Read Northwest Gbaya JEREMII 15 Bible Online

JEREMII 15 - Northwest Gbaya bible

JEREMII 15

¹GASA WAN tɔ̧a: «Kóó so nɛ́ o Moisɛ in Samuɛl a̧ yora so ti'm, mɛ ai nú ha̧‘m wen zu dukbíí'ɛ, mi beka pi̧ nú‘m tɛ wa na. Mɛ̀ ndák wa yinɛ ti'm; wa a̧ yák síɓí!

²Ɓɛɛ kà wa ak mɛ‘e: ‹Ɛ́ɛ́ tɛ nɛ si déè nde?› mɛ̀ kífí nú ha̧ wa'e, GASA WAN tɔ̧a'e: Wi nɛ̀ tɛ fe nɛ́ géé fio a̧ fé nɛ́ kɔ‘i! Wi nɛ tɛ fe nɛ́ fio-gba-paa a̧ fé nɛ́ kɔ‘i! Wi nɛ tɛ fe nɛ́ fio-kaɓa a̧ fé nɛ́ kɔ‘i! Ɓɛɛ wi nɛ̀ wa tɛ kai nɛ̀ bara-biro yaknɛ a̧ nɛ́ nɛ́ kɔ‘i!»

³«Nɛ́ mi GASA WAN a̧ tɔ̧ wen’ɛ: Mi tɛ tom o ŋgamɔ nɛtɛ nɛtɛ naar pii zu wa: gba-paa tɛ kum wa, o toyo tɛ tɛ mɛ gbur wɔr-wa a taŋ, ɓɛɛ o tama in o gbóò tɛ tɛ kɔ‘i mɛ nyɔŋ wɔr-wa gur yinɛ nɛ̀ oi-wa beka bo na.

⁴Mi tɛ de mɔ‘i hegɔ wen zu Manase, wannu Juda, bem ko Ezekias, wen o mɔ lɛŋ n'aa dee so sɛn Jerusalɛm, ɓɛɛ mɔ‘i tɛ duk nɛ́ mɔɔ-sedaako nɛ̀ tɛ pi̧ kíì tɛ o mɔɔ-wan zu nù lɛŋ.»

⁵«Jerusalɛm, nɛ́ ge bíí ge a̧ tɛ de ko ha̧ mɛ ge? Nɛ́ o'o tɛ usi ŋma be kɔ̧ɔ̧mɔ ha̧ mɛ o? Nɛ́ o'o tɛ ɗaŋ kɔ‘i tɛ̀ mɛ́ ak mɔ wen mɛ o?

⁶Nɛ́ mɛ a̧ ee am duk! Nɛ́ mi GASA WAN a̧ tɔ̧ wen’ɛ. Mɛ a̧ zika ɗoŋ-mɛ e ha̧‘m ɛ̧! Mi nyɛi̧a er-am sitɛ mɛ mɛ ɗaŋ mɛ, wen deeko kɔ‘m zu mɛ gana'm kaɗi.

⁷«Mi baa mɔɔ-pɛfi-mɔ ɓɛɛ mi pɛfi wa dam zaŋnu lɛŋ; mi kuma o bem er dukbíí kɔ‘m ɗaŋ nɛ̀ wa yinɛ, ɓɛɛ wa kpai naŋanɔ kɔ-wa na.

⁸Mi dee ha̧ o ko-gera mɛ dɔk mgbara wa hee nyɛmɛ ka̧ ŋgere ga; mi foo wi-ɗaŋ-bíí nɛ̀ ŋga bu-wese pi̧ zu o nàà ko o daŋa wi-biro, mi foo ŋga mɔɔ-kíì pi̧ zu wa yekseɗe.»

⁹GASA WAN tɔ̧a: «Ɗɛɗɛ nàá-wan-bem nɛ̀ o bem kɔ̧-a̧ mɔɔrɔ-ɗoŋ-yiitoo yɔa ŋmana, ɓɛɛ a̧ ɔm hɔ ɗɔɔ ɓɔna; wese yee zu a̧ nɛ̀ ŋga bu-wese, ɓɛɛ ziimɔ ba a̧ tɛ kɔsa kɔ̧-a̧. «Ɓɛɛ mi tɛ e oi nda bíí nɛ̀ tɛ ɓɔn er o wisɛn kɔ-wa mɛ kum wa nɛ̀ gba-paa. Nɛ́ mi GASA WAN a̧ tɔ̧ wen’ɛ.»

¹⁰Oee bɔnɛ kɔ‘m wa, naaye, wen ge s’ɛnɛ kòò so'm ge? O bíí zaŋnu’ɛ lɛŋ kii nɛ́ nú‘m, kur nɛ̀ biro zu'm. Ŋma bíí n'am nɛ̀ɛ̀ kpe mɔ er-a bo na; bíí nɛ̀ tɛ̀ɛ̀ kpe mɔ er-am mbɛt bo na, ɓɛɛ nɛ́ mɔ'ɔ nɛ̀ o bíí lɛŋ tok nɛ́ ɗaŋ yoŋgo a zu'm.

