Read Northwest Gbaya JEREMII 40 Bible Online

JEREMII 40 - Northwest Gbaya bible

JEREMII 40

¹GASA WAN tɔ̧ɔ̧ wen ha̧ Jeremii ɗoŋ nɛ̀ Nɛbuzaradaŋ gasawi zu o wi-pɛm-wannu gboo so nɛ̀ a̧ yinɛ sɛn Rama. Wa hɛra so Jeremii nɛ̀ nyak-boi pi̧ mgbara o bara-biro nɛ̀ wa kai yaknɛ nɛ̀ Jerusalɛm in nɛ̀ nù ko Juda si Babilɔŋ mɛ. Nɛ́ hi̧i̧ a̧ Nɛbuzaradaŋ kpaa nɛ̀ a̧,

²ba a̧ yinɛ mgbara wa, ɓɛɛ tɔ̧ ha̧ a̧: «Mɛ̀ nɛ́ GASA WAN Sɔ̧ kɔ-mɛ a̧ tɔ̧ɔ̧ so wen zu pɛrti bɔnɛ hegɔ mɛ tik fara’ɛ.

³Ɓɛɛ GASA WAN fo bɔnɛ‘i tɛnɛ, a̧ dee mɔ nyɛm nɛ̀ ɗoŋ mɔ n'aa tɔ̧ɔ̧ so. Mɛ̀ nɛ́ wen n’ɛnɛ dee ɗaŋmɔ sitɛ GASA WAN, wen n’ɛnɛ zii wen nú-a na, ɓɛɛ sa mɔ‘i hɔ.

⁴Ɓɛɛ sɔsɔɔ kinii'i, mi bura nyak zɔɓɔ er-mɛ yinɛ; kà mɛ nɛ́ kɔ̧ɔ̧ mɛ nɛ̀ in am si Babilɔŋ mɛ, mɛ̀ tɛ́, ɛ̀ɛ̀ yàk, mi tɛ zɔk mɛ nɛ̀ de-a; ɓɛɛ kà mɛ nɛ́ bɛ̧ɛ̧ nɛa-a in am si Babilɔŋ, ká mɛ́ tɛ na. Nù lɛŋ a̧a̧ ti mɛ, mɛ̀ hók fara lɛŋ nɛ̀ mɛ kɔ̧ɔ̧ mɛ nɛ sɛnɛ.

⁵«Kà mɛ kɔ̧ mɛ duk in am na, mɛ̀ sí ɗoŋ si katɛ Gedalias bem ko Ahikam, bem ko Safaŋ, nɛ̀ wannu Babilɔŋ ee mɛ duk zu o ye Juda, a̧ mɛ̀ dúk in a̧ mgbara dukbíí; kóó mɛ nyɛma nɛa-a fara lɛŋ nɛ̀ mɛ kɔ̧ɔ̧, nyɛm nɛ̀ ɗoŋ hokamɔ kɔ-mɛ.» Gasawi ko o wi-pɛm-wannu ha̧a̧ o nyɔŋmɔ in ŋma ha̧a̧mɔ ha̧ a̧, ɓɛɛ e a̧ yak.

⁶Hegɔ Jeremii nɛ̀ɛ̀ hɔ Mispa katɛ Gedalias bem ko Ahikam, ɓɛɛ a̧ duk in a̧ mgbara o bíí nɛ̀ ɓɔna tɛ nù‘i.

⁷O gasa wi-duk-zu o wi-biro lɛŋ nɛ̀ ɓɔna zaŋbɛɛ, wa in o bíí kɔ-wa zia'e ndé, wannu Babilɔŋ ee Gedalias bem ko Ahikam nɛ̀ gasa wi-duk-zu nù Juda, ɓɛɛ ha̧ o wiwii, o okoo gú nɛ̀ o obem in o ŋma bíí tɛ nù‘i nɛ̀ wa kai nɛ̀ bara-biro si Babilɔŋ na, ha̧ a̧.

