Read Northwest Gbaya JEREMII 31 Bible Online

JEREMII 31 - Northwest Gbaya bible

JEREMII 31

¹GASA WAN tɔ̧a: «Tɛ ŋgimbi'i, mi tɛ duk nɛ́ Sɔ̧ ko o be nútua ko Israɛl lɛŋ, ɓɛɛ kɔ-wa, wa tɛ ya nɛ́ dukbíí kɔ‘m.»

²Tɔ̧ɔ̧-wen ko GASA WAN nɛ́ mɔ'ɔ: «Mi tɛ zɔk dukbíí nɛ̀ gba-paa hɔɔ yɔɔ zu wa sɛn ŋga-gbárà mɛ‘i nɛ̀ de yí; Israɛl tɛ duk tɛ ga̧a̧mɔ siti woyo.

³GASA WAN usa tɛ ha̧‘m nɛ̀ ku̧u̧naŋ-a mɛ tɔ̧ nɛnɛ‘e: Mi kɔ̧ɔ̧ mɛ Israɛl nɛ̀ kɔ̧ɔ̧mɔ nɛ̀ beka kaɗi na; nɛ́ zu ha̧a̧nú kɔ‘m a̧‘m dak nɛ̀ mɛ pii tɛ‘m.

⁴Mi tɛ ba mɛ e ŋgɔn, ha̧ mɛ mɛ yor nɛ̀ de-a ɗɛŋgɛn woyo, mɛ́, zɔŋa Israɛl nɛ̀ tɛ iŋ tɛ̀ na’ɛ; mɛ tɛ kai o bi̧ɔ̧ a ŋgɔn, ɓɛɛ mɛ daka o bíí a tɛ gbaŋa-tortɛ woyo.

⁵Mɛ tɛ gun o nyak-dɔ̧ɔ̧ zu o kaya Samarii woyo, ɓɛɛ o wi-guna-a tɛ ɓi o waya-a.

⁶Ŋma wese tɛ hɔ nɛ̀ o wi-pɛm-mɔ tɛ hiɗi mɔ sa nɛ̀ mɔ si zu kaya Efraim tɔ̧ nɛnɛ‘e: ‹Ɛ̀nɛ̀ kúr! Ɛ̀ɛ̀ dáŋ si Siɔŋ sitɛ GASA WAN Sɔ̧ k’ɛɛ!› »

⁷Tɔ̧ɔ̧-wen ko GASA WAN nɛ́ mɔ'ɔ: «Ɛ̀nɛ̀ súmbúrí Jakob nɛ̀ desee! Ɛ̀nɛ̀ kpɛ́k wan ko o tugun bíí nɛ̀ desee. Ɛ̀nɛ̀ súmbúrí a̧ nɛ̀ tortɛ tɔ̧ nɛnɛ‘e, GASA WAN gboo oi ndaa dukbíí kɔ‘i Israɛl nɛ̀ ɓɔna so tɛ bara.

⁸Mi tɛ kai wa piinɛ nɛ̀ nù mɛ ká̧-zan-mɛ́-ŋgɔn mɛ, mi tɛ mɔi̧ wa piinɛ ɗoŋ nɛ̀ o nduti-nù mɛ lɛŋ. Mgbara wa'i, o wi-boma-yí, o wi-kum, o nàá-zaŋ ká bá nɛ̀ o nana-oi-kɔra mbɛt a̧a̧ sɛnɛ, ɓɛɛ wa tɛ mɔi ŋmaa tululu nɔ ŋmaa sum-sum hegɔɔ piinɛ ɗoŋ.

⁹Wa tɛ hɔ nɛ̀ kɔ̧a̧ ŋgúr-ŋgúr hiɗi nɛ̀ mɔ‘e: ‹Ɛ̀nɛ̀ dé ko h’ɛɛ!› Ɓɛɛ mi tɛ mgbɔ wa si kɔ̧́ gba de ga̧a̧ ɗɔŋgɔ, nɛ̀ yuwar nɛ̀ wa beka kɔ̧ naŋ-wa sɛnɛ na. Nɛ̀ mbetɛ, mi kifa duk nɛ́ dáà ko Israɛl, ɓɛɛ Efraim kifi kɔ‘i duk nɛ́ kaya-bem kɔ‘m.

