Read Northwest Gbaya JEREMII 6 Bible Online

JEREMII 6 - Northwest Gbaya bible

JEREMII 6

¹Ɛ́nɛ́ o bezaŋ Bɛnjamin, ɛ̀nɛ̀ gbó Jerusalɛm, ɛ̀nɛ̀ yú mɔ si ŋma fara, ɓɛɛ ɛ̀nɛ̀ nɛ́ɛ̀ hu̧si tɛ‘nɛ́. Ɛ̀nɛ̀ dɔ́m mbia sɛn Tɛkoa! Ɛ̀nɛ̀ bá tutuwal-biro e ŋgɔn sɛn zu ye Bɛt-Kɛrɛm. Ŋma ɗaŋmɔ a̧ hai'nɛ́ tɛnɛ nɛ̀ zu o kaya nɛ̀ war ká̧-zan-mɛ́-ŋgɔn'i: mɛ̀ nɛ́ ŋma gasa ŋgamɔ.

²Mɛ́, Siɔŋ gba de ga̧a̧ ye, mɛ́ kpá nú mɛ́ tɔ̧ wen ɓɔna.

³O bíí tɛ tɛ pii zu ye'i, hee mɛ nɛ́ o wi-dai-mɔ a̧ kai o mɔ-dai kɔ‘i tɛnɛ ga. Wa tɛ a o tua-laa kɔ-wa zik a̧ e see-a, kóó o ndé nɛ̀ war fara kɔ‘i.

⁴Wa tɛ hiɗi mɔ tɔ̧ nɛnɛ‘e: «Ɛ̀nɛ̀ kúr, ɛ̀nɛ̀ bí wa! Ɛ̀nɛ̀ tík wa nɛ̀ gba bu-wese’ɛ! Ɛ́nɛ́ kuma kaɗi, wese a̧ gir tɛnɛ'ɛ! O gi̧ɔ̧-te a̧ zi̧i̧‘i mbɛt.

⁵Ɛ̀nɛ̀ kúr, ɛ̀ɛ̀ tík wa mɛ biŋgi-zɛ, ɛ̀ɛ̀ ɗáŋ o gba de tua kɔ-wa!»

⁶Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «Ɛ̀nɛ̀ gɔ́m o te, ɓɛɛ ɛ̀nɛ̀ ɗáfí fara-daŋ-nɛnɛ si saaye Jerusalɛm, wen Jerusalɛm nɛ́ ye nɛ̀ ɗaŋa kaɗi; mɔ nɛ̀ duk tɛ ye'i nɛ́ ŋgamɔ ɓɔnsɛnɛ.

⁷Hee mɔ'ɔ nɛ̀ gɔna kɔ̧-yì ŋmai̧ nɛ̀ yì gbonɛ'ɛ ga, mɛ̀ nɛ́ hegɔ a̧ wa ŋmai̧ nɛ̀ ɗaŋ kɔ-wa a zan mbɛt; mɔ kɔ-wa lɛŋ nɛ́ mɔɔ-ŋgai in ɗaŋ; ɓɔnsɛnɛ kànà nɛ́ dee ŋgamɔ, de nɛ̀ mɔ ba tɛ o bíí; ɓɛɛ zɔka bɔnɛ ko bíí, nɛ́ mɔ‘i a̧ tu̧ see-am.

⁸Mɛ̀ zíí mbɔrɔ'ɛ ŋgaɓo, Jerusalɛm! Kà bó hegɔ na, mi tɛ kɛ̧ tɛ‘m nɛ̀ mɛ, ɓɛɛ mɛ tɛ kifi duk nɛ́ géé zaŋbɛɛ buu, nɛ̀ ŋma bíí beka de ye sɛnɛ na.»

⁹Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «A'i ɓí oi o be Israɛl nɛ̀ ɓɔna hee mɔ'ɔ nɛ̀‘i ɓi nɛ̀ waya-nyak-dɔ̧ɔ̧'ɛ ga! Mɛ̀ pí̧ er-mɛ si gun sikila-nyak-dɔ̧ɔ̧ woyo hee mɔ'ɔ nɛ̀ wi-de-tom fo nɛ̀ nyak-dɔ̧ɔ̧ ɓi nɛ̀ waya’ɛ ga.»

