Read Northwest Gbaya ESAII 8 Bible Online

ESAII 8 - Northwest Gbaya bible

ESAII 8

¹GASA WAN tɔ̧ɔ̧ ha̧‘m: «Mɛ̀ bá de sɛka-ta, ɓɛɛ mɛ̀ yɔ́r wen’ɛ ‹Mahɛr-Salal-Has-Baz›[6] sɛnɛ nɛ sa̧a̧-a̧ ha̧ bíí mɛ tɔr.»

²Ɓɛɛ mi usi sɛka-ta'i ha̧ o kpasa wi-sedaako yiitoo, Uria wi-ɗafi-sɔ̧ in Zakarii bem ko Yeberekia.

³Nɛ mɔ'ɔ n'am duka in kóò kɔ‘m, okoo-tɔ̧-wen oi nú Sɔ̧ mɛ zɛ wese'i; a̧ baa zaŋ, ɓɛɛ a̧ ko nɛ be-wiwii, ɓɛɛ GASA WAN tɔ̧ ha̧‘m'e, a̧‘m sa nin-a'e Kpan-nɔ-Tik-zu-mɔ,

⁴wen nɛti ha̧ bem’ɛi mɛ iŋ saa «dáà», kóò «naa», wa tɛ kai o dɔka mɔ nɛ Damas in o mɔɔ-oi-biro nɛ Samarii mɛ tɛnɛ ti wannu Asirii.

⁵GASA WAN tɔ̧ɔ̧ wen ha̧‘m woyo:

⁶«Hee mɔ'ɔ nɛ dukbíí'ɛ bɛ̧a̧ yi Siloe nɛ fok nɛ ga̧a̧-a̧, nɛ mɔ'ɔ nɛ tɛ-wa duk nak nɛnɛ nɛ kíì wen zu Rɛsin in Pɛka bem ko Rɛmalia ga,

⁷GASA WAN tɛ de ha̧ nana-yì mɛ ha̧ hur wa, kpe zu wa gu nɛ wannu Asirii nɛ oi ŋgayamɔ kɔ‘i, nana-yì‘i tɛ ha̧ yak nu ŋgere;

⁸a̧ tɛ ha̧ hur Juda lɛŋ nɛ‘i beka zɔk zu ye'i na. Yi tɛ ha̧ ba ger-wa, ɓɛɛ tɛ kpe zu nu kɔ-mɛ lɛŋ, Emmanuɛl!»

⁹O dukbíí, tɛ‘nɛ́ a̧ nak, ɓɛɛ wa a̧ kum'nɛ́ a nu gbuɗuk! Ɛnɛ o zika-nù mɛ nyɛi̧a fara, ɛnɛ zii, kóó ɛ́nɛ́ ɗafi o boi-de-biro k’ɛ́nɛ́, biro tɛ yai'nɛ́ ɗɛsɛ-ɗɛsɛ; kóó ɛ́nɛ́ saŋa so tɛ‘nɛ́ nɛ o boi-biro k’ɛ́nɛ́ lɛŋ, wa tɛ mbɔli'nɛ́ tɛ biro'i.

¹⁰Kóó ɛ́nɛ́ ee nɛ zu-mɔ k’ɛ́nɛ́, ndaa mɔ‘i beka tu̧ na, kóó ɛ̀nɛ̀ tɔ̧ nɛ ŋma de wen, gba̧a̧-wen'i tɛ gbo zan, wen Sɔ̧ a̧a̧ in yɛɛ.

¹¹Mɔ nɛ GASA WAN tɔ̧ɔ̧ ha̧‘m ŋgimbi n'aa foo nɛ‘m wen ká‘m tɛɛ ba yuwar ko dukbíí'ɛ nɛ mɔ'ɔ:

¹²«K’ɛ́nɛ́ ye tɛ ɗaŋ baa keta kɔ-wa na; mɔ nɛ wa yu, k’ɛ́nɛ́ yu k’ɛ́nɛ́ na; k’ɛ́nɛ́ de kíì na mbɛt.»

¹³Mɛ nɛ GASA WAN nɛ a̧a̧ nɛ ŋgayamɔ lɛŋ, ɛ̀nɛ̀ tɛ tu̧ tɛ-a, nɛ́ a̧ kpɔk ɓɛɛ a'i tɛ yu, ɓɛɛ kana nɛ́ a̧‘i nɛ̀ duk nɛ́ zɔm-mɔ.

