Read Northwest Gbaya ESAII 5 Bible Online

ESAII 5 - Northwest Gbaya bible

ESAII 5

¹E ha̧‘m bíí gima ha̧ sɛm kɔ‘m, gima kɔ̧ɔ̧mɔ-tortɛ zu fɔ-nyak-dɔ̧ɔ̧ kɔ̧-a̧. Sɛm kɔ‘m a̧a̧ so nɛ fɔ-nyak-dɔ̧ɔ̧ kɔ‘i tɛ de mɔka nu sɛn zu-tɔ̧́ mɛ.

²A̧ gbuta nu nɛ de-a dɔr kii-ta yinɛ sɛnɛ lɛŋ, ɓɛɛ a̧ gun o de be nyak-dɔ̧ɔ̧ sɛnɛ. A̧ dee taŋaɗa-pɛm-mɔ see fɔ‘i, ɓɛɛ a̧ za̧ kɔ̧ see fɔ‘i mbɛt. A̧ taa so kɔ̧-a̧ mɛ kpa nɛ de o waya-nyak-dɔ̧ɔ̧ fara'i, ɓɛɛ nɛ mɔ'ɔ nɛ o nyak-dɔ̧ɔ̧ kɔ̧-a̧ tɛɛ wai nɛ ɗaŋ gee siɗimɔ.

³Ɓɛɛ kinii, ɛnɛ o be Jerusalɛm in o be Juda, mi ai nu h’ɛ́nɛ́, ɛ̀nɛ̀ kɛ̧ mgbara wen kɔ‘m in fɔ-nyak-dɔ̧ɔ̧ kɔ‘m.

⁴Ŋma mɔ n'am tɛ̀ɛ́ de ha̧ fɔ-nyak-dɔ̧ɔ̧ kɔ‘m n'am de na’ɛ nɛ ge? Mi taa so kɔ‘m mɛ kpa nɛ waya nyɔ̧ɔ̧ dɔ̧ɔ̧, ɓɛɛ wen ge fɔ-nyak-dɔ̧ɔ̧'ɛ tɛɛ dɛm nɛ gee paŋ siɗimɔ ha̧‘m ge?

⁵Ɓɛɛ kinii mi tɛ tɔ̧ mɔ n'am tɛ de nɛ fɔ-nyak-dɔ̧ɔ̧ kɔ‘m h’ɛ́nɛ́; mi tɛ yai o ɓoramɔ n'am ɓora so nɛ a̧‘i a nu, wen ha̧ mɔ mɛ nyɔŋ a̧. Mi tɛ gbin ŋgeŋ wen ha'i mɛ i̧si̧ a̧ ɗaŋ lɔkɔti-lɔkɔti.

⁶Kinii, mi tɛ ɗaŋ a̧ ɗaŋ yinɛ, ŋma mɔ nɛ‘i tɛ ɗafi tɛ-a bo na, kà bó nɛ̀ dee zao-a na mbɛt; o tɛn in o tɛn-dara tɛ da̧ kpe zu a̧; ɓɛɛ mi tɛ dor kóró ká tɛ̀ɛ́ hɔ a zu fɔ‘i na mbɛt.

⁷Fɔ-nyak-dɔ̧ɔ̧ ko GASA WAN nɛ a̧a̧ nɛ ŋgayamɔ lɛŋ, nɛ nutua ko Israɛl. Ɓɛɛ o be Juda nɛ o nyak-dɔ̧ɔ̧ n'aa hoka gun; a̧ taa so kɔ̧-a̧‘e, wa tɛ ya nɛ de-a in o ŋmaa wo, ɓɛɛ kɔ-wa nɛ kuma ŋmaa. A̧ taa so kɔ̧-a̧‘e, wa tɛ de mɔ nɛ yuwar-a sitɛ o ŋmaa wo, ɓɛɛ kɔ-wa nɛ hiɗimɔ-ɗaŋsee.

⁸Bɔnɛ a̧a̧ zu o wi nɛ ba tua ko ŋma-wi nɛ ŋgai e zu kɔ‘i, in o wi nɛ ba fɔ ko ŋma bíí e nú kɔ‘i. Ɛnɛ baa fara lɛŋ hee ɓaa o bíí nɛ ɔ ye'i nɛ ɛnɛ ɓɛɛ ga.

