Read Northwest Gbaya LEVITIK 25 Bible Online

LEVITIK 25 - Northwest Gbaya bible

LEVITIK 25

¹GASA WAN tɔ̧ɔ̧ wen ha̧ Moisɛ sɛn zu kaya Sinai hee mɔ'ɔ ga:

²«Mɛ̀ tɔ̧́ ha̧ o be Israɛl‘e, wa bé tɛ̀ɛ́ ye nù n'am ha̧ wa'i, nù nɛ oi-aa tɛ gɔn ŋma ŋgimbi-ɔm-tɛ mɛ gasi nɛ GASA WAN. Tɛ pɛ mɔɔrɔ-ɗoŋ-kpɔk,

³mɛ tɛ gun nyɔnɔ, ɗɛn nɛ o nyak-dɔ̧ɔ̧ kpɛɛfɔ kɔ-mɛ ɓɛɛ mɛ mɔi̧a waya-a.

⁴Mɔɔrɔ-ɗoŋ-yiitoo pɛ tɛ duk nɛ pɛ-ɔm-tɛ ko nù, wen tu̧u̧ tɛ GASA WAN; mɛ beka gun nyɔnɔ kpɛɛfɔ kɔ-mɛ na, mɛ beka ɗɛn nyak-dɔ̧ɔ̧ kɔ-mɛ na.

⁵Mɛ beka mɔi̧ nyɔnɔ nɛ maa nɛ ta-tɛ tɛ bìrì ti pɛ‘i na, mɛ beka ɓi waya-nyak-dɔ̧ɔ̧ kɔ-mɛ nɛ a̧a̧ poo zao na. Pɛ‘i tɛ duk nɛ pɛ-ɔm-tɛ ko nù.

⁶Ɛnɛ tɛ nyɔŋ nɛ́ mɔ nɛ̀ nù dɛma nɛ ta-tɛ ti pɛ-ɔma-tɛ‘i: mɛ, wi-de-tom kɔ-mɛ, kó-de-tom kɔ-mɛ, wi-de-tom-sede, kóó gɛnɛ nɛ duk tɛ kɔ-mɛ mbɛt.

⁷Ɓɛɛ nɛ ko mɔ-dai kɔ-mɛ in o saɗi-zaŋbɛɛ nɛ ya nù kɔ-mɛ, wa tɛ nyɔŋ kɔ-wa nɛ mɔ lɛŋ nɛ gboo nɛ tɛ nù.»

⁸«Mɛ tɛ tɔr pɛ mɔɔrɔ-ɗoŋ-yiitoo hee mɔ'ɔ nɛ‘i tɔr nɛ ɔɔ-zɛ zaŋ alat kpɔk’ɛ ga, mɛ tɛ tɔr wa mɔɔrɔ-ɗoŋ-yiitoo, wen nɛ̀ tɔ̧ pɛ mɔɔrɔ-ɗoŋ-yiitoo war mɔɔrɔ-ɗoŋ-yiitoo; mɔ‘i lɛŋ tɛ de nɛ́ pɛ ɓu-naar-zua-mɔɔrɔ-ɗoŋ-naar.

⁹Ɔɔ-zɛ ɓu tɛ mɔɔrɔ-ɗoŋ-yiitoo fio-zɛ, mɛ tɛ dɔm zak ha̧ bíí mɛ gai mɔ; wese ea-ɗaŋmɔ, ɛnɛ tɛ dɔm zak ha̧ mɛ wor dam nù k’ɛ́nɛ́ lɛŋ.

¹⁰Ɛnɛ tɛ zɔk ɓu-mɔɔrɔ pɛ hee sa̧a̧ pɛ ga, ɓɛɛ ɛnɛ tɛ tɔ̧ dam nù‘e, bíí lɛŋ gboo tɛ bara; pɛ‘i tɛ duk nɛ kpɔk pɛ gbaŋa k’ɛ́nɛ́; kóó o nde tɛ si mgbák nù kɔ‘i, ɓɛɛ bíí kpɔk kpɔk sii mgbara nam kɔ‘i.

