Read Northwest Gbaya ESAII 49 Bible Online

ESAII 49 - Northwest Gbaya bible

ESAII 49

¹Ɛnɛ o see-kisi, gu nɛ o bíí mɛ nyɛi̧a fara mɛ mbɛt, ɛ̀nɛ̀ yéŋ zer'nɛ́, ɓɛɛ ɛ̀nɛ̀ zíí wen kɔ‘m. GASA WAN saa'm, ku̧u̧naŋ-a nɛ kɔ̧-zaŋ naa kɔ‘m mɛ tɛnɛ, ɓɛɛ a̧ saa nin-am tɛ ŋgimbi nɛ wa koo nɛ‘m mbɛt.

²A̧ bɛŋa nú‘m tɔ̧ hee pai-toro ga, a̧ kpee zu'm nɛ gi̧ɔ̧ er-a. A̧ dee ha̧‘m mɛ duk hee tɔ̧ɔ̧-nú goo ga, ɓɛɛ a̧ pi̧‘m kɔ ɓaro kɔ̧-a̧.

³A̧ tɔ̧ɔ̧ ha̧‘m: «Israɛl, mɛ́ nɛ́ wi-de-tom kɔ‘m, mi tɛ usi gasamɔ kɔ‘m nɛ ɗoŋ mɛ.»

⁴Ɓɛɛ sa'm tɔ̧‘e mi ɗaŋ nɛ tɛ‘m, yɔ nɛ ŋgimbi kɔ‘m sɔɔ gee, in mi de ha̧ tɛ‘m mɛ mbɔi sɔɔ gee mbɛt. Wen mɔɔ-oi-tom kɔ‘m a̧a̧ er GASA WAN; mɔɔ-oi-tom kɔ‘m gu nɛ yí-mɔ kɔ‘m mbɛt a̧a̧ er GASA WAN.

⁵Ɓɛɛ kinii, GASA WAN dea'm pi̧ kɔ̧ zaŋ naa kɔ‘m, wen ha̧‘m mɛ duk wi-de-tom kɔ̧-a̧, ha̧‘m mɛ mgbɔ Jakob siɗoŋ tɛ a̧, in wen ha̧‘m mɛ mɔi̧ o be Israɛl mbɛt. Ɓɛɛ zu mɔ‘i, GASA WAN tɛ ba'm e ŋgɔn, wen Sɔ̧ kɔ‘m nɛ ŋgai kɔ‘m.

⁶A̧ tɔ̧ɔ̧ ha̧‘m: «Mɔ n'am kɔ̧ɔ̧ tɛ-mɛ, bó nɛ́ duka wi-de-tom kɔ‘m, wen mgbɔɔ Jakob pii ɗoŋ tɛ‘m, mɔi̧ nɛ̀ o be Israɛl nɛ ya kpasa ha̧‘m, ɓɛɛ na, ɓɛɛ mi dee mɛ nɛ̀ sa̧a̧mɔ ha̧ o tugun bíí lɛŋ, wen ha̧ yuwar-kpasa-a kɔ‘m mɛ pɛsi dam zaŋnu lɛŋ, hɔ nɛnɛ nduti nu mɛ.»

⁷Nɛ́ GASA WAN, Sa̧a̧ Wi ko Israɛl, wan-gɔn-zu dukbíí kɔ‘i, a̧ tɔ̧ wen’ɛ ha̧ mɛ. Mɛ́ nɛ̀ o bíí e tɛ geemɔ'ɛ, ɓɛɛ nɛ̀ wa zɔk mɛ hee ɗaŋmɔ ga’ɛ, mɛ, bara ko o ŋga-wi nɔ'ɔ, ŋgimbi nɛ o wannu be tɛɛ zɔk mɛ, wa tɛ kur yor ŋgɔn ti damti kɔ-mɛ, in be-wan mbɛt tɛ zɔk mɛ, ɓɛɛ wa tɛ kiŋgili tɛ-wa nɛ nu ti mɛ, wen zu GASA WAN, Sa̧a̧ Wi ko Israɛl, wan nɛ hoka mɛ in nɛ yor ɗoŋ wen kɔ‘i mbɛt.

