Read Northwest Gbaya ESAII 55 Bible Online

ESAII 55 - Northwest Gbaya bible

ESAII 55

¹A̧i̧yoo, ɛnɛ o wi nɛ wɔ-yí gbɛ lɛŋ, ɛ̀nɛ̀ tɛ́ ɛ̀nɛ̀ nɔ́ dɔ̧ɔ̧ in yibere mbɛt; ɛ̀nɛ̀ bá gée, ɛ́nɛ́ beka hi̧fi hi̧fi na. Ɛ̀nɛ̀ ák gba̧a̧ alkamaari, ɛ̀nɛ̀ nyɔŋ; ɛ̀nɛ̀ tɛ́ ɛ̀nɛ̀ nɔ́ yi; ɛ́nɛ́ beka hi̧fi dɔ̧ɔ̧ in yibere na mbɛt.

²Ɛ́nɛ́ ɗaŋ sede in ŋgai k’ɛ́nɛ́ zu mɔ nɛ sur zaŋ-wi na wen ge? Ɛ́nɛ̀ zíí wen kɔ‘m, ɓɛɛ ɛ̀nɛ̀ nyɔ́ŋ nɛ demɔ, ɛ̀nɛ̀ nyɔ́ŋ nɛ gba de nyɔŋmɔ nɛ tɛ ha̧ desee h’ɛ́nɛ́.

³Ɛ̀nɛ̀ zíí wen nú‘m ɓɛɛ ɛ̀nɛ̀ tɛ́ pii tɛ‘m h’ɛ́nɛ́ mɛ kpasi. Mi tɛ ha̧ o gba demɔ n'am ha̧a̧ so nú wen-aa ha̧ David h’ɛ́nɛ́, ɓɛɛ nɔɔ-tɔk kɔ‘m in'nɛ̀ɛ́ tɛ duk kpoo nɛ kpoo.

⁴Mi ee a̧ nɛ sedaako mɔɔ-ŋgai kɔ‘m o nú-gara dukbíí; a̧ nɛ wan in gasawi zu nu.

⁵Hegɔ Israɛl, mɛ tɛ sa o tugun bíí nɛ mɛ iŋ so wa na, in nɛ wa iŋ so mɛ na mbɛt, ɓɛɛ wa tɛ tɛ pii tɛ mɛ, wen nɛ̀ GASA WAN nɛ́ Sɔ̧ kɔ-mɛ, Nɛ mbetɛ, Sa̧a̧ Wi ko Israɛl ha̧a̧ gasamɔ ha̧ mɛ.

⁶Ɛ̀nɛ̀ kíí GASA WAN ŋgimbi n'aa biti e tɛ h’ɛ́nɛ́ mɛ kpa a̧‘i; ɛ̀nɛ̀ sá a̧ ŋgimbi n'aa biti katɛ‘nɛ́.

⁷Wi-ɗaŋ a̧ e yuwar n'aa ba'i duk, ɓɛɛ wi-ɗaŋ-mɔ a̧ e ɗaŋ taamɔ kɔ‘i duk mbɛt. Wa a̧ kifi see-wa ha̧ GASA WAN, ɓɛɛ a̧ tɛ de ko ha̧ wa; wa a̧ pii ɗoŋ tɛ Sɔ̧ k’ɛɛ, wen a̧ tɛ e ɗaŋmɔ ɓɔnsɛnɛ.

⁸GASA WAN'e nde: «Taamɔ kɔ‘m nyɛm ŋmaa in k’ɛ́nɛ́ na, in yuwar deemɔ k’ɛ́nɛ́ bo hee kɔ‘m ga na mbɛt.

⁹Hee mɔ'ɔ nɛ yiwese ɔ nyɛi̧a nɛ nu’ɛ ga, nɛ́ hegɔ mbɛt a̧ o deemɔ in o taamɔ kɔ‘m duk nɛnɛ in war k’ɛ́nɛ́.

¹⁰«Hee mɔ'ɔ nɛ kórò in ɓɔrɔ hɔ nɛ yiwese ŋgɔn mɛ pii mbɔɗɔnu ɓɔ nɛ nu, ha̧ nyɔnɔ mɛ gasi in ha̧ wi-gun-nyɔnɔ mɛ dɛm nyɔnɔ kaɗi, sɛka daŋa siɗoŋ'ɛ ga,

¹¹hegɔ mbɛt wen nɛ̀ gbo nɛ̀ kɔ̧ nú‘m beka pii ɗoŋ pii tɛ‘m sɔɔ gee na, hɔ ŋgimbi nɛ mɔ n'am kɔ̧a̧ tɛ de, in mɔ n'am tɔ̧ɔ̧ wen-aa'i tɛ hɔ gba̧a̧ kaɗi sɛ.

¹²«Ɛ́nɛ́ tɛ kur Babilɔŋ siɗoŋ nɛ desee, ŋma mɔ beka de'nɛ́ na; o kaya in o zu-tɔ̧́ tɛ hiɗi mɔ nɛ desee ti'nɛ́, ɓɛɛ o te zaŋbɛɛ lɛŋ tɛ ɓu er zu'nɛ́.

¹³O zawaya tɛ́ hɔ oi tɛn-dara, be te nɛ̀ pɛr-aa ɔ́ dee tɛ́ hɔ oi tɛn-ga̧a̧, ha̧ nin GASA WAN mɛ́ hur hee ŋma mɔɔ-usi-mɔ nɛ̀ tɛ-wi beka bi na ga kpoo nɛ kpoo.»