Read Northwest Gbaya JEREMII 22 Bible Online

JEREMII 22 - Northwest Gbaya bible

JEREMII 22

¹GASA WAN tɔ̧a ha̧ Jeremii: «Mɛ̀ zír si nutua ko wannu Juda,

²ɓɛɛ mɛ̀ tɔ̧́ wen’ɛ ha̧ a̧‘e: Wannu Juda nɛ̀ duk zu damti-wan ko David, mɛ̀ zíí wen ko GASA WAN; mɛ́ in o gasawi gú nɛ̀ o bíí kɔ-mɛ nɛ̀ ɓir nɛ̀ o nú tua nɔ'ɔ.

³Tɔ̧ɔ̧-wen ko GASA WAN h’ɛnɛ nɛ́ mɔ'ɔ: Ɛ̀nɛ̀ gɔ́n kita zu o bíí nɛ̀ yuwar-a, de nɛ̀ mɔ nɛ̀ de-a; ɛ̀nɛ̀ kpásí o wi-bɔnɛ ɗɔɔ ŋgai ko o wi-nyɔŋ-yí-wí; k’ɛ́nɛ́ usi bɔnɛ ha̧ o gɛnɛ, o be-oi in o ko-gera na, k’ɛ́nɛ́ gbɛ o bíí nɛ̀ duk zóóŋ géè sɛn fara’ɛ na mbɛt.

⁴K’ɛ̀nɛ̀ nɛ́ dee mɔ nyɛm nɛ̀ ɗoŋ wen kɔ‘m, ɓɛɛ o wan k’ɛnɛ tɛ ɔ wan zu damti-wan ko David siti, daŋ nɛ̀ o keekee in o nyaŋa; wa in o gasawi bá nɛ̀ o bíí kɔ-wa tɛ duk tɛ yea-a nɛ̀ o nú tua nɔ'ɔ siti.

⁵Nɛ́ GASA WAN a̧ tɔ̧ wen’ɛ. K’ɛ̀nɛ̀ zii o wen nɔ'ɔ na, mi kana mɔ nɛ̀ tɛ‘m, tua’ɛ tɛ kifi nɛ́ geemɔ.»

⁶Ɛ̧ɛ̧ hɛ̧ɛ̧ nɛ́ mɔ nɛ̀ GASA WAN tɔ̧ɔ̧ zu o be nútua ko wannu Juda: «Kóó mɛ duka so yí‘m hee Galad, kóó hee ŋma kaya Libaŋ ga, mi kana mɔ‘e, mi tɛ de ha̧ mɛ mɛ kifi nɛ́ géé ŋga-gbárà, nɛ̀ ŋma bíí beka de ye sɛnɛ na.

⁷Mi tɛ tom o ŋma bíí mɛ nɛ̀ɛ́ ɗaŋ mɛ, kóó o ndé nɛ̀ boi kɔ‘i, ɓɛɛ wa gɔma o gba de gbatui kɔ-mɛ a nù, pi̧ wee sɛnɛ bíí wee lɛŋ.

⁸«Ŋgimbi nɛ o bíí tɛ o tugun bíí nɛtɛ nɛtɛ bé tɛ̀ɛ́ ɓir ká̧ ye'i, wa tɛ tɔ̧ sitɛ o ŋmaa'e: ‹Wen ge sa GASA WAN dee ɛ̧ɛ̧ zɔm mɔ'ɔ in gasa ye’ɛ hegɔ'ɛ ge?›

⁹Ɓɛɛ wa tɛ kifi nú‘e: ‹Mɛ̀ nɛ́ wen nɛ̀ wa ee yuwar nɔɔ-tɔk kɔ-wa in GASA WAN Sɔ̧ kɔ-wa duk nɛ́ɛ̀ gu nù ti o ŋma sɔ̧, gasi nɛ̀ wa.› »

¹⁰«Ɛ́nɛ́ o be Juda, k’ɛ́nɛ́ hi̧i̧ wannu Josias nɛ̀ fea na! k’ɛ́nɛ́ de ko nɛ̀ tɛ‘nɛ́ wen zu a̧ na mbɛt.[19] Ɓɛɛ ɛ̀nɛ̀ hí̧í̧ nɛ́ wi nɛ̀ wa ba yaknɛ‘i ɛ̧, wen a̧ beka zɔk nù nɛ̀ wa kòó a̧ sɛnɛ woyo ɓɔna.»