⁸Ɓɛɛ GASA WAN tɔ̧: «Mi kpɛka kɔfa mɔ kɔ-mɛ tɛ de ŋgimbi, mi gbaka mɛ wese kpasa-a, wen nɛ́ mi'i dee mɛ, wen ha̧‘m mɛ nɔ tɔk in o bíí nɛ ɗoŋ mɛ, ha̧ mɛ mɛ ba ye e ŋgɔn, kɛ̧ nɛ fara nɛ wa baa so ha̧ o bíí.

⁹Mi tɛ tɔ̧ ha̧ o wi-zɔɓɔ, in o wi nɛ ya zaŋ tum'e; ‹Ɛ̀nɛ̀ gbó pii tɛ sa̧a̧mɔ!› Wa tɛ hɔ ŋmaa in ŋma duk sami, nɛ nyɔŋ mɔ nɛ yuwar nɛnɛ zu o zu-tɔ̧́ mɛ.

¹⁰Wɔ nyɔŋmɔ in wɔ yi beka gbɛ wa na, kpɔra wee nu in wese beka dɔ wa na mbɛt; wen nɛ Wi nɛ zɔk wa nɛ ko, a̧ tɛ mgbɔ wa yaknɛ si ka̧ foka-yì.

¹¹Mi tɛ pi̧ o yuwar nɛ zu o kaya nɛnɛ, ɓɛɛ o yuwar nɔ‘i tɛ duk nɛ̀ tana-a.

¹²O wi nɔ‘i nɛ mɔ'ɔ nɛ tɛ'ɛ! Wa tɛ nɛ nyɛi̧a fara mɛ; o ŋma tɛ nɛ ká̧-zan-mɛ́-ŋgɔn, o ŋma nɛ yee-wese, ɓɛɛ o ŋma mbɛt tɛ kɔ‘i nɛ ka̧ Egiptɛ nɛ war ɗɔɔ.»

¹³Yiwese a̧ bíí gima nɛ desee, nù a̧ de nyɛŋɛ; o kaya a̧ de tortɛ, wen GASA WAN ga̧a̧ nɛ see o bíí kɔ‘i, ɓɛɛ a̧ dee ko ha̧ o wi-bɔnɛ.

¹⁴Siɔŋ‘e: «GASA WAN ea'm duk, tɛ GASA WAN bìí ɗoŋ-am mbɛt.»

¹⁵Tɛ naa-wan-bem tɛ bi so ɗoŋ bem kɔ‘i nde? A̧ beka usi kɔ̧ɔ̧mɔ ha̧ bem nɛ gboo nɛ tɛ-a na nde? Kóó tɛ-a bìì so ɗoŋ bem kɔ̧-a̧, ɓɛɛ kɔ‘m, tɛ‘m beka bi ɗoŋ mɛ na.

¹⁶Mi yɔra nin-mɛ kɔ̧ er-am, ɓɛɛ garo kɔ-mɛ duk ɓɔn yí‘m.

¹⁷O wi-mbo-mɛ woyo a̧ kpan nɔ tɛnɛ‘i, ɓɛɛ o wi-ɗaŋ-mɛ in o wi-de-mɔ ba tɛ-mɛ a̧ yak kɔ-wa'i.

¹⁸Mɛ̀ pí̧ yí-mɛ, ɓɛɛ mɛ̀ zɔ́k mɔ zik kpa katɛ mɛ. O bíí kɔ-mɛ mɔi̧ nɛ ŋmaa pii katɛ mɛ. GASA WAN tɔ̧a̧, Mi kan mɔ nɛ tɛ‘m, wa tɛ ya nɛ o mbɔi-tɛ nɛ mɛ tɛ pi̧ ger-mɛ, mɛ tɛ ɗafi tɛ-mɛ nɛ o mbɔi-tɛ nɔ‘i, hee ŋma zɔŋa nɛ‘i hara ga.