⁸Wa tɛ̀ɛ̀ kpa Gedalias sɛn Mispa: mɛ̀ nɛ́ Yismaɛl bem ko Nɛtania, Yohanaŋ in Yɔnataŋ o bem ko Karea, Sɛraya bem ko Tanumɛt, o bem ko Ofai be Nɛtɔfa, Yezania bem ko be Maka; wa in o bíí kɔ-wa.

⁹Gedalias, bem ko Ahikam, bem ko Safaŋ tɔ̧ɔ̧ wen’ɛ ha̧ wa in o bíí kɔ-wa: «K’ɛ́nɛ́ yu kpɛka mɔ ko o be Kaldee na; ɛ̀nɛ̀ ɓɔ́n tɛ nù'ɛ, ɛ̀nɛ̀ mbó zu ha̧ wannu Babilɔŋ, ɓɛɛ mɔ lɛŋ tɛ nɛ nɛ̀ de-a h’ɛnɛ.

¹⁰Kɔ‘m, mi tɛ duk sɛn Mispa wen o be Kaldee nɛ̀ tɛ́ tɛ̀ sɛn tɛ̀ k’ɛɛ; ɓɛɛ war k’ɛnɛ, ɛ̀nɛ̀ dé dɔ̧ɔ̧, ɛ̀nɛ̀ ɓí o waya-te, in o waya-te-nɔ̧́, ɛ̀nɛ̀ dé o nyɔŋmɔ nɛ̀ dɔka-a, ɓɛɛ ɛ̀nɛ̀ ɓɔ́n tɛ o ye n’ɛnɛ tɛ ya sɛnɛ‘i.»

¹¹Kale-a mbɛt, o be Juda lɛŋ nɛ̀ a̧a̧ so sɛn nú Mɔab mgbara o be Amɔŋ sɛn nú Edɔm in tɛ o nù lɛŋ zia'e, wannu Babilɔŋ ee o oi bíí sɛn Juda, ɓɛɛ a̧ e Gedalias bem ko Ahikam, bem ko Safaŋ nɛ̀ wi-duk-zu nù‘i.

¹²Wa gara pii ɗoŋ nɛ̀ o fara nɛtɛ nɛtɛ nɛ̀ wa pɛsa so wa si sɛnɛ. Ɓɛɛ nɛ̀ wa hɔɔ sɛn nù Juda katɛ Gedalias sɛn Mispa kaɗi, wa dee dɔ̧ɔ̧, wa ɓii o waya-te, wa mɔi̧a nyɔnɔ nɛ̀ dɔka-a nyɛmna.

¹³Nɛ̀ wa hɔɔ katɛ Gedalias sɛn Mispa, Yohanaŋ bem ko Karea in o gasawi ko o wi-biro nɛ̀ ɓɔna so zaŋbɛɛ

¹⁴aka a̧: «Mɛ iŋ kɔ-mɛ‘e Bablis wannu ko o be Amɔŋ toma Yismaɛl bem ko Nɛtania mɛ gbɛ mɛ na nde?» Gedalias bem ko Ahikam bɛ̧ɛ̧ wen'i.

¹⁵Ɓɛɛ Yehohanaŋ, bem ko Karea ak Gedalias sɛn Mispa nɛ̀ hu̧sa-a hee mɔ'ɔ ga: «Mɛ̀ é ha̧‘m nɛ́ɛ̀ gbɛ Yismaɛl bem ko Nɛtania nɛ̀ hu̧sa-a, nɛ̀ bíí beka iŋ na. Mɛ kɔ̧ɔ̧ nɛ̀ mbetɛ, a̧ a̧ gbɛ mɛ nde? O be Juda nɛ̀ mɔi̧ ya katɛ mɛ tɛ yambali, ɓɛɛ oi o be Juda tɛ kum lɛŋ.»

¹⁶Gedalias bem ko Ahikam kifa nú ha̧ Yohanaŋ bem ko Karea: «Ká mɛ de mɔ‘i na! Mɔ nɛ̀ mɛ tɔ̧ zu Yismaɛl nɛ́ ndela.»