Read Northwest Gbaya JEREMII 21 Bible Online

JEREMII 21 - Northwest Gbaya bible

JEREMII 21

¹GASA WAN tɔ̧ɔ̧ wen ha̧ Jeremii ŋgimbi nɛ̀ wannu Sedesias toma nɛ̀ Pasehur bem ko Malkia in wi-ɗafi-sɔ̧ Sefania bem ko Masɛya mɛ tɔ̧ ha̧ a̧‘e:

²«Mɛ̀ nɛ́ɛ̀ ak mgbara mɔ zu yɛ in GASA WAN, wen Nabukɔdɔnɔsɔr wannu Babilɔŋ bi nɛ ɛɛ. Ŋmafara GASA WAN tɛ gbak yɛ nɛ̀ ŋma mɔɔ-kifi kɔ‘i, nɛ̀ tɛ de ha̧ Nabukɔdɔnɔsɔr mɛ gbin gbagari-biro yak.»

³Jeremii kifa nú ha̧ wa: «Mɔ n’ɛnɛ tɛ nɛ̀ɛ́ tɔ̧ ha̧ Sedesias nɛ́ mɔ'ɔ.

⁴GASA WAN Sɔ̧ ko Israɛl tɔ̧a'e: O boi-biro n’ɛnɛ kai mɛ bi nɛ̀ wannu Babilɔŋ in o bíí Kaldee nɛ̀ nasi ɛ́nɛ́ nɛ̀ ɗoŋ garo mɛ‘i, mi tɛ de ha̧ nú o boi nɔ‘i k’ɛnɛ‘i mɛ zik pii ɗoŋ zu'nɛ́.

⁵See-am tɛ kur, ɓɛɛ mi nɛ̀ tɛ‘m tɛ nyɛi̧ ŋga er-am mɛ bi'nɛ́ tɛ nyimsea in tu̧u̧-see kɔ‘m.

⁶Mi tɛ kum o bíí tɛ ye'i, o bíí gú nɛ̀ o saɗi; nɛ́ ŋga zɛɛ-geŋa a̧ tɛ kum wa!

⁷Nɛ́ mi, GASA WAN a̧ tɔ̧ wen’ɛ. Ɗoŋ mɔ‘i, mi tɛ e Sedesias wannu Juda in o wi-de-tom kɔ‘i, ká bá nɛ̀ o bíí saaye’ɛ nɛ̀ zɛɛ-geŋa tɛ gbɛ wa ɓɛɛ wa fee fio gba-paa in kaɓa mbɛt’ɛ. Mi tɛ e wa er wannu Babilɔŋ, er o wisɛn kɔ-wa nɛ̀ kíí mɛ gbɛ wa, ɓɛɛ wa tɛ kum wa nɛ̀ ŋma be deako kóó tikiɗi beka bo yí-wa na.

⁸«Ɓɛɛ nɛ̀ ko o wi nɔ'ɔ, mɛ tɛ tɔ̧ ha̧ wa'e ndé, wen nɛ̀ GASA WAN tɔ̧ nɛ́ mɔ'ɔ: Mi tɛ e h’ɛnɛ mɛ hok mgbara fio in duka-kpasa.

⁹Wi nɛ̀ tɛ ɓɔn tɛ ye’ɛ tɛ fe nɛ̀ fio zɛɛ-geŋa, gba-paa in kaɓa. Wi nɛ̀ tɛ gbo kɔ‘i sitɛ o be Babilɔŋ nɛ̀ kɛr'nɛ‘i tɛ kpasi, a̧ beka fe na.

¹⁰Nɛ́ mi GASA WAN a̧ tɔ̧ wen’ɛ! Nɛ̀ mbetɛ, mi zik tɛ‘m sitɛ ye’ɛ, bo nɛ wen dee demɔ na, ɓɛɛ nɛ́ wen dee ŋgamɔ. Mi tɛ e a̧ ɗɔɔ ŋgai ko wannu Babilɔŋ nɛ̀ tɛ pi̧ wee sɛnɛ.»

¹¹Ɛ́nɛ́ be nutua ko wannu Juda, ɛ̀nɛ̀ zíí wen ko GASA WAN.

¹²Ɛ́nɛ́ be nútua ko David, wen nɛ̀ GASA WAN tɔ̧ h’ɛnɛ nɛ́ mɔ'ɔ. «Ɛ̀nɛ̀ gɔ́n kita nɛ̀ yuwar-a mɛ tutuyɛ lɛŋ! Ɛ̀nɛ̀ kpásí wi-bɔnɛ ɗɔɔ ŋgai ko wi-nyɔŋ-yí-wí! Kà bó hegɔ na, nyimsea kɔ‘m tɛ kur zu'nɛ́ hee wee ga, nɛ̀ tɛ dar yaknɛ, ŋma wi bia-a yinɛ beka bo na, wen o ɗaŋ deemɔ k’ɛnɛ.

¹³Nɛ́ mi GASA WAN a̧ tɔ̧ wen’ɛ. Mi tɛ ba zu'm dúk nɛ̀ ɛ́nɛ́, o wi-ɔ tɛ hira-fara zu yɔka-ta nɛ̀ tɔ̧‘e, ŋma bíí nɛ̀ tɛ zir mɛ ye si ɗoŋ‘nɛ bo na wó'ɛ.

¹⁴Mi tɛ de ŋmaa in'nɛɛ nyɛm nɛ̀ ɗoŋ tom k’ɛnɛ. Mi tɛ pi̧ wee kɔ̧ kombo[18] k’ɛnɛ nɛ tɛ dɔ mɔ lɛŋ a nù. Nɛ́ mi GASA WAN a̧ tɔ̧ wen'i.»