Read Northwest Gbaya ESAII 44 Bible Online

ESAII 44 - Northwest Gbaya bible

ESAII 44

¹«Ɓɛɛ kinii, Jakob wi-de-tom kɔ‘m, mɛ zii, Israɛl, nɛ́ mi'i hoka mɛ.

²Wen nɛ GASA WAN nɛ ɓoo mɛ, nɛ dee mɛ pi̧ kɔ̧ zaŋ naa kɔ-mɛ in nɛ kɔ̧ɔ̧ mɛ gbak mɛ, tɔ̧ nɛ mɔ'ɔ: Ká kíì de mɛ na, Jakob wi-de-tom kɔ‘m, Yesurun,[18] wi n'am hoka.

³Mi tɛ de ha̧ yi mɛ a zu nu, yi tɛ fok zu kora nu. Mi tɛ ha̧ Ɔmi kɔ‘m ha̧ o bezaŋ‘nɛ́, ɓɛɛ mi toka de yoŋgo zu o pɛ́r-nam k’ɛ́nɛ́ mbɛt.

⁴Wa tɛ ɓɔ hee mbɔŋgi-nu-kórò ga, gasi nɛnɛ hee gasa te ká̧ yi ga.

⁵Ŋma mgbara wa tɛ tɔ̧‘e: ‹Mi nɛ bíí ko GASA WAN›, ɓɛɛ ŋma tɛɛ tɔ̧ kɔ‘i'e, wa a̧ sa nin-wi'e, Jakob. Ŋma woyo tɛ gɔn dap te-er tɔ̧ nɛnɛ‘e: ‹Mi duk nɛ ko GASA WAN›, ɓɛɛ a̧ duka tɛ̀ nɛ̀ nin Israɛl.»

⁶Wen nɛ GASA WAN nɛ a̧a̧ nɛ ŋgayamɔ lɛŋ, wannu ko Israɛl in Wan-kpas'aa tɔ̧, nɛ mɔ'ɔ: «Mi nɛ ku̧u̧naŋmɔ in sɔŋkur-mɔ; ŋma sɔ̧ yak zu'm, bo na.

⁷Ŋma bíí hee mi ga a̧a̧ sɛnɛ? Wi’ɛi a̧ ba wen, ɓɛɛ a̧a̧ usi wi nɛ tɔ̧ɔ̧ mɔ nɛ ku̧u̧naŋ-a mɛ zu mɔ nɛ tɛ hɔ, in a̧ a̧ tɔ̧ mɔ nɛ tɛ hɔ nɛ ɗoŋ h’ɛ́ɛ́ mbɛt.

⁸«Ká kíì de'nɛ́ na, in ká tɛ‘nɛ́ nak na mbɛt; bó nɛ́ mi wee so ɗoŋ mɔ‘i h’ɛ́nɛ́ nɛti na nde? Ɛnɛ iŋa mɔ‘i nɛ de-a; ɛnɛ nɛ o wi-sedaako kɔ‘m; ŋma sɔ̧ yak zu'm, bo na, ŋma Kam-ta yak zu'm, bo na mbɛt.»

⁹O wi-sɛk géé-sɔ̧ nɛ o gee tum bíí; mɔ nɛ wa de bó nɛ́ kpasamɔ na. Gbaayí o mɔ nɛ wa dea zɔk mɔ na; wa iŋ mɔ na mbɛt, ɓɛɛ wa tɛ e foe yí o wan-de-wa.

¹⁰Mɛ̀ nɛ́ mɔɔ-ba-tɛ wen o wi-dui géé-sɔ̧ nɔ‘i!

¹¹Foe baa o wi-nɛ-ɗoŋ o géé-sɔ̧ nɔ‘i, o wi-dui-wa nɛ gee o bíí sɔɔ gee! O wi nɔ‘i a̧ mɔi̧ ŋmaa lɛŋ ɛ̀ɛ̀ ɓá kita; kíì tɛ de wa ɓɛɛ ziimɔ baa wa.

¹²Wan-dui-mɔ ba nɛ boi pi̧ tɛ wee mbɛr nɛ dɔnɔ ɗafi nɛnɛ nɛ ŋgai-tɛ lɛŋ. Kà a̧ kpa mɔɔ-nyɔŋ na, ɓɛɛ ŋgai kɔ̧-a̧ kaɗa; kà a̧ nɔ yi na mbɛt, ɓɛɛ tɛ-a mɔka.

¹³Ɓɛɛ nɛ war ko wi-sɛk-te, a̧ we te kaɗi sɛka a̧ sɛka nyɛm nɛ ɗoŋ-aa; mɛ́ ɗoŋ ɓɛɛ a̧ gbɛra yɔk ɗoŋ-aa nɛ̀ de-a wen ha̧ mɛ́ hɔ ŋmaa in bíí, ɓɛɛ a̧ baa e kɔ̧ tua mɛ́ gasi.

¹⁴Wa zɔk nɛ́ oi o gbatui e, hok nɛ̀ o zawaya wen gɔma-a in o gasa te, ɓɛɛ wa ee há̧ wa mɛ́ gasi mgbara o te kɔ̧ kombo. Ŋma ɓɛɛ wa guna nɛ́ sumbu[19] nɛ̀ kórò tɛ hɔ a zu a̧ ɓɛɛ gasa.

¹⁵Mɛ́ ɗoŋ, o te nɔ‘i kifa nɛ gua-ye-wee, nɛ̀ bíí tɛ́ yè nɛ̀ wee wen ɔa-a, in wen dɔa-a nɛ brɛt mbɛt. Ɓɛɛ nɛ́ kpɔk te'i a̧ bíí sɛk nɛ sɔ̧ kɔ‘i, gbɛ nɛ zugur nu ti a̧ gasi nɛnɛ nɛ see lɛŋ.

