Read Northwest Gbaya JEREMII 30 Bible Online

JEREMII 30 - Northwest Gbaya bible

JEREMII 30

¹GASA WAN tɔ̧ɔ̧ wen ha̧ Jeremii hee mɔ'ɔ ga:

²«Nɛ́ mi GASA WAN Sɔ̧ ko Israɛl a̧ tɔ̧ wen’ɛ. Mɛ̀ yɔ́r o wen lɛŋ n'am tɔ̧ ha̧ mɛ zaŋ kalata.

³GASA WAN tɔ̧a: Ŋgimbi tɛ hɔ n'am tɛ ɗafi o be Israɛl dukbíí kɔ‘m in Juda woyo; mi tɛ mgbɔ wa pii ɗoŋ tɛ nù n'am ha̧a̧ so ha̧ o dáà kɔ-wa, ɓɛɛ nù‘i tɛ duk nɛ́ mɔ kɔ-wa.»

⁴Wen nɛ̀ GASA WAN tɔ̧ zu Israɛl (in Juda) nɛ́ mɔ'ɔ:

⁵«Wi zii nɛ́ o hiɗimɔ-bele; in gasa mɔɔ-kíì, ga̧a̧mɔ bo na.

⁶Ɛ̀nɛ̀ kíí mɔ, ɓɛɛ ɛ̀nɛ̀ zɔ́k a̧‘i; wiwii kòò so bem nɛti? Mi zɔk o ŋga bíí lɛŋ a nɛ́ er zu zaŋ hee okoo-ko-bem ga! O saŋa-yí-wa duk fɛŋ nɛnɛ kpalili!

⁷Oee ŋga bɔnɛ wa! Nɛ̀ mbetɛ, ŋga ŋgimbi-bɔnɛ nɛ́ mɔ'ɔ nɛ̀ hɔa'i! Ŋma wese nɛ̀ hɔɔ ŋmaa in wese'i bo na. War ko Jakob, nɛ́ ŋgimbi dita-see, ɓɛɛ zu-a'i, wa tɛ kpasi wese'i.»

⁸GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: «Wese'i, mi tɛ gbin kpàŋà ger-wa yinɛ, ɓɛɛ mi tɛ ŋman o nyak-hɛr-wa yinɛ mbɛt, nɛ̀ wa beka de bara ha̧ o gɛnɛ ɓɔna,

⁹ɓɛɛ wa tɛ de tom ha̧‘m, mi GASA WAN Sɔ̧ kɔ-wa, in ha̧ David wannu n'am tɛ e mɛ ɔ wan zu wa.

¹⁰Kɔ-mɛ Jakob wi-de-tom kɔ‘m, ká mɛ́ de kíì na, ká mɛ́ e ha̧ tɛ-mɛ gbin na, Israɛl! Mi tɛ kai'nɛ́ piiɗoŋ nɛ̀ tɛ̀ o nyɛi̧a fara, mi tɛ gbo o bezaŋ‘nɛ́ tɛ́ nù nɛ̀ wa de bara sɛnɛ. Jakob tɛ pii ɗoŋ, nɛ̀ ŋma mɔ nɛ̀ tɛ fo a̧ bo na; a̧ tɛ duk mgbítíŋ, ŋma bíí nɛ tɛ pi̧ kíì tɛ-a beka bo na mbɛt.

¹¹Mi tɛ duk in'nɛɛ mɛ kpasi'nɛ́, mi tɛ kum o tugun bíí lɛŋ fara n'am pɛsa'nɛ́ dam sɛnɛ; ɓɛɛ k’ɛnɛ, mi beka kum'nɛ́ na; mi tɛ usi ɗoŋ deemɔ nɛ̀ yuwar-a h’ɛnɛ, nɛ̀ ŋma mɔ kpɔk beka yɔ‘nɛ́ na. Nɛ́ GASA WAN a̧ tɔ̧ wen’ɛ!»

¹²Wen nɛ̀ GASA WAN tɔ̧ nɛ́ mɔ'ɔ: «Gasa ŋgamɔ‘i beka yak zu'nɛ́ na; o da̧i̧ k’ɛnɛ beka wíí na.

¹³Ŋma bíí mɛ ye ɗoŋ‘nɛ́ bo na; ŋma nyina nɛ̀ tɛ wìì gba-da̧i̧ k’ɛnɛ bo na mbɛt.