¹¹Ɓu-mɔɔrɔ pɛ tɛ duk nɛ pɛ-gbaŋa k’ɛ́nɛ́; ɛnɛ beka gun mɔ na, ɛnɛ beka mɔi̧ nyɔnɔ nɛ maa nɛ ta-tɛ poo bìrì na, ɛnɛ beka ɓi waya-nyak-dɔ̧ɔ̧ nɛ poo zao na mbɛt.

¹²Wen pɛ‘i tɛ duk nɛ pɛ gbaŋa, tɛ duk nɛ mɔ nɛ ɔ sa̧a̧ wen'nɛ́; ɛnɛ tɛ nyɔŋ nɛ́ mɔ nɛ dɛma nɛ ta-tɛ.

¹³«Tɛ pɛ-gbaŋa'i, nù kó o nde tɛ si ɗoŋ er mgbák wan-aa.

¹⁴Kà mɛ nɛ́ dee nɛ gɛnɛ, kà mɛ nɛ́ ɗɔra nɛ mɔ ha̧ ŋma-mɛ, kóó kà mɛ nɛ́ hi̧fa nɛ ŋma mɔ er-a, ká mɛ́ kii mɛ kpa yí-mɔ zu-a na.

¹⁵Mɛ tɛ ta nɛ ŋgimbi pɛ-gbaŋa nɛ yaka hi̧fi nɛ mɔ er ŋma-mɛ, ɓɛɛ a̧ tɛ ta kɔ̧-a̧ nɛ pɛ-mɔi̧a-nyɔnɔ ɗɔr nɛ mɔ ha̧ mɛ.

¹⁶Kà oi pɛ ɓɔn nɛ dɔka-a ha̧ mbe ŋgimbi gbaŋa mɛ hɔ, gɛnɛ mɔ nɛnɛ tɛ hi̧fi tɛ duk nɛ ŋgaya-a, ɓɛɛ kà oi pɛ ɓɔn tikiɗi, gɛnɛ mɔ n’ɛnɛ tɛ hi̧fi tɛ duk si ɗɔɔ, wen nɛ́ ŋma nú nyɔnɔ a̧ a̧ ɗɔr ha̧ mɛ.

¹⁷Ká ŋma bíí mgbara'nɛ́ ɔr ŋma-a kai nɛ mɔ er-a na, nɛ́ hegɔ a̧ mɛ tɛ yu nɛ Sɔ̧ kɔ-mɛ, wen mi nɛ GASA WAN Sɔ̧ k’ɛ́nɛ́.

¹⁸«Ɛ̀nɛ̀ dé mɔ nyɛm nɛ ɗoŋ o heembea kɔ‘m, ɛ̀nɛ̀ kásí o yuwar-duka-a n'am usi h’ɛ́nɛ́, ɛ̀nɛ̀ dé mɔ nyɛm nɛ ɗoŋ-aa, ɓɛɛ ɛ́nɛ́ tɛ ɔ ye nɛ de-a.

¹⁹Nù tɛ dɛm nyɔnɔ, ɛnɛ tɛ nyɔŋ mɔ zaŋ‘nɛ́ sur, ɓɛɛ ɛ́nɛ́ tɛ ɔ ye nɛ de-a.

²⁰«Ŋma fara ɛnɛ tɛ tɔ̧‘e, wi tɛ nyɔŋ nɛ ge tɛ mɔɔrɔ-ɗoŋ-yiitoo pɛ ge nɛ‘i beka gun ŋma mɔ in nɛ‘i beka mɔi̧ nyɔnɔ na’ɛ ge?

²¹Mi tɛ tok de yoŋgo kɔ‘m zu'nɛ́ tɛ mɔɔrɔ-ɗoŋ-kpɔk pɛ, ha̧ pɛ‘i mɛ dɛm nyɔnɔ h’ɛ́nɛ́ wen pɛ taar.

