Read Northwest Gbaya LEVITIK 4 Bible Online

LEVITIK 4 - Northwest Gbaya bible

LEVITIK 4

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e nde: kà ŋma bíí nɛ́ dee ɗaŋmɔ nɛ bo nɛ a̧ a̧ kɔ̧ɔ̧ na, gbin nɛ ŋma heembea ko GASA WAN kpɔk, wi tɛ de hee mɔ'ɔ ga:

³«Kà nɛ́ bòò nɛ́ wi-ɗafi-sɔ̧ nɛ‘i tɛna nɔ̧́ a zu a̧ a̧ dee ɗaŋmɔ‘i, de nɛnɛ ha̧ ɗaŋmɔ‘i mɛ tik zu o dukbíí, a̧ tɛ ha̧ daŋa wiwii-ndai nɛ ŋma mɔ ɗaŋ tɛ-a na ha̧ GASA WAN ɗafi nɛ Sɔ̧ wen kpaa ea-ɗaŋmɔ.

⁴A̧ tɛ ba ndai'i nɛnɛ si nú Tua-kpa-ŋmaa, sɛn ti GASA WAN; a̧ tɛ e er zu a̧, ɓɛɛ a̧ gɔna a̧ sɛn ti GASA WAN;

⁵ɓɛɛ wi-ɗafi-sɔ̧ nɛ‘i tɛna nɔ̧́ a zu-a'i tɛ ba tɔk ndai'i nɛnɛ si kɔ̧ Tua-kpa-ŋmaa;

⁶a̧ tɛ pi̧ ndɔŋ nu zɔ̧ɔ̧ er-a ɗɔɔ tɔk, ɓɛɛ a̧ misa̧ war mɔɔrɔ-ɗoŋ-yiitoo a tɛ babir-laa nɛ kpe sa̧a̧-fara ti GASA WAN;

⁷ɓɛɛ wi-ɗafi-sɔ̧ tɛ sɔ̧ ŋma tɔk ndai'i tɛ o zak fara-dɔ-fuu-nyama nɛ duk kɔ̧ Tua-kpa-ŋmaa ti GASA WAN, ɓɛɛ a̧ gbaia oi tɔk daŋa wiwii-ndai'i a gun fara-dɔ-kpoo-sɔ̧ nɛ duk nú Tua-kpa-ŋmaa.

⁸A̧ tɛ ɗafi de nɔ̧́ kpoo-ha̧a̧mɔ wen ea ɗaŋmɔ e nɛtɛ: nɔ̧́ zu gbazaŋ-aa in wan mɛ bezaŋ-aa,

⁹o gbaazaa-a nɛ oi nɔ̧́-a̧ gu nɛ nu see-aa lɛŋ.

¹⁰Wi tɛ kai mɔɔ nɔ‘i tɛ wiwii ndai wen ɗafa-sɔ̧-gaŋmɔ, ɓɛɛ wi-ɗafi-sɔ̧ kaia wa dɔ zu fara-ɗafi-sɔ̧.

¹¹Wi-ɗafi-sɔ̧ tɛ ba ndàrá ndai'i nɛ oi kpoo-aa lɛŋ, o zu-a gu nɛ o mbayo-a, zaŋ-aa gu nɛ ɗɔr-aa,

¹²mɔ nɛ tɔ̧‘e oi kpoo-aa lɛŋ sitɛ ŋma sa̧a̧ fara ɗoŋ gbagari, fara nɛ‘i a bùk sɛnɛ, ɓɛɛ a̧ dɔɔ mɔɔ nɔ‘i yí wee gua.

¹³«Kà nɛ́ bòò nɛ́ o be Israɛl lɛŋ a̧ yɔɔ-kaya, nɛ̀ bó nɛ́ wa a̧ kɔ̧ɔ̧ na, gbin nɛ ŋma heembea ko GASA WAN kpɔk nɛ usi'e wa dee ɗaŋmɔ,

¹⁴ɓɛɛ kà ɗaŋmɔ‘i nɛ́ gboo zan, giiwi tɛ ha̧ daŋa wiwii-ndai ɗafi nɛ Sɔ̧ wen ɗaŋmɔ‘i, ɓɛɛ wa baa a̧ nɛnɛ e nú Tua-kpa-ŋmaa.

