

³²Ŋgimbi nɛ GASA WAN tɛ gusi nɛ a̧ nɛ nyasi'i, o bíí tɛ mbɛr bi̧ɔ̧ in koloŋ mbɛt yɔ nɛ yɔyɛ. GASA WAN tɛ fo er nɛ ŋgɔn, ɓɛɛ dee biro in a̧.

³³Wa ɗafa fara-dɔ-wɔr kaɗi; wa za̧a̧ kɔ̧ nɛ ɗuka-a in nɛ pɛsa-a, o zɔ̧ in o gua a̧a̧ sɛnɛ nɛ dɔka-a, ɓɛɛ nɛ́ búk kɔ̧ nú GASA WAN a̧ tɛ pi̧ wee tɛ mɔɔ nɔ‘i hee naa-wan-wee ga.