Read Northwest Gbaya JEREMII 2 Bible Online

JEREMII 2 - Northwest Gbaya bible

JEREMII 2

¹Ɓɛɛ GASA WAN tɔ̧ ha̧‘m:

²«Mɛ̀ nɛ́ɛ̀ hé mbéá'ɛ sɛn Jerusalɛm hee ndé: Wen nɛ GASA WAN tɔ̧ nɛ mɔ'ɔ: Israɛl, tɛ‘m mbaŋa ɗoŋ kɔ̧ɔ̧mɔ kɔ-mɛ ŋgimbi nɛ̀ mɛ ɓɔna so nɛ̀ zɔŋa, hee mɔ'ɔ nɛ̀ mɛ kɔ̧ɔ̧ so nɛ̀‘m, tɛ ku̧u̧naŋ baa-ŋmaa k’ɛɛ in mɛɛ ga; mɛ ndaka so ɗoŋ-am sɛn ŋga-gbárà mɛ, sɛn tɛ ŋma mbimbi-nù.

³Israɛl, mɛ duka so nɛ́ mgbak mɔ kɔ‘m, mi GASA WAN; mɛ duka nɛ́ kuti zu-nyɔnɔ kɔ‘m; kóó o ndé nɛ̀ foo mɛ, kpaa wen kɔ‘m, ɓɛɛ ŋgamɔ kpaa wa. GASA WAN tɔ̧ɔ̧ hegɔ.»

⁴O bezaŋ Jakob, o bíí nutua ko Israɛl lɛŋ, ɛ̀nɛ̀ zíí wen ko GASA WAN.

⁵Gba̧a̧ wen ko GASA WAN nɛ̀ tɔ̧‘i nɛ́ mɔ'ɔ: «Nɛ́ ge ɗaŋmɔ ge a̧ o dáà k’ɛnɛ kpaa tɛ‘m, wen ha̧ wa mɛ e nɛ‘m duk ge? Wa ndaka ɗoŋ o geemɔ, ɓɛɛ wa kifi geemɔ!

⁶Wa ak géé aka mɔ‘e: ‹GASA WAN nɛ̀ gboo yɛ nú Egiptɛ, ɓɛɛ ká dúk ti h’ɛɛ si ŋga-gbárà, fara ndaɗa-nù in o gbóŋgó, nù kaɓa in fara-fio, nɛ̀ bíí ɓir sɛnɛ, kà bó nɛ̀ duka-a sɛnɛ na mbɛt'i, a̧a̧ déè ndé?› wó na.

⁷Zɔ́k, mi kaia'nɛ́ nɛ́ɛ̀ a tɛ gba de nú-dɛm-nyɔnɔ, wen h’ɛnɛ mɛ nyɔŋ mɔ sɛnɛ nɛ̀ de-a. Ɓɛɛ tɛ yea-a k’ɛnɛ sɛn hi̧i̧, ɛnɛ ɗaŋa nù kɔ‘m, ɓɛɛ ɛnɛ de ha̧ nù‘i mɛ kifi duk nɛ́ mɔɔ-búù.

⁸O wi-ɗafi-sɔ̧ ak géé aka mɔ‘e: ‹GASA WAN a̧a̧ déè ndé?› na. O wan-usi-heembea iŋ am na, o wi-dai-sami de nɛ́ ŋgazu in am, ɓɛɛ o wi-tɔ̧-wen oi nú Sɔ̧ tɔ̧ nɛ wen nɛ̀ nin sɔ̧ Bal, ndak nɛ̀ ɗoŋ o géé tum sɔ̧.

⁹Nɛ́ GASA WAN a̧ tɔ̧ wen’ɛ: Mi tɛ gɔn kita zu'nɛ́ in o bezaŋ‘nɛ́ mbɛt.»

