Read Northwest Gbaya ESAII 46 Bible Online

ESAII 46 - Northwest Gbaya bible

ESAII 46

¹Sɔ̧ Bal gbina, ɓɛɛ Nɛbo tik nu; wa hɛra tui o géé-sɔ̧ a zu o mɔ-dai kɔ-wa; o géé-sɔ̧ nɔ‘i duk nɛ zɔm dita tui nɛ wa ee zu o saɗi nɔ‘i nɛ mbɔia'i.

²Ɗoŋ o sɔ̧ nɔ‘i difa in ger-wa gɔa tɛ kpɔk ŋgimbi; wa nyɛm mɛ kpasi o gee sɛka-te kɔ-wa nɔ‘i na, ɓɛɛ o bíí kai wa nɛ bara-biro yaknɛ.

³Ɛnɛ o bezaŋ Jakob, in oi o be nú-gara ko Israɛl, ɛ̀nɛ̀ zíí wen kɔ‘m. Nɛ mi'i tuia'nɛ́, dai nɛ ɛnɛ nɛ kɔ̧ zaŋ naa k’ɛ́nɛ́ mɛ tɛnɛ.

⁴Mi beka kpai er deemɔ in'nɛ̀ɛ́ na, hɔ nɛnɛ ŋgimbi sɔki k’ɛ́nɛ́. Mi tɛ yor ɗoŋ‘nɛ́ hegɔ mbui hɔ nɛnɛ zu'nɛ́. Mi dee mɔ‘i h’ɛ́nɛ́ kaɗi. Mi tɛ ba'nɛ́ e ŋgɔn, mi tɛ yor ɗoŋ‘nɛ́, ɓɛɛ mi tɛ kpasi'nɛ́ mbɛt.

⁵Ɛnɛ tɛ we'm nɛ o? Nɛ o'o hɔɔ ŋmaa in am o? Nɛ o ɛ̀nɛ̀ ta tɔ̧ nɛnɛ‘e, a̧ nyɛma ŋmaa in am o?

⁶O dukbíí hu̧i̧ nɛ ŋgoɓo kɔ-wa sɛ nɛ o lɔr gbonɛ, we nɛ sede tɛ mɔɔ-we-mɔ, ɓɛɛ wa gɔna zu wi-dui-mɔ mɛ dui sɔ̧ ha̧ wa, gbɛ nɛ zugur ti sɔ̧‘i gasi nɛnɛ mbɛt.

⁷Ɓɛɛ wa gɔɔ a̧ e zu kóŋgó-ɓaa tui yaknɛ, nɛ́ɛ̀ é sɛn fara nɛ wa tɛ e a̧ sɛnɛ. Ɓɛɛ fara nɛ wa ee a̧ sɛnɛ‘i, a̧ yor ɓɔn oi-aa, a̧ fo gee foo tɛ-a na. Wa ya hiɗi nɛ mɔ ai nɛ nú sitɛ a̧, a̧ kifi nú ha̧ wa na, sɛka bó nɛ̀ kpasa wa tɛ bɔnɛ kɔ-wa na mbɛt.

⁸Tɛ‘nɛ́ a̧ mbaŋ ɗoŋ mɔ n'am tɔ̧ɔ̧ so h’ɛ́nɛ́, ɓɛɛ tɛ‘nɛ́ a̧ duk sɛnɛ! Ɛ̀nɛ̀ kpá mbe ta, ɛnɛ o yaa-ŋgazu nɔ'ɔ!

⁹Tɛ‘nɛ́'ɛ mbaŋ ɗoŋ o mɔ nɛ yaka so ɓeemɛ; mi nɛ Sɔ̧ kpɔk ɓɛɛ, ŋma mbe-a yak zu'm, bo na.

¹⁰Mɔ nɛ tɛ de nɛ sɔŋkur-aa mɛ, ɓɛɛ mi tɔ̧ɔ̧ nɛ ku̧u̧naŋ-a mɛ; mɔ nɛ tɛ de hɔ̧ɔ̧ na, ɓɛɛ mi tɔ̧ɔ̧ nɛti ɓɛɛ mɛ mɛ kaɗi. Ee-zu-mɔ kɔ‘m duk nɛnɛ kpoo nɛ kpoo; mɔ n'am taa mɛ de, mɔ‘i tɛ hɔ kana gba̧a̧.

¹¹Mi saa zua nɛ war ndaa-zan, nɛ tɛ nyɛi̧a fara mɛ tɛnɛ. Wi’ɛi tɛ de mɔ nyɛm nɛ ɗoŋ mɔ n'am taa! Mɔ n'am taa kɔ̧ see-am mɛ de, mi tɛ de kana mɔ‘i.

¹²Ɛ̀nɛ̀ zíí wen kɔ‘m, ɛ́nɛ́ o yaa-ŋgazu nɔ'ɔ, wen ɛnɛ biti nɛ nyɛi̧a-a tɛ mɔ n'am ha̧a̧ nú zu-a.

¹³Ɗoŋ-aa nyɛi̧ ɓɔna ɓɛɛ ɛnɛ tɛ gan zu mɔ, kpasa-a k’ɛ́nɛ́ hɛɗa dɔ̧ɔ̧ kaɗi; mi tɛ kpasi Siɔŋ, ɓɛɛ mi ha̧a̧ zɔnamɔ ha̧ Israɛl.