Read Northwest Gbaya ESAII 53 Bible Online

ESAII 53 - Northwest Gbaya bible

ESAII 53

¹Nɛ́ ge bíí ge a̧ kpɛka mɔ n’ɛɛ zia o? Nɛ́ o'o zɔka ŋgai ko GASA WAN tɛ mɔ n'aa dea o?

²Wi-de-tom'i gasa yi GASA WAN hee de mbɔɗi-te ga, hee kunin-te nɛ hɔ zu ŋga nu ga. Ŋma déè in demɔ mɛ tɛ-a bo na; a̧ de yí o bíí sɛka be de ká'í zɔka mɔ sitɛ a̧ na mbɛt.

³O bíí ee a̧ hee geemɔ ga, ɓɛɛ wa pi̧ a̧ taŋ; a̧ nɛ wi-nyimmɔ in wi-bɔnɛ mbɛt, a̧ hɔɔ ŋmaa in ŋma bíí nɛ‘i zɔk, ɓɛɛ wi kpee yí-wi tɛ zɔka a’ɛ ga; o bíí ee a̧ tɛ geemɔ, ɓɛɛ wa zɔk mɔ sitɛ a̧ na.

⁴Mɛ nɛ hegɔ, ŋga nyimmɔ nɛ tɛ̀ɛ́ tik so zu yɛ‘i tika zu a̧, bɔnɛ nɛ tɛ̀ɛ́ tik so zu yɛ tika zu a̧ mbɛt. Nɛ mɔ'ɔ n’ɛɛ taa k’ɛɛ‘e, Sɔ̧ gusa a̧, usi nɛ bɔnɛ ha̧ a̧, e nɛ a̧ tɛ geemɔ.

⁵Mɛ nɛ wen zu ɗaŋmɔ k’ɛɛ a̧ wa toka nɛ a̧, mɔ baa tɛ-a wen gbɛɛ-zu k’ɛɛ. Bɔnɛ n'aa zɔka dee h’ɛ́ɛ́ mɛ kpa ga̧a̧mɔ, ɓɛɛ nɛ o da̧i̧ kɔ̧-a̧ a̧ dee h’ɛ́ɛ́ mɛ kpasi.

⁶Ɛɛ lɛŋ yaa so yambali nɛnɛ hee o sami ga, kóó o nde ba nɛ yuwar kɔ‘i, ɓɛɛ nɛ mɔ'ɔ nɛ GASA WAN dee ha̧ ɗaŋmɔ k’ɛɛ lɛŋ mɛ tik zu a̧.

⁷Wa usa bɔnɛ ha̧ a̧ nɛ ŋgaya-a; a̧ mɔka see-aa. A̧ hú̧í̧ nú-a kóó tikiɗi na, kànà hee be-sami nɛ‘i ba nɛnɛ mɛ gɔn’ɛ ga, hee sami nɛ duk ti wan-gɔn-buma tɛ-a’ɛ ga. A̧ hú̧í̧ gee nú-a tikiɗi tɔ̧ wen na.

⁸Wa gɔna kita zu a̧ ba nɛ a̧, ɓɛɛ wa gbɛ a̧ mbɛt; nɛ́ ge bíí ge a̧ pi̧i̧ nú tɛ wen kɔ̧-a̧ ge? Wa baa a̧ yinɛ mgbara o bíí nɛ ya kpasa; wa gbɛɛ a̧ wen ɗaŋmɔ ko dukbíí kɔ̧-a̧.

⁹Wa ɗafa pɛsi kɔ̧-a̧ mgbara o wi-ɗaŋ; wa guna a̧ mgbara o wanmbɔi; bó nɛ́ a̧ dee ŋma ɗaŋmɔ, kà bó nɛ̀ dee ndela na mbɛt.

¹⁰GASA WAN usa bɔnɛ ha̧ a̧, ɓɛɛ a̧ ha̧ duka-kpasa kɔ̧-a̧ wen gɔna zu ɗaŋmɔ ko bíí. O bezaŋ-aa tɛ dɔk, in zɛ duka-a kɔ̧-a̧ tɛ dɔk zu nu’ɛ mbɛt, ɓɛɛ nɛ́ a̧ a̧ tɛ de ha̧ mɔ nɛ Sɔ̧ kɔ̧a̧ mɛ hɔ gba̧a̧.

¹¹Tɛ ŋga bɔnɛ n'aa zɔka'i, a̧ tɛ kpa o bezaŋ, ɓɛɛ a̧ duka ɗoŋ-aa nyɛi̧. Hee mɔ'ɔ nɛ a̧ nɛ wi-de-mɔ nɛ yuwar-a ga, wi-de-tom kɔ‘m'i tɛ de ha̧ o dɔka bíí mɛ ya nɛ o wi-de-mɔ nɛ yuwar-a, wen a̧ nɛ tɛ-a tuia o ɗaŋmɔ kɔ-wa.

¹²Mɛ nɛ wen hegɔ sa'm e a̧ mgbara o gasawi, ha̧ a̧ mɛ kɛ̧ mɔɔ-oi in o ŋga bíí, wen a̧ kpɛka mɛ fe ɓɛɛ wa tɔr a̧ mgbara o wi-gbin-heembea. A̧ gɔna zu o ɗaŋmɔ ko o giiwi, ɓɛɛ a̧ am mɔ zu o ɗaŋwi.