¹⁰Mɛ̀ nɛ́ o'o tɛ zii wen in wee ɗoŋ mɔ kɔ‘m o? Ho! Zer-wa mgbea; wa nyɛm mɛ zii mɔ na, wa ba kɔ-wa wen ko GASA WAN e nɛ̀ mɔɔ-zɛkɛɗi kɔ-wa, wa kɔ̧ zia-a na.

¹¹Nyimsea ko GASA WAN duna see-am, n'am beka duk nɛ̀ oi-aa siti na. «Mɛ̀ gbáí nyimsea kɔ‘m'i a zu o obem mgbara kira nɛnɛ in zu o bem lɛŋ; mɛ̀ nɛ́ kalemɔ in o wiwii gu nɛ̀ o okoo, sɔka-wi in gbɛrɛ mbɛt.»

¹²GASA WAN tɔ̧a: «O tua, o fɔ in o okoo tɛ ye er o ŋma bíí. Mi tɛ fo ŋgamɔ pi̧ zu o bíí nù'ɛ.

¹³Wa lɛŋ, o gasawi in o obem mbɛt, kii nɛ̀ yuwar kpaamɔ kɔ‘i, o wi-tɔ̧-wen oi nú Sɔ̧ in o wi-ɗafi-sɔ̧ de nɛ́ mɔ nɛ̀ ɔrmɔ.

¹⁴Wa tɔ̧ wen ŋgamɔ nɛ̀ tɛ kpa dukbíí kɔ‘m hee geɗek mɔ ga, tɔ̧ nɛnɛ‘e: ‹Mɔ duk kɔ‘i nɛ̀ de-a! Ŋma mɔ bo na!› Ɓɛɛ zu-a'i, ŋma mɔ kpɔk nɛ̀ duk nɛ̀ de-a bo na.

¹⁵Zu ŋgamɔ nɛ̀ wa de'i, foe de wa dee nde? Foe de wa na kóó tikiɗi. Wa iŋ géé iŋa foe-a na!» Ɓɛɛ sa GASA WAN tɔ̧‘e: «Nɛ̀ mbetɛ, wa tɛ tir a nù hee o oi bíí ga, ŋgimbi n'am bé tɛ̀ɛ́ de ŋmaa in wa.»

¹⁶Ɓɛɛ GASA WAN tɔ̧ woyo: «Ɛ̀nɛ̀ yór sɛn yuwar, ɛ̀nɛ̀ tá mɔ, ɛ̀nɛ̀ ák mɔ sitɛ o ŋmaa zu mɔ ko o kuti yuwar n’ɛ̀nɛ̀ duk so ba ɓɔnsɛnɛ‘i. De yuwar nɛ́ wan mɛ ge-a ge? Ɛ̀nɛ̀ bá nɛ́ de yuwar'i, ɓɛɛ ɛ́nɛ́ tɛ kpa ɔma-tɛ.» Ɓɛɛ wa kifi nú‘e: «Ɛɛ beka ba k’ɛɛ yuwar'i na!»

¹⁷«Mi ee o wi-pɛm-mɔ mɛ mbaŋ tɛ-wa, wa a̧ zíí dɔma mbia!» Ɓɛɛ wa a̧ kífí nú: «Ŋma wen k’ɛɛ bo tɛ mɔ‘i na!»

¹⁸«Ɓɛɛ ɛ́nɛ́ o tugun bíí, ɛ̀nɛ̀ zìì; ɛ́nɛ́ o bíí lɛŋ, ɛ̀nɛ̀ íŋ mɔ n'am tɛ de in o wi nɔ'ɔ![6]

¹⁹O bíí nù'ɛ lɛŋ, ɛ̀nɛ̀ zìì! Kɔ‘m, mi tɛ fo ŋga bɔnɛ pi̧ zu dukbíí'ɛ oi ɗaŋ taamɔ kɔ̧-a̧. A̧ mbo zu tɛ wen kɔ‘m na, ɓɛɛ yuwar mɔ n'am usi ha̧ a̧, a̧ ba e tɛ geemɔ.