⁹Ɛ̀nɛ̀ zíí mɔ nɛ GASA WAN nɛ a̧a̧ nɛ ŋgayamɔ lɛŋ tɔ̧ɔ̧ ha̧‘m: «O zɔm gasa gba de tua nɔ'ɔ tɛ gbin a nu, o bíí beka ɔ sɛnɛ na.

¹⁰Fɔ-nyak-dɔ̧ɔ̧ nɛ pɛsa-a nɛ naŋ booro-taar tɛ ha̧ yí-dɔ̧ɔ̧́ dun litrɛ ɓu-naar; kóó wi waa so nɛ zɔm fɔ, mɔ nɛ‘i tɛ mɔi̧ kpɛɛfɔ‘i lɛŋ tɛ duk nɛ bufu kpɔk ɓɛɛ.»

¹¹Bɔnɛ a̧a̧ zu wi nɛ kur kɔ‘i nɛ tutuyɛ nɔ nɛ ŋga dɔ̧ɔ̧ nɛnɛ, ɓɛɛ kà zɛ tɛ de hɔ̧ɔ̧ na, ɓɛɛ dɔ̧ɔ̧ gbɛɛ a̧ pi̧ nu!

¹²Koloŋ, zaŋa, bi̧ɔ̧ in dɔma zak nɛ yee ɗoŋ nɔɔ dɔ̧ɔ̧ kɔ-wa'i de ha̧ wa mɛ ta mɔ wen tom nɛ GASA WAN de na, in wa zɔk o mɔ n'aa dea na.

¹³Mɛ nɛ wen hegɔ nɛ wa tɛ kai dukbíí kɔ‘m nɛ bara-biro yaknɛ, wen zu-wa bo na; wɔ tɛ kum o yaa-ŋgo-biro kɔ-wa, ɓɛɛ gba dukbíí tɛ kum nɛ wɔ yi.

¹⁴Kɔ̧-fio ɓaa nú yoŋgolo mɛ gur o gasawi in o gba giiwi Jerusalɛm nɛ ya nɛ desee in tortɛ‘i.

¹⁵O bíí beka ba zu nɛ ŋgɔn ɓɔna, wa lɛŋ tɛ duk si ɗɔɔ, ɓɛɛ o wi-ŋmaŋ-tɛ tɛ zum zu nɛ foe.

¹⁶Hegɔ wi tɛ zɔn GASA WAN nɛ a̧a̧ nɛ ŋgayamɔ lɛŋ wen zu gɔna kita kɔ̧-a̧ nɛ yuwar-a; ɓɛɛ nin Sɔ̧ tɛ hur wen zu deemɔ kɔ̧-a̧ nɛ yuwar-a.

¹⁷O be-sami tɛ nyɔŋ mbɔɗi zɔ̧ hi̧i̧ hee fara-dai-wa ga, ɓɛɛ o ŋmaŋa saɗi in o be-sami tɛ nyɔŋ mɔ bɛɛ-oi.

¹⁸Bɔnɛ a̧a̧ zu o wi nɛ dak bɔnɛ pi̧ zu-wi, ba nɛ ɗaŋmɔ yuɓuri nɛ tɛ hee nyak-ndai ga!

¹⁹Wa'e: «Sɔ̧ a̧ de tom kɔ‘i nɛ haya-a ɓɔn gbaayí-ɛɛ h’ɛ́ɛ́ zɔk! Sa̧a̧ Wi ko Israɛl a̧ de mɔ‘i nɛ haya-a h’ɛ́ɛ́ iŋ mgbara-a!»

²⁰Bɔnɛ a̧a̧ zu o wi nɛ sa ɗaŋmɔ‘e, demɔ, ɓɛɛ saa demɔ‘e, ɗaŋmɔ; wa zɔk tum hee sa̧a̧mɔ ga, ɓɛɛ wa tɛɛ zɔk sa̧a̧mɔ hee tum ga. Wa sa paŋmɔ‘e, nyɔ̧ɔ̧-mɔ, ɓɛɛ wa saa nyɔ̧ɔ̧-mɔ‘e, paŋmɔ.