¹⁵O kuti be Israɛl tɛ e er zu ndai'i ti GASA WAN, ɓɛɛ wa gɔna a̧ ti GASA WAN mbɛt.

¹⁶Wi-ɗafi-sɔ̧ nɛ‘i tɛna nɔ̧́ a zu-a tɛ ba ŋma tɔk-aa nɛnɛ si kɔ̧ Tua-kpa-ŋmaa.

¹⁷A̧ tɛ pi̧ ndɔŋ nu zɔ̧ɔ̧ er-a ɗɔɔ tɔk'i, ɓɛɛ a̧ misa̧ war mɔɔrɔ-ɗoŋ-yiitoo a tɛ babir-laa ti GASA WAN;

¹⁸ɓɛɛ a̧ sɔ̧ɔ̧ ŋma tɔk'i tɛ o zak fara-ɗafi-sɔ̧ nɛ duk ti GASA WAN kɔ̧ tua-mɔi̧a-a, ɓɛɛ a̧ gbaia oi tɔk'i a gun fara-dɔ-kpoo-sɔ̧ nɛ duk nu Tua-kpa-ŋmaa.

¹⁹A̧ tɛ mɔi̧ o de fara nɔ̧́ lɛŋ, ɓɛɛ a̧ dɔɔ sɛn fara-ɗafi-sɔ̧.

²⁰A̧ tɛ de mɔ nɛ kpoo daŋa be ndai'i hee mɔ'ɔ n'aa dee so nɛ kpoo daŋa be ndai wan mɛ ea-ɗaŋmɔ ga. Kà wi-ɗafi-sɔ̧ nɛ dee mɔ nɛ usi ea ɗaŋmɔ zu giiwi, ɓɛɛ Sɔ̧ ee ɗaŋmɔ kɔ-wa ha̧ wa.

²¹A̧ tɛ kai kpoo daŋa be ndai gbonɛ kɔ̧ gbagari, ɓɛɛ a̧ dɔɔ hee mɔ'ɔ n'aa dɔɔ nɛ kuti-a ga. Yuwar-ɗafa-sɔ̧ wen ea ɗaŋmɔ ko giiwi nɛ mɔ‘i.

²²«Kà bó nɛ́ be-wan a̧ gbina ŋma heembea ko GASA WAN Sɔ̧ kɔ̧-a̧, de nɛ ɗaŋmɔ nɛ̀ bó nɛ́ a̧ a̧ kɔ̧ɔ̧ na, ɓɛɛ kà ɗaŋmɔ‘i tik zu-a,

²³kà‘i nɛ usa ɗaŋmɔ n'aa dea'i ha̧ a̧, a̧ tɛ ba vala gbadua nɛ ŋma mɔ ɗaŋ tɛ-a na nɛnɛ nɛ̀ ha̧a̧mɔ.

²⁴A̧ tɛ e er-a zu vala gbadua'i, ɓɛɛ a̧ gɔna a̧ fara nɛ‘i gɔn saɗi-ɗafi-sɔ̧ sɛnɛ‘i sɛn ti GASA WAN. Mɔ‘i nɛ ɗafa-sɔ̧ wen ea ɗaŋmɔ.

²⁵Wi-ɗafi-sɔ̧ tɛ pi̧ ndɔŋ nu zɔ̧ɔ̧ er ɗɔɔ tɔk kpoo-ɗafi-sɔ̧ wen ea ɗaŋmɔ‘i, ɓɛɛ a̧ sɔ̧ɔ̧ tɛ o zak nɛ duk fara-dɔ-kpoo-sɔ̧‘i, ɓɛɛ a̧ gbaia oi tɔk-aa a gun fara-dɔ-kpoo-sɔ̧.

