Read Northwest Gbaya LEVITIK 27 Bible Online

LEVITIK 27 - Northwest Gbaya bible

LEVITIK 27

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl, kà ŋma bíí nɛ́ ha̧a̧ nú mɛ ha̧ bíí ha̧ GASA WAN, a̧ nyɛma mɛ ha̧ nɛ sede oi ha̧a̧nú kɔ̧-a̧‘i,

³nyɛm nɛ ɗoŋ sede kìì bíí nɛ‘i gɔn’ɛ. Kà nɛ́ bòò nɛ́ wiwii mgbara pɛ ɓu-yiitoo in pɛ ɓu-mɔɔrɔ-ɗoŋ-kpɔk, wi tɛ gɔn zu a̧ nɛ kɔya bu-mbɔi ɓu-mɔɔrɔ, nyɛm nɛ ɗoŋ kɔya sede sa̧a̧ fara.

⁴Kà nɛ́ bòò nɛ́ okoo, wi tɛ gɔn zu a̧ nɛ kɔya bu-mbɔi ɓu-taar;

⁵be-wiwii nɛ a̧a̧ nɛ pɛ mɔɔrɔ hɔ nɛnɛ tɛ pɛ ɓu-yiitoo, wi tɛ gɔn zu a̧ nɛ́ kɔya bu-mbɔi ɓu-yiitoo, ɓɛɛ ko be-okoo nɛ kɔya bu-mbɔi ɓu.

⁶Nɛ́ bòò nɛ́ obem nɛ a̧a̧ nɛ fio-zɛ kpɔk hɔ tɛ pɛ mɔɔrɔ, be-wiwii tɛ duk nɛ kɔya bu-mbɔi mɔɔrɔ, ɓɛɛ be-okoo tɛ duk nɛ kɔya bu-mbɔi taar.

⁷Kà nɛ́ bòò nɛ́ bíí nɛ a̧a̧ nɛ pɛ ɓu-mɔɔrɔ-ɗoŋ-kpɔk, kóó gan mbɛt, sede nɛ‘i tɛ gɔn nɛ zu a̧, wiwii nɛ kɔya bu-mbɔi ɓu-zua-mɔɔrɔ, ko okoo nɛ kɔya bu-mbɔi ɓu.

⁸«Kà ŋma wisan nyɛm mɛ ha̧ sede'i na, a̧ tɛ mgbɔ wi n'aa kɔ̧ɔ̧ mɛ gɔn zu a̧‘i nɛnɛ ha̧ wi-ɗafi-sɔ̧ ha̧ a̧ mɛ tɔ̧ sede-a nyɛm nɛ ɗoŋ kpaamɔ ko wisan'i.

⁹«Kà nɛ́ bòò nɛ́ saɗi nɛ‘i nyɛma mɛ ha̧ nɛ mɔ ha̧ GASA WAN, saɗi lɛŋ nɛ‘i ha̧a̧ ha̧ GASA WAN kaɗi kifa nɛ sa̧a̧ saɗi.

¹⁰Wi beka kpai saɗi ha̧a̧mɔ‘i na, wi beka kpai ɗaŋ-a nɛ̀ de-a na, in wi beka kpai de-a nɛ̀ ɗaŋ-a na mbɛt; kà‘i nɛ́ kpaia saɗi nɛ ŋmaa, wa yiitoo lɛŋ kifa nɛ mɔ nɛ ɔ sa̧a̧.

¹¹Kà nɛ́ bòò nɛ́ ndiŋ saɗi nɛ‘i nyɛm mɛ ha̧ ha̧ GASA WAN na, wi tɛ e saɗi'i ti wi-ɗafi-sɔ̧.

¹²Wi-ɗafi-sɔ̧ tɛ zɔk saɗi'i, kà nɛ́ bòò nɛ́ ɗaŋ-a, kóó kà nɛ́ bòò nɛ́ de-a, ɓɛɛ wi tɛ yor nɛ zu mɔ n'aa tɛ gɔn'i.

