Read Northwest Gbaya ESAII 38 Bible Online

ESAII 38 - Northwest Gbaya bible

ESAII 38

¹Ŋgimbi'i, ŋga zɛɛ baa Ezɛkias ha̧ a̧ mɛ fe, ɓɛɛ Esaii wi-tɔ̧-wen oi nú Sɔ̧, bem ko Amɔs tɛ tɛ-a, ɓɛɛ tɔ̧: «Mɔ nɛ GASA WAN kɔ̧ɔ̧ ha̧‘m mɛ tɔ̧ ha̧ mɛ nɛ mɔ'ɔ: Mɛ̀ tɔ̧́ sɔŋkur wen nú-mɛ ha̧ o bíí kɔ̧ kira kɔ-mɛ ŋgaɓo, wen mɛ tɛ fe, mɛ beka kur tɛ zɛ'ɛ na.»

²Ɓɛɛ Ezɛkias zik tɛ zɔk mɔ si zaŋ ŋgeŋ, ɓɛɛ kɔfi GASA WAN hee mɔ'ɔ ga:

³«GASA WAN, tɛ‘nɛ́'ɛ̀ mbaŋ ɗoŋ tom n'am dee h’ɛ́nɛ́ nɛ see kpɔk nɛ yuwar-a, ɓɛɛ ɓɔnsɛnɛ mi kia mɛ de nɛ mɔ nɛ dee tɛ‘nɛ́ mbɛt.» Ɓɛɛ Ezɛkias hi̧i̧ kɔ̧a̧ nɛ dɔka-a.

⁴Ɓɛɛ nɛ mɔ'ɔ nɛ GASA WAN tɔ̧ɔ̧ ha̧ Esaii woyo:

⁵«Mɛ̀ nɛ́ɛ̀ tɔ̧ ha̧ Ezɛkias'e, mi GASA WAN, Sɔ̧ ko dáà kɔ̧-a̧ David, mi zia kɔfamɔ kɔ̧-a̧; mi zɔka mi̧i̧kɔ̧a̧ kɔ̧-a̧ mbɛt. Mi tɛ ha̧ haya-tɛ ha̧ a̧. Ɗoŋ zɛ taar, ɓɛɛ mɛ̀ dáŋ si kɔ̧ Tua ko GASA WAN. Mi tɛ ha̧ mbe duka-a ha̧ a̧ siti zaŋnu mɛ de pɛ ɓu-zua-mɔɔrɔ woyo.

⁶Mi tɛ kpasi a̧ sɛn er wannu Asirii, ɓɛɛ mi tɛ de mɔ mɛ kpasi ye’ɛ mbɛt.»

⁷Ɓɛɛ Esaii kifi nú ha̧ a̧: «Mɔ nɛ tɛ usi ha̧ mɛ mɛ iŋ‘e, mɔ nɛ GASA WAN ha̧a̧ nú wen-aa tɛ de kpasamɔ ha̧ mɛ nɛ mɔ'ɔ:

⁸Sɔ̧ tɛ de ha̧ gi̧ɔ̧-tɛ wannu Ezɛkias nɛ zira so si ɗɔɔ mɛ‘i mɛ daŋ duk oi-aa si ɗoŋ tɛ naŋ ɓu.» Ɓɛɛ nɛ mɔ'ɔ nɛ wese daŋa duk oi-aa hee naŋ ɓu ga tɛ gi̧ɔ̧-mɔ nɛ zira so.

⁹Gima ko Ezɛkias, wannu Juda ŋgimbi n'aa kura nɛnɛ tɛ zɛɛ nɛ mɔ'ɔ.

¹⁰Ɓɛɛ mi tɔ̧: Ŋgimbi n'am biti so nɛ gba de bozo-wi, mi tɛ̀ɛ́ ye tua ko o fio; nɛ́ fara'i a̧‘m tɛ̀ɛ́ duk sɛnɛ kaɗi nɛ oi pɛ duka-a kɔ‘m.

¹¹Ɓɛɛ sa'm tɔ̧ siti woyo: Mi iŋa nɛ mbetɛ‘e mi beka zɔk GASA WAN nɛ yí‘m mgbara bíí zu nu’ɛ ɓɔna, mi beka zɔk yí ŋma bíí mgbara o bíí nɛ ya zu nu’ɛ ɓɔna mbɛt.

