Read Northwest Gbaya JEREMII 49 Bible Online

JEREMII 49 - Northwest Gbaya bible

JEREMII 49

¹Wen nɛ̀ GASA WAN tɔ̧ zu o be Amɔŋ nɛ́ mɔ'ɔ: «Israɛl bó nɛ̀ o be-wiwii na nde? A̧ bó nɛ̀ o wi-duk-oi-aa na nde? Ɓɛɛ wen ge sa Milkɔŋ[32] kai bɔɔ mɔɔ-oi ko Gad, ɓɛɛ sa dukbíí kɔ̧-a̧ ɔ bɔɔ nɛnɛ tɛ o gasa ye nɔ'ɔ ge?»

²Nɛ́ hegɔ sa GASA WAN tɔ̧‘e: «Zu mɔ‘i, wese tɛ hɔ n'am tɛ de ha̧ wa mɛ gai mɔ-biro sɛn Raba, zɔm ye ko o be Amɔŋ. Ye'i tɛ kifi nɛ́ ŋga-gbárà; o be ye mɛ́ katɛ a̧ tɛ bìì wee, ɓɛɛ Israɛl tɛ kai mɔɔ-oi kɔ‘i nɛ̀ wa kaia so.»

³O be Hɛsbɔŋ, ɛ̀nɛ̀ hí̧í̧ kɔ̧a̧, «Ai ɗaŋa lɛŋ!» Ɛ̀nɛ̀ híɗí mɔ, ɛ́nɛ́ o be ye lɛŋ nɛ̀ a̧a̧ ka̧ Raba, ɛ̀nɛ̀ á bufu tɛ‘nɛ́! Ɛ̀nɛ̀ áí nú! Ɛ̀nɛ̀ yámbálí dam kɔ̧́ garo! Wa baa Milkɔŋ yaknɛ nɛ̀ bara si ŋma nù, gú nɛ̀ o wi-ɗafi-sɔ̧ in o gasawi kɔ̧-a̧ lɛŋ.

⁴Wen ge mɛ́ duk ŋmaŋ nɛ̀ tɛ-mɛ zu ɗɔŋgɔ kɔ-mɛ ge, Raba, zɔŋa yàà-ŋga-zu’ɛ? Ɗɔŋgɔ kɔ-mɛ dea, ɓɛɛ nɛ́ mɔ'ɔ nɛ̀ mɛ̀ duk sɛnɛ duk nɛ̀ tɛ-mɛ zu o kpaa-mɔ kɔ-mɛ tɔ̧ nɛnɛ‘e: «O'o tɛ ba zu dúk nɛ̀‘m o?»

⁵GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: «Kɔ‘m, mi tɛ fo gasa mɔɔ-kíì pi̧ zu'nɛ́, nɛ̀ tɛ̀ o wi nɛ̀ ɔ katɛ mɛ. Ɛ́nɛ́ tɛ pɛsi, kóó o ndé ma nɛ́ kɔ‘i tan ti; ŋma bíí nɛ̀ tɛ mɔi̧ o wi-yu-mɔ, bo na.

⁶«Ɓɛɛ ɗoŋ mɔ‘i, mi tɛ ba Amɔŋ e ŋgɔn woyo.» Nɛ́ GASA WAN a̧ tɔ̧ wen'i.

⁷Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ zu Edɔm nɛ́ mɔ'ɔ: «Iŋa-mgbara-mɔ bo Teman ɓɔna nde? O wi-ba-keta kɔ-wa bó nɛ̀ kpasa taamɔ na, iŋa-mgbara-mɔ kɔ-wa yɔa.

⁸Ɛ́nɛ́ o bíí Dedan, ɛ̀nɛ̀ kífí tɛ‘nɛ́, ɛ̀nɛ̀ yú mɔ yak! Ɛ̀nɛ̀ nɛ́ɛ̀ hu̧si kɔ̧́ kɔ̧̀. Nɛ́ mi'i tɛ ɗaŋ o bezaŋ Esau. Ŋgimbi hɔɔ ha̧ wa mɛ kifi nú zu ɗaŋmɔ kɔ-wa kaɗi.