¹⁰«Ɛ̀nɛ̀ nɛ́ si ka̧ ŋgere Kitim, ɛ̀nɛ̀ zɔ́k mɔ! Ɛ̀nɛ̀ tóm o bíí sitɛ o be Kedar, ɛ̀nɛ̀ ák mgbara mɔ in wa'e, pɛrti mɔ hegɔ dee so hi̧i̧ nɛti kaɗi nde?

¹¹Ŋma tugun bíí mɛ kpai o sɔ̧ kɔ‘i bo na, kóó nɛ̀ sɔ̧ kɔ-wa bo nɛ́ o kpasa sɔ̧ na mbɛt'i, ɓɛɛ nɛ̀ war ko dukbíí kɔ‘m, wa ba nɛ́ gasamɔ kɔ-wa kpai nɛ̀ geemɔ nɛ̀ gbak wi na.

¹²Sɛn tɛ mɔ‘i, ɗɛɗɛ‘nɛ́ a̧ gɔ́n! Ɛ́nɛ́ o mɔ-mɛ-yiwese, kíì a̧ bá‘nɛ́, ɓɛɛ tɛ‘nɛ́ a̧ nák mbɛt! GASA WAN tɔ̧ɔ̧ hegɔ!

¹³Nɛ̀ mbetɛ, ɗaŋmɔ nɛ̀ dukbíí kɔ‘m dea, daŋa zu ŋmaa yiitoo. Wa ea'm nɛ̀ duk nɛ́ kpút-kpút geɗa-yì duk, nɛ́ɛ̀ za̧ nɛ gɔna-yì nɛ̀ yì yor sɛnɛ na.»

¹⁴«Israɛl so nɛ́ bara? Wa kòó a̧ sɛn zaŋ bara nde? Wen ge sa wa de a̧ nɛ̀ bara ge?

¹⁵O daŋa-dila tuɓi nɛnɛ a zu a̧, ɗaŋ nɛ̀ nù kɔ̧-a̧ lɔkɔti-lɔkɔti, dɔ nɛ̀ o ye kɔ̧-a̧, ɓɛɛ o bíí saaye gbin yu mɔ yak lɛŋ ge?

¹⁶Kóó nɛ́ o be Mɛmfis in o be Dafne mbɛt kpuia zu-mɛ de nɛ̀ mɛ nɛ̀ bara.

¹⁷Bó nɛ́ mɔɔ nɔ'ɔ lɛŋ kpaa mɛ wen nɛ̀ mɛ ee GASA WAN Sɔ̧ kɔ-mɛ duk, ŋgimbi n'aa duka so mgbɔ nɛ̀ mɛ nɛnɛ na nde?

¹⁸Báá yuwar Egiptɛ mɛ nɛ̀ɛ́ nɔ gbaa-er Nil tɛ de nɛ́ ge ha̧ mɛ ge? Báá yuwar Asirii mɛ nɛ̀ɛ́ nɔ yí Efrat tɛ de nɛ́ ge ha̧ mɛ mbɛt ge?

¹⁹Ɗaŋmɔ kɔ-mɛ a̧ pí̧ bɔnɛ zu mɛ! Nyimmɔ in tu̧u̧-see a̧ tík zu mɛ nɛnɛ hɔ sɔŋkur-aa. Nɛ̀ mbetɛ, kinii mɛ́ yú kíí tɛ‘m ɓɔna; GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ tɔ̧ɔ̧ hegɔ.»

²⁰«Zɛ ɔ dɔka, mɛ́ mbo zu ha̧‘m ɓɔna, mɛ́ de nɛ ŋgazu in am tɔ̧ nɛnɛ‘e: ‹Mi kɔ̧ kɔ‘m duka bara ɓɔna,› ɓɛɛ mɛ gasi nɛ́ o géé-sɔ̧ nɛ zu o kaya in ɗɔɔ o da̧a̧ wa̧a̧-te lɛŋ.