¹¹GASA WAN tɔ̧a: «Mi kana mɔ, oi mɔ kɔ-mɛ nɛ̀ ɓɔna tɛ duk nɛ̀ de-a siti; mi kana mɔ, mi tɛ de ha̧ o wi-sɛn-mɛ mɛ kii gbaka mɔ er mɛ tɛ ŋgimbi bɔnɛ in ŋgimbi dita-see.

¹²Wi nyɛma so mɛ gbin boi in ndɛrɛ nɛ̀ tɛ́ nɛ̀ ká̧-zan-mɛ́-ŋgɔn nde?»

¹³Mi ee o mbɔi kɔ-mɛ in o demɔ kɔ-mɛ ha̧ wa mɛ kai yaknɛ nɛ̀ mɔɔ-oi-ɗaŋmɔ nɛ̀ mɛ́ dee so zu nù kɔ-mɛ dam fara lɛŋ.

¹⁴Mi tɛ de ha̧ o wisɛn kɔ-mɛ mɛ ba mɛ nɛ̀ bara yaknɛ si ŋma nù nɛ̀ mɛ iŋ na, wen nyimsea kɔ‘m kura kaɗi, see-am bia wee ɓɛɛ tu̧ zu mɛ.

¹⁵GASA WAN, k’ɛnɛ, ɛnɛ iŋa mɔ nɛ̀ yak lɛŋ! Tɛ‘nɛ́'ɛ mbáŋ ɗoŋ am, ɛ̀nɛ̀ gbák am, ɓɛɛ ɛ̀nɛ̀ kífí er ha̧ o wi nɛ̀ kii nú‘m. Ká nɔɔ-ŋgiɗi k’ɛ́nɛ́ duk siti ɗoŋ-aa nyɛi ɓɔna, wen ká wa tɛɛ gbɛ‘m. Ɛnɛ iŋa kànà‘e, mɛ̀ nɛ́ wen zu'nɛ́ a̧‘m nyɔŋ nɛ̀ nin-am tɛ da̧ra̧'ɛ.

¹⁶Ŋgimbi n'am zia so o wen k’ɛnɛ, ɓɛɛ mi ba wen'i e kɔ̧́ see-am; wen k’ɛnɛ ha̧a̧ desee ha̧‘m, ɓɛɛ pi̧‘m tɛ tortɛ. GASA WAN, Sɔ̧ nɛ̀ a̧a̧ nɛ̀ ŋgayamɔ lɛŋ, wa saa nin'nɛ́ zu'm.

¹⁷Mi beka kii desee kɔ‘m tɛ ndaka ɗoŋ o bíí-de-zɛŋ na; hee mɔ'ɔ nɛ̀ er'nɛ́ dora'm ga, mi wɛra tɛ‘m nɛ̀ wa, wen deemɔ kɔ-wa duk nɛ́ mɔɔ-nyɛr tɛ‘m.

¹⁸Wen ge sa bɔnɛ kɔ‘m kaɗi na’ɛ ge? Wen ge sa da̧i̧ kɔ‘m wíí na’ɛ ge? Nɛ̀ mbetɛ, ɛnɛ dee ha̧‘m mɛ hɔ ŋmaa in be-zér mɛ wan nɛ̀ fok ɗoŋ-aa nyɛi na ɓɛɛ gɔna’ɛ.

¹⁹Ɓɛɛ GASA WAN kifi nú: «Kà mɛ pii ɗoŋ tɛ‘m, mi tɛ kpɛk mɛ mɛ ha̧ tom ha̧ mɛ; ɓɛɛ kà mɛ tɔ̧ nɛ́ kpasawen, mɛ́ è tɔ̧ɔ̧ géé tum-wen duk, mɛ tɛ duk betom kɔ‘m. Nɛ́ o bíí a̧ tɛ́ nɛ̀ tɛ̀ mɛ ɛ̧, nɛ̀ bó nɛ́ mɛ a̧ tɛ́ nɛ̀ tɛ́ wa na.

²⁰Mi tɛ de mɛ nɛ̀ ŋgeŋ-ndɛrɛ nɛ̀ beka fo mɔ kóó naka-a ti o wi nɔ'ɔ na; wa tɛ bi mɛ, ɓɛɛ wa beka de ŋma mɔ in mɛɛ na. Mi a̧a̧ ɗoŋ mɛ, wen kpasa mɛ in gbaka mɛ mbɛt. Nɛ́ mi GASA WAN a̧ tɔ̧ wen’ɛ.

²¹Mi baa mɛ yinɛ er o wi-ɗaŋ, mi zuɗa mɛ yinɛ kɔ̧̀ er o wi-de-mɔ nɛ̀ ŋgai.»