Read Northwest Gbaya JEREMII 41 Bible Online

JEREMII 41 - Northwest Gbaya bible

JEREMII 41

¹Tɛ mɔɔrɔ-ɗoŋ-yiitoo fio-zɛ, Yismaɛl bem ko Nɛtania, bem ko Elisama, ŋma be nutua-wan, ŋma mgbara o gasawi ko wannu tɛ̀ɛ̀ kpa Gedalias bem ko Ahikam sɛn Mispa; a̧ in o bíí ɓu, ɓɛɛ sɛn Mispa'i, wa nyɔŋa mɔ in o ŋmaa.

²Nɛ̀ haya-a Yismaɛl bem ko Nɛtɛnia in o bíí ɓu nɛ̀ nɛ̀ɛ̀ in a̧ kura gbɛ Gedalias bem ko Ahikam nɛ̀ gba-paa pi̧ nù. Nɛ́ hegɔ á̧ à̧ gbɛɛ nɛ̀ wi nɛ̀ wannu Babilɔŋ ee nɛ̀ wi-duk-zu nù‘i yinɛ.

³Nɛ́ kpɔk kalemɔ‘i mbɛt a̧ Yismaɛl gbɛɛ nɛ̀ o be Juda lɛŋ nɛ̀ yaa so in Gedalias sɛn Mispa, ká bá nɛ̀ o wi-biro ko o be Kaldee nɛ̀ a̧a̧ so sɛn Mispa.

⁴Zɛ yiitoo ɗoŋ fio ko Gedalias, nɛ̀ bíí tɛ iŋ hɔ̧ɔ̧ na,

⁵o bíí tɛ̀ɛ́ nɛ Sikɛm, nɛ̀ Silo in nɛ̀ Samarii; wa lɛŋ duka so nɛ́ o bíí ɓu-mɔɔrɔ-ɗoŋ-taar. Wa kpuia zera, pi̧ nɛ̀ o a̧ka̧ laa zɛgbɛ-zɛgbɛ, gɔn nɛ̀ tɛ-wa mbɛt, wa tui so nɛ́ o ha̧a̧mɔ in fuu-nyama tɛnɛ pii kɔ̧́ Tua ko Sɔ̧.

⁶Yismaɛl bem ko Nɛtania kura sɛn Mispa we nɛ̀ ti wa, nɛ̀ hi̧a kɔ̧a̧; a̧ kpaa wa yuwar mɛ, ɓɛɛ a̧ tɔ̧ ha̧ wa: «Ɛ̀nɛ̀ tɛ́ɛ̀ zɔ́k Gedalias bem ko Ahikam.»

⁷Hee mɔ'ɔ nɛ̀ wa hɔɔ see ye kaɗi ga, Yismaɛl bem ko Nɛtania in o bíí nɛ̀ a̧a̧ so in a̧ tika zu wa, kum wa, ɓɛɛ kai o wɔr-wa a kɔ̧̀ gɔna-yì.

⁸Mgbara wa'i, o bíí ɓu a̧a̧ sɛnɛ nɛ̀ tɔ̧ɔ̧ ha̧ Yismaɛl: «Ká mɛ́ gbɛ yɛ na, ɛɛ a̧a̧ nɛ̀ o nyɔŋmɔ n’ɛɛ hu̧sa̧ zaŋbɛɛ: alkamaari, fon, nɔ̧́ in gɔrɔ.» Yismaɛl ee wa duk in o nya-wa.

⁹Gɔna-kɔ̧́-yì nɛ̀ Yismaɛl aa so o wɔr-bíí n'aa gbɛɛ so sɛnɛ‘i duka so nɛ́ gasa gɔna-kɔ̧́-yì nɛ̀ wannu Asa gɔna so ŋgimbi nɛ̀ Baɛsa wannu Israɛl baa so nɛ̀ biro dúk nɛ̀ a̧. Yismaɛl bem ko Nɛtania aa o wɔr dun gɔna-kɔ̧́-yì‘i,

¹⁰ɓɛɛ a̧ kai o oi bíí saaye Mispa nɛ̀ bara-biro yaknɛ: o boko-be-wan in o oi bíí nɛ̀ ɓɔna so kɔ‘i fara ɔa-a Mispa kaŋ, o wan nɛ̀ Nɛbuzaradaŋ wan ko o wi-pɛm-wannu aa so er Gedalias, bem ko Ahikam, Yismaɛl bem ko Nɛtania kaia wa nɛ̀ bara-biro yaknɛ, ɓɛɛ a̧ nɛ́ɛ̀ kpa nɛ̀ o be Amɔŋ.

¹¹Ŋgimbi nɛ̀ Yohanaŋ, bem ko Karea in o gasa wi-biro nɛ̀ yaa so in a̧‘i zia wen gbɛɛ-zu ko Yismaɛl, bem ko Natania,

¹²o gasa wi-biro mɔi̧a o bíí kɔ-wa, ɓɛɛ ba biro dúk nɛ̀ Yismaɛl bem ko Nɛtania. Wa nɛ̀ɛ̀ kpa a̧ ká̧ gba-tɔp sɛn Gabaɔŋ.

¹³Ŋgimbi nɛ̀ o bíí lɛŋ nɛ̀ yaa so in Yismaɛl zɔka Yohanaŋ bem ko Karea in o gasa wi-biro lɛŋ nɛ̀ yaa so in a̧, wa kpaa desee.

¹⁴O bíí lɛŋ nɛ̀ Yismaɛl kaia so nɛ̀ bara-biro sɛn Mispa zika tɛ, ɓɛɛ si ɗoŋ sitɛ Yohanaŋ bem ko Karea.

¹⁵Ɓɛɛ war ko Yismaɛl bem ko Nɛtania, a̧ yuu mɔ yak in o bíí mɔɔrɔ-ɗoŋ-taar ŋgimbi nɛ̀ Yohanaŋ bem ko Karea hɛɗa nɛnɛ pii tɛ-a'i, ɓɛɛ a̧ nɛ́ sitɛ o be Amɔŋ.

¹⁶Nɛ́ mɔ'ɔ nɛ̀ Yohanaŋ bem ko Karea in o gasa wi-duk-zu o wi-biro nɛ̀ nɛ̀ɛ̀ so in a̧ kaia o oi bíí. Mɛ̀ nɛ́ o wan nɛ̀ Yismaɛl bem ko Nɛtania kaia so nɛ̀ bara-biro sɛn Mispa ɗoŋ fio ko Gedalias, bem ko Ahikam: o wiwii, o wi-biro, o okoo, o obem in o bíí mɛ kɔ̧̀ kira ko wannu nɛ̀ wa kaia tɛnɛ nɛ̀ Gabaɔŋ.

¹⁷Wa baa yuwar yak, ɓɛɛ wa yor sɛn kɔ̧̀ gbagari Kimam ká̧ Bɛtlɛhɛm zu naŋ-wa, wen yaka-a si Egiptɛ.

¹⁸Wa yuu so nɛ́ o be Kaldee nɛ̀ wa de kíí-wa, wen nɛ̀ Yismaɛl bem ko Nɛtania gbɛɛ so Gedalias, bem ko Ahikam, wi-duk-zu-nù nɛ̀ wannu Babilɔŋ ee so.