²¹Mi guna mɛ hee gba de nyak-dɔ̧ɔ̧ ga; wen ge sa mɛ kpaia duk nɛ́ ŋma gɔni nyak-dɔ̧ɔ̧ nɛ̀ waya-a de na’ɛ ge?

²²Kóó mɛ̀ zui so tɛ-mɛ nɛ́ yì wese lɛŋ héé ge, kóó mɛ̀ zui nɛ́ yì nɛ̀ gba zɔm sa̧-ndiŋ mbɛt, ɗaŋmɔ kɔ-mɛ tɛ duk ɓɔn yí‘m. GASA WAN Sɔ̧ tɔ̧ɔ̧ hegɔ.

²³Hee ge mɛ tɔ̧‘e, mɛ ɗaŋ war-tɛ-mɛ tɛ nɛɛ ɗoŋ o sɔ̧ Bal na, ge? Mɛ̀ zɔ́k naŋanɔ kɔ-mɛ wan mɛ kɔ̧̀ ɗɔŋgɔ mɛ, ɓɛɛ ká mɛ́ kafi mɔ nɛ̀ mɛ dea na. Mɛ hɔɔ ŋmaa in ŋma zɔŋa ŋgeloba nɛ̀ nɛ́ nɔ̀ kɔ‘i si ti, si ɗoŋ ga.

²⁴Nana tuifuu-zaŋbɛɛ nɛ̀ iŋa duka-a kɔ‘i gbárà mɛ‘i, kà ŋgimbi-daŋ-ŋmaa kɔ̧-a̧ hɔ kaɗi, a̧ dee pɛr wiwii nɛ̀ ti búk nɛnɛ, ɓɛɛ wi nɛ̀ tɛ dor a̧ tɛ ŋgimbi'i nɛ́ o? Kóó nɛ́ ge wiwii-a ge nɛ̀ kɔ̧ɔ̧ mɛ daŋ a̧ tɛ kpa a̧ ɓan na tɛ ŋgimbi'i.

²⁵Israɛl mɛ̀ yór sɛ; kà bó hegɔ na, mɛ tɛ kifi nɛ́ wi-nɛ-nɔ̀ nɛ̀ géé naŋ, ɓɛɛ war ger-mɛ tɛ kor wen wɔ-yì! Mɔ kpɔk, mɛ́ tɔ̧́ kɔ-mɛ‘e: ‹Ŋma mɔɔ-de bo ɓɔna, mi kɔ̧ɔ̧ kɔ‘m nɛ́ o géé-sɔ̧, mi tɛ nɛ̀ nɛ́ ɗoŋ wa.›

²⁶Ziimɔ tɛ ba o be Israɛl hee mɔ'ɔ nɛ ziimɔ ba nɛ̀ wi-zuzu nɛ̀‘i ba fara zu mɔ'ɛ ga. Ziimɔ tɛ ba o wannu kɔ-wa, o gasawi, o wi-ɗafi-sɔ̧ gu nɛ̀ o wi-tɔ̧-wen oi nú Sɔ̧ kɔ-wa mbɛt.

²⁷«Wa tɔ̧ɔ̧ ha̧ te'e: ‹Mɛ́ nɛ́ dáà k’ɛɛ!› Ɓɛɛ wa tɔ̧ ha̧ ta: ‹Nɛ́ mɛ́'ɛ kòò yɛ!› Wa zika kɔr-zu e ha̧‘m, wa zɔk mɔ pii tɛ‘m na, ɓɛɛ nɛ́ ŋgimbi nɛ̀ ŋgamɔ kpa wa kaɗi, sɛka wa tɔ̧ɔ̧ ha̧‘m'e: ‹Ɛ̀nɛ̀ kúr, ɛ̀nɛ̀ kpásí yɛ.›

²⁸Ɓɛɛ kifa nú kɔ‘m nɛ́ mɔ'ɔ: O sɔ̧ n’ɛnɛ dee nɛ̀ er a̧a̧ déè? Kà wa nɛ́ nyɛma mɛ kpasi'nɛ́ tɛ ŋgimbi bɔnɛ k’ɛnɛ, wa a̧ kúr, wa a̧ kpásí‘nɛ́ gɔ! K’ɛ́nɛ́ o be Juda, o sɔ̧ k’ɛnɛ dɔka nyɛm nɛ̀ ɗoŋ o ye k’ɛnɛ.

