Read Northwest Gbaya ESAII 9 Bible Online

ESAII 9 - Northwest Gbaya bible

ESAII 9

¹Dukbíí nɛ duka so zaŋ tum zɔka gasa sa̧a̧mɔ, o bíí nɛ yaa so ti tum in ɗɔɔ gi̧ɔ̧-fio zɔka sa̧a̧mɔ.

²Ɛnɛ ha̧a̧ desee ha̧ wa gan kuti-a, bíí zɔka tortɛ nɛ wa de'i. Wa de nɛ nyɛŋɛ ti'nɛ́ hee mɔ'ɔ nɛ bíí de nɛ nyɛŋɛ ŋgimbi-mɔi-nyɔnɔ'ɛ ga, kana hee mɔ'ɔ nɛ‘i de nɛ tortɛ wese kɛ̧ mɔɔ-oi-biro nɛ er ŋmaa’ɛ ga.

³Kpáŋá nɛ duka so mɛ diti a̧'ɛ, zɔm gasa mboɗa boi nɛ duka so zu kóŋgó-ɓaa-a'i, in nyasi ko wan-nasi a̧‘i, ɛnɛ gbina mɔɔ nɔ‘i a nu hee mɔ'ɔ n’ɛnɛ gbina so nɛ o boi ko o bíí Madiaŋ ga.

⁴O ŋga ndárá-de-biro lɛŋ, gu nɛ o gasa laa nɛ duna nɛ tɔk lɛŋ, wa dɔɔ nɛ wee.

⁵Wen wa koo ŋma bem h’ɛ́ɛ́, bem’ɛi nɛ be-wiwii. Mɔɔ-wan lɛŋ duk zu koŋgó-ɓaa-a; nin nɛ wa aa ha̧ a̧ nɛ mɔ'ɔ: De wan-tɔ̧-mbɔrɔ, Sɔ̧ nɛ a̧a̧ nɛ ŋgai, dáà nɛ duk ɓɔnsɛnɛ, Wan ko ga̧a̧mɔ.

⁶Mɔɔ-wan kɔ̧-a̧ tɛ gasi, ɓɛɛ ga̧a̧mɔ tɛ duk hegɔ ɓɔnsɛnɛ zu damti mɔɔ-wan ko David n'aa ɗafa, wen kpaa ŋgai tɛ deemɔ nɛ yuwar-a in kpasawen, ku̧u̧naŋ-a kinii hegɔɔ yaknɛ kpoo nɛ kpoo. Nɛ́ tɛ gasa kɔ̧ɔ̧mɔ ko GASA WAN nɛ a̧a̧ nɛ ŋgayamɔ lɛŋ a̧ mɔ‘i tɛ de nɛnɛ.

⁷GASA WAN tɔ̧ɔ̧ ŋma wen zu Jakob, ɓɛɛ wen'i tik zu Israɛl.

⁸Dukbíí nɛ oi gun lɛŋ tɛ iŋ mɔ nɛ tɛ de'i. Efraim in o bíí Samarii lɛŋ nɛ duk-tɛ nɛ ŋmaŋa-tɛ kɔ‘i tɔ̧ nɛnɛ‘e:

⁹«O mboo tua nɔ'ɔ gbina a nu, ɓɛɛ ɛɛ tɛ mbo mbe-a nɛ o ŋga ta. O te-mbɔra[7] gbina a nu, ɓɛɛ ɛɛ tɛ gun nɛ o gbatui oi wa.»

¹⁰GASA WAN dee ha̧ o bíí mɛ kur zu wa, ɓɛɛ a̧ a wen ha̧ o wi nɔ‘i mɛ sɛn wa.

¹¹Aram duka kɔ‘i nɛ war daŋa-wese, o be Filistii duk kɔ‘i nɛ ɗoŋ-wa, ɓɛɛ wa lɛŋ nasi Israɛl nɛ kin. Tɛ mɔɔ nɔ‘i lɛŋ, nyimsea kɔ̧-a̧ ga̧ na. See-aa ɓɔna kana tɛ kura-a zu wa.

¹²Zu mɔ‘i, dukbíí pii ɗoŋ tɛ wi nɛ gusa wa'i na; wa kii mɛ iŋ GASA WAN nɛ a̧a̧ nɛ ŋgayamɔ lɛŋ na.

¹³Mɛ nɛ hegɔ nɛ GASA WAN ɓira zu Israɛl ɓɛɛ gɔn dom-aa mbɛt pi̧ nu; ɓɛɛ tɛ kale kpɔk wese'i, a̧ gɔna ndɛŋgɛ in toro mbɛt.

¹⁴O kuti-wi in o wi-gɔn-kita, mɛ̀ nɛ́ zú Israɛl; wi-tɔ̧-wen oi nú Sɔ̧ de nɛ̀ ndela, nɛ́ dom Israɛl.

¹⁵O wi-duk-ti ko dukbíí nɔ'ɔ usi yuwar ha̧ wa nɛ sa̧a̧-a̧ na, ɓɛɛ sa o wi nɔ'ɔ yɔ.

¹⁶Mɛ nɛ wen mɔ‘i a̧ GASA WAN beka de ko ha̧ o daŋa-ŋgaiwi kɔ-wa na. A̧ beka de ko ha̧ o be-oi in o ko-gera na mbɛt, wen wa lɛŋ nɛ o wi-ɗaŋ in o wi-de-ɗaŋmɔ. Mɔ nɛ gbo nɛ kɔ̧ nú-wa lɛŋ nɛ ɗaŋ wen-búù; ɓɛɛ zu mɔɔ nɔ‘i nyimsea kɔ̧-a̧ ga̧ na, see-aa ɓɔna kana tɛ kura-a zu wa.

¹⁷Dee ɗaŋ nɛ mɔ nɛ duk hee wee nɛ dɔ o tɛn-dara in o tɛn, ká bá nɛ̀ da̧a̧ kombo’ɛ ga, ɓɛɛ wi nyɛma zɔka zi-wee-aa fara daŋa-a.

¹⁸Ŋga nyimsea ko GASA WAN nɛ a̧a̧ nɛ ŋgayamɔ lɛŋ dee ha̧ nu lɛŋ mɛ bíí wee. Wee'i tɛ dɔ o bíí zaŋnu lɛŋ. Ŋma bíí nɛ tɛ iŋ‘e ɛ̧ɛ̧ wi’ɛ nɛ́ nya kɔ‘i bo na.

¹⁹Kà‘i gɔn mur-tɛ nya-a̧‘i mɛ wiiko nyɔŋ, ɓɛɛ wɔ kaɗi na; kà‘i gɔn mɛ gale nyɔŋ, ɓɛɛ zaŋ-wi sur na mbɛt. Ɓɛɛ kóó o nde tɛɛ zik tɛ nyɔŋ nɛ tɛ-wi nɛ tɛ-wi woyo.

²⁰Manase nyɔŋa Efraim gur nɛ kpasa, ɓɛɛ Efraim tɛɛ tik zu Manase nyɔŋ a̧ gur nɛ kpasa, ɓɛɛ wa yiitoo lɛŋ tɛɛ mɔi̧ ŋmaa tik zu Juda. Zu mɔ‘i lɛŋ nyimsea kɔ̧-a̧ ga̧ na; see-aa ɓɔna kana tɛ kura-a zu wa.