Read Northwest Gbaya JEREMII 29 Bible Online

JEREMII 29 - Northwest Gbaya bible

JEREMII 29

¹Gba̧a̧-wen kalata nɛ̀ wi-tɔ̧-wen oi nú Sɔ̧ Jeremii toma nɛ̀ Jerusalɛm ha̧ o gasawi, o wi-ɗafi-sɔ̧, o wi-tɔ̧-wen oi nú Sɔ̧ in dukbíí lɛŋ nɛ̀ wannu Nabukɔdɔnɔsɔr kaia so nɛ̀ bara-biro nɛ̀ Jerusalɛm si Babilɔŋ nɛ́ mɔ'ɔ.

²(Duka so nɛ́ ɗoŋ ŋgimbi nɛ̀ Yekonia yuu nɛnɛ Jerusalɛm in nàà kɔ‘i, o kpàná, o gasawi Juda in Jerusalɛm, o wi-iŋ-dee-tom gú nɛ̀ o wi-ɗafi-nú tua yaka nɛnɛ‘i, á̧ Jeremii yɔra nɛ̀ kalata'i.)

³A̧ ha̧a̧ kalata'i ha̧ Elɛasa bem ko Safaŋ in ha̧ Gɛmaria bem ko Hilkia nɛ̀ Sedesias wannu Juda toma so ha̧ Nabukɔdɔnɔsɔr, wannu Babilɔŋ si Babilɔŋ mɛ.

⁴«Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ ha̧ o bíí n'aa dee ha̧ wa mɛ kai nɛ̀ bara-biro, nɛ̀ Jerusalɛm si Babilɔŋ nɛ́ mɔ'ɔ:

⁵Ɛ̀nɛ̀ mbó o tua, ɛ̀nɛ̀ ɔ́ sɛnɛ, ɛ̀nɛ̀ wá o fɔ, ɓɛɛ ɛ̀nɛ̀ nyɔ́ŋ mɔ-aa.

⁶Ɛ̀nɛ̀ bá kóò, ɓɛɛ ɛ̀nɛ̀ kó o be-wiwii in o be-okoo. Ɛ̀nɛ̀ kíí o boko-bem ha̧ o be-wiwii k’ɛnɛ mɛ ba nɛ̀ kóò; ɛ̀nɛ̀ há̧ o boko-bem k’ɛnɛ ha̧ o wíì ha̧ wa mɛ ko o bem mbɛt. Ɛ̀nɛ̀ kó dun nù fara n’ɛnɛ ya sɛnɛ‘i, k’ɛ́nɛ́ sir ɓɔna.

⁷Ɛ̀nɛ̀ tá mɔ wen gasa-a ko ye n'am kaia'nɛ́ nɛ̀ bara a sɛnɛ‘i, ɓɛɛ ɛ̀nɛ̀ kɔ́f'am wen-aa. Nɛ́ gasa-a k’ɛnɛ a̧ tɛ de ha̧ ye'i mɛ gasi siti mbɛt.

⁸«Nɛ̀ mbetɛ, tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl nɛ́ mɔ'ɔ: K’ɛ́nɛ́ e ha̧ o wi-tɔ̧-wen oi nú Sɔ̧, kóó o wan-gbánà nɛ̀ a̧a̧ mgbara'nɛ́ mɛ ɔr'nɛ́ na. K’ɛ́nɛ́ e ta nɛ̀ ɔɔ-zu k’ɛnɛ na.

⁹GASA WAN tɔ̧a, o wen nɛ̀ wa tɔ̧ nɛ̀ nin-am'i nɛ́ ndela. Mi tom kɔ‘m wa na.

¹⁰«Nɛ́ mɔ'ɔ nɛ̀ GASA WAN tɛ̀ɛ̀ tɔ̧ woyo'e: Kà pɛ ɓu-mɔɔrɔ-ɗoŋ-yiitoo n'am gɔna ha̧ Babilɔŋ bé tɛ̀ɛ́ yak kaɗi, mi tɛ ta mɔ wen'nɛ́, ɓɛɛ mi tɛ de mɔ nyɛm nɛ̀ ɗoŋ ha̧a̧nú n'am ha̧a̧ so wen pia-ɗoŋ k’ɛnɛ pii fara’ɛ.