²⁰Ge a̧‘m tɛ de nɛ̀ fuu-nyama, nɛ̀ tɛ nɛ̀ Saba mɛ‘i ge, ká bó nɛ̀ de te-nyama mɛ́ nyɛi̧a fara ge? Wɔ o kpoo-sɔ̧ k’ɛnɛ gbɛ‘m na; o ɗafa-sɔ̧ k’ɛnɛ ha̧‘m de tɛ‘m na mbɛt.»

²¹Nɛ́ mɔ‘i ɓɛɛ sa GASA WAN tɔ̧: «Mi tɛ e mɔɔ-kɔ̧-naŋ yuwar ko dukbíí'ɛ, nɛ̀ o dáà in o bem tɛ tik sɛnɛ; o wi-ɔ katɛ wa in o sɛm kɔ-wa tɛ fe sɛnɛ mbɛt.»

²²GASA WAN tɔ̧a: «Ŋma dukbíí a̧ tɛ nɛ̀ ká̧-zan-mɛ́-ŋgɔn'i; ŋma gasa tugun bíí kura nɛ̀ nduti-nù mɛ.

²³Kusaa-góò nɔɔ er-wa in o za; wa nɛ́ o ŋgazu bíí nɛ̀ kó bó yí-wa na. Giti-wa nɔi̧ hee giti kura-a ko gba-tɔp ga; wa daŋa o nyaŋa, nɛk nɛnɛ hee o gíí wi-biro ga, wen bíí mɛ, gba de ye Siɔŋ.»

²⁴«Ɛɛ zia nyɛrɛ mɔ‘i, ɓɛɛ gba̧a̧ tɛ yɛ gbin lɛŋ; zɔm kíì baa yɛ hee mɔ'ɔ nɛ̀ mɔ ba nɛ̀ okoo ŋgimbi koa-a’ɛ ga.

²⁵K’ɛ́nɛ́ gbo yak si nú fɔ na, k’ɛ́nɛ́ yar si yuwar na mbɛt, wen gba-paa ko wisɛn dama fara nɔ‘i lɛŋ.»

²⁶«K’ɛ́nɛ́, dukbíí kɔ‘m, ɛ̀nɛ̀ gáɓí bufu tɛ‘nɛ́, ɛ̀nɛ̀ kíŋgílí tɛ‘nɛ́ nɛ̀ nù, ɛ̀nɛ̀ hí̧í̧ fio hee mɔ'ɔ nɛ̀‘i hi̧i̧ nɛ̀ kpɔk bem’ɛ ga; ɛ̀nɛ̀ hí̧í̧ kɔ̧a̧ nɛ̀ ŋgaya-a, wen wi-ɗaŋ-mɔ tɛ hɔ, kpáŋí nɛ̀ ɛ́nɛ́.»

²⁷«Jeremii, mi ee mɛ wen ha̧ mɛ mɛ we dukbíí kɔ‘m hee mɔ'ɔ nɛ‘i we nɛ boi’ɛ ga. Mɛ̀ zɔ́k naŋanɔ kɔ-wa, in deemɔ kɔ-wa.»

²⁸Wa gana o wi-ŋgazu lɛŋ nɛ̀ ɗaŋ; wa nɛ́ o wi-kai-ndaa-wi, wa ɔ ŋgaya hee ndɛrɛ kóó ŋga boi ga, wa lɛŋ nɛ́ o wi-ɗaŋ-mɔ.

²⁹Mɔɔ-ufi-wee-dɔra ko wan-dui-mɔ ufi tuŋgu wen ha̧ ɗɔr-aa mɛ gbo; ɓɛɛ wan-fo-wee-dɔra fo wee takaɗi, o ndiŋ yu tɛ̀ o wi nɔ'ɔ na.

³⁰Kinii, wi tɛ sa wa nɛ́: «Géé tum bu-mbɔi» nɛ̀‘i ee tɛ geemɔ, wen GASA WAN ee wa tɛ geemɔ.