Read Northwest Gbaya ESAII 43 Bible Online

ESAII 43 - Northwest Gbaya bible

ESAII 43

¹Kinii, Israɛl bezaŋ Jakob, wen nɛ GASA WAN wi nɛ dee mɛ tɔ̧ nɛ mɔ'ɔ: «Ká kíì de mɛ na, mi gɔna zu mɛ; mi sa mɛ nɛ̀ nin-mɛ, ɓɛɛ mɛ́ nɛ́ kɔ‘m.

²Koo mɛ kuu nɛ gasa yi, mi a̧a̧ ɗoŋ mɛ, kóó mɛ kuu nɛ nana-yì, mɛ beka fe yi na; kóó mɛ gɔma nɛ yí-wee, leɓe-wee beka ba mɛ na,

³wen mi GASA WAN nɛ Sɔ̧ kɔ-mɛ, Sa̧a̧ Wi ko Israɛl Wan-kpasi-mɛ. «Mi tɛ ha̧ Egiptɛ gɔn nɛ̀ zu mɛ; Etiopii in Seba tɛ duk oi nu mɛ.

⁴Mɛ́ nɛ́ gasamɔ sɛn yí‘m; see-am duk ɓɔn tɛ-mɛ, mi kɔ̧ɔ̧ mɛ nyɛmna. Mɛ nɛ wen hegɔ sa'm ha̧ o bíí oi nú mɛ, in o ye gɔn nɛ̀ zu mɛ.

⁵«Ká kíì de mɛ na, mi a̧a̧ ɗoŋ mɛ; mi tɛ kai o bezaŋ-mɛ nɛ war daŋa-wese piinɛ ɗoŋ, ɓɛɛ mi mɔi̧a o bíí kɔ-mɛ nɛ a̧a̧ si yee-wese pii ɗoŋ mbɛt.

⁶Mi tɛ tɔ̧ ha̧ ká̧-zan-mɛ́-ŋgɔn: ‹Mɛ̀ é ha̧ wa pii ɗoŋ›, ɓɛɛ mi tɔ̧ɔ̧ ha̧ ká̧-zan-mɛ́-ɗɔɔ: ‹Ká mɛ dor wa na.› O bem kɔ‘m be-wiwii-a nɛ a̧a̧ tɛ nyɛi̧a nu mɛ a̧ pii ɗoŋ,

⁷O nde lɛŋ nɛ‘i sa nin-am zu wa a̧ pii ɗoŋ. Mɛ nɛ mi a̧ mboo wa, de nɛ wa mbɛt, wen ha̧ wa mɛ zɔn gasamɔ kɔ‘m.»

⁸Ɛ̀nɛ̀ káí o wi nɔ'ɔ nɛ a̧a̧ nɛ gbaayí ɓɛɛ zɔk mɔ na, in nɛ a̧a̧ nɛ zer, ɓɛɛ zii mɔ na’ɛ tɛnɛ ha̧‘m.

⁹O tugun bíí a̧ mɔi̧, o zuduk bíí a̧ mɔi̧ ya kpɔk fara. Mgbara o sɔ̧ k’ɛ́nɛ́, ŋma nɛ nyɛma mɛ tɔ̧ mɔ nɛ yaka a̧a̧ sɛnɛ? Wi’ɛi nɛ́ bòó sɛnɛ, ɓɛɛ a̧ a̧ we ɗoŋ-aa h’ɛ́ɛ́, a̧ a̧ kai o wi-sedaako nɛ yaa so oi-aa a ti yɛ ha̧ wa ɓa wen mɔ nɛ yaka so in ha̧ mɛ kpɛk'e, mɔ‘i nɛ kpasawen.

¹⁰War kɔ‘m, ɛ́nɛ́ o be Israɛl nɛ wi-sedaako kɔ‘m, GASA WAN tɔ̧ɔ̧ hegɔ; ɛnɛ nɛ o bíí n'am hoka wen h’ɛ́nɛ́ mɛ iŋ am, h’ɛ́nɛ́ mɛ e ta nɛ‘m, in h’ɛ́nɛ́ mɛ iŋ nɛ mbetɛ‘e, Sɔ̧ kana nɛ mi'i. Ŋma sɔ̧ bo nɛti ha̧‘m na, ɓɛɛ nɛ ɗoŋ mbɛt, ŋma sɔ̧ beka bo na.

¹¹Kana nɛ mi, kpɔk ɓɛɛ, mi'i nɛ GASA WAN, ŋma wan-kpasi-wi yak zu'm, bo na.

¹²Nɛ́ mi'i baa yuwar-kpasa-a tɛnɛ, nɛ́ mi'i tɔ̧ɔ̧ wen-aa de nɛnɛ h’ɛ́nɛ́ mɛ iŋ yuwar'i; ŋma gɔni sɔ̧ tɛ de pɛrti mɔ hegɔ mgbara'nɛ́ nɛti na. Ɛnɛ nɛ o wi-sedaako'e, mi nɛ Sɔ̧, GASA WAN tɔ̧ɔ̧ hegɔ.

