Read Northwest Gbaya JEREMII 34 Bible Online

JEREMII 34 - Northwest Gbaya bible

JEREMII 34

¹GASA WAN tɔ̧ɔ̧ wen ha̧ Jeremii woyo ŋgimbi nɛ̀ Nabukɔdɔnɔsɔr, wannu Babilɔŋ in o gíí wi-biro kɔ‘i gú nɛ̀ o wi-biro ko o be wannu lɛŋ nɛ̀ duk ɗɔɔ ŋgai kɔ̧-a̧ tika Jerusalɛm in o ye nɛ̀ zik a̧ lɛŋ nɛ̀ biro. Wen-aa nɛ́ mɔ'ɔ:

²«Mɛ̀ nɛ́ mi GASA WAN, Sɔ̧ ko Israɛl a̧ tom mɛ. Mɛ̀ nɛ́, ɓɛɛ mɛ̀ tɔ̧́ ha̧ Sedesias wannu Juda'e ndé: Wen ko GASA WAN ha̧ mɛ nɛ́ mɔ'ɔ: Mi tɛ e ye’ɛ kɔ̧̀ er wannu Babilɔŋ mɛ pi̧ wee zu a̧.

³Kɔ-mɛ, mɛ beka gbo yak kɔ̧̀ er-a na. Wa tɛ ba mɛ, ɓɛɛ wa ee mɛ er-a. Mɛ in wannu Babilɔŋ, yí‘nɛ́ tɛ to kànà ŋmaa zɔ̧i̧i̧; kóó hegɔ mbɛt, a̧ tɛ tɔ̧ wen ha̧ mɛ nɛ̀ nú-a nɛti kaɗi, ɓɛɛ sɛka mɛ yaka si Babilɔŋ mɛ.

⁴Kóó hegɔ mbɛt, Sedesias wannu Juda, mɛ̀ zíí wen nɛ̀ GASA WAN tɔ̧ ha̧ mɛ'ɛ: Mɛ beka fe fio gba-paa na.

⁵Mɛ tɛ fe nɛ́ géé fio; wa tɛ dɔ fuu-nyama zu mɛ hee mɔ'ɔ nɛ̀ wa dɔɔ nɛnɛ zu o dáà kɔ-mɛ nɛ̀ duka so zu damti-wan nɛ̀ ti ha̧ mɛ ga. Wa tɛ hi̧i̧ mɛ nɛ̀ gima-fio tɔ̧ nɛnɛ‘e: ‹Oee, wannu fea!› » GASA WAN tɔ̧a: «Nɛ mbetɛ, nɛ́ mi a̧ tɔ̧ɔ̧ hegɔ.»

⁶Jeremii wi-tɔ̧-wen oi nú Sɔ̧ tɔ̧ɔ̧ wen nɔ‘i lɛŋ ti Sedesias wannu Juda sɛn Jerusalɛm.

⁷Ŋgimbi'i ká o wi-biro ko wannu Babilɔŋ kpee so Jerusalɛm ká bá nɛ̀ Lakis in Azɛka, o gasa ye Juda e nù, wen mɛ̀ nɛ́ o ye nɔ‘i yiitoo'i a̧ ɓɔna so nɛ́ o ye-ŋgárá sɛn nù Juda.

⁸Ɓɛɛ GASA WAN tɔ̧ wen ha̧ Jeremii woyo nyɛm nɛ̀ ɗoŋ ŋgimbi nɛ̀ wannu Sedesias ee nɛ nú in o bíí Jerusalɛm, wen gboo o bara yinɛ.

⁹Kóó o ndé a̧ gbó o bara nɛ̀ ya nɛ́ o be Hebreu yinɛ; kóó wi’ɛi so nɛ́ okoo, kóó a̧ so nɛ́ wiwii; ŋma bíí nɛ̀ tɛ de nya kɔ‘i be Juda nɛ̀ bara bo ɓɔna.

¹⁰Ɓɛɛ hegɔ, o gasawi lɛŋ in o bíí lɛŋ nɛ̀ ha̧a̧ so nú wen gboo o bara kɔ-wa yinɛ, kóó so nɛ́ okoo, kóó nɛ́ wiwii, nɛ̀ wa beka e wa tɛ bara woyo ɓɔna, yora ɗoŋ ha̧a̧nú kɔ-wa war kpɔk.

¹¹Duka siti ɗoŋ-aa nyɛi, ɓɛɛ wa kpai taamɔ kɔ-wa, zik tɛ tɛ́ɛ̀ kai o bara nɛ̀ wa gboo so a nù kaɗi'i, o wiwii in o okoo, kai wa a tɛ tom-bara, ɓɛɛ de wa nɛ̀ bara woyo.