¹⁰«O tugun bíí, ɛ̀nɛ̀ zíí wen ko GASA WAN, ɛ̀nɛ̀ wé ɗoŋ wen'i ha̧ o bíí mɛ nyɛi̧a fara mɛ. Ɛ̀nɛ̀ tɔ̧́ ha̧ wa'e, wi nɛ̀ pɛsa so Israɛl dam mgbii-zan naar mɔi̧ nɛ́ wa pii ɗoŋ; a̧ pɛm nɛ̀ wa hee mɔ'ɔ nɛ̀ wi-dai-mɔ pɛm nɛ̀ o gii mɔ-dai kɔ‘i’ɛ ga.

¹¹GASA WAN gɔna zu Jakob, gbo nɛ̀ a̧ yinɛ er ŋma wan-ŋgai.

¹²Wa tɛ bìì nɛ́ gima-tortɛ tɛ nɛnɛ pii zu kaya Siɔŋ mɛ; gar nɛnɛ pii tɛ o demɔ ko GASA WAN: pii tɛ alkamaari, o ɔ̧ɔ̧ nyɔ̧ɔ̧ dɔ̧ɔ̧ in o mbe nɔ̧́; ká bá nɛ̀ o geɗek mɔ-dai in o gasa-a mbɛt. Wa tɛ ya nɛ̀ de-a hee o nyɔnɔ sɛn kpɛɛfɔ nɛ‘i a yì aa sɛnɛ ga; wa beka ya nɛ̀ dita-see ɓɔna.

¹³Ɓɛɛ o be-zɔŋa tɛ yɔ yɔyɛ, tɛ-wa tɛ hai nɛ̀ tortɛ; tɛ́ duk nɛ́ kalemɔ wen o be-ŋgaiwi in o sɔkawi mbɛt. Mi tɛ kpai ɗaŋsee kɔ-wa nɛ̀ desee; ɓɛɛ mi tɛ ha̧ ŋgai ha̧ wa; mi tɛ ga̧ see-wa tɛ bɔnɛ kɔ-wa.

¹⁴Mi tɛ gbɛ o ŋmaŋa saɗi ha̧ o wi-ɗafi-sɔ̧; ɓɛɛ dukbíí kɔ‘m tɛ sur nɛ̀ o demɔ kɔ‘m. GASA WAN tɔ̧ɔ̧ hegɔ.»

¹⁵GASA WAN tɔ̧a: «Wi zii nɛ́ aia-nú sɛn Rama mɛ, in hi̧a-kɔ̧a̧-ɗaŋsee nyɛmna; Rachɛl hi̧i̧ nɛ́ o bem kɔ‘i. A̧ kɔ̧ ha̧ bíí mɛ gai a̧ na, wen o bem kɔ̧-a̧ bo ɓɔna.»

¹⁶Wen nɛ̀ GASA WAN tɔ̧ nɛ́ mɔ'ɔ: «Nyɛma kaɗi, ká‘i áí nú ɓɔna. Ká‘i hi̧i̧ kɔ̧a̧ ɓɔna mbɛt, mɔɔ-oi-tom kɔ-mɛ nɛ́ mɔ'ɔ.» GASA WAN tɔ̧a: «Wa a̧ pii ɗoŋ nɛ̀ tɛ̀ o nù ko o wisɛn tɛnɛ‘i.»

¹⁷GASA WAN tɔ̧a: «Demɔ kɔ-mɛ wan mɛ siti a̧ pɛm mɛ‘i. O bem kɔ-mɛ tɛ pii ɗoŋ nù kɔ-wa woyo.

¹⁸Nɛ̀ mbetɛ, mi zia aia-nú ko Efraim nɛ̀ tɔ̧‘e: ‹Ɛ́nɛ́ usa ŋga bɔnɛ ha̧‘m, hee mɔ'ɔ nɛ̀‘i usi nɛ̀ bɔnɛ ha̧ ŋma ŋgazu daŋa be-wiwii ndai ga. Ɛ̀nɛ̀ mgbɔ́‘m pii ɗoŋ wen ha̧‘m mɛ pii ɗoŋ tɛ‘nɛ́, wen ɛ́nɛ́ nɛ́ GASA WAN Sɔ̧ kɔ‘m.›

¹⁹Nɛ̀ mbetɛ, mi ee so ɛ́nɛ́ duk, ɓɛɛ kinii mi duk nɛ̀ dita-see zu mɔ‘i; ɛ́nɛ́ usa mgbara yɔɔ-kaya kɔ‘m ha̧‘m, ɓɛɛ mi mbɛr nɛ́ yí-see-am, gɔm nɛ̀ er ti'nɛ́ nɛ̀ foe; ziimɔ baa'm zu mɔ n'am dea tɛ ŋgimbi ŋgaiwi kɔ‘m mɛ.»

