Read Northwest Gbaya JEREMII 18 Bible Online

JEREMII 18 - Northwest Gbaya bible

JEREMII 18

¹Wen nɛ̀ GASA WAN tɔ̧ɔ̧ ha̧ Jeremii nɛ́ mɔ'ɔ:

²«Mɛ̀ kúr! Mɛ̀ zír nɛ̀ haya-a si tɛ̀ ko wi-ɓu-kpánà. Mi a̧a̧ nɛ̀ ŋma wen mɛ tɔ̧ ha̧ mɛ sɛn hi̧i̧.»

³Mi zira si tɛ̀ ko wi-ɓu-kpánà, ɓɛɛ mi hɔ kpa a̧ fara ɓu kpánà.

⁴Kà a̧ yɔ kaya yuwar kpánà n'aa ɓu'i, ɓɛɛ a̧ ɓuu mbe-a nyɛm nɛ̀ ɗoŋ yuwar-ɓuu-de-kpánà.

⁵Ɓɛɛ GASA WAN e wen nú‘m:

⁶«O be Israɛl, mi beka de so mɔ in'nɛɛ hee mɔ'ɔ nɛ̀ wi-ɓu-kpánà'ɛ de ga na? Ɛnɛ a̧a̧ kɔ̧̀ er-am hee mɔ'ɔ nɛ̀ gìì duk nɛnɛ kɔ̧̀ er wi-ɓu-kpánà'ɛ ga.

⁷Tɛ́ ŋma ŋgimbi mi taa mɔ mɛ yai ŋma tugun bíí, kóó ŋma mɔɔ-wan yinɛ.

⁸Kà tugun bíí‘i nɛ́ ee yuwar ɗaŋmɔ nɛ̀ de ha̧ see-am mɛ tu̧‘i duk, ɓɛɛ mi beka de ŋgamɔ n'am taa so mɛ de in a̧‘i ɓɔna.

⁹Ŋmana, mi taa so mɛ ba ŋma tugun bíí kóó nɛ́ ŋma mɔɔ-wan e ŋgɔn.

¹⁰Kà wa zii wen nú‘m na, kà wa de mɔ n'am kɔ̧a̧ na, ɓɛɛ mi tɛ bɛ̧ dee demɔ n'am taa so mɛ de ha̧ wa'i.

¹¹Ɓɛɛ kinii, Jeremii, mɛ̀ tɔ̧́ ha̧ o be Juda in o bíí Jerusalɛm'e ndé, GASA WAN'e, war k’ɛ́nɛ́, mi ta nɛ́ mɔ mɛ pi̧ ŋgamɔ zu'nɛ́, mi taa mboɗa zu mɔ n'am tɛ de in'nɛɛ‘i kaɗi. Nɛ̀ mbetɛ, o ndé a̧ kpáí duka-a kɔ‘i. Kóó o ndé a̧ kpáí ɗaŋ yuwar duka-a in ɗaŋ yuwar deemɔ kɔ‘i.»

¹²Ɓɛɛ wa tɛ tɔ̧: «Ŋma mɔ k’ɛɛ mɛ de tɛ mɔ‘i bo na. Ɛɛ tɛ ndak kànà nɛ́ ɗoŋ o taamɔ k’ɛɛ, ɓɛɛ kóó o ndé tɛ ɓɔn kànà tɛ dee ɗaŋ ŋgazu kɔ‘i siti.»

¹³Wen nɛ̀ GASA WAN tɔ̧ nɛ́ mɔ'ɔ: «Ɛ̀nɛ̀ kíí mɔ mgbara o tugun bíí. Ɛ́nɛ́ zia so pɛrti ŋma mɔ hegɔ dee so nɛti nde? Israɛl dee ŋma zɔm mɔ pi̧ nù.

¹⁴Zɔm ɓɔrɔ tɛ̀ɛ́ nyaŋ so zu kaya Libaŋ nde? De gɛ̧ɛ̧ yì nɛ̀ fok zir nɛ̀ zu kaya mɛ tɛnɛ‘i tɛ ɔ̧si so nde?