⁹Kà o wi-ɓi-waya nyak-dɔ̧ɔ̧ bé tɛ̀ɛ́ tɛ, wa beka e ŋma sikila-a kpɔk duk na. Kà o wi-zuzu tɛ mɛ zɛ, wa kai kànà nɛ́ mɔ lɛŋ nɛ̀ wa nyɛma mɛ kai.

¹⁰Nɛ́ mi nɛ̀ tɛ‘m à̧ tɛ kai mɔ er o bezaŋ Esau, mi tɛ kai o mbɔi nɛ̀ wa hu̧sa̧ so'i a zan. Wa nyɛm mɛ hu̧si tɛ-wa ɓɔna; o bezaŋ-wa, o nya-wa in o wi-ɔ katɛ wa tɛ kum, ɓɛɛ ŋma oi ndaa bíí nɛ̀ tɛ ɓɔn mɛ tɔ̧‘e:

¹¹‹Ká mɛ́ ta mɔ wen o be-oi-mɛ na, mi tɛ dai wa; ɓɛɛ o ko-oi-mɛ nyɛma mɛ e ta nɛ‘m,› wó, beka bo na.»

¹²Wen nɛ̀ GASA WAN tɔ̧ nɛ́ mɔ'ɔ: «Nɛ̀ mbetɛ, ɛ̀nɛ̀ zɔ́k ai! O wi nɛ̀ tɛ̀ɛ́ nɔ so be-ɗele na, nɔɔ nɛ̀ doole, ɓɛɛ kɔ-mɛ, mɔ‘i tɛ̀ɛ́ nyaŋ so zu mɛ nde? Weyaa, mɔ‘i beka hɔ yɔɔ zu mɛ na; mɛ tɛ nɔ kànà nɛ̀ mbetɛ.

¹³GASA WAN tɔ̧a, nɛ̀ mbetɛ, mi kàná mɔ nɛ̀ tɛ‘m, Bɔsra tɛ kifi nɛ́ ŋga-gbárà, géé bɛɛ-oi; a̧ tɛ kifi duk nɛ́ mɔ nɛ̀ o bíí tɛ́ ba da̧ nɛ̀ ŋmaa, be nɛ̀ mɔ a̧ zu ŋmaa mbɛt. O be ye nɛ̀ zii nɛ̀ a̧ lɛŋ tɛ kifi nɛ́ bɛɛ-oi kpoo nɛ kpoo.»

¹⁴Mi zia nú-tom nɛ̀ GASA WAN ee nú ŋma betom mɛ́ tɔ̧ ha̧ o tugun bíí hee mɔ'ɔ ga: «Ɛ̀nɛ̀ kúr, ɛ̀nɛ̀ mɔ́í̧ ŋmaa, ɓɛɛ ɛ̀nɛ̀ nɛ́ɛ̀ bi Edɔm!»

¹⁵«Nɛ́ mbetɛ, mi tɛ de mɛ́ nɛ̀ geɗek-a mgbara o tugun bíí; ɓɛɛ wa tɛ zɔk mɛ hee geemɔ ga.

¹⁶Mɛ́ dúk nɛ́ tɛ-mɛ tɛ kíì nɛ̀ mɛ pi̧ tɛ o bíí; mɛ́ ta kɔ-mɛ‘e mɛ gana o bíí lɛŋ, ɓɛɛ mɛ ɔr nɛ́ tɛ-mɛ sɔɔ géè. Mɛ́ ɔ́ nɛ̀ kɔ̧̀ o di̧i̧-ta, hak nɛnɛ nɛ̀ nú-zɔ̧ɔ̧ o kusa kaya. Kóó mɛ nɛ̀ɛ́ de so yáá kɔ-mɛ zu kusa mɔ zaŋ kaya hee tama ga, mi tɛ kɔti mɛ pi̧ nù.» GASA WAN tɔ̧ɔ̧ hegɔ.

