Read Northwest Gbaya ESAII 36 Bible Online

ESAII 36 - Northwest Gbaya bible

ESAII 36

¹Tɛ ɓu-zua-naar pɛ-wan ko Ezɛkias wannu Juda, Senakerib wannu Asirii bìì o ŋga-ye Juda, ɓɛɛ ba.

²Wannu Asirii toma betom nɛ Lakis mɛ nɛnɛ sitɛ wannu Ezɛkias sɛn Jerusalɛm. Betom'i nɛ Rabsake in o gba gii wi-biro. A̧ yora mgbák nu-ŋgere nɛ o bíí za̧a̧, yuwar fara-fɔr-laa.

³Eliakim, bem ko Hilkia, wan-duk-zu tua ko wannu nɛɛ kpa a̧; wa nɛa in Sɛbna, bem ko Yɔa bem ko Asap sitɛ a̧.

⁴Rabsake tɔ̧a̧: «Ɛ̀nɛ̀ nɛ́ɛ̀ tɔ̧ ha̧ Ezɛkias'e, mɔ nɛ mi gasa wannu Asirii tɔ̧ nɛ mɔ'ɔ: Mɔ nɛ mɛ e nɛ ta kinii’ɛ nɛ ge?

⁵Mɛ tɔ̧ kɔ-mɛ‘e, nɛ tɛ tɔ̧ɔ̧-wen tikiɗi, ɓɛɛ wi kpaa tɔ̧ɔ̧-mbɔrɔ in ŋgai tɛ biro nde? Wi nɛ mɛ e nɛ ta, de nɛ ŋgazu in am’ɛ nɛ o?

⁶Mɛ́ é ta nɛ Egiptɛ, nɛ hɔɔ ŋmaa in ɓui nɛ‘i ba ɓɛɛ gbaa a er wi’ɛ ga. Mɔ nɛ wannu Egiptɛ de in o wi nɛ e ta nɛ a̧, a̧‘i.

⁷«Mana ɛnɛ tɛ tɔ̧ ha̧‘m'e: ‹Ɛɛ e ta nɛ GASA WAN Sɔ̧ k’ɛɛ,› ɓɛɛ bo nɛ kale Sɔ̧‘i nɛ mɔ'ɔ nɛ Ezɛkias ɗaŋa o gasa fara-gas'aa gu nɛ o fara-ɗaf'aa mbɛt, ɓɛɛ a̧ tɔ̧ ha̧ o bíí Juda in o bíí Jerusalɛm'e, wa a̧ gu nu sɛn ti ɛ̧ɛ̧ fara-ɗafi-sɔ̧'ɛ, na nde?

⁸«Ɔ dee mɛ e nú mɛ in gasa wan kɔ‘m wannu Asirii, ɓɛɛ mi tɛ ha̧ o nyaŋa booro-yiitoo ha̧ mɛ, kà mɛ a̧ nyɛma kpaa o wi-daŋ-aa.

⁹Mɛ nyɛm mɛ zik ɗoŋ mɛ e ha̧ wi-duk-zu zika-nù ko wan kɔ‘m nɛ duk nɛ geɗek wi-de-tom ti a̧ na, wen mɛ e ta nɛ Egiptɛ mɛ ha̧ o keekee-nyaŋa in o wi-daŋ-aa ha̧ mɛ.

¹⁰Mɛ ta kɔ-mɛ‘e bo nɛ GASA WAN a̧ gbak am nɛ mɔ'ɔ n'am kpa nɛ ŋgai mɛ ɗaŋ ye kɔ-mɛ yínɛ́'ɛ na nde? Mɛ nɛ GASA WAN a̧ tɔ̧ɔ̧ ha̧‘m, a̧‘m bi ye kɔ-mɛ, a̧‘m ɗaŋ ye'i lɔkɔti-lɔkɔti yinɛ!»

¹¹Ɓɛɛ Eliakim, Sɛbna, ká bá nɛ̀ Yɔa tɔ̧ ha̧ wi-pɛm-gbagari'i: «Ɛ̀nɛ̀ tɔ̧́ nɛ nú arameɛn ha̧ o wi-de-tom k’ɛ́nɛ́, wen nɛ́ nú‘i ɛ̀ɛ̀ zii, ɓɛɛ k’ɛ́nɛ́ tɔ̧ nú ko o be Juda na, wen o wi nɔ'ɔ nɛ̀ ya zu garo biro’ɛ.»

