Read Northwest Gbaya ESAII 63 Bible Online

ESAII 63 - Northwest Gbaya bible

ESAII 63

¹Nɛ́ ge bíí ge a̧ tɛ nɛ Edɔm, si war Bɔsra nɛ o gbɛ̧-mɔ a̧a̧ tɛ laa kɔ̧-a̧‘i ge? Wi’ɛi ɓer nɛ yí-ŋguɗi sɛn ɗɔɔ gba-laa, e nɛ ta nɛ ŋgai kɔ‘i. Nɛ mi GASA WAN a̧ tɛ wen deemɔ nɛ yuwar-a; mɛ́ bi biro in o bíí wen kpasa dukbíí kɔ‘m.

²Wen ge o gbɛ̧-mɔ a̧a̧ tɛ laa kɔ-mɛ hee ko wi-vati-dɔ̧ɔ̧ ga ge?

³Mɛ̀ nɛ́ wen mi vata dɔ̧ɔ̧ ɛ̀n’ám, ŋma bíí mgbara dukbíí kɔ‘m gbak am na; sɛn zaŋ nyimsea kɔ‘m, mi i̧sa wa mbɔti ɓɛɛ tɔk-wa kpíɗí a tɛ o laa kɔ‘m; tɛ ŋga nyimsea'i mi ŋmaa wa, ɓɛɛ tɔk-wa ndɔr ɗaŋ nɛ o laa kɔ‘m lɛŋ.

⁴Sɛn kɔ̧ see-am, mi taa wese kifa-er hɔa, ŋgimbi kpasa dukbíí kɔ‘m hɔɔ kaɗi mbɛt.

⁵Mi kɛ̧i̧a̧ mɔ gbakna mi zɔka ŋma bíí wen gbaka'm wo, takaɗi. Ɗɛɗ‘am gɔna tɛ zɔka-a'e ŋma bíí mɛ gbak am bo na. Nɛ́ hegɔ s'am de mɔ‘i nɛ tɛ‘m, ɓɛɛ ŋga nyimsea kɔ‘m ha̧ ŋgai ha̧‘m.

⁶Sɛn tɛ ŋga nyimsea kɔ‘m mi mbɔla o dukbíí, tu̧u̧-see kɔ‘m gbɛɛ wa hee dɔ̧ɔ̧ ga, ɓɛɛ mi gbai tɔk tɛ-wa a nu.

⁷Tɛ‘m tɛ mbaŋ ɗoŋ o demɔ ko GASA WAN, mi tɛ zɔn a̧ wen zu o tom n'aa dee wen yɛ, in gasa kɔ̧ɔ̧mɔ kɔ̧-a̧ wen dukbíí Israɛl. GASA WAN kɔ̧ɔ̧ wa, de nɛ demɔ in wa.

⁸A̧ tɔ̧ɔ̧ wen’ɛ zu o be Israɛl: «O wi nɔ'ɔ nɛ dukbíí kɔ‘m nɛ mbetɛ, wa nɛ o bem nɛ beka e foe yí‘m na.» Hegɔ a̧ duka nɛ Wan-kpasi-wa.

⁹Tɛ ŋgimbi dita-see kɔ-wa lɛŋ, bó nɛ́ ŋma betom a̧ a̧ toma na, ɓɛɛ mɛ̀ nɛ́ a̧ nɛ tɛ-a a̧ kpasa wa. Sɛn tɛ kɔ̧ɔ̧mɔ in deako kɔ̧-a̧, a̧ nɛ tɛ-a gɔna zu wa, a̧ tuia wa, ɓuk nɛ wa nɛ ɗoŋ mɛ tɛnɛ ɓeemɛ.

¹⁰Zu-a'i, wa dee ŋgazu, ɓɛɛ wa tu̧ see sa̧a̧ Ɔmi kɔ̧-a̧. Hegɔ a̧ kifa duk nɛ wisɛn kɔ-wa, ɓɛɛ a̧ ba biro duk nɛ̀ wa.