²²Tɛ mɔɔrɔ-ɗoŋ-taar pɛ, ɛnɛ tɛ gun mɔ, ɓɛɛ ɛnɛ tɛ nyɔŋ kànà nɛ gba̧‘a̧ nyɔnɔ n’ɛnɛ mɔi̧a'i hɔ nɛnɛ tɛ mbe pɛ, kpa nɛ mbe ŋgimbi-mɔi̧a-nyɔnɔ woyo.»

²³«Ɛ́nɛ́ beka ɗɔr nù ha̧ ŋma bíí wen ha̧ nù‘i mɛ duk nɛ kɔ̧-a̧ kpoo nɛ kpoo na, wen nù nɛ́ kɔ‘m; ɛ́nɛ́ ya hee o wi nɛ̀ èé nù kɔ‘i duk mɛ nɛɛ duk ŋma fara nɛtɛ, in hee o gɛnɛ kɔ‘m ga.

²⁴«Tɛ́ nù nɛ tɛ duk nɛ k’ɛ́nɛ́‘i, ɛnɛ tɛ e war ha̧ wi nɛ ɗɔra nù kɔ‘i mɛ hi̧fi nù‘i si ɗoŋ woyo.

²⁵Kà nya-mɛ nɛ́ ɗɔra ŋma nù kɔ‘i mɛ gbo nɛ nyamandoi, nɛ́ mgbák bíí kɔ̧-a̧ a̧ tɛ hi̧fi nù nɛ nya-a̧ ɗɔra'i si ɗoŋ.

²⁶Kà ŋma bíí bó nɛ̀ mgbák bíí kɔ‘i nɛ tɛ hi̧fi nù si ɗoŋ na, ɓɛɛ kà a̧ nɛ́ nyɛma kpaa yuwar mɛ hi̧fi nù‘i si ɗoŋ woyo,

²⁷a̧ tɛ tɔr o pɛ nɛ yaka ɗoŋ ŋgimbi n'aa ɗɔra nɛ nù‘i kɛ̧ nɛ ŋma sede-a ha̧ wi nɛ hi̧fa so nù‘i, ɓɛɛ a̧ baa nù kɔ̧-a̧ woyo.

²⁸Ɓɛɛ kà a̧ nɛ́ kpaa yuwar mɛ hi̧fi mɔ kɔ̧-a̧ si ɗoŋ nɛ tɛ-a na, mɔɔ-gɛnɛ‘i tɛ duk kànà er wi nɛ hi̧fa'i hɔ mbe pɛ-gbaŋa; ŋgimbi'i, ɓɛɛ a̧ baa nù kɔ̧-a̧ woyo, ɓɛɛ wi nɛ hi̧fa so nù‘i tɛ e i̧i̧ duk mɛ si ɗoŋ si tɛ nù kɔ‘i.

²⁹«Kà ŋma bíí ɗɔr ŋma tua-ɔ-sɛnɛ tɛ ŋma ye nɛ wa mboo garo zik nɛnɛ, a̧ tɛ nyɛm mɛ hi̧fi nù kɔ̧-a̧ sinɛ ɗoŋ woyo hɔ ŋgimbi nɛ pɛ tɛ yak kpɔk ɗoŋ wese n'aa ɗɔra n’ɛnɛ‘i. A̧ tɛ nyɛm mɛ hi̧fi tua si ɗoŋ tɛ pɛ kpɔk ɓɛɛ.

³⁰Kà wa nɛ́ hi̧fa tua'i si ɗoŋ zaŋ pɛ kpɔk na, tua saaye nɛ wa mboo garo zik nɛnɛ‘i tɛ duk nɛ ko wi-hi̧f'aa in o bezaŋ-aa hegɔ ɓɔnsɛnɛ; tua'i beka yu er-a ŋgimbi-pɛ-gbaŋa na mbɛt.

