Read Northwest Gbaya ESAII 34 Bible Online

ESAII 34 - Northwest Gbaya bible

ESAII 34

¹Ɛnɛ o tugun bíí lɛŋ, ɛ̀nɛ̀ ɗɔ́lí pii ti, ɛ̀nɛ̀ zíí wen kɔ‘m; ɓɛɛ ɛnɛ o dukbíí, ɛ̀nɛ̀ yéŋ zer'nɛ́ tɛ wen'i. Nu in o mɔ nɛ a̧a̧ zaŋ-aa lɛŋ a̧ zii wen kɔ‘m. Zaŋnu nɛ oi o mɔ nɛ a̧a̧ sɛnɛ lɛŋ a̧ duk wi-sedaako kɔ‘m.

²Ŋga nyimsea ko GASA WAN kura zu o tugun bíí lɛŋ gu nɛ o wi-biro kɔ-wa nɛ oi gun. A̧ bee mɔ-fio a zu wa nɛ tɛ kum wa gbuɗuk a nu lɛŋ.

³Wa tɛ kai wɔr-wa a nɛ ká̧ yuwar, pɛr mbɔra wɔr-wa tɛ nun dam fara lɛŋ, ɓɛɛ tɔk tɛ-wa tɛ fok nɛ zu kaya mɛ a nu,

⁴ɓɛɛ wese in zɛ, ká bá nɛ̀ o sɔra mɛ yiwese tɛ yeli, yiwese tɛ kar tɛ-wi hee kara-kalata ga, ɓɛɛ o sɔra tɛ ai nɛ yiwese a nu hee mɔ'ɔ nɛ wa̧a̧ nyak-dɔ̧ɔ̧ in wa̧a̧ te-mbɔra ai nɛnɛ a nu’ɛ ga.

⁵GASA WAN'e: Yí gba-paa kɔ‘m yiwese mɛ ɔ mgbekeyeke-kéréré hee yí wi-gbɛ-ɗɔ̧ɔ̧ ga; a̧ tɛ tik zu Edɔm in dukbíí n'am foma ha̧ wa mɛ zɔk bɔnɛ.

⁶Tɔk in nɔ kpee yí gba-paa ko GASA WAN; mɛ nɛ tɔk o sami in gbadua, ká bá nɛ̀ o vala sami, wen mɔɔ-ɗafi-sɔ̧ ko GASA WAN a̧a̧ Bosra mɛ, ɓɛɛ fara-kum-bíí a̧a̧ kɔ‘i sɛn Edɔm.

⁷Tɛ kpɔk ŋgimbi'i, o nam tɛ kum gu nɛ o wiwii-ndai, in o be-wiwii-a mbɛt; nù kɔ-wa tɛ kpe nɛ tɔk in nɔ tɛ-wi.

⁸Kinii'i, ŋgimbi kifa-er ko GASA WAN hɔa, pɛ yéé ɗoŋ Siɔŋ ko GASA WAN nɛ mɔ'ɔ mbɛt, wen ha̧ a̧ mɛ de mɔ ba nú o wi-sɛn Siɔŋ.

⁹O ŋga foka-yì mɛ Edɔm tɛ kifi yì-ŋgoŋgoe, o fuunu tɛ kifi baraadu, ɓɛɛ nu kɔ-wa tɛ bìì wee hee sɔ̧́ɔ̧́-bírí ga.

¹⁰Wee'i beka bi na zɛ nɛ wese, ɓɛɛ zi-wee-aa tɛ tur nɛnɛ ɓɔnsɛnɛ; fara'i tɛ kifi nɛ ŋga-gbárà nɛ bíí beka ɓir nɛnɛ na kpoo nɛ kpoo.

¹¹Ɓɛɛ fara'i tɛ duk nɛ fara ko o diri in o ŋgɛzɛ, ká bá nɛ̀ o gbakaɗa in o gba-kɔra mbɛt, ɓɛɛ GASA WAN tɛ de ha̧ nu'i mɛ ŋgai kotoro kifi gee fara hee mɔ'ɔ nɛ duka so nɛ ti ga.

¹²Ŋma gasa wi-de-wan nɛ tɛ de wan ha̧ ŋma wannu mɛ ɔ ye fara'i, bo na; o be-wan yambala yak lɛŋ.

¹³O tɛn-dara in o tɛn-ga̧a̧ ká bá nɛ̀ naakɔɓa tɛ hɔ kɔ̧ ŋga tua-pɛm-mɔ, ɓɛɛ fara'i tɛ kifi duk nɛ fara-ya ko o gbóò in o ndao.

¹⁴O kóŋgóló-dɔmɔ tɛ kpa ŋmaa in o ɓoŋgo, ɓɛɛ fara'i tɛ duk nɛ fara-duk ko o ɗaŋ-sɔ̧ in o gba-nyɔŋ-wi, wa tɛ ɔm tɛ sɛn hi̧i̧.

¹⁵Gɔ́k tɛ gɔm bɔk pi̧ kui a sɛnɛ, bɛɛ ɔɔ zu-a ha̧ kui'i mɛ mbaŋ o be-a; ɓɛɛ o tama tɛ mɔi̧ lɛŋ kpa ŋmaa fara'i.

¹⁶Ɛ̀nɛ̀ kíí wen’ɛ zaŋ kalata ko GASA WAN, ɛnɛ tɛ kpa wen’ɛ nɛ tɔ̧a̧‘e: «Ŋma kóó kpɔk mgbara wa yɔ na, o nde beka de kíì wen ɓii-aa na; wen n'aa tɔ̧ɔ̧ lɛŋ tɛ hɔ gba̧a̧, wen mɛ nɛ mɔ nɛ nú GASA WAN tɔ̧a̧. Mɛ nɛ tɛ ɔmi kɔ̧-a̧ a̧ a̧ mɔi̧a nɛ wa.

¹⁷Mɛ nɛ GASA WAN a̧ tɛ kɛ̧ nù ha̧ wa, wen ha̧ o nde mɛ kpa fara kɔ‘i, ɓɛɛ wa tɛ ya fara'i in o bezaŋ-wa nɛ tɛ hɔ ɗoŋ ŋmaa nɛnɛ; fara'i tɛ duk nɛ fara kɔ-wa kpoo nɛ kpoo.»