²¹Bɔnɛ a̧a̧ zu o bíí nɛ zɔk tɛ-wa'e, wi nɛ wi-iŋ-mgbara-mɔ, ɓɛɛ nɛ wa ta mbɛt'e, wi nɛ wi-iŋ-mɔ.

²²Bɔnɛ a̧a̧ zu o ŋga wi-gbɛ-dɔ̧ɔ̧, in o ŋga-wi nɛ záŋ kpɔra dɔ̧ɔ̧ nɛ ŋmaa nɔ nɛnɛ.

²³Kà o bíí ye wa nɛ mbɔi kaɗi, ɓɛɛ wa foo wen zu o wi nɛ dee mɔ nɛ ɗaŋ-a yinɛ, ɓɛɛ wa tɛɛ pi̧ pi̧i̧ wen zu o wi nɛ de mɔ nɛ yuwar-a.

²⁴Hee mɔ'ɔ nɛ leɓe-wee ndal nɛ zɔ̧, in hee mɔ'ɔ nɛ zɔ̧ bíí nɛ wee kór-kór’ɛ ga, a̧ kunin-wa tɛ mbɔr nɛnɛ, ɓɛɛ o bezaŋ-wa yambala hee puɗu-zɔ̧ ga, wen wa pi̧i̧ so heembea ko GASA WAN nɛ a̧a̧ nɛ ŋgayamɔ lɛŋ taŋ, e nɛ wen ko Sa̧a̧ Wi ko Israɛl tɛ geemɔ.

²⁵Mɛ nɛ wen hegɔ sa see GASA WAN nyim zu dukbíí kɔ‘i, ɓɛɛ ba er nɛ ŋgɔn mɛ mbɛr wa; o kaya naka, o wɔr ya nɛ mbɔɗɔnu sinɛ, hee o yɔsɛ nɛ ya nɛ ká̧ yuwar ga. Ɓɛɛ see-aa tɛ ga̧ hɔ̧ɔ̧ na, er-a ɓɔna tɛ-wa.

²⁶A̧ dee mɔɔ-usi-mɔ sa nɛ o tugun bíí nɛ tɛ o nyɛi̧a fara mɛ; a̧ dɔma fɔ̧i̧ si nduti nu mɛ, ɓɛɛ o bíí gar nɛ haya-a tɛnɛ mɛ̧tɛ̧ɛ̧-mɛ̧tɛ̧ɛ̧.

²⁷Kóó ŋma bíí kpɔk mgbara wa nɛ mbɔia, kà bó nɛ̀ gbura naŋ nɛ nu bo na; ŋma bíí nɛ zur ya, kà bó nɛ̀ ɔɔ ya, bo na mbɛt. Kanda bur guntir-wa na, in nyak-ndárà ŋman naŋ-wa na mbɛt.

²⁸Wa bɛŋa nu goo kɔ-wa pɛ́ɗɛ́ŋ-pɛ́ɗɛ́ŋ; ɓɛɛ wa ŋgaŋ o kusaa kɔ-wa ya nɛnɛ; o sɔ̧ɔ̧-naŋ nyaŋa kɔ-wa duk hee ta-sawara ga, ɓɛɛ o naŋ keekee kɔ-wa ma yi hee gba-búk ga.

²⁹A̧ bembi hee nana-dila ga, a̧ mgbimgbi hee be-dila ga mbɛt. Kà a̧ tuɓi da̧ ba nɛ mɔ, ɓɛɛ a̧ baa mɔ‘i yaknɛ, ŋma bíí mɛ ɓar mɔ‘i er-a yinɛ, bo na.

³⁰Ɓɛɛ wese'i, wa tɛ tuɓi da̧ a zu o be Juda in o be Israɛl hee wan-wee ga; ká'í zɔk mɔ si mbɔɗɔnu, mɔ lɛŋ nɛ gba-tum kpɔ̧ɔ̧-kpɔ̧ɔ̧ in dita-see, ɓɛɛ mɔ nɛ‘i zɔk nɛ gba-kutu nɛ kpee zu sa̧a̧mɔ hirip.