³¹O tua be ye nɛ wa mbo garo zik nɛnɛ na tɛ hɔ ŋmaa in fɔ. Wi nyɛma mɛ hi̧fi wa si ɗoŋ, ɓɛɛ ŋgimbi-pɛ-gbaŋa, wan-tua'i tɛ ba mɔ kɔ‘i woyo.

³²O bezaŋ Levii nyɛma mɛ hi̧fi tua nɛ duk saaye kɔ-wa si ɗoŋ ŋgimbi lɛŋ.

³³Wi nɛ hi̧fa so tua er o bezaŋ Levii, kóó wi-hi̧fa-a'i so nɛ bezaŋ Levii mbɛt, a̧ tɛ gbo kànà kɔ̧ tua saaye'i mbɛt ŋgimbi-pɛ-gbaŋa, wen nɛ́ tua-saaye ko o be Levii, nɛ́ nù kɔ-wa mgbara o be Israɛl.

³⁴War ko o fɔ nɛ ya ɗoŋ o ye kɔ-wa, wa beka nyɛm mɛ ɗɔr na, wen tɛ duk nɛ fɔ kɔ-wa ɓɔnsɛnɛ.»

³⁵«Kà san bá ŋma-mɛ, ɓɛɛ kà a̧ zɔ́k bɔnɛ katɛ mɛ, mɛ tɛ gbak a̧. Mɛ tɛ de kalemɔ‘i in gɛnɛ nɛ tɛ duk nù kɔ-mɛ, ha̧ a̧ mɛ ɔ ye in mɛɛ.

³⁶Kà a̧ bá nyamandoi er-mɛ, mɛ beka tɔ̧ ha̧ a̧ mɛ e mbe-a zu-a ha̧ nɛnɛ siɗoŋ na. Nɛ́ hegɔ a̧ mɛ tɛ yu nɛ Sɔ̧ kɔ-mɛ, ɓɛɛ ŋma-mɛ tɛ ɔ ye in mɛɛ.

³⁷Mɛ beka ha̧ sede ha̧ a̧ kii nɛ mbe-a zu-a na, mɛ beka ha̧ nyɔŋmɔ ha̧ a̧ kii nɛ mbe-a zu-a na mbɛt.

³⁸Mɛ̀ nɛ́ mi GASA WAN Sɔ̧ k’ɛ́nɛ́, nɛ foo'nɛ́ gbonɛ nɛ nú Egiptɛ, mɛ ha̧ nú Kanaŋ h’ɛ́nɛ́, ha̧‘m mɛ duk nɛ Sɔ̧ k’ɛ́nɛ́.»

³⁹«Kà ŋma-mɛ é ziŋina er-mɛ, kà a̧ ɗɔ́r tɛ-a ha̧ mɛ, mɛ beka e a̧ tɛ tom-bara na.

⁴⁰Mɛ tɛ zɔk a̧ hee wi-de-tom-sede, kóó gɛnɛ ga; a̧ tɛ duk nɛ wi-de-tom kɔ-mɛ hɔ ŋgimbi-pɛ-gbaŋa.

⁴¹Ŋgimbi'i, a̧ tɛ gbo tɛ kɔ-mɛ in o bem kɔ̧-a̧, ɓɛɛ a̧ tɛ si ɗoŋ mgbara nam kɔ̧-a̧, a̧ tɛ si ɗoŋ si nù ko o dáà kɔ̧-a̧.

⁴²O wi n'am foo gbonɛ nɛ nú Egiptɛ nɛ o wi-de-tom kɔ‘m. Wi beka ɗɔr wa hee mɔ'ɔ nɛ‘i ɗɔr nɛ o bara’ɛ ga na.

⁴³Mɛ beka duk zu ŋma-mɛ de nɛ mɔ in a̧ nɛ ŋgai na; nɛ́ hegɔ a̧ mɛ tɛ yu nɛ Sɔ̧ kɔ-mɛ.

