Read Northwest Gbaya ESAII 7 Bible Online

ESAII 7 - Northwest Gbaya bible

ESAII 7

¹Duka nɛ tɛ ŋgimbi ko Ahaz bem ko Yotam, be-koo Ozias wannu Juda, in wannu Aram nɛ‘i sa'e Rɛsin, ká bá Pɛkaŋ bem ko Rɛmalia, wannu Israɛl, a̧ wa lɛŋ mɔi̧a ŋmaa kpa, ɓɛɛ nɛ́ mɛ bi Jerusalɛm wen ha̧ wa mɛ ba a̧, ɓɛɛ mɔ‘i gan wa.

²Ɓɛɛ nyɛrɛ mɔ‘i a zer o bíí nutua ko David'e nde, Aram baa Efraim. See wannu in o bíí saaye kɔ‘i ku̧u̧ naŋ naka-a hee mɔ'ɔ nɛ wa̧a̧-te kɔ̧ kombo nak nɛnɛ ŋgimbi nɛ búk yu nɛnɛ'ɛ ga.

³Ɓɛɛ GASA WAN tɔ̧ ha̧ Esaii: «Mɛ̀ kúr in bem kɔ-mɛ Sɛar-Yasub, ɛ̀nɛ̀ nɛ́ɛ̀ kpá Ahaz sɛn ká̧ gɔna-yi fara-zui-yi nɛ duk ka̧ fɔ fara-fɔr-mɔ mɛ‘i,

⁴ɓɛɛ mɛ̀ tɔ̧́ ha̧ a̧ nde: ‹Mɛ̀ nɔ́ ŋgiɗi, ká tɛ-mɛ nak na; ká kíì de mɛ na, ká see-mɛ to wen zu ŋga nyimsea ko Rɛsin be Sirii in bem ko Rɛmalia na, wen wa nɛ o gee nú-wee yiitoo nɛ tur sɔɔ gee.›

⁵Mi iŋa'e Aram in Efraim ká bá nɛ̀ bem ko Rɛmalia ee nú-wa mɛ nɛɛ bi mɛ; wa tɔ̧ɔ̧ nde:

⁶‹Ɛ̀ɛ̀ nɛ̀ɛ́ bí Juda pi̧ nɛ kíì tɛ-a, k’ɛ̀ɛ̀ nɛ ba a̧ kaɗi, ɓɛɛ ɛ́ɛ́ èè bem ko Tabeɛl nɛ wannu zu nu'i.›

⁷Ɓɛɛ wen nɛ GASA WAN tɔ̧ nɛ mɔ'ɔ: ‹Ee-zu-wen kɔ-wa'i beka yor na, mɔ‘i beka de na,

⁸wen Damas nɛ́ gasa ye zu nu Sirii, ɓɛɛ Rɛsin nɛ wanye Damas ɓɛɛ; Samarii nɛ gasa ye zu nu Efraim, ɓɛɛ Pɛka nɛ wanye Samarii mbɛt ɓɛɛ; hegɔ oi-aa ɓɔna nɛ pɛ ɓu-mɔɔrɔ-ɗoŋ-kpɔk-zua-mɔɔrɔ, ɓɛɛ wi beka zii nin dukbíí Efraim ɓɔna.› Mɔ kpɔk, k’ɛ̀nɛ̀ e ta nɛ‘m na, ɛ́nɛ́ beka duk hɔ ti na.»

¹⁰GASA WAN tɔ̧ɔ̧ wen ha̧ Ahaz woyo:

¹¹«Mɛ ak mɔɔ-usi-mɔ er GASA WAN Sɔ̧ kɔ-mɛ, kóó mɔ‘i duka so nɛ ɗuka-a si ɗɔɔ nu mɛ, kóó mɔ‘i kusa so to yiwese mɛ.»

¹²Ahaz kifa nú: «Weyaa! Mi beka ak mɔ na! Mi beka we GASA WAN na.»

