Read Northwest Gbaya ESAII 41 Bible Online

ESAII 41 - Northwest Gbaya bible

ESAII 41

¹O bíí mɛ nyɛi̧a fara, ɛ̀nɛ̀ dúk nɛ oi nú ti'm; o dukbíí lɛŋ a̧ kpa nɔɔ-ŋgiɗi! Wa a̧ ɗɔŋ pii ti wen tɔ̧ɔ̧ wen; ɛɛ lɛŋ, ɛ̀ɛ̀ nɛ́, ɛ̀ɛ̀ ɓá kita in o ŋmaa.

²Wi nɛ dee ha̧ wi-gɔn-kita nɛ yuwar-a mɛ daŋa-wese, mɛ gan biro zu nu, tir nɛ o wannu a nu, gɔm nɛ o bíí nɛ gba-paa a mbɔɗɔnu, yai nɛ wa nɛ goo a taŋ hee búk a̧ pɛsi kora zɔ̧ ga’ɛ nɛ o, bo nɛ mi na?

³Wi’ɛi ndaka ɗoŋ wa nasi nɛ wa nɛnɛ, ŋma mɔ fo tɛ-a na, ɓɛɛ naŋ-a ndɔ nu na mbɛt.

⁴Nɛ o'o dee mɔɔ nɔ‘i o? Mɛ nɛ Wi nɛ sa o bíí nɛ ku̧u̧naŋ-a mɛ tɛnɛ. Mi GASA WAN, mi duka so nɛ kuti-mɔ, ɓɛɛ mi tɛ duk kana tɛ sɔŋkur mɔ mbɛt.

⁵O bíí mɛ nyɛi̧a fara zɔka so mɔɔ nɔ‘i, ɓɛɛ kíì de wa; o bíí mɛ si ndaa-zan mɛ gara tɛnɛ nɛ naka-tɛ.

⁶O bíí gbak nɛ ŋmaa tɔ̧ nɛnɛ‘e: «Mɛ̀ nɔ́ ŋgiɗi!»

⁷Wi-sɛk-te ha̧ nɛ ŋgai ha̧ wi-nɔi̧-lɔr; wi-nɔi̧-lɔr ha̧ nɛ nɔɔ-ŋgiɗi ha̧ wi-dui-mɔ, ɓɛɛ wa zɔn nɛ tom ko o ŋmaa tɔ̧ nɛnɛ‘e: «Ɔ dee!» Wa kaia o mɔɔ-nɔ‘i a kɔ̧ ŋmaa, ŋgai, ɓɛɛ ba e ŋgɔn mɛ duk nɛ sɔ̧.

⁸Israɛl, mɛ́ wi-de-tom kɔ‘m, Jakob, mɛ́ bíí n'am hoka, bezaŋ sɛm kɔ‘m Abraham!

⁹Mi mgbɔɔ mɛ tɛnɛ nɛ nduti nu mɛ, nɛ sɔŋkur nu mɛ a̧‘m saa nɛ mɛ. Mɛ wi n'am tɔ̧ɔ̧ so ha̧ a̧‘e: «Mɛ nɛ wi-de-tom kɔ‘m. Mi hoka mɛ, ɓɛɛ bo nɛ mi siŋa mɛ pi̧ nu na.»

¹⁰Ká kíì de mɛ na, wen mi a̧a̧ ɗoŋ mɛ; ká yí-mɛ gɔn kɔ̧a̧ na, wen mi nɛ Sɔ̧ kɔ-mɛ. Mi tɛ ha̧ ŋgai ha̧ mɛ, gbak nɛ mɛ, kasi nɛ mɛ nɛ war wii er-am nɛ duk nɛ te-er-gbin-biro.

¹¹Ziimɔ in búù tɛ ba o wi nɛ see kur zu mɛ‘i, wa beka ba zu nɛ ŋgɔn na. O wi-kii-wen in mɛɛ nɔ‘i tɛ yambali kifi geemɔ, ɓɛɛ wa kuma lɛŋ.

¹²Mɛ tɛ kii wisɛn kɔ-mɛ nɔ‘i, ɓɛɛ mɛ beka kpa wa ɓɔna; mi tɛ sakali o wi nɛ ha̧m biro pii tɛ-mɛ‘i, wa tɛ de geemɔ,

¹³wen mi GASA WAN Sɔ̧ kɔ-mɛ, kasi mɛ nɛ er-am mɛ wiiko, tɔ̧ nɛnɛ ha̧ mɛ‘e: «Ká mɛ de kíì na, mi a̧a̧ ɗoŋ mɛ.»

¹⁴Israɛl bezaŋ Jakob nɛ wa zɔk hee be dɔk, ŋma be dɔk ha̧ wa mɛ mbɔli ga’ɛ, mi tɛ ye ɗoŋ mɛ. Nɛ GASA WAN a̧ tɔ̧ wen’ɛ. Mɔ nɛ wa dee in mɛɛ‘i ɓɔna kɔ̧ see-am. Sɔ̧, Sa̧a̧ Wi ko Israɛl a̧ tɔ̧.

¹⁵Mi tɛ de ha̧ mɛ mɛ duk hee mbe mɔɔ-gusi-alkamaari nɛ o nin-a a̧a̧ sɛnɛ nɛ ŋgaya-a ga. Mɛ tɛ gak zu o kaya ɗaŋ, ɓɛɛ mɛ hɔ̧na o zu-tɔ̧́ mɔk hee pumyulu alkamaari ga.