¹¹Kɔ‘m, mi iŋa o mɔ n'am ee zu-a mɛ de h’ɛnɛ. Mi ee zu mɔ ha̧ mɔɔ-nù k’ɛnɛ mɛ nɛ nɔ̀ nɛ̀ de-a, nɛ̀ bó nɛ́ h’ɛnɛ mɛ zɔk nɛ́ bɔnɛ na. Mi tɛ de h’ɛnɛ mɛ kpa mɔɔ-e-nɛ-ta, ɓɛɛ ha̧ mɔ mɛ ba nɛ̀ ɛnɛ tɛ duka-a k’ɛnɛ wan mɛ siti. Nɛ́ mi GASA WAN a̧ tɔ̧ wen’ɛ.

¹²Ɛ́nɛ́ tɛ sa sara pii tɛ‘m, ɛ́nɛ́ tɛ tɛ mɛ kɔf'am am, ɓɛɛ mi tɛ zii kɔfamɔ k’ɛnɛ.

¹³K’ɛ̀nɛ̀ nɛ́ kia'm, ɓɛɛ ɛ́nɛ́ tɛ kpa'm, k’ɛ̀nɛ̀ nɛ́ kia'm nɛ̀ see'nɛ́ lɛŋ,

¹⁴ɓɛɛ mi tɛ e h’ɛnɛ mɛ hɔ kpa'm. Nɛ́ GASA WAN a̧ tɔ̧ wen’ɛ. Mi tɛ ɗafi'nɛ́ woyo, ɓɛɛ mi tɛ kai'nɛ́ piinɛ ɗoŋ pii fara n’ɛnɛ yaa so sɛnɛ yak nɛ̀ bara-biro'i.

¹⁵«GASA WAN tɔ̧ wen’ɛ h’ɛnɛ wen ɛnɛ ta k’ɛnɛ‘e a̧ ha̧a̧ o wi-tɔ̧-wen oi nú Sɔ̧ h’ɛnɛ nɛ̀ Babilɔŋ mɛ.

¹⁶«Ɓɛɛ mɔ nɛ̀ GASA WAN tɔ̧ ha̧ wannu nɛ̀ duk zu damti-wan ko David, in ha̧ o bíí lɛŋ nɛ̀ ɔ saaye’ɛ, ká bá nɛ̀ o nya'nɛ́ nɛ̀ wa kai nɛ̀ bara-biro yaknɛ in'nɛɛ na nɛ́ mɔ'ɔ.

¹⁷Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ nɛ mɔ'ɔ. Mi tɛ tom gba-paa, kaɓa in ŋga zɛɛ-geŋa pi̧ zu wa; mi tɛ de mɔ in wa hee mɔ'ɔ nɛ̀‘i de nɛ̀ mɔ in waya-mbɔra nɛ̀ ɗaŋa ɓɛɛ nɛ̀‘i beka nyɛm mɛ nyɔŋ na’ɛ ga.

¹⁸Mi tɛ nasi wa yaknɛ nɛ̀ gba-paa, kaɓa, ká bá nɛ̀ ŋga zɛɛ-geŋa. Mɔ n'am tɛ de in wa'i tɛ pi̧ kíì tɛ o mɔɔ-wan zaŋnu lɛŋ, ɓɛɛ wi tɛ ba wen tɛ-wa fom nɛ̀ o ŋmaa. Nù kɔ-wa tɛ kifi duk nɛ́ geemɔ nɛ̀ tɛ pi̧ kíì tɛ o tugun bíí lɛŋ, ɓɛɛ o tugun bíí n'am tɛ pɛsi wa si mgbara wa'i tɛ e wa nɛ̀ mɔɔ-da̧ nɛ̀ o ŋmaa,

¹⁹wen wa zii wen kɔ‘m na. Nɛ́ GASA WAN a̧ tɔ̧ wen’ɛ. Mi toma so o wi-de-tom kɔ‘m, o wi-tɔ̧-wen oi nú‘m ŋgimbi lɛŋ ha̧ wa takaɗi, wa zii wen nú‘m na. GASA WAN tɔ̧ɔ̧ hegɔ.

²⁰«Ɛ́nɛ́ o wi n'am ndaka nɛ̀ Jerusalɛm si Babilɔŋ, ɛ̀nɛ̀ zíí wen ko GASA WAN.

²¹«Mɔ nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ ha̧ Akab, bem ko Kɔlaya in ha̧ Sedesias bem ko Masɛya, nɛ̀ ya nɛ́ o wi-tɔ̧-wen oi nú‘m h’ɛnɛ nɛ̀ ndela nɛ́ mɔ'ɔ: Mi tɛ e wa ɗɔɔ ŋgai ko Nabukɔdɔnɔsɔr wannu Babilɔŋ, ɓɛɛ a̧ tɛ gbɛ wa ɓɔn gbaayí‘nɛ́.