²⁹«Ɛ́nɛ́ dik wen a zu'm wen ge? Ɛ́nɛ́ lɛŋ kura zu'm. Nɛ́ mi GASA WAN a̧ tɔ̧ wen’ɛ.

³⁰Mi gusa o bezaŋ‘nɛ́ takaɗi; wa kpɛk usamɔ kɔ‘m na. Gba-paa k’ɛnɛ kum nɛ́ o wi-tɔ̧-wen oi nú Sɔ̧ nɛ̀ duk mgbara'nɛ́ hee dila-ɗaŋ-mɔ ga.

³¹(Ɛ́nɛ́ o be-kinɛɛ! Ɛ̀nɛ̀ zíí wen nɛ̀ GASA WAN tɔ̧'ɛ!) Mi kifa nɛ́ ŋga-gbárà wen o be Israɛl nde? Mi kifa nɛ́ nù nɛ̀ duk zaŋ tum nde? Wen ge sa dukbíí kɔ‘m tɔ̧‘e, wi yak kɔ‘i nɛ̀ yaka-a si fara nɛ‘i kɔ̧a̧, nɛ̀‘i beka pii ɗoŋ tɛ‘m ɓɔna ge?

³²Tɛ zɔŋa bi so ɗoŋ o mbɔi-tɛ kɔ‘i bii? Tɛ wan-wíì bi so ɗoŋ o mɔɔ-ɗafi-tɛ kɔ‘i bii nde? Ɓɛɛ war ko dukbíí kɔ‘m, tɛ-wa bìí ɗoŋ-am zɛ ɔ dɔka.

³³«Ho! Mɛ iŋa so yuwar kia-a ha̧ o bíí mɛ kɔ̧ mɛ wa! Mɛ̀ nɛ́ hegɔ ɓɛɛ sa yuwar gbɛɛ-zu hir tɛ-mɛ.

³⁴Tɔk-tɛ o wisan nɛ̀ de ŋma ɗaŋmɔ na a̧a̧ naŋ laa kɔ-mɛ‘i! Mɛ̀ nɛ́ sɛn tɛ laa nɔ‘i a̧‘m kpaa nɛ̀ tɔk'i, bó nɛ́ mɛ kpaa nɛ́ wa fara koma tua na.

³⁵Ɓɛɛ zu-a'i, mɛ tɔ̧a'e, ɗaŋmɔ kɔ‘i bo na, nyimsea ko Sɔ̧ beka tik zu wi na. Ɓɛɛ kɔ‘m, mi tɛ gɔn kita zu mɛ, wen nɛ̀ mɛ tɔ̧a'e, mɛ de gɔɔmɔ na.

³⁶«Mɛ yɔ nɛ kaya siti siti de nɛ ɗaŋmɔ nɛtɛ nɛtɛ; mɔɔ-oi-tom kɔ-mɛ nɛ́ ziimɔ, nɛ̀ tɛ ba mɛ yí Egiptɛ hee mɔ'ɔ nɛ̀ ziimɔ baa so nɛ̀ mɛ yí Asirii’ɛ ga.

³⁷Mɛ tɛ a er gba̧a̧ zu-mɛ gbo nɛnɛ sɛn fara'i mbɛt, wen mi GASA WAN zɔk kɔ‘m yuwar-pɛma-tɛ kɔ-mɛ‘i hee geemɔ ga; bo nɛ hegɔ a̧ mɛ tɛ de nɛ̀ mɔ hɔ gba̧a̧ na.»