Read Northwest Gbaya ESAII 32 Bible Online

ESAII 32 - Northwest Gbaya bible

ESAII 32

¹Mbe wannu tɛ de mɔ nɛ yuwar-a, ɓɛɛ o wan mbɛt tɛ gɔn kita nɛ yuwar-a.

²Kóó o nde tɛ duk nɛ̀ fara-hu̧si tɛ-wi wen búk, tua-hu̧si-kórò, kóó hee foka-yì zu ŋga nu ga; wa tɛ duk hee gi̧ɔ̧ gasa ta zu kora nu sɛn ŋga-gbárà ga.

³Hegɔ gbaayí o wi nɛ zɔk mɔ beka kpe ɓɔna; o wi-zii-mɔ tɛ yeŋ zer mɛ zii mɔ nɛ sa̧a̧-a̧.

⁴O wi nɛ tɔ̧ wen nɛ hakilo na tɛ kii mɛ iŋ mɔ nɛ sa̧a̧-a̧; leɓe o wi-guguma tɛ bur, ɓɛɛ wa tɛ tɔ̧ wen nɛ haya-a in nɛ sa̧a̧-a̧ mbɛt.

⁵Bíí beka sa mgbelewi'e, gasawi na, ɓɛɛ wi beka tu̧ tɛ wi-ndela na mbɛt,

⁶wen yí-tom ko wi-iŋ-mɔ na nɛ tɔ̧ɔ̧ mgbélé wen nɛnɛ, ɓɛɛ see-aa duk tɛ ɗaŋmɔ, de nɛ ɗaŋ, tɔ̧ nɛ ɗaŋ wen nɛtɛ nɛtɛ zu GASA WAN; a̧ ha̧ nyɔŋmɔ ha̧ o wi nɛ tik ŋgata, kà bó nɛ̀ ha̧a̧ yí-nɔɔ ha̧ o wi nɛ wɔ yi gbɛ na mbɛt.

⁷Ɓɛɛ nɛ war ko wi-ndela, tom kɔ̧-a̧ nɛ gbɛɛ-zu, a̧ ɓir nɛ wen-ndela nɛtɛ nɛtɛ wen pi̧i̧ bɔnɛ zu o wi-kɔsa, kóó war wen ko o wi-kɔsa nɔ‘i duka so nɛ yuwar-a mbɛt.

⁸Ɓɛɛ war ko kpasa bíí, mɔ n'aa ta lɛŋ nɛ kpasamɔ, ɓɛɛ tom kɔ̧-a̧ duk nɛ kpasamɔ mbɛt.

⁹O okoo nɔ'ɔ nɛ ta mɔ na’ɛ, ɛ̀nɛ̀ kúr, ɛ̀nɛ̀ zíí wen kɔ‘m! Ɛnɛ o zíŋ-zíŋ zɔŋa nɔ'ɔ, ɛ̀nɛ̀ yéŋ zer'nɛ́ tɛ wen n'am tɛ tɔ̧ h’ɛ́nɛ́‘i:

¹⁰«Ɗoŋ pɛ kpɔk nɛ̀ ŋma be ŋgimbi zu-a tikiɗi, ɓɛɛ tɛ‘nɛ́ tɛ nak, ɛnɛ o okoo nɔ'ɔ nɛ taamɔ bo na’ɛ, wen kà ŋgimbi-mɔi̧-nyɔnɔ yak kaɗi, ɓɛɛ nyɔnɔ kaɗa mbɛt.

¹¹Ɓɛɛ kinii, tɛ‘nɛ́'ɛ nak, ɛnɛ o zíŋ-zíŋ zɔŋa nɔ'ɔ. Gba-gbana a̧ ba'nɛ́, ɛnɛ o okoo nɔ'ɔ nɛ ta mɔ na’ɛ. Ɛ̀nɛ̀ kpɔ̧́í̧ mɔ tɛ‘nɛ́ yinɛ, ɓɛɛ ɛ̀nɛ̀ yá nɛ mgbii. Ɛ̀nɛ̀ pí̧ laa-zim-mɔ tɛ‘nɛ́.

¹²Ɛ̀nɛ̀ mbɛ́r yí-see'nɛ́, hee mɔ'ɔ n’ɛnɛ de so ŋgimbi nɛ tortɛ ba nɛ ɛnɛ tɛ dɛma-a nɛ fɔ k’ɛ́nɛ́ dɛm’ɛ ga, in nɛ nyak-dɔ̧ɔ̧ k’ɛ́nɛ́ gasi nɛnɛ nɛ de-a’ɛ ga.

¹³Nu ko dukbíí kɔ‘m gu nɛ zu tua-de-tortɛ lɛŋ, in zu o ye-de-nyɛŋɛ kɔ-wa, kpee nɛ o tɛn in o tɛn-dara.

¹⁴Bíí bo zu damti ɓɔna, o bíí gbina tɛ ye-de-ŋgamɔ‘i yak lɛŋ. Ofɛl in ŋga tua-pɛm-mɔ kifa duk nɛ gee fara kpoo nɛ kpoo, fara nɛ o tuifuu-zaŋbɛɛ nyɔŋ mɔ sɛnɛ nɛ ga̧a̧-see in fara-nyɔŋ-mɔ ko o mɔ-dai.

¹⁵«Nɛ̀ ɗoŋ tikiɗi, Sa̧a̧ Ɔmi tɛ zir nɛ ŋgɔn pii zu yɛ, hegɔ ŋga-gbárà tɛ kifi duk nɛ fara-dɛm-nyɔnɔ, ɓɛɛ fara-dɛm-nyɔnɔ tɛ kifi kɔ‘i nɛ́ kombo.

¹⁶Deemɔ nɛ yuwar-a tɛ duk kɔ̧ kombo'i, ɓɛɛ deemɔ nɛ yuwar-a tɛ duk tɛ de fara-dɛm-nyɔnɔ mbɛt.

¹⁷Deemɔ nɛ yuwar-a tɛ ha̧ ga̧a̧mɔ; kpɔk deemɔ nɛ yuwar-a'i tɛ de ha̧ bíí mɛ kpa de duka-a nɛ de-a kpoo nɛ kpoo.

¹⁸Dukbíí kɔ‘m tɛ ya tɛ ga̧a̧mɔ ɓɔnsɛnɛ; ŋma mɔ beka fo wa na, ɓɛɛ wa tɛ ya nɛ de-a mbɛt.

¹⁹«Ɓɔrɔ tɛ gbin te kɔ̧ kombo'i a nu lɛŋ, ɓɛɛ ye tɛ tik.

²⁰Ɛnɛ tɛ ya tɛ demɔ, wen ɛnɛ tɛ gun mɔ sɛn ká̧ yi, ɓɛɛ o ndai in o tuifuu k’ɛ́nɛ́ tɛ kpa de duka-a.»