¹⁹Nù kɔ-mɛ ɗaŋa lɛŋ kifi nɛ bɛɛ-oi; kinii, fara beka nyɛm o bíí kɔ-mɛ ɓɔna, ɓɛɛ o wi-ɗaŋ-nù kɔ-mɛ tɛ pɛsi yak.

²⁰O bem kɔ-mɛ nɛ mɛ taa so kɔ-mɛ‘e wa yɔɔ wo’ɛ, tɛ fu̧i̧ wen zer-mɛ tɔ̧ nɛnɛ‘e: «Fara’ɛ nyɛm yɛ na, ɛ̀nɛ̀ kíí ŋma mbe fara h’ɛ́ɛ́ duk sɛnɛ.»

²¹Ɓɛɛ mɛ tɛ ta nɛ kɔ̧ see-mɛ tɔ̧ nɛnɛ: «O wi nɔ'ɔ nɛ ò'ó kòó wa ha̧‘m o, bó nɛ́ mi yara so nɛ ndɔra na? Bó nɛ́ wa baa so'm yaknɛ nɛ bara-biro si ŋma fara na? Ɓɛɛ nɛ̀ ko o wi nɔ'ɔ, nɛ o'o dee ha̧ wa mɛ gasi o? Mi duka so kɔ‘m ɛn'am, ɓɛɛ nɛ̀ ko o wi nɔ'ɔ, wa yaa so kɔ-wa dee?»

²²Ɓɛɛ GASA WAN Sɔ̧ tɔ̧: «Mi tɛ de mɔɔ-usi-mɔ ha̧ o tugun bíí, ɓɛɛ mi baa tutuwal kɔ‘m e ŋgɔn ti o dukbíí; wa tɛ tui o bui-bem kɔ-mɛ nɛ zu kóŋgó-ɓaa pii ɗoŋ ha̧ mɛ, ɓɛɛ wa ɓuka o boko-bem kɔ-mɛ mbɛt.

²³O wannu tɛ ya nɛ o wan-dai-mɛ, ɓɛɛ o boko-bem ko wannu tɛ ya o wi-ha̧-nyɔŋmɔ ha̧ mɛ; wa tɛ gu yí-wa nú, gu nɛ nú ti mɛ. Wa tɛ ndal fuunu naŋ-mɛ yinɛ, ɓɛɛ mɛ tɛ iŋ‘e nde, mi nɛ GASA WAN, ɓɛɛ foe beka de o wi-e-ta nɛ‘m na.

²⁴«Wa tɛ ɓar mɔɔ-oi-biro er ŋga wi-biro yinɛ nde? Kóó wa tɛ kai o bara-biro er-a yinɛ mbɛt nde?»

²⁵Wen nɛ GASA WAN tɔ̧ nɛ mɔ'ɔ: «Wa tɛ ɓar o bara-biro yinɛ er ŋga wi-biro, ɓɛɛ o mɔɔ-oi-biro nɛ yaa-ŋgo-biro kaia so tɛ yu er-a. Mi tɛ kifi nú ha̧ o wi nɛ kii wen in mɛɛ, ɓɛɛ nɛ́ mi nɛ tɛ‘m a̧ tɛ kpasi o bem kɔ-mɛ.

²⁶Mi tɛ de ha̧ o wi-nukuri-mɛ, mɛ nyɔŋ kpoo tɛ-wa nɛ tɛ-wa; tɔk tɛ-wa tɛ gbɛ wa hee ŋga dɔ̧ɔ̧ ga, ɓɛɛ o bíí lɛŋ tɛ iŋ‘e nde, mi, GASA WAN, nɛ́ wan-kpasi-mɛ; ŋga-wi ko Jakob nɛ́ wan-gɔn-zu-mɛ.»