¹⁷«Edɔm tɛ kifi ŋga-gbárà kotoro. O bíí lɛŋ nɛ̀ tɛ ɓir yak nɛ̀ ká̧ fara'i bé tɛ̀ɛ́ zɔk o mɔ nɛ̀ ɗaŋa, wa tɛ hiɗi mɔ nɛ̀ gɔna-ɗɛɗɛ zu mɔ‘i.

¹⁸GASA WAN hee ndé, hee mɔ'ɔ nɛ̀ dee so tɛ ɗaŋa-a ko Sɔdɔm in Gɔmɔr ká bá nɛ̀ o ye nɛ̀ a̧a̧ so katɛ wa ga, ŋma bíí beka ɔ fara'i ɓɔna, ŋma bíí mɛ duk hi̧i̧ bo ɓɔna mbɛt.

¹⁹«Mi tɛ daŋ tɛnɛ hee ŋma dila nɛ̀ daŋ nɛ̀ kɔ̧̀ da̧a̧ kombo Jurdɛn pii tɛ ɓoramɔ'ɛ ga; mi tɛ ndak o bíí lɛŋ yinɛ fara'i hee gɔma-yí ga. Mi tɛ fo o daŋa wi-biro pii zu wa. Nɛ́ o'o tɛ we zu nɛ‘m o? Nɛ́ o'o tɛ ba'm si ti kita o? Nɛ́ ge wi-dai-mɔ ge a̧ tɛ yor ti'm ge?»

²⁰Ɛ̀nɛ̀ zíí ŋma mbe taamɔ nɛ̀ GASA WAN ɗafa zu Edɔm. Zu-wen n'aa ee wen dea-a in o bíí saaye Tɛman nɛ́ mɔ'ɔ. Ɛ̀nɛ̀ íŋ nɛ̀ mbetɛ‘e, wa tɛ ɔr wa kai yaknɛ hee o sami ga, ɓɛɛ a̧ tɛ ɗaŋ nù kɔ-wa wen zu deemɔ kɔ-wa.

²¹Tɛ tika-a kɔ-wa'i, nù naka; hiɗimɔ kɔ-wa wora hɔ nú Gbɛ̧ gba-tɔp mɛ.

²²Ɔ hee mɛ̀ nɛ́ ŋma tama a̧ daŋ tɛnɛ nyar nɛ̀ ɓaa si zu Bɔsra ga. Wese'i o yaa-ŋgo-biro ko Edɔm tɛ kpa bɔnɛ hee okoo nɛ̀ zaŋ nyim mɛ ko bem’ɛ ga.

²³War ko Damas, foe baa Hamat in Arpad; mɛ̀ nɛ́ wen nɛ̀ wa zia ŋma ɗaŋ nyɛrɛ mɔ, ɓɛɛ wa pɛŋi hee gba-tɔp ga. Mɔ'ɔ bɔɔ hee ge, wa nyɛm mɛ́ duk mgbítíŋ na?

²⁴Ŋgai ko Damas gbina, a̧ zika tɛ mɛ́ yu mɔ, gba-gbánà baa a̧, tu̧u̧-see in nyimmɔ baa a̧ hee okoo nɛ̀ zaŋ nyim mɛ ko bem’ɛ ga.

²⁵Ho! Wa ee gasa ye’ɛ duk, ye-ha̧-desee h’ɛnɛ'ɛ?[33]

²⁶GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: «Nɛ̀ mbetɛ, tɛ kpɔk wese'i, o daŋa wi-biro kɔ̧-a̧ yoo nù ɓɔn bee-gara ye'i. Wi zii ger o wi-biro kɔ̧-a̧ ɓɔna.

²⁷Mi tɛ pi̧ wee tɛ o garo Damas, ɓɛɛ tɛ bìì tua-wan ko Bɛn-Hadad.»

²⁸Wen nɛ̀ GASA WAN tɔ̧ zu Kedar in zu o mɔɔ-wan ko Hasɔr nɛ̀ Nabukɔdɔnɔsɔr wannu Babilɔŋ ɗaŋa so nɛ́ mɔ'ɔ: «Ɛ̀nɛ̀ kúr, ɛ̀nɛ̀ tík Kedar, ɛ̀nɛ̀ kúm o bíí Kedɛm.