¹²Rabsake kifa nú ha̧ wa: «Ɛnɛ ta k’ɛ́nɛ́‘e, mɛ nɛ wen ɛnɛ in wannu k’ɛ́nɛ́ ɓɛɛ a̧ wan kɔ‘m toma nɛ‘m tɛnɛ mɛ tɔ̧ wen’ɛ? Weyaa, mi tɔ̧ wen’ɛ ha̧ o wi nɔ'ɔ nɛ ya zu tua-pɛm-mɔ'ɔ. Nɛ́ wa a̧ tɛ nyɔŋ ɗɔr kɔ-wa in nɔɔ ini mɛ yí-ndaa-wa nɛ tɛ-wa, ká bá nɛ̀ ɛnɛ mbɛt.»

¹³Ɓɛɛ Rabsake tɔ̧ wen nɛ nú ko o be Juda nɛ hee ger ha̧ wa hee mɔ'ɔ ga: «Ɛ̀nɛ̀ zíí mɔ nɛ gasa wannu Asirii tɔ̧ɔ̧ ha̧‘m mɛ tɔ̧ h’ɛ́nɛ́.

¹⁴A̧‘e nde, ká Ezɛkias ɔr'nɛ́ na; a̧ beka kpasi'nɛ́ na.

¹⁵K’ɛ́nɛ́ zii wen ko Ezɛkias nɛ tɔ̧ h’ɛ́nɛ́‘e, ɛ̀nɛ̀ e ta nɛ GASA WAN, a̧ tɛ kpasi'nɛ́, a̧ beka e ha̧ o wi-biro ko wannu Asirii mɛ ba ye k’ɛɛ na wo'i, na.

¹⁶K’ɛ́nɛ́ zii wen ko Ezɛkias na. Mɔ nɛ wannu Asirii tɔ̧ɔ̧ nɛ mɔ'ɔ: ‹Ɛ̀nɛ̀ nɔ́ tɔk in am, ɛ̀nɛ̀ gbín pii tɛ‘m; ɓɛɛ kóó o nde mgbara'nɛ́ tɛ nyɔŋ waya-nyak-dɔ̧ɔ̧ in te-mbɔra kpɛɛfɔ kɔ‘i, in wa tɛ nɔ yi kɔ̧ gɔna-yi kɔ-wa nɛ ga̧a̧-see mbɛt.

¹⁷Ɓɛɛ mi tɛ kai'nɛ́ si gba de nù nɛ duk hee nu k’ɛ́nɛ́ ga, nu nɛ duna nɛ alkamaari in dɔ̧ɔ̧, ká bá nɛ̀ fɔ-nyak-dɔ̧ɔ̧ mbɛt.

¹⁸K’ɛ́nɛ́ zii ɔramɔ ko Ezɛkias nɛ ɔr nɛ ɛnɛ‘e nde, GASA WAN tɛ kpasi'nɛ́‘i na. Ɛnɛ zɔka o géé-sɔ̧ ko o tugun bíí kpasa so o bíí kɔ‘i er wannu Asirii ŋma wese, ɓɛɛ k’ɛ́nɛ́ zii?

¹⁹O sɔ̧ ko Hamat in Arpad a̧a̧ de? Ɛnɛ zɔka o sɔ̧ ko Sefarvaim a̧a̧ dee? O sɔ̧ ko Samarii ya dee? Wa kpasa Samarii er-am ŋma wese, ɓɛɛ k’ɛ́nɛ́ zɔk kaɗi?

²⁰Mgbara o sɔ̧ ko nu nɔ'ɔ lɛŋ nɛ ya hɛ̧ɛ̧, ge sɔ̧ ge ɛ́nɛ́ zɔka nɛ̀ kpasa nù kɔ‘i er-am kaɗi, sɛka GASA WAN kpasi nɛ Jerusalɛm ge?› »

²¹Wa lɛŋ yaa nɛ oi-nú selele, ŋma bíí mɛ kifi nú bo na, wen mɛ nɛ heembea nɛ wannu Ezɛkias ha̧a̧ so ha̧ wa'e, ka'i kifi nú na.

²²Ɓɛɛ nɛ mɔ'ɔ nɛ Eliakim, bem ko Hɛlkia, gasawi kɔ̧ kira ko wannu in Sɛbna wi-yɔr-kalata ko wannu, ká bá nɛ̀ Jɔas bem ko Asaf, wan-kasi-kalata-nyɛrɛmɔ nu'i tɛɛ tɛ Ezɛkias nɛ a̧ka̧ laa tɛ-wa, ɓɛɛ wa we ɗoŋ wen ko Rabsake lɛŋ ha̧ a̧.