Read Northwest Gbaya LEVITIK 12 Bible Online

LEVITIK 12 - Northwest Gbaya bible

LEVITIK 12

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl ndé: kà ŋma naa-zaŋ kó nɛ̀ be-wiwii, a̧ tɛ duk nɛ́ ndiŋ bíí tɛ zɛ mɔɔrɔ-ɗoŋ-yiitoo hee mɔ'ɔ n'aa duk nɛnɛ ŋgimbi zɔka zɛ ga.

³Tɛ mɔɔrɔ-ɗoŋ-taar zɛ, ɓɛɛ wa gɔna mbii ko bem’ɛi.

⁴Ɓɛɛ naa-wan-bem tɛ duk tɛ zima mɔ zɛ ɓu-taar-zua-taar woyo sɛka a̧ zuia yì oi tɔk-bea. A̧ beka fo ŋma mɔ nɛ̀ duk nɛ́ ko Sɔ̧ na, kóó yee kɔ̧ sa̧a̧-fara na, hɔ ŋgimbi n'aa tɛ kaɗi nɛ ɗafa war-tɛ-a.

⁵«Ɓɛɛ kà a̧ nɛ́ koo nɛ be-okoo, a̧ tɛ duk nɛ́ ndiŋ bíí zaŋ alat yiitoo hee mɔ'ɔ n'aa duka nɛnɛ ŋgimbi zɔka zɛ ga; hɔ-ɗoŋ-aa, naa-wan-bem'i tɛ duk tɛ zɛma mɔ zaŋ zɛ ɓu-mɔɔrɔ-ɗoŋ-kpɔk-zua-mɔɔrɔ-ɗoŋ-kpɔk, sɛka a̧ zuia yì oi bea.

⁶«Kà ŋgimbi zuia yi kɔ̧-a̧‘i a̧ kaɗa ɗoŋ n'aa koo nɛ be-wiwii kóó nɛ be-okoo, ɓɛɛ a̧ a̧ ba sami nɛ a̧a̧ nɛ pɛ kpɔk in gbaku̧i̧, kóó pola nɛnɛ e nú tua-mɔi̧a-a ha̧ wi-ɗafi-sɔ̧ mɛ dɔ nɛ ha̧a̧mɔ wen kpaa ea-ɗaŋmɔ.

⁷Wi-ɗafi-sɔ̧ tɛ ha̧ mɔɔ nɔ‘i ha̧ GASA WAN, ɓɛɛ kà a̧ nɛ dee do-mɔ nɛ usi ea-ɗaŋmɔ zu kóò‘i kaɗi, tɛ kóò‘i sa̧a̧ oi tɔk-bea nɛ gboo a̧‘i.» Usamɔ zu okoo nɛ ko be-wiwii kóó be-okoo nɛ mɔ‘i.

⁸«Kà kóó‘i nɛ kpaa be-sami na, a̧ nyɛma kaia pola, kóó gbaku̧i yiitoo, ŋma kpɔk tɛ duk wen dɔa-a, ɓii-aa wen ha̧a̧mɔ-ea-ɗaŋmɔ. Kà wi-ɗafi-sɔ̧ nɛ́ dee do-mɔ nɛ usi ea-ɗaŋmɔ zu kóò‘i kaɗi, ɓɛɛ war-tɛ-a sa̧a̧.»