Read Northwest Gbaya ESAII 51 Bible Online

ESAII 51 - Northwest Gbaya bible

ESAII 51

¹Ɓɛɛ GASA WAN tɔ̧: «Ɛ́nɛ́ o wi nɛ̀ nɛ́ ɗoŋ yuwar-kpasa-a, nɛ̀ kii deemɔ nɛ yuwar-a, ɛ́nɛ́ nɛ kii GASA WAN, ɛ̀nɛ̀ zíí wen kɔ‘m: Ɛ̀nɛ̀ bá yí‘nɛ́ nɛ ŋgɔn, Ɛ̀nɛ̀ zɔ́k ta nɛ wa sɛka de nɛ ɛnɛ; ɛ̀nɛ̀ zɔ́k o kɔ̧ ta fara n’ɛnɛ gboo nɛnɛ.

²Ɛ̀nɛ̀ zɔ́k dáà k’ɛ́nɛ́ Abraham in Sara, wi nɛ koo'nɛ́; ŋgimbi n'am saa nɛ Abraham, a̧ bó só nɛ̀ bem na; nɛ mɔ'ɔ n'am toka de yoŋgo zu a̧, ɓɛɛ a̧ ko o bem dun nù.»

³GASA WAN tɛ de ko ha̧ Siɔŋ gu nɛ bɛɛ-oi kɔ̧-a̧; a̧ tɛ de ha̧ fara-duk kɔ̧-a̧, nɛ duk so nɛ ŋga-gbárà'ɛ mɛ kifi duk nɛ fɔ Edɛn, ɓɛɛ fara-ŋga-nu tɛ kifi duk nɛ fɔ ko GASA WAN. O bíí tɛ ya nɛ tortɛ de nɛ nyɛŋɛ sɛn tɛ ye'i, ɓɛɛ wa tɛ bìì gima zɔn nɛ‘m, de nɛ osoko ha̧‘m mbɛt.

⁴«Ɛ́nɛ́ dukbíí kɔ‘m, ɛ́nɛ́ yéŋ zer'nɛ́ ɛ̀nɛ̀ zíí wen n'am tɛ tɔ̧‘i; ɛ́nɛ́, tugun bíí kɔ‘m, wen nɛ́ mi'i tɛ ha̧ heembea, ɓɛɛ gɔna kita kɔ‘m tɛ duk nɛ sa̧a̧mɔ ko o dukbíí lɛŋ.

⁵Gɔna-kita kɔ‘m nɛ yuwar-a duk dɔ̧ɔ̧ nɛ̀ ɛnɛ, yuwar-kpasa-a kɔ‘m hɔɔ tɛ‘nɛ́ kaɗi. Mi tɛ gɔn kita zu o dukbíí kɔ‘m; O see-kisi tɛ e ta nɛ‘m, wa a̧ e ta nɛ ŋgai kɔ‘m.

⁶Ɛ̀nɛ̀ bá yí‘nɛ́ nɛ ŋgɔn ɛ̀nɛ̀ zɔ́k yiwese, ɓɛɛ ɛ̀nɛ̀ zɔ́k mɔ si mbɔɗɔnu mbɛt. Yiwese tɛ yeli tur yak hee zi-wee ga, ɓɛɛ nu a̧ka̧ gbɛzɛ-gbɛzɛ hee ŋma a̧ka̧ laa ga. O bíí mɛ zaŋ-aa tɛ kum hee o kokoɗo-mɔ ga, ɓɛɛ yuwar-kpasa-a in deemɔ nɛ yuwar-a kɔ‘m tɛ duk kpoo nɛ kpoo nɛ nduti-a beka bo na.

⁷«Ɛ́nɛ́ o bíí kɔ‘m nɛ iŋa deemɔ nɛ yuwar-a, ɛnɛ dukbíí-kasi-heembea kɔ‘m, k’ɛ́nɛ́ pɛm nɛ zɛkɛɗa'nɛ́ nɛ wa zɛkɛɗi'i na, ká tɛ‘nɛ́ mbɔi wen o dara nɛ wa da̧ nɛ ɛnɛ‘i na!

⁸Wen zɛmɛ tɛ yi wa hee laa ga; dɔk tɛ a tɛ-wa hee ndárá sami ga, ɓɛɛ deemɔ nɛ yuwar-a in yuwar-kpasa-a kɔ‘m tɛ duk kpoo nɛ kpoo.»

⁹Ɛ̀nɛ̀ kúr GASA WAN, ɛ̀nɛ̀ kpásí yɛ; Ɛ̀nɛ̀ kpásí yɛ tɛ ŋgai k’ɛ́nɛ́; Hee mɔ'ɔ n’ɛnɛ kpasa so nɛ o kuti bíí mɛ ti ga! Bó nɛ́ ɛnɛ a̧ baa gɔm so Rahab,[22] pɔi nɛ ndiɓa ɗɔɔ gba-tɔp a nu pɛ́sɛ́-pɛ́sɛ́'ɛ́ na nde?

¹⁰Bó nɛ́ ɛnɛ a̧ dee so ha̧ gba-tɔp, in o yi mɛ gba ɗuka-fara mɛ ɔ̧si̧ kor mbɛt’ɛ na nde? Bó nɛ́ ɛnɛ a̧ baa pi̧ war nɛ ndaa-lembe ɗɔɔ gba-tɔp, ha̧ o bíí n’ɛnɛ gɔna zu wa mɛ ku yak’ɛ na?

