Read Northwest Gbaya ESAII 66 Bible Online

ESAII 66 - Northwest Gbaya bible

ESAII 66

¹Wen nɛ GASA WAN tɔ̧ nɛ mɔ'ɔ: «Yiwese nɛ damti kɔ‘m, ɓɛɛ nù nɛ mɔɔ-e-ɗɔɔ naŋ-am. Nɛ́ ge tua ge ɛ́nɛ́ nyɛma mɛ de ha̧‘m ge? Ge fara ge ɛ̀nɛ̀ tɛ de ha̧‘m mɛ ɔm tɛ‘m sɛnɛ ge?

²Mɔɔ nɔ'ɔ lɛŋ nɛ tom nɛ er-am dea, ɓɛɛ wa lɛŋ nɛ kɔ‘m. GASA WAN a̧ tɔ̧. Ɓɛɛ wi n'am kɔ̧a̧, mɛ nɛ wisan in wi-kɔsa nɛ zii wen kɔ‘m ɓɛɛ see ŋmana.

³«Kà wa gɔn ndai ɗafi nɛ sɔ̧, ɓɛɛ wa gbɛɛ bíí mbɛt; kà wa gɔn be-sami ɗafi nɛ Sɔ̧, ɓɛɛ wa gbɛɛ toyo mbɛt. Wa ha̧ fuu-alkamaari nɛ ha̧a̧mɔ ha̧‘m, ɓɛɛ wa ha̧a̧ tɔk ŋgɔya mbɛt. Wa dɔ fuu-nyama ha̧‘m, ɓɛɛ wa zɔna o géé-sɔ̧ kɔ-wa mbɛt. O wi nɔ‘i kpɛka mɛ ba nɛ yuwar nɛ see-wa kɔ̧a̧, kpa nɛ desee tɛ mɔɔ-ndiŋ nɛ wa de'i.

⁴Kɔ‘m, mi hoka ha̧ wa mɛ kpa mɔɔ-oi ŋgazu kɔ-wa. Mi tɛ de ha̧ ŋgamɔ nɛ wa yu'i mɛ tik zu wa, wen mi saa so wa, ɓɛɛ ŋma bíí kóó kpɔk kɔ̧ sara na; mi tɔ̧ɔ̧ so wen, ɓɛɛ wa kɔ̧ zia-a na. Wa dee nɛ mɔ nɛ de tɛ‘m na, ɓɛɛ nɛ mɔ n'am kɔ̧ na, a̧ wa hoka.»

⁵O wi nɛ zia wen ko GASA WAN, ɓɛɛ ká see'nɛ́ ŋman’ɛ, ɛ̀nɛ̀ zíí wen n'aa tɔ̧: Wen nɛ o nya k’ɛ́nɛ́ nɛ bɛ̧ɛ̧‘nɛ́ ndak nɛ ɛnɛ mgbara wa yinɛ, wen zu nin-am tɔ̧, nɛ́ mɔ'ɔ: «GASA WAN a̧ usi gasamɔ kɔ‘i h’ɛ́nɛ́ mɛ kpa desee de nɛ gbaŋa-a h’ɛ́ɛ́ zɔk.» Ɓɛɛ nɛ́ wa a̧ foe tɛ ba.

⁶Gitimɔ a̧ de mɔ tɛnɛ nɛ saaye'i, gitimɔ‘i tɛ nɛ kɔ̧ Tua ko Sɔ̧ tɔ̧ nɛnɛ‘e: Mɛ nɛ GASA WAN a̧ ha̧ mɔɔ-oi-tom kɔ-wa ha̧ o wisɛn kɔ‘i.

⁷Jerusalɛm koo bem nɛti ha̧ zaŋ mɛ i̧si̧, a̧ kóó be-wiwii nɛti ká zaŋ tɛ nyim hɔ̧ɔ̧ na.

⁸Nɛ o'o zia pɛrti mɔ hegɔ kaɗi o? O'o zɔka pɛrti mɔ‘i o? Ŋma ye nyɛma mɛ gasi kpɔk wese, koo ŋma nu hee gɔma-yí ga nde? Mɔ nɛ hɔɔ zu Siɔŋ nɛ mɔ'ɔ: Zaŋ-aa tɛ nyim gee nyima-a na, ɓɛɛ a̧ ko bem.

⁹«Ka'm nɛ hu̧i̧a̧ yuwar ha'i mɛ ko, ɓɛɛ mi beka e ha̧ bem-a mɛ gbo na nde? Mi nɛ dee ha'i mɛ ko bem, ɓɛɛ mi tɛ dor woyo nde?» GASA WAN a̧ tɔ̧.

¹⁰Ɛnɛ o bíí nɛ kɔ̧ɔ̧ Jerusalɛm, ɛ̀nɛ̀ kpá desee de nɛ nyɛŋɛ in a̧. Ɛnɛ o wi-zim-mɔ wen ŋgamɔ nɛ kpaa so a̧, ɛ̀nɛ̀ dé tortɛ in a̧.

¹¹Hee mɔ'ɔ nɛ naa-wan-bem ha̧ nɛ bere ha̧ be-zɔɗi, ɓɛɛ ká ama nɛ desee’ɛ ga, ɛnɛ tɛ am ber-aa zaŋ‘nɛ́ sur ɓɛɛ see'nɛ́ ga̧a̧.