¹³Ɓɛɛ kà‘i nɛ kɔ̧ɔ̧ mɛ hi̧fi saɗi'i si ɗoŋ, wi tɛ e ŋma sede zu wan nɛ wi-ɗafi-sɔ̧ gɔna'i,[7] ɓɛɛ saɗi'i pia ɗoŋ duk nɛ ko wan-aa.

¹⁴«Kà‘i ha̧ nɛ tua kɔ‘i ha̧ GASA WAN hee ha̧a̧mɔ nɛ ɔ sa̧a̧ ga, wi-ɗafi-sɔ̧ tɛ zɔk, kà tua'i nɛ́ ɔɔ dee, kóó nɛ́ dee na, ɓɛɛ wi tɛ yor tɛ mɔ nɛ wi-ɗafi-sɔ̧ gɔna'i.

¹⁵Kà wi nɛ̀ ha̧a̧ tua kɔ‘i ha̧ GASA WAN nɛ́ kɔ̧ɔ̧ mɛ hi̧fi tua'i pii ɗoŋ woyo, a̧ tɛ e ŋma sede zu wan nɛ wi-ɗafi-sɔ̧ gɔna, ɓɛɛ tua'i pia ɗoŋ er-a.

¹⁶«Kà ŋma bíí nɛ́ ha̧a̧ nɛ ŋma fɔ kɔ‘i ha̧ GASA WAN, sede-a tɛ nyɛm ɗoŋ mɔ nɛ‘i nyɛma mɛ gun kpɛɛfɔ‘i: wi tɛ ɗɔr bufu nyɔnɔ nɛ‘i guna kpɛɛfɔ‘i tɛ kɔya bu-mbɔi ɓu-mɔɔrɔ wen kilo nyɔnɔ gɔmŋmaa-naar.

¹⁷Kà bíí nɛ́ ha̧a̧ fɔ kɔ‘i tɛ ŋgimbi-pɛ-gbaŋa, wi tɛ yor kana zu sede nɛ‘i gɔna'i.

¹⁸Kà bíí nɛ́ ha̧a̧ fɔ kɔ‘i ɗoŋ ŋgimbi-pɛ-gbaŋa, wi-ɗafi-sɔ̧ tɛ gɔn gɛnɛ-a nyɛm nɛ ɗoŋ oi pɛ nɛ ɓɔna ha̧ mbe pɛ-gbaŋa mɛ hɔ, ɓɛɛ wi tɛ gbɛ ŋma sede-a yinɛ.

¹⁹Kà bíí nɛ̀ ha̧a̧ fɔ kɔ‘i nɛ́ kɔ̧ɔ̧ mɛ hi̧fi fɔ‘i pii ɗoŋ woyo, a̧ tɛ e ŋma sede zu gɛnɛ fɔ‘i, ɓɛɛ a̧ baa fɔ kɔ̧-a̧.

²⁰Ɓɛɛ kà a̧ hi̧fi fɔ kɔ̧-a̧ pii ɗoŋ na ɗɔr nɛnɛ ha̧ ŋma mbe bíí siti, a̧ beka nyɛm mɛ hi̧fi pii ɗoŋ ɓɔna.

²¹Ɓɛɛ ŋgimbi-pɛ-gbaŋa, wi nɛ hi̧fa fɔ‘i tɛ e fɔ‘i ha̧ mɛ duk nɛ mɔ nɛ ɔ sa̧a̧ wen GASA WAN: nɛ́ fɔ nɛ‘i ee ha̧ Sɔ̧ war kpɔk. Fɔ‘i tɛ kifi nɛ ko wi-ɗafi-sɔ̧.

