Read Northwest Gbaya ESAII 65 Bible Online

ESAII 65 - Northwest Gbaya bible

ESAII 65

¹Mi duka so dɔ̧ɔ̧ wen kifa nú in gbaka bíí, ɓɛɛ bii ak am na; mi duka dɔ̧ɔ̧ wen gbaka bíí, ɓɛɛ wa kii gbakamɔ‘i na. Mi usa tɛ‘m'e «Mi nɛ mɔ'ɔ» ha̧ ŋma dukbíí nɛ iŋ so nin-am na.

²Mi nyɛi̧a er-am wese lɛŋ sitɛ dukbíí ŋgazu nɛ ba kɔ‘i nɛ ɗaŋ war, de nɛ mɔ nɛ see kɔ̧a̧.

³Wa nɛ ŋma dukbíí nɛ de mɔ hu̧si na, tu̧ nɛ see-am ɓɔnsɛnɛ; wa ɗafi nɛ sɔ̧ sɛn kpɛɛfɔ, dɔ nɛ fuu-nyama see zu fara-ɗafi-sɔ̧ nɛ‘i dee nɛ brik.

⁴Fara-ɔɔ kɔ-wa nɛ́ kɔ̧ pɛsi-fio in kɔ̧ di̧i̧; wa nyɔŋ nɛ kpoo ŋgɔya, ɓɛɛ wa aa o ndiŋ nyɔŋmɔ kɔ̧ o nyɛk kɔ-wa mbɛt.

⁵Wen nɛ wa tɔ̧ ha̧ o bíí nɛ wa kpa nɛ mɔ'ɔ: «Ɛ̀nɛ̀ yá nɛ nyɛi̧a-a, k’ɛ́nɛ́ fo tɛ yɛ na, wen ká simbo tɛ́ɛ̀ ba'nɛ́.»[27] Kà‘m zɔk yí-tom'i, ɓɛɛ see-am bíí nɛ wee tu̧ nɛnɛ.

⁶Mi kasa[28] deemɔ kɔ-wa'i e kɔ̧ see-am, mi beka e duk na, hɔ ŋgimbi n'am tɛ kifi er sɛnɛ ha̧ wa nɛ de-a.

⁷Mi tɔr o gbɛɛ-zu ko o zɔmdáa kɔ-wa tɔr in war kɔ-wa mbɛt. Mi GASA WAN a̧ tɔ̧ wɛn’ɛ. O zɔmdáa kɔ-wa nɔ‘i dɔ so nɛ fuu-nyama ha̧ o géé-sɔ̧ see zu o kaya, zɛkɛɗi nɛ‘m see zu o zu-tɔ̧́ mbɛt. Tɛ mɔ‘i, mi tɛ kifi er de nɛ mɔ nɛ tɛ tok see-wa sar, nyɛm nɛ ɗoŋ mɔ nɛ wa dee so.

⁸Nɛ GASA WAN a̧ tɔ̧ wen’ɛ: Bo nɛ ka'i kpa de sikila waya nyak-dɔ̧ɔ̧ nɛ ga̧i̧ kɔ̧ te-a, ɓɛɛ wi tɔ̧a̧‘e: «K’ɛ́ɛ́ ɗáŋ a̧ na, wen de be dɔ̧ɔ̧ tɛ gbo nɛ tɛ-a» na nde? Nɛ́ hegɔ a̧‘m tɛ de nɛnɛ in o wi-de-tom kɔ‘m mbɛt, ká‘m tɛɛ ɗaŋ wa yinɛ nɛ oi gun.

⁹Mi tɛ de ha̧ nutua ko Jakob mɛ kpa o bezaŋ; wi nɛ tɛ kpa o kaya kɔ‘m nɛ mɔɔ-oi tɛ gbo nɛ tɛ Juda. O kaya nɔ‘i tɛ duk nɛ ko o wi n'am hoka, ɓɛɛ wa dee ye zu a̧.

¹⁰Bɔkɔ-nu Sarɔŋ tɛ duk nɛ fara-nyɔŋ-mɔ ko o geɗek mɔ-dai, ɓɛɛ kɔ̧ ɗɔŋgɔ Akɔr duka wen o gasa mɔ-dai ko dukbíí kɔ‘m nɛ kii am.

¹¹Ɓɛɛ war k’ɛ́nɛ́ o wi nɛ ee GASA WAN duk, ká tɛ‘nɛ́ bi nɛ ɗoŋ yuwar sitɛ sa̧a̧ kaya kɔ‘m, k’ɛ́nɛ́ ɗafi nɛ̀ fara-nyɔŋ-mɔ ha̧ Gad sɔ̧-ha̧-de-sɔnti, á nɛ̀ zɛzɛ ha̧ Meni sɔ̧-e-zu-mɔ'ɛ,

¹²mi tɛ de ha̧ fio k’ɛ́nɛ́ mɛ duk nɛ ŋga fio-gba-paa. Ɛnɛ tɛ gbɛ zugur'nɛ́ nu wen ha̧ wa mɛ gɔn ger'nɛ́, wen mi saa so'nɛ́, ɓɛɛ ɛnɛ kɔ̧ sara na, mi tɔ̧ɔ̧ so wen, ɓɛɛ ɛnɛ kɔ̧ zia-a na. Ɛnɛ dee nɛ́ mɔ nɛ de tɛ‘m na, ɓɛɛ nɛ mɔ n'am kɔ̧ na'i, ɛ́nɛ́ hoka.