²⁰GASA WAN tɔ̧a: «Efraim nɛ́ yaa-dua-see-am, wan-de mɔɔ-fe-see-am. Ŋgimbi lɛŋ n'am tɔ̧ wen kɔ̧-a̧, mi tɛ sa kànà nin-a woyo, ɓɛɛ nɛ́ mɔ‘i a̧ taamɔ kɔ‘m duk ɓɔn zu a̧. Mi kɔ̧ɔ̧ a̧ nɛ̀ mbetɛ, mi kɔ̧ɔ̧ a̧.

²¹«Mɛ̀ é o mɔɔ-sedaako-mbaŋ-tɛ-wi yuwar kɔ-mɛ; mɛ̀ gbín o wa̧a̧ a yuwar mɛ usi yuwar kɔ-mɛ; mɛ̀ zɔ́k tɛ-mɛ tɛ yuwar nɛ̀ mɛ ba. Mɛ̀ píí ɗoŋ, be-zɔŋa Israɛl, mɛ̀ píí ɗoŋ pii saaye kɔ-mɛ.

²²Mɛ tɛ pofi nɛ̀ mbɔɗɔnu hɔ déè, zɔŋa yàà-ŋgazu’ɛ? Ɓɛɛ kinii mi GASA WAN mi iŋa dee ŋma mbe mɔ pi̧ zu nù'ɛ: mbe mɔ‘i nɛ́ okoo a̧ tɛ tɔ̧ tɔ̧ɔ̧ wen wiwii.»

²³Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: «Ŋgimbi n'am bé tɛ̀ɛ́ ɗafi o be Israɛl kaɗi, wa tɛ tɔ̧ wen’ɛ woyo sɛn nù Juda in tɛ o gasa ye mɛ nù Juda hee mɔ'ɔ ga: ‹GASA WAN a̧ tók de yoŋgo zu mɛ, sa̧a̧ kaya Siɔŋ, yuwar-kpasa-a!›

²⁴«Juda in o ye kɔ‘i tɛ mɔi̧ ŋmaa de ye kpɔk; o wi-wa-fɔ in o wi-dai-mɔ-dai tɛ duk kpɔk in o ŋmaa.

²⁵Mi tɛ ha̧ ŋgai ha̧ o wi nɛ̀ mbɔia, mi tɛ de ha̧ o bíí lɛŋ nɛ̀ a̧a̧ nɛ̀ wɔ mɛ sur nɛ̀ nyɔŋmɔ.»

²⁶(Nɛ́ mɔ‘i, ɓɛɛ sa wa tɔ̧‘e: «Mi ɔɔ ya ɓɛɛ mi tun, nɛ́ mɔ'ɔ n'am zɔka'e yá n'am ɔa'i nɛ́ gba demɔ nyɛmna.»)

²⁷GASA WAN tɔ̧a: «Ŋma ŋgimbi tɛ hɔ n'am tɛ dun nù ko Israɛl in Juda, nɛ̀ o bíí in o mɔ-dai, hee mɔ'ɔ nɛ̀‘i pɛ nɛ̀ kpar-mɔ kpɛɛfɔ'ɛ ga.

²⁸Nɛti, mi zika so ɗoŋ-am e ha̧ wa, zuɗi nɛ̀ wa a taŋ, ir nɛ̀ mɔ a nù, gbin nɛ̀ mɔ, ɗaŋ nɛ̀ mɔ, de nɛ̀ ŋgamɔ in wa; ɓɛɛ tɛ ŋgimbi nɛ̀ tɛ hɔ‘i, mi tɛ yor ɗoŋ wa tɛ báá mɔ e ŋgɔn woyo, in tɛ guna mɔ. Nɛ́ mi GASA WAN a̧ tɔ̧ hegɔ.

²⁹Tɛ ŋgimbi'i, wa beka tɔ̧‘e: ‹O dáà nyɔŋa waya-nyak-dɔ̧ɔ̧ nɛ̀ mbui-a, ɓɛɛ nɛ́ gba̧a̧-nin o bem kɔ-wa a̧ fea gbilili,› na.

³⁰«Bo a̧‘i̧ na! Kóó o ndé tɛ fe nɛ́ fio ɗaŋmɔ kɔ‘i, ɓɛɛ kà ŋma bíí nyɔŋ waya-nyak-dɔ̧ɔ̧ nɛ̀ mbui-a, ɓɛɛ kànà nɛ́ gba̧a̧-nin wi’ɛi a̧ tɛ ɗaŋ.»