¹⁴Tɛ o wi nɛ̀ de so wɔ-mɛ bìí ɗoŋ mɛ, wa ta mɔ wen mɛ ɓɔna. Mi gusa mɛ nɛ̀ ŋgaya-a ba nú-mɛ́, hee nɛ́ ŋma wisɛn kɔ-mɛ a̧ gusa mɛ ga; mi gaia mɛ zu o dɔka ɗaŋmɔ in o yɔɔ-kaya kɔ-mɛ nɛ̀ nɛ́ siti siti'i.

¹⁵Zɔk, mɛ́ dúk hiɗi nɛ̀ mɔ zu ŋgamɔ nɛ̀ kpaa mɛ; da̧i̧ kɔ-mɛ beka wíí na ɓɔnsɛnɛ. Mɛ̀ nɛ́ wen o dɔka ɗaŋmɔ kɔ-mɛ in wen o yɔɔ-kaya kɔ-mɛ nɛ̀ nɛɛ siti siti'i a̧ dee ha̧‘m mɛ fo ŋgamɔ pi̧ zu mɛ.

¹⁶Nɛ̀ mbetɛ, wa tɛ nyɔŋ o bíí lɛŋ nɛ̀ nyɔŋa so mɛ; wa tɛ kai o wisɛn kɔ-mɛ lɛŋ yaknɛ nɛ̀ bara. Wa tɛ ɗaŋ o bíí lɛŋ nɛ̀ ɗaŋa so mɛ; mi tɛ de ha̧ wa mɛ kai mɔ er o bíí lɛŋ nɛ̀ kaia so mɔ er-mɛ.»

¹⁷GASA WAN tɔ̧a: «Mi tɛ ha̧ daama ha̧ mɛ ɓɛɛ mɛ tɛ kpa ŋgai; mi tɛ de ha̧ o da̧i̧ kɔ-mɛ mɛ wìì, wen wa sa nin-mɛ‘e: ‹Ŋma okoo nɛ̀‘i ndaka pi̧ taŋ,› Siɔŋ nɛ̀ bíí ta mɔ wen-aa ɓɔna’ɛ.»

¹⁸Wen nɛ̀ GASA WAN tɔ̧ nɛ́ mɔ'ɔ: «Mi tɛ ɗafi o tua-laa ko Jakob woyo, ko de'm dee wen o fara-ɔɔ kɔ-wa. Wa tɛ mbo o ye zu o kaya ɓɔn oi bɛɗɛ-wa, o de tua lɛŋ tɛ duk tɛ de fara kɔ‘i woyo.

¹⁹O bíí de nɛ́ mɔ zɔn nɛ̀ Sɔ̧; wa gai nɛ́ mɔ nɛ̀ desee. Mi tɛ de ha̧ wa mɛ dɔk siti, nɛ̀ wa beka sir ɓɔna. Mi tɛ de ha̧ wa mɛ duk nɛ́ kpasa bíí, nɛ̀‘i beka e wa tɛ geemɔ ɓɔna.

²⁰Ɓɛɛ o bem kɔ-wa tɛ ya nɛ̀ de-a, hee mɔ'ɔ nɛ̀ wa yaa so nɛti ga. Wa tɛ mɔi kpa ŋmaa ti'm woyo, ɓɛɛ mi tɛ de ŋmaa in dukbíí nɛ̀ nasi wa.»

²¹GASA WAN tɔ̧a: «Nɛ́ ŋma bíí mɛ mgbara wa a̧ tɛ ɔ wan zu wa, nɛ́ ŋma bem nɛ̀ wa tɛ ko a̧ tɛ ɔ ɔɔ wan'i. Mi tɛ de ha̧ wi’ɛi mɛ ɗɔŋ pii katɛ‘m; o'o tɛ ɗɔŋ pii katɛ‘m nɛ̀ ŋgai tɛ-wi o?

²²Ɛ́nɛ́ tɛ ya nɛ́ dukbíí kɔ‘m, ɓɛɛ kɔ‘m, mi tɛ duk nɛ́ Sɔ̧ k’ɛnɛ.»

²³Ŋga gba-búk ko GASA WAN nɛ̀ duk nɛ́ ŋga nyimsea kɔ̧-a̧ tɛ tuɓi, ɓoɓi nɛnɛ zu o wi nɛ̀ wen a̧a̧ zu wa;

²⁴Ŋga wee nyimsea ko GASA WAN beka ga̧ na hɔ ŋgimbi nɛ̀ ee-zu-mɔ kɔ̧-a̧ hɔɔ gba̧a̧; ɛ́nɛ́ tɛ iŋ mgbara-a nɛ̀ ɗoŋ.