¹¹Wen nɛ̀ GASA WAN tɔ̧ɔ̧ zu Salum, bem ko Josias wannu Juda nɛ̀ ɔɔ so wan oi dáà kɔ‘i, ɓɛɛ nɛ̀ wa baa so yaknɛ nɛ̀ bara-biro nɛ́ mɔ'ɔ: «Kɔ̧-a̧, a̧ beka pii ɗoŋ ɓɔna.

¹²A̧ tɛ fe ɓɔn fara nɛ̀ wa ba a̧ si sɛnɛ‘i, a̧ beka zɔk nù'ɛ nɛ̀ yí-a ɓɔna.»

¹³«Bɔnɛ a̧a̧ zu wi nɛ̀ de tua-wan kɔ‘i nɛ̀ yuwar-ɔramɔ, nɛ̀ de tua kɔ‘i zu ŋmaa nɛ̀ yuwar-nyɔŋa-yí-bíí, nɛ̀ mɔi o ŋma-a de nɛ̀ tom ha̧ a̧ sɔɔ géè, ɓɛɛ nɛ̀ yoɓi mɔɔ-oi-tom ha̧ wa na.

¹⁴Wi’ɛi'e ndé: wi de nɛ́ gasa tua kɔ‘i, e nɛ̀ o bɛr-aa mɛ ŋgɔn nɛ̀ pɛsa-a; wi a nɛ o woi-aa, ɗafi nɛ̀ ɗoŋ-aa nɛ̀ gbatui, sɔ̧ nɛ̀ gbɛ̧-mɔ ɗoŋ-aa mbɛt.

¹⁵Mɛ kɔ̧ɔ̧ mɛ usi'e mɛ nɛ́ wan, tɛ hoka gbatui ɗafi nɛ̀ ɗoŋ tua kɔ-mɛ‘i nde? Dáà kɔ-mɛ nyɔŋa so mɔ, nɔ nɛ̀ mɔ, gɔn nɛ̀ kita nɛ̀ yuwar-a, de nɛ̀ demɔ, ɓɛɛ a̧ kpa de duka-a.

¹⁶A̧ yora so ɗoŋ o wi-bɔnɛ in o wisan, ɓɛɛ mɔ duk nɛ̀ de-a. Bíí nɛ̀ de mɔ hegɔ usi'e wi’ɛi iŋa'm nɛ̀ de-a. Nɛ́ mi GASA WAN a̧ tɔ̧ wen’ɛ.

¹⁷O zɔkamɔ kɔ-mɛ in taamɔ kɔ-mɛ, nɛ́ wen kpaa yí-mɔ kɔ-mɛ ɓɛɛ, gbɛ nɛ̀ o bíí nɛ̀ wen bo zu wa na nɛ̀ saka-yí, de nɛ̀ mɔ nɛ̀ ŋgai hee saɗi ga.»

¹⁸Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ɔ̧ ha̧ Yoyakim bem ko Josias wannu Juda nɛ́ mɔ'ɔ: «Wi beka ai nú, bíí nɛ̀ gima-fio zu a̧ tɔ̧ nɛnɛ‘e: ‹Oee mi wa, nya'm! Oee mi wa, boko-nya'm!› na. Wi beka hi̧i̧ kɔ̧a̧ zu a̧ tɔ̧ nɛnɛ‘e: ‹Oee mi wa, wan kɔ‘m! Oee mi wa, wannu!› na mbɛt.

¹⁹Wi tɛ gun a̧ hee mɔ'ɔ nɛ̀‘i gun nɛ̀ tuifuu’ɛ ga, wa tɛ gbur a̧ gbonɛ nɛ̀ nú garo Jerusalɛm pi̧ taŋ si zan mɛ.»