⁴⁴Ɛnɛ tɛ hi̧fi o kó-bara in o wiwii-bara tɛ o nù nɛ ya zik'nɛ́.

⁴⁵Ɛnɛ nyɛma mɛ hi̧fi ŋma mgbara zuduk kɔ-wa nɛ tɛɛ mɛ duk nù k’ɛ́nɛ́ kpoo nɛ kpoo. Wa tɛ ya nɛ́ mɔ k’ɛ́nɛ́,

⁴⁶ɓɛɛ ɛnɛ tɛ e wa nɛ mɔɔ-oi ha̧ o bem k’ɛ́nɛ́ ha̧ mɛ duk nɛ mɔ kɔ-wa. Wa tɛ ya nɛ o bara k’ɛ́nɛ́ ɓɔnsɛnɛ, ɓɛɛ war k’ɛ́nɛ́ o be Israɛl, k’ɛ́nɛ́ duk zu nya'nɛ́ nɛ ŋgai na.

⁴⁷«Kà ŋma gɛnɛ nɛ̀ a̧a̧ tɛ kɔ-mɛ kpa mbɔi, ɓɛɛ kà nya-mɛ ba nyamandoi er-a ɗɔr nɛ tɛ ha̧ a̧, kóó kà a̧ ɗɔr tɛ-a ha̧ bezaŋ ŋma bíí nɛ duk nɛ bíí nú-gara ko ŋma gɛnɛ,

⁴⁸ɗoŋ nɛ wa dee gɛnɛ-a kaɗi, wi nyɛma mɛ hi̧f'aa pii ɗoŋ;

⁴⁹nɔkɔ kɔ̧-a̧, kóó be-nɔkɔ kɔ̧-a̧, kóó ŋma nam kɔ̧-a̧ nyɛma mɛ hi̧f'aa pii ɗoŋ. Kóó kà yuwar-a nɛ bòó, a̧ nyɛma hi̧fa tɛ-a pii ɗoŋ mbɛt.

⁵⁰Hegɔ, kà wa é nú in wi-hi̧f'aa, wa tɛ tɔr pɛ mgbara wese ɗɔra a̧ in mbe ŋgimbi-pɛ-gbaŋa. Wa tɛ zɔk sede ko wi-de-tom nɛ ba tɛ pɛ kpɔk gɔn nɛ gɛnɛ-a nyɛm nɛ ɗoŋ oi pɛ nɛ́ ɓɔna ha̧ mbe ŋgimbi-pɛ-gbaŋa mɛ hɔ.

⁵¹Ɓɛɛ sɛn tɛ hi̧fa a̧ pii ɗoŋ, kà oi pɛ nɛ́ ɓɔna nɛ dɔka-a, a̧ tɛ yoɓi sede nyɛm ɗoŋ dɔka pɛ nɛ ɓɔna.

⁵²Kà oi pɛ á̧ ɓɔna tikiɗi ha̧ mbe pɛ-gbaŋa mɛ hɔ, wi tɛ tɔr, ɓɛɛ a̧ hi̧fa tɛ-a nyɛm nɛ ɗoŋ pɛ nɛ ɓɔna.

⁵³Wi nɛ hi̧fa so a̧ tɛ zɔk a̧ hee wi-de-tom kɔ‘i ga pɛ nɛ pɛ. Mɛ beka e ha̧ wi’ɛi mɛ de bɔnɛ in a̧ na.

⁵⁴Kà‘i kpá yuwar mɛ hi̧f'aa pii ɗoŋ nɛ ŋma yuwar mɔɔ nɔ‘i na, a̧ tɛ gbo tɛ bara in o bem kɔ̧-a̧ tɛ mbe ŋgimbi-pɛ-gbaŋa.

⁵⁵O be Israɛl nɛ́ o wi-de-tom kɔ‘m n'am foo gbonɛ nɛ nú Egiptɛ. Mi nɛ GASA WAN Sɔ̧ k’ɛ́nɛ́.»