¹²Wen nɛ GASA WAN tɔ̧ nɛ mɔ'ɔ: «Mi tɛ tom ga̧a̧mɔ si Jerusalɛm hee yi a̧ fok ga, in mbɔi ko o zuduk bíí hee ha̧a̧-yì a̧ pii ga. A̧ tɛ pi̧ bere nú‘nɛ́ hɛr nɛ ɛnɛ ɗoŋ-aa, hee mɔ'ɔ nɛ naa-wan-bem de nɛnɛ in bem kɔ‘i’ɛ ga.

¹³Mi tɛ ga̧ see'nɛ́ ɓɛɛ ɛnɛ kpa desee mbɛt hee mɔ'ɔ nɛ naa-wan-bem de kana nɛnɛ'ɛ ga. See'nɛ́ tɛ ga̧ sɛn Jerusalɛm nɛ mbetɛ,

¹⁴ɓɛɛ o gba̧a̧-tɛ‘nɛ́ tɛ kpa ŋgai hee mɔ'ɔ nɛ mbɔŋgi ɓɔ nɛnɛ nú kórò'ɛ ga.» GASA WAN tɛ duk zu o wi-de-tom kɔ‘i, ɓɛɛ nyimsea kɔ̧-a̧ tika zu o wi-sɛn-a.

¹⁵GASA WAN a̧ tɛ‘i, a̧ duk mgbara leɓe-wee, ɓɛɛ keekee kɔ̧-a̧ nɛ hara-búk. A̧ tɛ mɛ yoɓi nyamandoi-nyimsea kɔ̧-a̧ nɛ̀ tu̧u̧-see, in nyamandoi-nasa-bíí kɔ̧a̧ nɛ̀ leɓe-wee.

¹⁶GASA WAN tɛ gɔn kita zu bíí lɛŋ nɛ̀ wee in gba-paa, ɓɛɛ ɓaa-wen tɛ tik zu o bíí nɛ dɔka-a.

¹⁷O wi nɛ tɔ̧‘e wi nɛ sa̧a̧-wi, war-tɛ-wi ɗaŋ na kóó tikiɗi ŋma ndiŋ bo tɛ-wi na kóó tikiɗi, ɓɛɛ yee kpɛɛfɔ yor nɛnɛ ɗoŋ kuti bíí nɛ yor see-a, nyɔŋ nɛ kpoo ŋgɔya in o ŋma ndiŋ saɗi, gu nɛ o zɔya, tɛ kum lɛŋ. Nɛ GASA WAN a̧ tɔ̧.

¹⁸Mi iŋa yí-tom kɔ-wa in mɔ nɛ wa ta kɔ̧ see-wa. Mi tɛ tɛ mɛ mɔi̧ o tugun bíí lɛŋ nɛ tɔ̧ nú nɛtɛ nɛtɛ ha̧ wa mɛ zɔk gasamɔ kɔ‘m.

¹⁹Mi tɛ e ŋma mɔɔ-usi-mɔ mgbara wa, ɓɛɛ mi toma o ŋma bíí nɛ mɔ hɔɔ yɔɔ zu sitɛ o tugun bíí: mɛ nɛ o bíí Tarsis, Pul in Lud, nɛ ya nɛ o ŋga wi-pi̧-góò; wa tɛ nɛ sitɛ o bíí Tubal in Yavaŋ mbɛt, gu nɛ o see-kisi nɛ ɔ nyɛi̧a lɛŋ nɛ tɛ zii nyɛrɛ kɔ‘m hɔ̧ɔ̧ na, kà wa zɔk nɛ gasamɔ kɔ‘m na mbɛt. O betom kɔ‘m tɛ usi gasamɔ kɔ‘m ha̧ o tugun bíí nɔ‘i,

²⁰ɓɛɛ wa kaia o nya'nɛ́ lɛŋ nɛ pɛsa so dam ɗoŋ o nù nɛtɛ nɛtɛ piinɛ sɛn zu o nyaŋa, o keekee in o mɔɔ-gɔ-wi, o tuifuu in o ŋgeloba hɔ nɛnɛ zu sa̧a̧ kaya kɔ‘m Jerusalɛm. GASA WAN a̧ tɔ̧. Mɔ‘i tɛ duk nɛ ha̧a̧mɔ ɗaf'am, ɓɛɛ mi tɛ kpɛk, hee mɔ'ɔ nɛ o be Israɛl e so nɛ ha̧a̧mɔ kɔ̧ o sa̧a̧ nyɛk ha̧ nɛnɛ kɔ̧ Tua kɔ‘m’ɛ ga.

²¹Mi tɛ hok o wi-ɗafi-sɔ̧ in o be Levii mgbara wa mbɛt. GASA WAN a̧ tɔ̧.

²²«Hee mɔ'ɔ nɛ mbe yiwese in mbe nù n'am tɛ de tɛ duk nɛ nɔa-a ti'm ga, bezaŋ‘nɛ́ in nin'nɛ́ tɛ duk sɛn ti'm hegɔ mbɛt. GASA WAN a̧ tɔ̧.

²³«Dam ɗoŋ mbe yí-zɛ lɛŋ in wese-ɔm-tɛ mbɛt, bíí lɛŋ tɛ tɛɛ gbɛ zugur nu ti'm! GASA WAN a̧ tɔ̧.

²⁴Tɛ gboa-a, wi tɛ zɔk wɔr o bíí, nɛ dee so ŋgazu in am; o dɔk nɛ aa tɛ wa beka fe na, in wee nɛ dɔ wa'i mbɛt bi na, ɓɛɛ wa tɛ duk nɛ mɔɔ-nyɛr wen bíí lɛŋ.»