²⁹A'i káí o tua-laa in o mɔ-dai kɔ-wa, gú nɛ̀ o geɗek tua-laa fara-ɔm-tɛ, in o mɔ kɔ-wa lɛŋ. A'i káí o ŋgeloba kɔ-wa, ɓɛɛ a'i gáí mɔ a zu wa'e ndé: ‹Kíì a̧ dé‘nɛ́ fara lɛŋ.› »

³⁰GASA WAN tɔ̧a: «Ɛ̀nɛ̀ yú mɔ! Ɛ̀nɛ̀ má yì nɛ̀ haya-a! Ɛ̀nɛ̀ hú̧sí kɔ̧́ kɔ̧̀, ɛ́nɛ́ o be Hasɔr, wen Nabukɔdɔnɔsɔr wannu Babilɔŋ taa ɗaŋmɔ zu'nɛ́; a̧ ɗafa ŋma yuwar nɛ̀ de na zu'nɛ́.»

³¹GASA WAN'e, «Ɛ̀nɛ̀ kúr, ɛ̀nɛ̀ bá biro dúk nɛ̀ tugun bíí'ɛ nɛ̀ ta mɔ na, nɛ̀ kíi ŋma mɔ de wa na’ɛ. Wa bó nɛ̀ o kpar-nú tua, kà bó nɛ̀ mɔɔ-mana-a na mbɛt, wen wa ya tɛ fara kɔ-wa mɛ gɛ́ɗɛ́k.

³²O wisɛn tɛ kai o ŋgeloba in o gíí mɔ-dai kɔ-wa nɛ̀ mɔɔ-oi-biro, ɓɛɛ mi tɛ pɛsi o yàá-kpui-ká̧-yí nɔ‘i dam ti zan; mi tɛ pi̧ bɔnɛ zu wa tɛ fara lɛŋ.» GASA WAN tɔ̧ɔ̧ hegɔ.

³³«Hasɔr tɛ kifi nɛ́ fara-duk ko o gba-toyo, géé ŋga-gbárà nɛ̀ tɛ́ duk kpoo nɛ kpoo. Ŋma bíí beka ɔ fara'i ɓɔna, ŋma bíí mɛ duk hi̧i̧ bo ɓɔna mbɛt.»

³⁴Wen’ɛ nɛ́ wen nɛ̀ GASA WAN tɔ̧ɔ̧ ha̧ Jeremii wi-tɔ̧-wen oi nú-wi zu Elam tɛ ku̧u̧naŋ ɔɔ-wan ko Sedesias wannu Juda.

³⁵Gba̧a̧-wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧a nɛ́ mɔ'ɔ: «Kɔ‘m, mi tɛ gbin kusaa-goo ko Elam nɛ̀ duk nɛ́ kpasa ŋgai kɔ̧-a̧‘i ŋgɛrɛm-ŋgɛrɛm a nù.

³⁶Mi tɛ tom búk nɛ̀ war mgbii-zan naar pi̧ zu Elam. Mi tɛ pɛsi wa dam fara lɛŋ, ŋma nù nɛ̀ o be Elam beka pɛsi hɔ sɛnɛ na, bo na.»

³⁷GASA WAN tɔ̧a: «Mi tɛ pi̧ kíì tɛ o be Elam ti o wisɛn kɔ-wa, o wi nɛ̀ kíí mɛ gbɛ wa. Mi tɛ tom ŋma ŋgamɔ pi̧ zu wa, mɔ‘i nɛ́ nyimsea kɔ‘m. Mi tɛ e gba-paa ɗoŋ-wa hɔ ŋgimbi n'am tɛ kum nɛ wa lɛŋ.»

³⁸GASA WAN tɔ̧a: «Mi tɛ mbo damti-wan kɔ‘m sɛn Elam, ɓɛɛ mi tɛ pɛsi wannu in o gasawi sɛnɛ yinɛ.

³⁹«Ɓɛɛ nɛ̀ ɗoŋ tɛ́ ŋma ŋgimbi, mi tɛ ba Elam e ŋgɔn woyo. Nɛ́ GASA WAN a̧ tɔ̧ wen’ɛ.»