¹²Wa baa fara-duk kɔ‘m pi̧ nyɛi̧ nɛ‘m hee gbaksak ko wi-dai-ndai ga; ɛnɛ kara duka-kpasa kɔ‘m hee mɔ'ɔ nɛ wan-fan-bale kar nɛ yipol-bale’ɛ ga. Mɔ tɛ ga̧ hɔ̧ɔ̧ na, ɓɛɛ mɔ kɔ‘m kaɗa, GASA WAN.

¹³Mi gɔfi mɔ ai nɛ nú h’ɛ́nɛ́ mɛ zɛ mɔ sa̧ nɛnɛ; dúk hee dila a̧ gbin gba̧a̧-tɛ‘m lɛŋ ga, ɓaa kɔ‘m nɛ mɔ'ɔ nɛ kaɗa'i.

¹⁴Tɛ‘m mbɔia fara hiɗi mɔ hee gbiiwara a̧ bu̧i hiɗi nɛ mɔ ga; ger-am fara tɛ gɔfa mɔ ai nɛ nú hee gbaku̧i ga; yí‘m mbɔia tɛ kɛ̧i̧a̧ mɔ sitɛ‘nɛ́ ŋgɔn mɛ, GASA WAN, ɛ̀nɛ̀ kpás’ám tɛ ŋgamɔ'ɛ.

¹⁵Mi tɛ tɔ̧ bɔɔ nɛ ge? Ge mɔ ge a̧‘m tɛ tɔ̧ bɔɔ ha̧ a̧ ge? Mɛ nɛ deemɔ ko GASA WAN; mi tɛ duk kana zaŋnu'e nɛ dita-see, wen war mɔ kɔ‘m hɔ sɔŋkur ŋgimbi nɛ mɔ‘i, hɔ sɔŋkur ŋgimbi duka-a kɔ‘m zaŋnu’ɛ.

¹⁶GASA WAN duk ka̧ tɛ o bíí kɔ‘i; a̧ tɛ de ha̧ wa mɛ ya kpasa, ɓɛɛ ɔmi kɔ̧-a̧ tɛ de ha̧ o mɔ nɛ a̧a̧ tɛ-wa mɛ kpa ŋgai; a̧ tɛ ba'm e ŋgɔn de nɛnɛ ha̧‘m mɛ duk kpasa woyo mbɛt.

¹⁷Kimni dita-see kɔ‘m kpaia kifi nɛ desee, wen ɛ́nɛ́ kpasa'm ka'm tɛ́ɛ̀ ye kɔ̧, ɓɛɛ ɛnɛ pi̧ ɗaŋmɔ kɔ‘m lɛŋ taŋ nyɛi̧ nɛ ɛnɛ.

¹⁸Wa gasi'nɛ́ fara ko o fio mɛ na, o fio beka zɔn nin'nɛ́ na; o wi nɛ ya kɔ̧ fio ɗɔɔ mɛ‘i e ta nɛ dee demɔ k’ɛ́nɛ́ ɓɔna.

¹⁹Kana nɛ o bíí nɛ ya kpasa hee mi ga a̧ gasi'nɛ́ ɓɛɛ; o dáa-wan-bem we nɛ ɗoŋ demɔ k’ɛ́nɛ́ ha̧ o bem kɔ‘i.

²⁰GASA WAN, tɛ kpas'am n’ɛnɛ kpasa’ɛ, ɛɛ tɛ dikiɗi o mɔɔ-mbɛr k’ɛɛ sɛn nu kira k’ɛ́nɛ́, wese lɛŋ dam ɗoŋ zɛ duka-a k’ɛɛ zaŋnu’ɛ.

²¹Ɓɛɛ Esaii tɔ̧: «Mɛ̀ bá mbɔɗa mbɔra yi gba-da̧i̧, ɓɛɛ tɛ tɛ wii.»

²²Ɓɛɛ Ezɛkias tɔ̧ ha̧ a̧: «Mɔɔ-usi-mɔ nɛ tɛ usi ha̧‘m mɛ iŋ‘e, mi tɛ daŋ si kɔ̧ Tua ko GASA WAN nɛ ge?»