²²«Kà ŋma bíí ha̧ fɔ n'aa hi̧fa er ŋma bíí ha̧ GASA WAN, nɛ̀ bó nɛ́ fɔ n'aa kpaa nɛ mɔɔ-oi na,

²³wi-ɗafi-sɔ̧ tɛ gɔn gɛnɛ fɔ‘i nyɛm nɛ ɗoŋ oi dɔka pɛ nɛ ɓɔna ha̧ mbe ŋgimbi-pɛ-gbaŋa mɛ hɔ, ɓɛɛ wi tɛ ha̧ sede-a kpɔk kale wese'i; mɔ‘i nɛ mɔ nɛ ɔ sa̧a̧ wen GASA WAN.

²⁴Tɛ pɛ-gbaŋa, fɔ‘i tɛ pii ɗoŋ er wi nɛ wa hi̧fa so er-a, fɔ‘i tɛ pii ɗoŋ er kuti wan-aa.

²⁵«Gɛnɛ mɔ lɛŋ tɛ nyɛm ɗoŋ o kɔya sede sa̧a̧-fara. Kɔya bu-mbɔi kpɔk tɛ nyɛm ŋmaa in geɗek sede ɓu-yiitoo.

²⁶«Ŋma bíí beka ha̧ o kaya be mɔ-dai kɔ‘i ha̧ GASA WAN na, wen o kaya mɔ-dai lɛŋ duk nɛ ko GASA WAN nɛti: kóó nɛ ndai, kòó nɛ sami, kòó nɛ gbadua, wa lɛŋ nɛ́ ko GASA WAN.

²⁷Kà nɛ́ bòò nɛ́ ndiŋ saɗi, wi nyɛma mɛ gɔn zu a̧, e nɛ mbe sede zu kuti gɛnɛ-a;[8] kà‘i nɛ gɔna zu a̧ na, wi tɛ ɗɔr nyɛm nɛ gɛnɛ-a nɛ‘i tɛ gɔn.

²⁸«Wi nyɛm mɛ hi̧fi mɔ nɛ‘i ha̧a̧ ha̧ Sɔ̧ war kpɔk pii ɗoŋ ɓɔna; kóó nɛ bíí, kóó nɛ saɗi, kóó nɛ fɔ; wi nyɛm mɛ ɗɔr mɔ‘i na mbɛt. Mɔ nɛ‘i ha̧a̧ ha̧ GASA WAN war kpɔk, duk nɛ mɔ nɛ ɔ sa̧a̧ nyɛmna wen GASA WAN.

²⁹Ɓɛɛ wi nyɛm mɛ hi̧fi bíí lɛŋ nɛ‘i ha̧a̧ ha̧ GASA WAN war kpɔk pii ɗoŋ woyo na; wi tɛ gbɛ kana nɛ a̧.

³⁰«Zu-mɔ lɛŋ nɛ duk nɛ mɔ nɛ‘i guna gun, kóó nɛ o zu-nyɔnɔ, kóó nɛ waya-te, duk nɛ ko GASA WAN. Nɛ́ mɔ nɛ ɔ sa̧a̧ wen GASA WAN.

³¹Kà ŋma bíí nɛ́ kɔ̧ɔ̧ mɛ hi̧fi ŋma zu-nyɔnɔ kɔ‘i pii ɗoŋ, a̧ tɛ e ŋma sede zu-a woyo.

³²Zu-mɔ lɛŋ nɛ̀ duk nɛ́ gasa mɔ-dai lɛŋ, kóó geɗek mɔ-dai, kà‘i tɔr wa ɓu, ɓɛɛ kpɔk nɛ́ ko GASA WAN.

³³Wi beka kii nɛ de-a, kóó nɛ ɗaŋ-a na, in wi beka kpai nɛ̀ ŋmaa na mbɛt; ɓɛɛ kà‘i kpai nɛ̀ ŋmaa, saɗi nɛ‘i kpaia'i in ɓii-aa mbɛt kifa nɛ mɔ nɛ ɔ sa̧a̧; wi nyɛm mɛ hi̧fi wa pii ɗoŋ ɓɔna.»

³⁴O geŋa nɛ GASA WAN ha̧a̧ ha̧ Moisɛ wen o be Israɛl zu kaya Sinai nɛ mɔɔ nɔ‘i.