¹³Nɛ mbetɛ, mi tɛ duk kana nɛ Sɔ̧ siti; ŋma bíí nɛ tɛ ɓar mɔ er-am yinɛ bo na; ŋma bíí nɛ tɛ dor am tɛ mɔ n'am kɔ̧ɔ̧ mɛ de, bo na mbɛt.

¹⁴Wen nɛ̀ GASA WAN, Sa̧a̧ Wi ko Israɛl, Wan-gɔn-zu'nɛ́ tɔ̧ nɛ mɔ'ɔ: «Mɛ nɛ wen zu'nɛ́ a̧‘m tom nɛ bíí nɛnɛ si Babilɔŋ, wen gbina nutua zɔɓɔ a nu, ɓɛɛ hiɗimɔ tortɛ ko o bíí Babilɔŋ tɛ kifi nɛ kɔ̧a̧ fio ŋgúr-ŋgúr.

¹⁵«Mi nɛ GASA WAN, Sa̧a̧ Wi k’ɛ́nɛ́, Wan nɛ dee Israɛl, mi nɛ wannu k’ɛ́nɛ́.»

¹⁶GASA WAN á̧ pi̧i̧ yuwar ku nɛ gba-tɔp; mɛ nɛ a̧ a̧ mbaŋa yuwar ku nɛ ŋga kin-yì mbɛt.

¹⁷A̧ dee ha̧ o keekee-biro in o nyaŋa ká bá nɛ̀ o ŋga wi-biro mɛ yak biro, ɓɛɛ wa tir a nu hee mɛ nɛ bùk-wee[17] ga, wa kur ɓɔna.

¹⁸Ká tɛ‘nɛ́ mbaŋ ɗoŋ mɔ nɛ yaka so nɛti na, k’ɛ́nɛ́ ta mɔ wen gba̧‘a̧ mɔ ɓɔna mbɛt.

¹⁹Kinii, mi tɛ de mbe mɔ; mɔ‘i ku̧u̧ naŋ kaɗi, ɓɛɛ ɛnɛ tɛ iŋ mɔ‘i. Mi tɛ pi̧ war sɛn ŋga-gbárà, ɓɛɛ yi foka sɛnɛ mbɛt.

²⁰O saɗi-zaŋbɛɛ, o gbóò in o ndao tɛ zɔn am, wen n'am dee ha̧ nana-yì mɛ fok sɛn ŋga-gbárà mɛ, ha̧ nana-yì mɛ fok fara nɛ yi bo so sɛnɛ na, wen ha̧ dukbíí kɔ‘m n'am hoka mɛ kpa mɛ nɔ.

²¹Wa nɛ o bíí n'am dee wen mɔ kɔ‘m nɛ tɛ‘m wen ha̧ wa mɛ gas'am.

²²GASA WAN tɔ̧a̧‘e: «Israɛl bó nɛ́ mɛ'ɛ pi̧i̧ tom sa nɛ‘m na; nɛ́ ɛ́nɛ́, o bezaŋ Jakob a̧ ea'm duk ɛ̧!

²³Bó nɛ́ wen zu'm a̧ mɛ dɔ so nɛ o be-sami na, mɛ de so mɔ‘i wen tu̧u̧ tɛ‘m na mbɛt. Mi de so mɛ nɛ ŋgai wen ha̧ mɛ mɛ ha̧ ha̧a̧mɔ, dɔ nɛ fuu-nyama ha̧‘m, sɛka tɛ-mɛ de ka mbɔia nɛnɛ na.

²⁴Bo nɛ wen zu'm a̧ mɛ hi̧fi so nɛ yí-nyama nɛ gɛnɛ-a ɔ ŋgaya na, in a̧ mɛ dɔ so nɛ nɔ-saɗi kɔ-mɛ wen ha̧‘m mɛ nyɔŋ zaŋ-am sur na mbɛt. Ɓɛɛ nɛ́ ɗaŋmɔ kɔ-mɛ a̧ dita zu'm mi mbɔia tɛ zɔka o mɔɔ-gbɛ-zu kɔ-mɛ.

²⁵Ɓɛɛ kɔ‘m nɛ tɛ‘m, mi tɛ bi ɗaŋmɔ kɔ-mɛ yinɛ wen zu nin-am; tɛ‘m tɛ bi ɗoŋ-aa.

²⁶«Mɔ nɛ mɛ tɔ̧ wen a zu'm sɛnɛ‘i, mɛ̀ bá gbonɛ ɛ̀ɛ̀ ɓá, wen ha̧ kpasawen nɛ mɛ yor zu-a'i mɛ gbo.

²⁷Zɔmdáa kɔ-mɛ mɛ ti mɛ̀, yɔɔ so kaya, o gasawi nɛ duk zu mɛ dee ŋgazu in am;

²⁸mɛ̀ nɛ́ wen mɔ‘i a̧‘m pi̧i̧ nɛ búù zu o wi-duk-zu Tua ko Sɔ̧, mi dee ha̧ o wisɛn mɛ ɗaŋ o bezaŋ Jakob yinɛ, mi de ha̧ Israɛl mɛ kifi nɛ mɔɔ-zɛkɛɗi kɔ-wa.»