¹⁵Ko dukbíí kɔ‘m, tɛ-wa bìí ɗoŋ-am, ɓɛɛ wa ɗafi o géé yambala sɔ̧ nɛ̀ de ha̧ wa mɛ kɔ̧ naŋ tɛ yuwar duka-a kɔ-wa in tɛ o gba̧‘a̧ mɔ ko o zɔmdáa kɔ-wa; ɓɛɛ wa ba nɛ́ o gɔɔ-war in o yuwar nɛ̀ sa̧ na.

¹⁶Wa dee ha̧ nù kɔ-wa mɛ kifi duk nɛ́ geemɔ kotoro nɛ̀ duk nɛ́ mɔɔ-kíì. O bíí nɛ̀ ɓir nɛ̀ hi̧i̧ lɛŋ yak nɛ̀ kíì, mii nɛ̀ zu.

¹⁷Mi tɛ pɛsi wa ti o wisɛn kɔ-wa, hee mɔ'ɔ nɛ̀ búk mɛ daŋa-wese pɛsi nɛ̀ fuunu’ɛ ga. Mi tɛ zik ɗoŋ-am e ha̧ wa wese bɔnɛ kɔ-wa, mi beka gbak wa na.»

¹⁸Nɛ́ mɔ'ɔ nɛ̀ o bíí tɔ̧a: «Ɛ̀ɛ̀ é zu mɔ n’ɛɛ tɛ de nɛ̀ Jeremii; o wi-ɗafi-sɔ̧ a̧a̧ sɛnɛ mɛ usi mɔ h’ɛɛ, o wi-iŋ-mgbara-mɔ a̧a̧ sɛnɛ mɛ usi yuwar deemɔ h’ɛɛ, sɛka o wi-tɔ̧-wen oi nú Sɔ̧ a̧a̧ sɛnɛ mbɛt mɛ tɔ̧ wen oi nú Sɔ̧ h’ɛɛ. Ɛ̀ɛ̀ é zu mɔ n’ɛɛ tɛ de mɛ ɗaŋ nɛ̀ Jeremii yinɛ, k’ɛ́ɛ́ yeŋ zer yɛ tɛ wen kɔ̧-a̧ ɓɔna.»

¹⁹Ɛ̀nɛ̀ yéŋ zer'nɛ́ pii tɛ‘m, GASA WAN, ɓɛɛ ɛ̀nɛ̀ zíí wen nɛ̀ o wi-sɛn-am tɔ̧ zu'm’ɛ.

²⁰Wi tɛ kifi er demɔ nɛ̀ ɗaŋmɔ nde? Kɔ-wa, wa tui nɛ́ ɗaŋ pɛ́r ha̧‘m. Tɛ‘nɛ́ a̧ mbáŋ ɗoŋ yora-a n'am yora so ti'nɛ́ tɔ̧ nɛ̀ wen zu wa, wen ha̧ nyimsea k’ɛnɛ mɛ ga̧ zu wa.

²¹Ɛ̀nɛ̀ pí̧ kaɓa zu o bem kɔ-wa, gba-paa a̧ kúm wa! San-bem a̧ bá o kóò kɔ-wa, fio a̧ kum o wíì kɔ-wa, wen ha̧ wa mɛ ya o ko-gera, ɓɛɛ nɛ̀ ko o daŋa ŋgaiwi kɔ-wa a̧ kúm tɛ biro mbɛt.

²²A'i zíí nɛ́ o hiɗimɔ ŋga mɔɔ-bɔnɛ zu wa si fara kɔ-wa mɛ ŋgimbi n’ɛnɛ bé tɛ̀ɛ́ fo nɛ̀ o ŋga bíí tɛnɛ a zu wa, wen wa tui nɛ́ o pɛ́r zik nɛ‘m mɛ ba'm; wa a nɛ́ o yɔk fara-nɛɛ kɔ‘m.

²³GASA WAN, ɛnɛ iŋa ɗaŋ taamɔ kɔ-wa pii zu'm; k’ɛ́nɛ́ bi ɗaŋmɔ kɔ-wa yinɛ na, ká tɛ‘nɛ́ bi ɗoŋ yɔɔ-kaya kɔ-wa na. Wa a̧ tír a nù ti'nɛ́! Ɛ̀nɛ̀ dé nɛ́ ŋmaa in wa tɛ ŋgimbi nyimsea k’ɛnɛ ɛ̧!