¹⁶Ŋginda-gua nɔ‘i nɛ mɔɔ-ye-wee kɔ̧-a̧, gi nɛ o kpoo zu a̧ wen nyɔŋa-a zaŋ-aa sur. Ŋma ɓɛɛ a̧ ɔɔ nɛ wee-aa tɔ̧ nɛnɛ‘e: «Oee gba de wee wa, gɛ̧ɛ̧ yuu tɛ‘m kaɗi!»

¹⁷Ɓɛɛ a̧ baa ɓii oi ŋginda-a sɛk de nɛ sɔ̧ kɔ̧-a̧, gbɛ nɛ zugur ti a̧, kɔfi nɛ a̧ tɔ̧ nɛnɛ‘e: «Mɛ́ nɛ́ sɔ̧ kɔ‘m, mɛ̀ kpás'am!»

¹⁸O wi nɔ‘i iŋ mɔ na, wa zii mɔ na; gbaayí-wa zɔk mɔ na, in wa iŋ kɛ̧ɛ̧ mgbara mɔ na mbɛt. See-wa mbɛt nɛ kalemɔ, wa ta mɔ na.

¹⁹Ŋma bíí mɛ ta mɔ‘e, kpɔk ŋginda-te’ɛ a̧‘i yee nɛ wee gi nɛ kpoo, dɔ nɛ brɛt zu-a nyɔŋ zaŋ-wi sur; ɓɛɛ nɛ́ kpɔk oi ŋginda-te'i a̧‘i sɛka de nɛ̀ sɔ̧ nɛ‘i gu nu ti a̧ gasi nɛnɛ wo’ɛ, bo na?

²⁰A̧ ndaɗi tɛ a nɛ mɔ nɛ duk gee bùk-wee; ŋga see kɔ̧-a̧ ɗaŋa taamɔ kɔ̧-a̧, sɔ̧ kɔ̧-a̧‘i beka kpas'a na, ɓɛɛ ha̧ a̧ mɛ tɔ̧‘e, mɔ nɛ duk er-wi’ɛ nɛ gee tum-mɔ wo’ɛ, bo na mbɛt.

²¹«Jakob, tɛ-mɛ mbaŋ ɗoŋ-aa'e, nɛ́ mi a̧ ɓoo mɛ; Israɛl, mɛ́ nɛ́ wi-de-tom kɔ‘m. Tɛ‘m beka bi ɗoŋ mɛ na.

²²Mi foo ɗaŋmɔ in o ŋgazu kɔ-mɛ yinɛ; wa yuu hee tura-zan ga. Mɛ̀ píí ɗoŋ pii tɛ‘m, wen mi gɔna zu mɛ kaɗi.»

²³Yiwese, mɛ̀ híɗí mɔ-tortɛ wen GASA WAN dee mɔ; ɛ̀nɛ̀ gáí mɔ, ɛ́nɛ́ o wi nɛ ya ɗɔɔ nu mɛ! O kaya, ɛ̀nɛ̀ mbɛ́r er gai nɛ mɔ nɛ desee; kombo in o te sɛn kɔ̧ a̧ lɛŋ a̧ gai mɔ nɛ desee, wen GASA WAN gɔna zu Jakob; a̧ usa gasamɔ kɔ̧-a̧ kpasi nɛ Israɛl.

²⁴Israɛl, GASA WAN nɛ gɔna zu mɛ, Wan nɛ ɓoo mɛ pi̧ kɔ̧ zaŋ naa kɔ-mɛ a̧ tɔ̧ wen’ɛ: «Nɛ́ mi GASA WAN a̧ dee mɔ lɛŋ, nɛ́ mi ɛ̀n’ám a̧ tata yiwese in nu ɓɛɛ, nɛ́ o a̧ gbaka'm tɛ tom-aa o?

²⁵Mi'i de ha̧ deemɔ ko wi-de-mɔɔ-kifi mɛ duk nɛ geemɔ; ɓɛɛ mi'i de ha̧ o wi-zɔk-mɔ mɛ kifi nɛ o mgbelewi. Mi dee ha̧ mɔ ko o wi-iŋ-mgbara-mɔ mɛ sir kifi gee tum-mɔ.

²⁶Mi tɛ yor ɗoŋ wen nɛ o wi-de-tom kɔ‘m tɔ̧ɔ̧ so, mi tɛ de ha̧ wen ko o betom kɔ‘m mɛ hɔ gba̧a̧, ɓɛɛ mɔ n'am tɔ̧ zu Jerusalɛm nɛ mɔ'ɔ: ‹O bíí tɛ ɔ sɛn Jerusalɛm woyo, ɓɛɛ nɛ war ko o gasa ye nu Juda, o bíí tɛ mbo o ye nɔ‘i, ɗafi nɛ o mɔ nɛ ɗaŋa so nɛ̀ mbe-a.›

²⁷Mi tɛ tɔ̧ ha̧ dir gba-tɔp: ‹Mɛ ɔ̧si̧, mi dee ha̧ o nana-yì kɔ-mɛ mɛ ɔ̧si̧ lɛŋ mbɛt.›

²⁸Ɓɛɛ war ko Sirus, mi tɔ̧a̧: ‹Mɛ́ nɛ́ wi-dai-mɔ kɔ‘m; a̧ tɛ de ha̧ mɔ nɛ see-am kɔ̧a̧ mɛ hɔ gba̧a̧. A̧̧ tɛ tɔ̧ zu Jerusalɛm'e: Wa a̧ mbó a̧ in wa a̧ bá Tua kɔ‘m e ŋgɔn woyo.› »