¹⁶Mɛ tɛ pɛfi wa, ɓɛɛ búk kaia wa pɛsi a taŋ; ɓɛɛ kɔ-mɛ, mɛ tɛ de nyɛŋɛ wen zu GASA WAN, mɛ tɛ duk tɛ-mɛ nɛ Sa̧a̧ Wi ko Israɛl.

¹⁷Ŋgimbi nɛ o wisan in o wi-kɔsa tɛ kii yì takaɗi, nɛ war ger-wa tɛ kor kútú-kútú, ɓɛɛ mi GASA WAN tɛ zii aia-nú kɔ-wa; mi Sɔ̧ ko Israɛl beka e wa duk na;

¹⁸mi tɛ de ha̧ nana-yì mɛ fok zir nɛ zu kaya mɛ, ɓɛɛ yi tɛ fok sɛn kɔ̧ ɗɔŋgɔ mɛ mbɛt. Mi tɛ de ha̧ ŋga-gbárà mɛ kifi nɛ gɔna-yì, in sira-nu mɛ kifi duk nɛ yí-mbuu.

¹⁹Mi tɛ gun gbatui, te akasia ká bá nɛ̀ be te nɛ pɛr-aa ɔ dee in te-nɔ̧́ sɛn ŋga-gbárà, ɓɛɛ mi guna zawaya, sumbu[16] ká bá nɛ̀ dɛ̧ɛ̧ tɛ kpɔk fara katɛ ŋmaa,

²⁰wen ha̧ o bíí mɛ zɔk, ha̧ wa mɛ iŋ, ha̧ wa mɛ ta mɔ sɛnɛ, ɓɛɛ wa iŋa mgbara-a mbɛt'e, nɛ́ er GASA WAN, Sa̧a̧ Wi ko Israɛl a̧ dee mɔɔ nɔ‘i.

²¹GASA WAN tɔ̧ɔ̧ ha̧ o sɔ̧ ko o tugun bíí: Ɛ̀nɛ̀ bá wen k’ɛ́nɛ́ gbonɛ. Wannu ko Jakob'e: Ɛ̀nɛ̀ tɔ̧ mgbák yi wen'i;

²²ɛ̀nɛ̀ ɗɔ́ŋ pii ti, ɛ̀nɛ̀ tɔ̧́ mgbara mɔ nɛ tɛ‘i h’ɛ́ɛ́! Ɛ̀nɛ̀ tɔ̧́ mɔ nɛ yaka, wen h’ɛ́ɛ́ mɛ iŋ o mɔɔ nɔ‘i. Ɛ̀nɛ̀ wé ɗoŋ mɔ nɛ tɛ‘i h’ɛ́ɛ́, sɛk’ɛɛ iŋa wan nɛ yaka.

²³Ɛ̀nɛ̀ tɔ̧́ mɔ nɛ tɛ hɔ h’ɛ́ɛ́, ɓɛɛ sɛk’ɛɛ iŋa'e nɛ mbetɛ‘e ɛnɛ nɛ o sɔ̧; ɛ̀nɛ̀ dé kana ŋma be mɔɔ-usi-mɔ, kóó nɛ ŋma ŋgamɔ, koo ŋma mɔɔ-kíì, h’ɛ́ɛ́ mɛ zɔk nɛ yí-ɛɛ sɛ!

²⁴Kà bó hegɔ na, ɓɛɛ gba̧a̧ mɔ bo tɛ‘nɛ́ na, tom k’ɛ́nɛ́ duk nɛ geemɔ mbulɛɛ gee; kóó o nde nɛ hok'nɛ, kifa nɛ mɔɔ-búù hee ɛnɛ ga.

²⁵Mi hoka ŋma bíí nɛ ká̧-zan-mɛ́-ŋgɔn mɛ, a̧ hɔɔ kaɗi; si war daŋa-wese mɛ‘i, wi sa nɛ nin-a. Wi’ɛi i̧sa̧ o wannu hee mɔ'ɔ nɛ‘i ŋma nɛ ɓɔtɛ, kóó hee mɔ'ɔ nɛ wi-ɓu-kpánà va̧i̧ nɛ gii’ɛ ga.

²⁶Wi nɛ wee so ɗoŋ o mɔɔ nɔ‘i nɛti h’ɛ́ɛ́ mɛ iŋ nɛ o? Wi nɛ tɔ̧ɔ̧ so wen-aa h’ɛ́ɛ́, k’ɛɛ tɔ̧‘e wen'i duk nɛ yuwar-a, nɛ o? Ŋma bíí tɔ̧ wen-aa h’ɛ́ɛ́, kà bó nɛ̀ wee ɗoŋ-aa h’ɛ́ɛ́ na mbɛt. Ŋma bíí mɛ mgbara'nɛ́ nɛ‘i zia wen-aa nú-a, bo na.

²⁷Kuti bíí nɛ tɔ̧ɔ̧ wen-aa ha̧ Siɔŋ nɛ‘m, ɓɛɛ mi tom nyɛrɛ-a nɛ betom ha̧ Jerusalɛm.

²⁸Mi pi̧i̧ yí‘m sitɛ o sɔ̧ nɔ‘i, ɓɛɛ mi zɔk ŋma bíí na; ŋma wi-ba-keta mgbara wa bo na. Ŋma bíí n'am tɛ ak ɓɛɛ ká kifa nú ha̧‘m, bo na.

²⁹Wa lɛŋ hee o ŋmaa ga, ŋma mɔ bo na; tom kɔ-wa nɛ gee tum mɔ. O sɔ̧ kɔ-wa nɔ‘i nɛ gee búk in geemɔ sɔɔ ge!