¹¹Tɛ mɔ‘i, tɛ dukbíí mbaŋa ɗoŋ nyɛrɛ mɔ nɛ yaka so tɛ ŋgimbi ko Moisɛ‘e: «Wi nɛ mgbɔɔ so dukbíí kɔ‘i ku nɛ gba-tɔp, wan-dai o mɔ-dai a̧a̧ dee? Wi nɛ ha̧a̧ so Ɔmi ha̧ o bíí kɔ‘i’ɛ a̧a̧ dee?

¹²Mɛ̀ nɛ́ ŋgai te er-a a̧ duk so nɛ̀ war wii-er Moisɛ. A̧ dee ha̧ yì mɛ kɛ̧ sɛn ti dukbíí kɔ̧-a̧, ɓɛɛ mɔ‘i de ha̧ nin-a mɛ hur kpoo nɛ kpoo.

¹³Nɛ́ a̧ a̧ dee ha̧ wa mɛ ku gba-tɔp nɛ ndaa-lembe, ɓɛɛ wa duk hee ŋma nyaŋa nɛ‘i toŋgi na ga.

¹⁴Wa duk hee ŋma gii mɔ-dai nɛ zir si kɔ̧ ɗɔŋgɔ ga. Ɔmi ko GASA WAN mgbɔ so nɛ wa mɛ kpa ɔma-tɛ.» Nɛ́ hegɔ, a̧ ɛ́nɛ́ GASA WAN mgbɔɔ so nɛ dukbíí k’ɛ́nɛ́, de nɛnɛ ha̧ nin'nɛ́ mɛ hur.

¹⁵Sɛn yiwese nɛ̀ kɔ̧ sa̧a̧ Tua k’ɛ́nɛ́ nɛ ɔ dee nyɛmna mɛ tɛnɛ, ɛ̀nɛ̀ hú̧i̧ yi'nɛ́, ɛ̀nɛ̀ zɔ́k mɔ nɛ hɔ zu yɛ'ɛ. Gɔya tɛ-ɛɛ in wɔ tɛ-ɛɛ n’ɛnɛ de so nɛ ŋgai’ɛ, a̧a̧ dee? K’ɛ́nɛ́ dor tɛ‘nɛ́ tɛ usa kɔ̧ɔ̧mɔ h’ɛ́ɛ́ na, GASA WAN.

¹⁶Dáà k’ɛɛ nɛ́ ɛ́nɛ́, zɔmdáa k’ɛɛ Abraham iŋ kɔ‘i yɛ na, Jakob mbɛt, iŋ yí yɛ na. Ɓɛɛ k’ɛ́nɛ́ GASA WAN, ɛ́nɛ́ nɛ dáà k’ɛɛ, nin'nɛ́ nɛ́ Wan-kpasi yɛ hegɔ ɓɔnsɛnɛ.

¹⁷GASA WAN, ɛnɛ ee h’ɛ́ɛ́ mɛ yambali, yɔ nɛ mɔ nyɛi̧ nɛ o yuwar k’ɛ́nɛ́, ŋgai nɛ see yɛ, yu nɛ̀ kíí‘nɛ́ na wen ge? Ɛ̀nɛ̀ píí ɗoŋ wen zu yɛ o wi-de-tom k’ɛ́nɛ́, wen dukbíí nɛ duk nɛ́ mɔ k’ɛ́nɛ́ nɛ oi-aa.

¹⁸Sa̧a̧ dukbíí k’ɛ́nɛ́ kpaa nù nɛ mɔɔ-oi ɗoŋ-aa tɛ nyɛi̧ na; o wisɛn k’ɛɛ dee so ndiŋ a tɛ sa̧a̧ Tua k’ɛ́nɛ́.

¹⁹Ɓɛɛ kinii, zɛ ɔ dɔka n’ɛnɛ ɔ wan zu yɛ, ɛɛ dukbíí k’ɛ́nɛ́, ɓɔna; ɛɛ dukbíí nɛ wa sa so nin'nɛ́ zu wa ɓɔna mbɛt. Kà bó só h’ɛ́nɛ́ mɛ a̧k yiwese zir nɛnɛ tɛnɛ ga, o kaya tɛ̀ɛ́ nak ɓɛɛ mbaŋa sɛn ti'nɛ́.