¹¹O bíí nɛ GASA WAN gɔna zu wa tɛ pii ɗoŋ, wa tɛ bìì gima nɛ tortɛ ye nɛnɛ Siɔŋ, sɔnti-wa tɛ tok nɛ desee nɛ beka kaɗi na kpoo nɛ kpoo; ɓɛɛ wa tɛ ya nɛ tortɛ de nɛ nyɛŋɛ, wen gɔfamɔ in bɔnɛ yaka kaɗi.

¹²GASA WAN tɔ̧a̧: «Nɛ́ mi a̧ ha̧ ŋgai h’ɛ́nɛ́; ɛ́nɛ́ yú bíí nɛ fe fee’ɛ wen ge? Ŋma ɓɔn-zan-bíí bo na, o bíí zaŋnu hɔɔ ŋmaa in zɔ̧.

¹³Tɛ-mɛ bìí ɗoŋ GASA WAN, wan-de-mɛ, nɛ tata yiwese, ɓɛɛ ká de nu’ɛ? Tɛ-mɛ nak wese lɛŋ sɛn ti wi-de-ŋgamɔ in mɛɛ, nɛ kii mɛ gbɛ mɛ yinɛ wen ge? Nyimsea ko wi’ɛi tɛ de nɛ ge in mɛ ge?

¹⁴Ɗoŋ gboo wi-zɔɓɔ yinɛ nyɛi̧ ɓɔna; wa beka fe kɔ̧ fio'i na, ɓɛɛ nyɔŋmɔ beka ɓan wa na mbɛt.

¹⁵Mi nɛ GASA WAN Sɔ̧ kɔ-mɛ; wan nɛ de ha̧ gba-tɔp mɛ kur in mɛ pɛŋi’ɛ. Nin-am nɛ GASA WAN Sɔ̧ nɛ a̧a̧ nɛ ŋgayamɔ lɛŋ.

¹⁶Nɛ́ mi a̧ ee wen kɔ‘m kɔ̧ nú-mɛ́, ɓɛɛ mi kpe zu-mɛ nɛ gi̧ɔ̧ er-am. Mi tata yiwese e ŋgɔn mɛ; mi a̧ dee nu, ɓɛɛ mi tɔ̧ ha̧ Siɔŋ‘e, ‹Mɛ́ nɛ́ dukbíí kɔ‘m.› »

¹⁷Jerusalɛm, mɛ̀ tún, mɛ̀ kúr! Mɛ́ nɔɔ ɗele dɔ̧ɔ̧-nyimsea er GASA WAN; mɛ́ nɔɔ lɛŋ, ɓɛɛ nɛ mɔ'ɔ nɛ zik zu mɛ'ɛ.

¹⁸Mgbara o bem nɛ mɛ koa lɛŋ, ŋma nɛ mgbɔɔ mɛ bo na; kóó nɛ o wan nɛ mɛ daia mbɛt gbak mɛ na.

¹⁹O ŋgamɔ nɔ'ɔ yiitoo’ɛ tɛ tik zu mɛ, ɓɛɛ wi nɛ tɛ de ko ha̧ mɛ nɛ o? Nù kɔ-mɛ tɛ ɗaŋ kifi bɛɛ-oi, sɛka kaɓa in gba-paa tɛ kum o bíí kɔ-mɛ. Wi nɛ tɛ ga̧ see-mɛ nɛ o?

²⁰O bem kɔ-mɛ tira a nu; wa ya nɛ mgbara mɔ sinɛ hee ban a̧ baa pɛr ga. Nɛ ŋga nyimsea ko GASA WAN Sɔ̧ kɔ-mɛ a̧ tika zu wa, nɛ mɔ‘i a̧ de ŋmaa in wa.

²¹Ɛnɛ o wi-bɔnɛ mɛ Jerusalɛm, ɛ̀nɛ̀ zíí wen’ɛ; ɛ́nɛ́ nɛ zu'nɛ́ zik hee mɛ nɛ dɔ̧ɔ̧ a̧ gbɛ‘nɛ́ ga’ɛ.

²²Mɛ nɛ Wan kɔ-mɛ GASA WAN Sɔ̧ kɔ-mɛ, wan nɛ yor ɗoŋ mɛ a̧ tɔ̧ wen’ɛ: «Zɔk mi baa ɗele-zik-zu in ɗele-nyimsea kɔ‘m n'am ha̧a̧ so ha̧ mɛ yinɛ er-mɛ; mɛ beka nɔ a̧ woyo ɓɔna!

²³Mi tɛ ba ɗele'i ŋma er o wi-de-ŋgamɔ in mɛɛ, o wi nɛ tɔ̧ɔ̧ so ha̧ mɛ‘e, ‹Mɛ̀ gú nu h’ɛ́ɛ́ isi mɛ yak nɛ zu mɛ,› ɓɛɛ mɛ́ tɛ̀ɛ̀ sútí ɗoŋ-mɛ ŋunɛŋ ha̧ wa isi yak nɛnɛ hee yuwar ga.»