³¹GASA WAN tɔ̧a: «Ŋma ŋgimbi tɛ hɔ n'am tɛ nɔ tɔk in o be Israɛl ká bá nɛ̀ o be Juda woyo.

³²Nɔɔ-tɔk‘i beka hɔ ŋmaa in wan n'am nɔɔ so in o dáà kɔ-wa, ŋgimbi n'am kasa so nɛ̀ er-wa, kai nɛ̀ wa gbonɛ nɛ̀ nú Egiptɛ na. War kɔ-wa, wa gbina nɔɔ-tɔk kɔ‘m'i; ɓɛɛ kɔ‘m, mi duk kànà nɛ́ wan zu wa siti. GASA WAN tɔ̧a'e,

³³tɔk n'am tɛ nɔ in o be Israɛl ɗoŋ o ŋgimbi nɔ‘i nɛ́ mɔ'ɔ. Mi tɛ e o yuwar usamɔ kɔ‘m tɛ-wa, ɓɛɛ mi yɔra o geŋa kɔ‘m sɛn kɔ̧́ see-wa mbɛt. Mi tɛ duk Sɔ̧ kɔ-wa, ɓɛɛ wa tɛ ya dukbíí kɔ‘m.

³⁴Wa beka usi mɔ ha̧ o ŋmaa, kóó nɛ́ sɛm, kóó nɛ́ o nya-wa, tɔ̧ nɛnɛ‘e: ‹Ɛ̀nɛ̀ yámbí iŋa GASA WAN!› ɓɔna, wen wa lɛŋ tɛ iŋ am, kóó so nɛ́ o geɗek-wi, kóó so nɛ́ gasawi mbɛt. Mi beka gɔn kita zu ɗaŋmɔ kɔ-wa ɓɔna; mi beka tɔ̧ wen zu yɔɔ-kaya kɔ-wa ɓɔna mbɛt.

³⁵«GASA WAN dee wese mɛ nyɛk mɛ wese, a̧ dee nyaŋa-zɛ in o sɔra nɛ̀ yuwar-a mɛ nyɛk mɛ zɛ; nɛ́ a̧ a̧ de ha̧ gba-tɔp mɛ pɛŋi mbɛt; nin-a nɛ́ GASA WAN nɛ̀ a̧a̧ nɛ̀ ŋgayamɔ lɛŋ.

³⁶Ɓɛɛ nɛ́ a̧ a̧ tɔ̧ wen’ɛ: Kà‘m nɛ́ yɔɔ so kaya tɛ dee o mɔɔ nɔ'ɔ n'am dea mɛ nɛ̀ nɔ̀ nɛ̀ yuwar-a, ɓɛɛ o bezaŋ Israɛl mbɛt tɛ̀ɛ́ kaɗi duka-a hee tugun bíí ga sɛn ti'm.

³⁷Tɔ̧ɔ̧-wen ko GASA WAN nɛ́ mɔ'ɔ: Kà ŋma bíí a̧ nyɛm so mɛ we kusa yiwese si ŋgɔn mɛ, in mɛ we ɗuka nù si ɗɔɔ mɛ hɔ ndaa-a gáà, ɓɛɛ mi mbɛt, mi tɛ̀ɛ́ nyɛm so mɛ siŋ o bezaŋ Israɛl a taŋ wen zu o ɗaŋ deemɔ kɔ-wa.»

³⁸GASA WAN tɔ̧a: «Wese tɛ hɔ nɛ wa tɛ mbo gasa ye’ɛ woyo nɛ̀ oi-aa lɛŋ wen am, ku̧u̧naŋ-a nɛ̀ tɛ kusa tua-pɛm-mɔ ko Hananɛl hɔ nɛnɛ tɛ nú garo mɛ mgbii-aa mɛ.

³⁹Wa tɛ e nduti ye'i nyɛm nɛ̀ war yee-wese, ba daŋnɛ yak nɛ̀ zu zu-tɔ̧ Garɛb, ɓɛɛ sɛka wa duka hi̧i̧ ba nɛnɛ si Gɔa mɛ.

⁴⁰Ɗɔŋgɔ-wɔr in ɗɔŋgɔ-bùk ká bá nɛ̀ bɛɛ-nù ká̧ ɗɔŋgɔ Sɛdrɔŋ hɔ nɛnɛ ka̧ mgbii nú garo ko o nyaŋa, nɛ̀ war daŋa-wese lɛŋ tɛ duk nɛ́ sa̧a̧-fara ko GASA WAN; wa beka zuɗ‘a na, wa beka gbin a̧ na ɓɔnsɛnɛ.»