²⁰«Jerusalɛm, mɛ̀ dáŋ si zu kaya Libaŋ ɓɛɛ mɛ̀ híɗí mɔ, mɛ̀ híɗí mɔ nɛ̀ hee ger si Basaŋ mɛ, mɛ̀ híɗí mɔ̀ dam fara lɛŋ;[20] wen o wi-kɔ̧-mɛ kuma kaɗi.

²¹Mi gaia so mɛ tɛ de ŋgimbi, ɓɛɛ mɛ kɔ̧ zia-a na. Nɛ́ hegɔ a̧ mɛ dea nɛ̀ bem mɛ tɛnɛ: mɛ zii so wen nú‘m na.

²²Gba-búk tɛ kai o wi-duk-zu-mɛ, gú nɛ̀ o wi-kɔ̧-mɛ lɛŋ yaknɛ si gɔni-nù mɛ. Nɛ̀ mbetɛ, foe in búù tɛ ba mɛ zu ɗaŋ kɔ-mɛ.

²³Mɛ́ nɛ̀ duk so mɔ kɔ-mɛ nɛ̀ de-a zu Libaŋ mɛ‘i’ɛ, nɛ̀ dee so yáá kɔ-mɛ kɔ̧́ gbatui,[21] mɛ tɛ gɔfi mɔ tɛ bɔnɛ nɛ̀ tɛ kpa mɛ, hee bɔnɛ nɛ̀ okoo zɔk tɛ ŋgimbi kóó bem’ɛ ga.»

²⁴GASA WAN tɔ̧a: «Hee mɔ'ɔ n'am duk kpasa ga, kà Konia bem ko Joakim wannu Juda duk so nɛ́ wele-pi̧-er-am mɛ wiiko, mi tɛ̀ɛ́ kpɔ̧i̧ a̧ pi̧ nù.

²⁵Mi ee mɛ er o wi nɛ̀ kíí mɛ gbɛ mɛ, o bíí wan nɛ̀ mɛ yu dɔ zu nɛ̀ wee'i; mi ee mɛ er Babilɔŋ in er Nabukɔdɔnɔsɔr, wannu Babilɔŋ in o wi-biro kɔ‘i, o be Kaldee.

²⁶Mi tɛ ndak ɛnɛ in nàá nɛ kòò mɛ si ŋma nù nɛ wa ko'nɛ́ sɛnɛ na, ɓɛɛ nɛ́ sɛn hi̧i̧ ɛ̀nɛ̀ tɛ fe sɛnɛ.

²⁷Ɛ́nɛ́ tɛ kɔ̧ nyɛmna mɛ si ɗoŋ si nù k’ɛnɛ, ɓɛɛ ŋgai-sii-ɗoŋ beka bo na!»

²⁸O bíí tɛ tɔ̧‘e: «Konia nɛ́ ŋma nyɛ́k nɛ̀ gbaa, nɛ̀‘i kɔ̧ ɓɔna, ɓɛɛ nɛ̀‘i beka de nɛ tom ɓɔna nde? Wen ge wi ndaka a̧ in o bem kɔ̧-a̧ si ŋma nù nɛ wa iŋ na ge nde?»

²⁹Ho! Nù kɔ‘m, nù kɔ‘m, mɛ̀ zíí wen ko GASA WAN.

³⁰Wen nɛ̀ GASA WAN tɔ̧ nɛ́ mɔ'ɔ: «Ɛ̀nɛ̀ yɔ́r mɔ zu wi’ɛ hee bíí nɛ̀ bó nɛ̀ bem ga na. A̧ nɛ́ ŋma bem nɛ̀ sɔnti ɗaŋa. Ŋma bezaŋ-aa nɛ̀ tɛ ɔ wan zu damti-wan ko David, sɛka bé dè ɓɛɛ ká a̧ ɔɔ wan zu nù ko Juda bo na.»