¹²Ɓɛɛ GASA WAN tɔ̧ ha̧ Jeremii:

¹³«Gba̧a̧-wen nɛ̀ GASA WAN Sɔ̧ ko Israɛl tɔ̧a'i nɛ́ mɔ'ɔ: Mi ha̧a̧ nú ha̧ o zɔmdáa k’ɛnɛ ŋgimbi n'am gboo so nɛ̀ wa kɔ̧́ tua-bara nú Egiptɛ mɛ‘i, mi tɔ̧ɔ̧ so ha̧ wa'e,

¹⁴ɗoŋ pɛ mɔɔrɔ-ɗoŋ-yiitoo, ɓɛɛ kóó o ndé mgbara'nɛ́ tɛ gbo be Hebreu nɛ̀ ɗɔra so tɛ-wi ha̧ nya-wi; a̧ tɛ de tom-bara ha̧ mɛ tɛ pɛ mɔɔrɔ-ɗoŋ-kpɔk, ɓɛɛ tɛ mɔɔrɔ-ɗoŋ-yiitoo pɛ, mɛ tɛ gbo a̧. Ɓɛɛ o zɔmdaa k’ɛnɛ zii mɔ‘i nɛ̀ ɗoŋ zer, wa kpɛk na.

¹⁵Bó nɛ́ ɗoŋ-aa nyɛi̧a so nyɛi na n’ɛ́nɛ́ kpaa so nɛ̀ mbe taamɔ, ɓɛɛ ɛ́nɛ́ de mɔ nɛ̀ nyɛma yí‘m tɛ gboo o nya'nɛ́ o be Juda yinɛ tɛ bara. Ɛnɛ ee so nú mɛ de mɔ‘i ɓɔn yí‘m sɛn kɔ̧́ Tua n’ɛnɛ sa nin-am sɛnɛ.

¹⁶Ɓɛɛ kinii, ɛ́nɛ́ tɛ̀ɛ̀ zik tɛ‘nɛ́ si ɗoŋ fɛŋ nin-am, wen nɛ̀ kóó o ndé mgbara'nɛ́ sii ɗoŋ kai o bara kɔ‘i n'aa gboo so a nù kaɗi, o wiwii in o okoo, kai wa a tɛ tom-bara, ɓɛɛ de wa nɛ̀ bara woyo.

¹⁷Nɛ́ hegɔ, ɓɛɛ sa GASA WAN tɔ̧‘e ndé: Hee mɔ'ɔ n’ɛnɛ zii wen nú‘m mɛ gbo o nya'nɛ́ in o be-nù k’ɛnɛ na ga, kɔ‘m, mi tɛ gbo'nɛ́! Ɓɛɛ gboo'nɛ́ kɔ‘m'i, nɛ́ gba-paa, ŋga zɛɛ-geŋa in kaɓa ɛ̀nɛ̀ tɛ kpa. Ɓɛɛ o wannu zaŋnu tɛ zii nyɛrɛ mɔ‘i nɛ kíì.

¹⁸O kutiwi in o gasawi ko Juda in Jerusalɛm, ká bá nɛ̀ o wi-ɗafi-sɔ̧ in o bíí lɛŋ nɛ̀ ha̧a̧ so nú kan nɛ̀ mɔ ha̧‘m, ɓɛɛ ka wa ɓir kpoo-sɔ̧ kɛ̧ tan see-a yiitoo, gbo nɛ̀ mgbara-a yak,[23] o wi nɔ‘i ee ha̧a̧nú kɔ-wa tɛ geemɔ, wa yor ɗoŋ ha̧a̧nú kɔ-wa na.

²⁰Mi ee o wiwii ɗɔɔ ŋgai ko o wisɛn kɔ-wa, o wi nɛ̀ kii mɛ gbɛ wa. Wɔr-wa tɛ kifi nɛ́ nyɔŋmɔ ko o nɔ̧́í̧ in ko o saɗi.

²¹Ɓɛɛ nɛ̀ war ko Sedesias, wannu Juda in o gasawi kɔ‘i, mi ee wa er o wisɛn kɔ-wa, o wi nɛ̀ kii mɛ gbɛ wa, o gíí wi-biro ko wannu Babilɔŋ. Kóó o wi-biro nɔ‘i zika so tɛ si ɗoŋ e'nɛ́ duk,

²²mi tɛ de ha̧ wa mɛ pii ɗoŋ zu ye’ɛ, ɓɛɛ wa tɛ bi'nɛ́, dɔ ye k’ɛnɛ'ɛ bíí wee kor-kor, ɓɛɛ mi tɛ de ha̧ o ye Juda mɛ ɗaŋ kifi nɛ́ géé ŋga-gbárà kotoro. Nɛ́ GASA WAN a̧ tɔ̧ɔ̧ hegɔ.»