¹⁴Nɛ́ a̧ a̧ duk nɛ́ Sa̧a̧ Fara, ta-kɔ̧-naŋ in fara-yo-nu wen nutua ko Juda in Israɛl. A̧ duk nɛ sak in pɛ́r mbɛt ha̧ o wi Jerusalɛm.

¹⁵Dɔka bíí tɛ kɔ̧ naŋ nɛ ta'i; wa tɛ tir a nu, ɓɛɛ wa tɛ gbin. Pɛ́r tɛ ba wa, ɓɛɛ wa tɛ kai wa yaknɛ nɛ bara-biro.

¹⁶Mi dee sedaako hɔɔ-zu in usamɔ ha̧ o ŋgaiwi kɔ‘m; mɔ‘i nɛ́ Sɔ̧'ɔ̧ usa ha̧‘m, ɓɛɛ mi mbo nú-wa ha̧ mɔ‘i mɛ ɓɔn kɔ̧ see-wa.

¹⁷Mi zɛm nɛ GASA WAN nɛ zik ɗoŋ e ha̧ o be nutua ko Jakob'i, wen mi e ta nɛ a̧.

¹⁸Mi in o bem nɛ GASA WAN ha̧a̧ ha̧‘m, ɛ́ɛ́ ya nɛ mɔɔ-usi-mɔ zu mɔ nɛ̀ tɛ̀ hɔ zu Israɛl; ɓɛɛ mɔ‘i tɛ tɛ kɔ‘i nɛ̀ tɛ̀ GASA WAN nɛ a̧a̧ nɛ ŋgayamɔ lɛŋ nɛ duk kɔ‘i zu kaya Siɔŋ mɛ‘i.

¹⁹Ɓɛɛ kà wa nɛ tɔ̧ɔ̧ h’ɛ́nɛ́‘e nde: «Ɛ̀nɛ̀ nɛ́ɛ̀ zɔ́k o wi-sa-sɔ̧-fio, koo nɛ o wi-a-tani nɛ tɔ̧ wen nɛ ɗɔɔ nu. Bo nɛ dukbíí zaŋnu’ɛ tɛ kii nɛ sɔ̧ kɔ‘i in sɔ̧-fio wen zu o bíí kɔ‘i nɛ ya kpasa na nde?»

²⁰Kà wa nɛ́ tɔ̧ɔ̧ hegɔ, ɛ́nɛ́ tɛ kifi nú‘e nde: «Nɛ́ tɛ usamɔ in sedaako ko Sɔ̧ a'i tɛ pii ɗoŋ sɛnɛ ɛ̧.» Wi nɛ kpɛk wen'i na beka zɔk gɔna-ndaa-zan na.

²¹Tɛ yara-a tɛ nu'i mɔ tɛ ba tɛ-wa nyɛmna in kaɓa tɛ ba wa mbɛt. Ŋgimbi nɛ wɔ be tɛɛ gbɛ wa a̧ see-wa tɛ ɗaŋ nɛnɛ, ɓɛɛ wa foma wannu in Sɔ̧ kɔ-wa mbɛt. Wa tɛ ba yí-wa mɛ zɔk mɔ si ŋgɔn,

²²ɓɛɛ kà wa zɔk mɔ si ɗɔɔ, mɔ nɛ wa tɛ zɔk'i nɛ gasa bɔnɛ, zɔm tum kpɔ̧ɔ̧-kpɔ̧ɔ̧ in tu̧u̧-see!

²³Kinii tum bo zu nu nɛ duka so zaŋ bɔnɛ-dita-see ɓɔna, wen tɛ kuti ŋgimbi, GASA WAN dee so ha̧ foe mɛ ba nu ko Zabulɔŋ in Nɛftalii. Ɓɛɛ tɛ ŋgimbi nɛ tɛ‘i, a̧ tɛ de ha̧ tu̧u̧-tɛ-mɔ in zɔnamɔ mɛ duk zu o ye si war nu gba-tɔp si kur Jurdɛn nu Galilee mɛ, fara ko o gɔni-duk.