Read Northwest Gbaya ESAII 56 Bible Online

ESAII 56 - Northwest Gbaya bible

ESAII 56

¹GASA WAN tɔ̧a̧: «Ɛ̀nɛ̀ dé mɔ nɛ yuwar-a in nɛ tana-a, wen kpasamɔ in deemɔ kɔ‘m nɛ yuwar-a hɛɗa kaɗi.

²Mi tɛ ha̧ de sɔnti ha̧ o wi nɛ tɛ de mɔ n'am tɔ̧a̧‘i, kasi nɛnɛ, zɔk nɛ wese-ɔm-tɛ nɛ de-a, ɓɛɛ nɛ pi̧ tɛ tɛ ŋma ɗaŋmɔ na mbɛt!»

³Ká ŋma gɔni-duk nɛ ndak pata GASA WAN tɔ̧‘e, GASA WAN tɛ fo wi yinɛ mgbara dukbíí kɔ‘i na, ɓɛɛ ká kpàná tɔ̧‘e, kɔ‘i, wi nɛ kora te na!

⁴Wen GASA WAN tɔ̧a̧: «O kpàná nɛ tɛ kasi wese-ɔm-tɛ kɔ‘m nɛ de-a, nɛ de mɔ n'am kɔ̧a̧ duk nɛnɛ zaŋ nɔɔ-tɔk kɔ‘m,

⁵mi tɛ e ta-zu-nu kɔ̧ Tua in zaŋ ŋgeŋ kɔ‘m nɛ̀ tɛ ba nin-wa e ŋgɔn, nɛ̀ gana koo o be-wiwii in o be-okoo; mi tɛ ha̧ nin ha̧ wa nɛ tɛ-wi beka bi ɗoŋ-aa na kpoo nɛ kpoo.»

⁶Ɓɛɛ nɛ war ko o gɔni-duk nɛ tɛ ndak pata'm, ya nɛ o wi-de-tom kɔ‘m, zɔn nɛ nin-am, zɔk nɛ wese-ɔm-tɛ nɛ de-a, tu̧ nɛ tɛ-a, duk nɛnɛ zaŋ nɔɔ-tɔk kɔ‘m mbɛt,

⁷mi tɛ mgbɔ wa nɛnɛ si zu sa̧a̧ kaya kɔ‘m, ɓɛɛ mi tɛ de ha̧ wa mɛ kpa desee kɔ̧ Tua-wor-am. «Mi tɛ kpɛk o dɔɔ kpoo-sɔ̧ in o ɗafa-sɔ̧ kɔ-wa zu fara-ɗaf'am, ɓɛɛ nin Tua kɔ‘m tɛ duk nɛ Tua-kɔfi-sɔ̧ wen o dukbíí lɛŋ.»

⁸GASA WAN Sɔ̧ tɔ̧a̧: «Mi mɔi̧a so o be Israɛl nɛ pɛsa so, ɓɛɛ mi tɛ mɔi̧ o mbe-a woyo piinɛ ɗoŋ.»

⁹O saɗi mɛ zaŋbɛɛ in o wan mɛ kɔ̧ kombo lɛŋ, ɛ̀nɛ̀ gár tɛ́nɛ́ ɛ̀nɛ̀ nyɔ́ŋ mɔ.

¹⁰O gasa wi-duk-zu o be Israɛl bó nɛ̀ gbaayí na, wa iŋ mgbara mɔ na. Wa nɛ o ŋga bafa-toyo nɛ mgbu mɔ na; wa zur nɛ ya, ɔ nɛ ya, ɔ nɛ zu.

¹¹Mɔ kpɔk, wa nɛ o ŋga bafa-toyo nɛ nyɔŋ mɔ zaŋ sur na; koo o nde kii nɛ war mɔ kɔ‘i mɛ tɛ-wi, ɓɛɛ wi tɛ sa wa'e wi-dai-mɔ hee ge? Wa iŋ kɛ̧ɛ̧ mgbara mɔ na.

¹²Ɛ̀nɛ̀ zíí tɔ̧ɔ̧-wen kɔ-wa: «Ɛ̀nɛ̀ gár tɛnɛ ɛ̀ɛ̀ nɔ́ dɔ̧ɔ̧ in o ŋmaa! Dɔ̧ɔ̧ wan mɛ sa̧a̧mɔ tɛ gan wan mɛ sɔsɔɔ'ɛ!»