¹³Mɛ nɛ wen hegɔ sa mi GASA WAN Sɔ̧ tɔ̧‘e: Ŋgimbi nɛ wi-de-tom kɔ‘m tɛ nyɔŋ mɔ, ɓɛɛ k’ɛ́nɛ́, ɛ́nɛ́ tɛ ya nɛ wɔ. Ŋgimbi nɛ wa a̧a̧ kɔ-wa nɛ mɔɔ-nɔ, ɓɛɛ war k’ɛ́nɛ́, ɛ́nɛ́ tɛ fe wɔ-yì; ŋgimbi nɛ búù tɛ ba'nɛ́, o wi-de-tom kɔ‘m tɛ ya nɛ desee.

¹⁴Wa tɛ de nyɛŋɛ, gai nɛ mɔ nɛ desee, ɓɛɛ k’ɛ́nɛ́, ɛ́nɛ́ tɛ hiɗi nɛ mɔ nɛ ɗaŋsee, ai nɛ nú, see'nɛ́ ŋman nɛnɛ.

¹⁵Ŋgimbi nɛ o wi-de-tom kɔ‘m tɛ kan mɔ fom nɛ bíí, wa tɛ sa nɛ nin'nɛ́ tɔ̧ nɛnɛ‘e: «Sɔ̧ a̧ gbɛ mɛ hee ko o wi nɔ‘i ga.» Ɓɛɛ war ko o wi-de-tom ha̧‘m, wi tɛ a nɛ mbe nin ha̧ wa.

¹⁶Kóó o nde nɛ kɔ̧ɔ̧ mɛ kpa toka de yoŋgo zaŋnu’ɛ, tɛ tok yoŋgo nɛ nin kpasa Sɔ̧. Kóó o nde zaŋnu’ɛ nɛ tɛ kan mɔ tɛ kan mɔ nɛ nin kpasa Sɔ̧ mbɛt, wen tɛ‘m tɛ bi ɗoŋ bɔnɛ nɛ yaka so, mi beka iŋ wa ɓɔna. GASA WAN a̧ tɔ̧.

¹⁷Mi tɛ de mbe yiwese in mbe nu, ɓɛɛ tɛ-wi beka mbaŋ ɗoŋ gba̧‘a̧ mɔ nɛ yaka kaɗi ɓɔna; taamɔ-a beka bo kɔ̧ see-wi ɓɔna mbɛt.

¹⁸Bíí lɛŋ a̧ kpa nɛ desee, de nɛ tortɛ wen zu mɔ n'am tɛ de'i, wen mi tɛ mbo Jerusalɛm in dukbíí woyo, nɛ tɛ duk de nɛ nyɛŋɛ kpoo nɛ kpoo.

¹⁹Mi tɛ de nyɛŋɛ Jerusalɛm, ɓɛɛ mi kpaa desee zu dukbíí kɔ‘m mbɛt! Wi beka zii giti hi̧a̧ kɔ̧a̧ in hiɗimɔ ɓɔna.

²⁰Fara'i, be-zɔɗi beka fe nɛ haya-a na, pɛ ko gbɛ́rɛ́ tɛ dam kana kaɗi sɛka a̧ fea. Kà wí nɛ kpaa pɛ gɔmŋmaa fe, a̧ fee nɛ ŋgaiwi, ɓɛɛ wi nɛ fe nɛti ha̧ pɛ gɔmŋmaa, wi tɛ tɔ̧‘e, mɛ nɛ fom a̧ baa wi’ɛi.

²¹Sɛn fara'i, o bíí nɛ tɛ mbo tua, wa tɛ ɔ kana kɔ̧ a̧, ɓɛɛ o wi nɛ tɛ wa fɔ-nyak-dɔ̧ɔ̧ tɛ nyɔŋ kana waya-a.

²²Wa beka mbo tua ɓɛɛ ŋma gɔni bíí ɔɔ kɔ̧ a̧ na, kóó guna mɔ, ɓɛɛ ká ŋma bíí nɛtɛ nyɔŋa na mbɛt. Zɛ duka-a ko o bíí kɔ‘m tɛ dɔk hee ko te ga. Wa tɛ nyɔŋ mɔɔ-oi-tom nɛ wa dee nɛ er-wa.

²³Wa beka de tom ba nɛ̀ tɛ-wa ɓɔna, wa beka ko o bem nɛ tɛ fe fee gee na, wen wa tɛ ya nɛ o bezaŋ o bíí nɛ GASA WAN toka de yoŋgo zu wa, wa in o bezaŋ-wa.

²⁴Kɔ‘m, wa tɛ sa sara hɔ̧ɔ̧ na, ɓɛɛ mi kifa nú ha̧ wa kaɗi; wa tɛ tɔ̧ wen kaɗi hɔ̧ɔ̧ na, ɓɛɛ mi zia kaɗi.

²⁵O ɓoŋgo in o sami tɛ nyɔŋ mɔ kpɔk; dila tɛ nyɔŋ zɔ̧ hee ndai ga, ɓɛɛ war ko gɔ́k, nyɔŋmɔ kɔ̧-a̧ tɛ duk nɛ fuunu. Bíí beka de ɗaŋmɔ in ŋgamɔ sɛn zu sa̧a̧ kaya kɔ‘m nɛ oi-aa lɛŋ ɓɔna. Nɛ GASA WAN a̧ tɔ̧.