²²Wa tɛ duk nɛ́ mɔɔ-fom mgbara o be Juda lɛŋ nɛ̀ wa kaia nɛ̀ bara-biro si Babilɔŋ; wi tɛ tɔ̧‘e: ‹GASA WAN a̧ dé mɔ in mɛɛ hee mɔ'ɔ n'aa dee so in Sedesias bá nɛ̀ Akab nɛ̀ wannu Babilɔŋ dɔɔ so yí wee’ɛ ga!›

²³GASA WAN tɔ̧a: Hegɔ, ŋgamɔ tɛ kpa wa zu mɔ nɛ̀ wa dea nɛ̀ duk nɛ́ mɔɔ-zim mgbara o be Israɛl. Ta-oi-mɔ kɔ-wa nɛ́ dee dàlà in kóò ko ŋmá-wà, ɓɛɛ zu-a'i, wa duk tɛ tɔ̧ɔ̧ wen ndela nɛ̀ nin-am nɛnɛ, nɛ̀ bó nɛ́ nú‘m a̧ ee wen nú-wa na. Mi iŋa mɔ‘i nɛ̀ wa de'i, mi nɛ́ wi-sedaako-a.»

²⁴«Mɔ nɛ̀ mɛ tɛ tɔ̧ ha̧ Sɛmaya be Nɛhalam nɛ́ mɔ'ɔ:

²⁵Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl ha̧ Sɛmaya nɛ́ mɔ'ɔ: O gba̧a̧ wen zaŋ kalata nɛ̀ mɛ toma nɛ̀ nin-mɛ ha̧ dukbíí sɛn Jerusalɛm lɛŋ, in ha̧ Sɛfania wi-ɗafi-sɔ̧ bem ko Masɛya, ká bá nɛ̀ o wi-ɗafi-sɔ̧ lɛŋ nɛ́ mɔ'ɔ:

²⁶Nɛ́ GASA WAN a̧ ee mɛ, wen ha̧ mɛ mɛ duk oi Yehoyada wi-ɗafi-sɔ̧, wen ha̧ mɛ mɛ zɔk o mɔ kɔ̧́ Tua ko Sɔ̧. Bíí lɛŋ nɛ̀ tɛ tɔ̧ wen nɛ̀ ɗaŋ-a oi nú Sɔ̧, mɛ tɛ hɛr wa nɛ̀ nyak-boi, kóó pi̧i̧ káná-boi ger-wa.

²⁷Ɓɛɛ wen ge sa see-mɛ tu̧ zu Jeremii be Anatot nɛ̀ tɔ̧ wen oi nú Sɔ̧ mgbara'nɛ‘i na ge?

²⁸Wen a̧ yɔra kalata h’ɛɛ kinii sɛn Babilɔŋ nɛ̀ tɔ̧a'e, ɗoŋ duka-a k’ɛɛ tɛ bara-biro tɛ nyɛi, ɛ̀ɛ̀ mbó o tua, ɛ̀ɛ̀ ɔ́ sɛnɛ, ɛ̀ɛ̀ wá o fɔ, ɓɛɛ ɛ̀ɛ̀ nyɔ́ŋ mɔ-a.»

²⁹Wi-ɗafi-sɔ̧ Sɛfania tɔra kalata'i ha̧ Jeremii wi-tɔ̧-wen oi nú Sɔ̧,

³⁰ɓɛɛ GASA WAN tɔ̧ ha̧ Jeremii:

³¹«Mɛ̀ tóm tom’ɛ ha̧ o wi nɛ̀ wa kaia nɛ̀ bara-biro lɛŋ. Tɔ̧ɔ̧-wen ko GASA WAN zu Sɛmaya be Nɛhalam nɛ́ mɔ'ɔ: Hee mɔ'ɔ n'aa tɔ̧ wen ɔr nɛ̀ ɛnɛ, ɓɛɛ ká‘m tom kɔ‘m a̧ na ga,

³²nɛ̀ mbetɛ, mi tɛ kur zu a̧ in o bezaŋ-aa. Kóó ŋma bíí kpɔk mgbara o bii nútua kɔ̧-a̧ nɛ̀ tɛ nyɔŋ bɔtɛ n'am tɛ ha̧ ha̧ dukbíí kɔ‘m bo na, wen a̧ usa ɗoŋ ŋgazu ha̧ dukbíí kɔ‘m. GASA WAN tɔ̧ɔ̧ hegɔ.»