Read Northwest Gbaya LEVITIK 1 Bible Online

LEVITIK 1 - Northwest Gbaya bible

LEVITIK 1

¹GASA WAN saa Moisɛ tɛnɛ, ɓɛɛ tɔ̧ ha̧ a̧ nɛ kɔ̧ Tua-kpa-ŋmaa mɛ‘e:

²«Mɛ̀ tɔ̧́ wen ha̧ o be Israɛl hee mɔ'ɔ ga; mɛ̀ tɔ̧: Kà ŋma bíí mgbara'nɛ́ ba ha̧a̧mɔ tɛnɛ ha̧ GASA WAN, ha̧a̧mɔ‘i a̧ duk nɛ gasa mɔ-dai, kóó geɗek-a.

³Kà dɔɔ-kpoo-sɔ̧‘i nɛ́ bòò nɛ́ gasa mɔ-dai, wi’ɛi tɛ ha̧ nɛ wiwii-a nɛ ŋma mɔ ɗaŋ tɛ-a na, ɓɛɛ a̧ baa a̧ nɛnɛ e nú Tua-kpa-ŋmaa, wen ha̧ GASA WAN mɛ kpɛk ha̧a̧mɔ‘i.

⁴Wi’ɛi tɛ e er zu saɗi'i, ha̧ GASA WAN mɛ kpɛk wen bíí ɗaŋmɔ kɔ̧-a̧ yinɛ.

⁵Wi tɛ gɔn saɗi'i ti GASA WAN, ɓɛɛ o wi-ɗafi-sɔ̧ nɛ duk nɛ o bem ko Arɔŋ tɛ ba tɔk-aa ha̧ ha̧ GASA WAN, ɓɛɛ wa misa̧ a ɗoŋ fara-ɗafi-sɔ̧ nɛ duk nú Tua-kpa-ŋmaa‘i.

⁶Kà‘i ɓa saɗi'i kaɗi, ɓɛɛ wi a̧ka̧.

⁷O wi-ɗafi-sɔ̧ nɛ duk nɛ o bem ko Arɔŋ tɛ ye wee fara-ɗafi-sɔ̧, ɓɛɛ wa aa gua zu-a.

⁸Wa tɛ kai zu saɗi, in nɔ̧́-a̧, gu nɛ oi kpoo-aa lɛŋ a yí wee fara-ɗafi-sɔ̧‘i.

⁹Wa tɛ fɔr zaŋ-aa gu nɛ o mbayo-a nɛ yì, ɓɛɛ wi-ɗafi-sɔ̧ dɔɔ o mɔɔ nɔ‘i lɛŋ zu fara-ɗafi-sɔ̧. Mɔ‘i nɛ́ dɔɔ-kpoo-sɔ̧ nɛ̀ duk nɛ́ de pɛr nyama tɛ GASA WAN.

¹⁰«Kà dɔɔ-kpoo-sɔ̧ ko wi’ɛi nɛ́ bòò nɛ́ geɗek mɔ-dai hee be-sami, kóó be gbadua ga, ɓɛɛ a̧ tɛ ha̧ nɛ vala-a nɛ ŋma mɔ ɗaŋ tɛ-a na.

¹¹Wi tɛ gɔn saɗi'i ti GASA WAN sɛn fara-ɗafi-sɔ̧ nɛ war ká̧-zan-mɛ́-ŋgɔn, ɓɛɛ o wi-ɗafi-sɔ̧ nɛ ya nɛ o bem ko Arɔŋ tɛ misi̧ tɔk-aa a ɗoŋ fara-ɗafi-sɔ̧‘i.

¹²Wi tɛ a̧k saɗi'i, zu-a gu nɛ nɔ̧́-a̧ mbɛt, ɓɛɛ wi-ɗafi-sɔ̧ kaia kpoo-aa a yí-wee-ɗafi-sɔ̧.

¹³Wi tɛ fɔr zaŋ-aa in o mbayo-a nɛ yì, ɓɛɛ wi-ɗafi-sɔ̧ ha̧a̧ o mɔɔ nɔ‘i lɛŋ ha̧ GASA WAN sɛka a̧ dɔɔ zu fara-ɗafi-sɔ̧. Mɔ‘i nɛ dɔɔ-kpoo-sɔ̧ nɛ duk nɛ de pɛr nyama tɛ GASA WAN.

¹⁴«Kà nɛ́ bòò nɛ́ nɔ̧́í̧ a̧‘i kɔ̧ɔ̧ mɛ dɔ ha̧ GASA WAN, ha̧a̧mɔ‘i a̧ duk nɛ gbaku̧i̧, kóó pola.

¹⁵Wi-ɗafi-sɔ̧ tɛ ha̧ nɔi'i ha̧ GASA WAN zu fara-ɗafi-sɔ̧; a̧ tɛ ŋman zu-a yinɛ, a̧ dɔɔ zu fara-ɗafi-sɔ̧, ɓɛɛ a̧ zura tɔk-aa a zu fara-ɗafi-sɔ̧ nɛ ká̧ a̧.

¹⁶Wi tɛ a̧i̧ tua-nyɔnɔ nɛ oi-aa yinɛ, ɓɛɛ wi pi̧i̧ taŋ ká̧ fara-ɗafi-sɔ̧ si war daŋa-wese, sɛn fara-a-bùk.

¹⁷Wi tɛ mbaŋ nɔi'i tan see-a, ɓɛɛ wi beka kɛ̧ wa nɛ ŋmaa na, ɓɛɛ wi-ɗafi-sɔ̧ dɔɔ nɔi'i zu fara-ɗafi-sɔ̧ zu nu gua nɛ‘i aa tɛ wee'i. Mɔ‘i nɛ dɔɔ kpoo-sɔ̧ nɛ duk nɛ de pɛr nyama tɛ GASA WAN.»