²⁶A̧ tɛ dɔ de nɔ̧́ kpoo-aa lɛŋ sɛn zu fara-ɗafi-sɔ̧ hee wan mɛ ɗafa-sɔ̧-gaŋmɔ ga. Kà wi-ɗafi-sɔ̧ nɛ dee mɔ nɛ usi ea-ɗaŋmɔ ko be-wan'i kaɗi, ɓɛɛ be-wan'i kpaa ea-ɗaŋmɔ.»

²⁷«Kà nɛ́ bòò nɛ́ ŋma bíí mgbara dukbíí a̧ gbina ŋma heembea ko GASA WAN kpɔk de nɛ ɗaŋmɔ nɛ̀ bó nɛ́ a̧ a̧ kɔ̧ɔ̧ na, ɓɛɛ kà ɗaŋmɔ‘i tik zu a̧,

²⁸kà‘i nɛ usa ɗaŋmɔ n'aa dea'i ha̧ a̧, a̧ tɛ ba nana gbadua nɛ ŋma mɔ ɗaŋ tɛ-a na tɛnɛ nɛ ha̧a̧mɔ wen zu ɗaŋmɔ n'aa dea'i.

²⁹Wi’ɛi tɛ e er zu saɗi-ɗafi-sɔ̧ wen ɗaŋmɔ‘i, ɓɛɛ a̧ gɔna a̧ tɛ kpɔk fara-dɔ-kpoo-sɔ̧‘i.

³⁰Wi-ɗafi-sɔ̧ tɛ pi̧ ndɔŋ nú-zɔ̧ɔ̧-er ɗɔɔ tɔk-aa sɔ̧ tɛ o zak fara-dɔ-kpoo-sɔ̧‘i, ɓɛɛ a̧ gbaia oi tɔk-aa a gun fara-ɗafi-sɔ̧.

³¹A̧ tɛ mɔi̧ nɔ̧́ kpoo saɗi'i hee mɔ'ɔ n'aa dee so nɛ saɗi-ɗafi-sɔ̧-gaŋmɔ ga, ɓɛɛ a̧ dɔɔ zu fara-ɗafi-sɔ̧ nɛ de pɛr nyama ha̧ GASA WAN. Kà wi-ɗafi-sɔ̧ nɛ́ dee mɔ nɛ usi ea-ɗaŋmɔ zu wi nɛ dee ɗaŋmɔ‘i, ɓɛɛ wi’ɛi kpaa ea-ɗaŋmɔ.

³²«Kà a̧ nɛ baa nɛ be-sami tɛnɛ mɛ ɗafi wen ea ɗaŋmɔ, be-sami‘i tɛ duk nɛ be-zɔŋa-a nɛ ŋma mɔ ɗaŋ tɛ-a na.

³³A̧ tɛ e er-a zu saɗi'i, ɓɛɛ a̧ gɔna a̧ wen ɗafa-sɔ̧ ea-ɗaŋmɔ sɛn fara gɔn saɗi-ɗafi-sɔ̧.

³⁴Wi-ɗafi-sɔ̧ tɛ pi̧ ndɔŋ nú-zɔ̧ɔ̧-er ɗɔɔ tɔk saɗi'i sɔ̧ tɛ o zak nɛ duk fara-dɔ-kpoo-sɔ̧‘i, ɓɛɛ a̧ gbaia oi tɔk-aa lɛŋ a gun fara-ɗafi-sɔ̧.

³⁵A̧ tɛ gɔn de nɔ̧́ kpoo-aa lɛŋ hee mɔ'ɔ nɛ‘i de nɛ be sami-ɗafi-sɔ̧-gaŋmɔ ga, ɓɛɛ a̧ dɔɔ sɛn zu fara-ɗafi-sɔ̧, e zu dɔɔ-kpoo-sɔ̧ ha̧ GASA WAN. Kà wi-ɗafi-sɔ̧ nɛ́ dee mɔ nɛ usi ea-ɗaŋmɔ zu wi nɛ dee ɗaŋmɔ‘i, ɓɛɛ wi’ɛi kpaa ea-ɗaŋmɔ.»