¹³Ɓɛɛ a̧ tɔ̧ woyo: «O bíí nutua ko David ɛnɛ zii! Dee bɔnɛ n’ɛnɛ de nɛ bíí‘i tɛ nyɛm tɛ‘nɛ́ na nde? Wen ge s’ɛnɛ kii mɛ sakali Sɔ̧ kɔ‘m ge?

¹⁴Kinii, mɛ nɛ GASA WAN nɛ tɛ-wi a̧ tɛ de mɔɔ-usi-mɔ h’ɛ́nɛ́. Zɔk kinii, ŋma be-zɔŋa baa zaŋ, ɓɛɛ a̧ tɛ ko nɛ be-wiwii, a̧ tɛ a nin-a'e Emmanuɛl. [5]

¹⁵Nyɔŋmɔ kɔ̧-a̧ tɛ duk nɛ yibere in gɔrɔ hɔ ŋgimbi n'aa tɛ iŋ bɛ̧a̧ ɗaŋmɔ wen dee demɔ.

¹⁶Nɛti ha̧ bem’ɛi mɛ siŋ ɗaŋmɔ pi̧ nu mɛ de nɛ demɔ‘i, nu ko o wan nɔ'ɔ yiitoo nɛ mɛ de kíí wa'i tɛ kifi nɛ geemɔ.

¹⁷«GASA WAN tɛ fo ŋma ŋgamɔ tɛnɛ pii zu mɛ, pii zu dukbíí kɔ-mɛ, ká bá nɛ̀ tua ko dáà kɔ-mɛ; mɔ‘i n'aa tɛ fo tɛnɛ‘i nɛ ŋma ɗaŋ wese nɛ mɛ tɛ zɔk nɛti na, ku̧u̧naŋ nɛ Efraim kɛ̧̀ɛ̧́ nɛ̀ tɛ nɛ Juda wannu Asirii.

¹⁸Wese'i GASA WAN tɛ tom o zifa tɛnɛ nɛ sara-ku Nil, yi ko o be Egiptɛ, ɓɛɛ o zi-gɔrɔ tɛ tɛ kɔ‘i nɛ nu Asirii mɛ.

¹⁹Wa tɛ tɛ lɛŋ mɛ hur o gboŋgo in o mgbara ta, hur nɛ o kásà, in o fara-nyɔŋmɔ ko o mɔ-dai lɛŋ.

²⁰«Wese'i, GASA WAN tɛ kpui buma tɛ-mɛ in mui-zu-mɛ ká bá nɛ̀ zera kɔ-mɛ lɛŋ a nu nɛ ŋma pai mɛ kúr gasa yì mɛ. Pai'i nɛ wannu Asirii.

²¹«Wese'i, kóó o nde tɛ dai nana-ndai kpɔk in sami yiitoo;

²²ɓɛɛ hee mɔ'ɔ nɛ o saɗi nɔ‘i tɛ ha̧ yibere nɛ dɔka-a ga, oi bíí nɛ ɓɔna tɛ ye'i tɛ nyɔŋ nɛ kaŋa-yibere in gɔrɔ. Nɛ́ kaŋa-yibere in gɔrɔ a̧ wa tɛ dai nɛ tɛ-wa.

²³«Sɛn wese'i, o de fara nɛ wa dɛma so o nyak-dɔ̧ɔ̧ sɛnɛ nɛ nyɛma so mɛ ha̧ sede ha̧ wa'i tɛ kifi nɛ o tɛn-dara in o tɛn.

²⁴O bíí tɛ kai o goo mɛ nɛɛ de gia sɛn fara'i, wen o tɛn-dara in o tɛn da̧a̧ kpe zu wa lɛŋ.

²⁵O bíí beka nɛ zu o kaya nɛ‘i gbuta so nu sɛnɛ‘i na; wen nɛ o tɛn-dara in o tɛn da̧a̧ kpe fara'i lɛŋ; fara'i kifa nɛ fara-nyɔŋ-mɔ ko o ndai in fara-dai o sami.»