Read Northwest Gbaya JEREMII 12 Bible Online

JEREMII 12 - Northwest Gbaya bible

JEREMII 12

¹K’ɛnɛ, GASA WAN, ɛ́nɛ́ nɛ́ wi-de-mɔ nɛ̀ yuwar-a, ɓɛɛ zu mɔ‘i, mi kɔ̧ɔ̧ kànà mɛ ak mgbara mɔ. Nɛ̀ mbetɛ, mi kɔ̧ɔ̧ mɛ ak mgbara mɔ in'nɛɛ: wen ge sa mɔ ko o wi-ɗaŋ nɛ́ nɔ̀ nɛ̀ de-a yaknɛ ge? Wen ge sa o wi-mbo-zu h’ɛnɛ na ya nɛ̀ de-a ge?

²Ɛnɛ guna wa, nin-wa yee nù, ɓɛɛ wa gasi wai; nú-wa duk ɓɔn tɛ‘nɛ́, ɓɛɛ see-wa ɔ nyɛi̧a nɛ̀ ɛnɛ.

³Ɓɛɛ kɔ‘m, ɛnɛ iŋa'm GASA WAN, yí‘nɛ́ duk ɓɔn tɛ‘m, ɓɛɛ ɛ́nɛ́ zɔka'e o taamɔ kɔ‘m a̧a̧ yuwar k’ɛnɛ. Ɛ̀nɛ̀ kái o wi-ɗaŋ a nɛ̀ mgbɔɔr hee o sami mɛ́ gɔn ga; ɛ̀nɛ̀ á wa pɛm nɛ̀ wese-gɔna-wa.

⁴O mɔ mɛ zu nù lɛŋ nɛ́ mɔ'ɔ nɛ̀ kor kor’ɛ, o zɔ̧-zaŋbɛɛ nɛ́ mɔ'ɔ nɛ ɔ̧k kor nɛnɛ'ɛ; mɔ‘i tɛ hɔ nduti mɛ gese ge? O saɗi in o nɔ̧́í̧ kum wen ɗaŋ ko o bíí tɛ nù'ɛ, nɛ̀ tɔ̧‘e: «Sɔ̧ zɔk yuwar deemɔ k’ɛɛ na,» wó'ɛ.

⁵GASA WAN tɔ̧a̧: «Kà mɛ nyɛm mɛ ma yì in o wi-a-yaa-gan-ŋmaa na, ɓɛɛ mɛ́ tɛ a yaa-gan-ŋmaa in o nyaŋa hee ge? Kà mɛ nɛ́ kɔ̧ɔ̧ nɛ́ de ga̧a̧ nù wen duka-a sɛnɛ nɛ̀ de-a, ɓɛɛ mɛ́ tɛ de hee ge kɔ̧ da̧a̧ kombo Jurdɛn ge?

⁶«Íì, o nya-mɛ in o nàm kɔ-mɛ mbɛt, e nɛ ɗɔra tɛ mɛ; sa nɛ̀ o gba gíí bíí a ɗoŋ mɛ. Ká mɛ́ e ta nɛ̀ wa ŋgimbi nɛ̀ wa tɔ̧ nɛ̀ gba de nyɔ̧ɔ̧ wen ha̧ mɛ‘i na.»

⁷«Mi ee tua kɔ‘m duk; mi pi̧i̧ mɔɔ-oi kɔ‘m taŋ. Mi siŋa wan n'am kɔ̧ɔ̧ nyɛmna pi̧ kɔ̧̀ er o wi-sɛn-a.

⁸Mɔɔ-oi kɔ‘m kifa duk hee dila-zaŋbɛɛ ga; a̧ tuɓi nɛ da̧ a zu'm; mi kɔ̧ a̧ ɓɔna.

⁹«Mɔɔ-oi kɔ‘m kifa nɛ́ ŋma gba de be nɔ̧́í̧, nɛ́ mɔ'ɔ nɛ̀ o ŋga nɔ̧́í̧-ba-mɔ mɔi̧a tik zu a̧ nɛ̀ fara nɛtɛ nɛtɛ'ɛ nde? Ɛ̀nɛ̀ nɛ́ɛ̀ mɔi o saɗi-zaŋbɛɛ tɛnɛ; ɛ̀nɛ̀ káí wa tɛnɛ tɛ gbaŋa!

¹⁰O gíí wi-dai-mɔ tɛɛ ɗaŋ nyak-dɔ̧ɔ̧ kɔ‘m, wa i̧sa fɔ kɔ‘m ɗaŋ lɔkɔti-lɔkɔti, kifi nɛ́ géé ŋgamɔ kotoro.

¹¹Wa dee ha̧ fɔ kɔ‘m nɛ̀ duk yí‘m’ɛ mɛ kifi duk nɛ́ mɔɔ-búù; nù nɛ̀ oi-aa ɗaŋa lɛŋ, ɓɛɛ ŋma bíí mɛ ta mɔ sɛnɛ bo ɓɔna.

¹²«O wi-ɗaŋ-mɔ gar nɛ̀ o yuwar mɛ ŋga-gbárà mɛ tɛnɛ; gba-paa ko GASA WAN ɗaŋ nɛ mɔ zu nù hɔ nduti-a mɛ, ŋma ga̧a̧mɔ bo wen ŋma bíí ɓɔna.

¹³Kà‘i gun alkamaari, ɓɛɛ wi ɓii nɛ́ nàákɔɓa; kà‘i de ŋga tom, ɓɛɛ wi kpa mɔɔ-oi-aa na. Ziimɔ a̧ bá‘nɛ́ tɛ ŋgamɔ nɛ̀ tik zu'nɛ́, zu ŋga wee-nyimsea ko GASA WAN.»

¹⁴Wen nɛ̀ GASA WAN tɔ̧ nɛ́ mɔ'ɔ: «Mi tɛ zuɗi o ɗaŋ bíí nɛ̀ a̧a̧ gbìsí-nu in o be Israɛl dukbíí kɔ‘m yinɛ, wen wa duk tɛ kia wen in wa zu nù n'am ha̧a̧ so ha̧ wa nɛ̀ mɔɔ-oi. Mi tɛ kai o be Juda yinɛ mgbara o wi nɔ‘i mbɛt.

¹⁵Ŋgimbi n'am bé tɛ̀ɛ́ fo o wi nɔ‘i yinɛ kaɗi, mi tɛ zɔk kó tɛ-wa woyo, ɓɛɛ mi tɛ mgbɔ wa si ɗoŋ, kóó o ndé si fara kɔ‘i, in si nù kɔ‘i.

¹⁶Ɓɛɛ kà wa yambi duka-a nɛ̀ mboozu hee ko dukbíí kɔ‘m ga, kan nɛ̀ mɔ nɛ̀ nin-am tɔ̧ nɛnɛ‘e: ‹GASA WAN duk kpasa,› hee mɔ'ɔ nɛ̀ wa usa so nɛ̀ kanamɔ nɛ̀ nin Bal ha̧ dukbíí kɔ‘m ga, wa tɛ kpa fara-duk mgbara dukbíí kɔ‘m.

¹⁷Ɓɛɛ kà wa zii wen nú‘m na, mi tɛ ɗaŋ tugun bíí nɔ‘i yinɛ war kpɔk nɛ̀‘i beka iŋ oi wa ɓɔna.» Nɛ́ GASA WAN a̧ tɔ̧ wen'i.