Read Northwest Gbaya JEREMII 7 Bible Online

JEREMII 7 - Northwest Gbaya bible

JEREMII 7

¹Wen nɛ̀ GASA WAN tɔ̧ɔ̧ ha̧ Jeremii nɛ́ mɔ'ɔ;

²«Mɛ̀ yór nú Tua kɔ‘m a̧ mɛ̀ hé mbéá‘e: Ɛ́nɛ́ o be Juda lɛŋ nɛ̀ ye Tua nɛ̀ o nú tua nɔ'ɔ mɛ gasi GASA WAN, ɛ̀nɛ̀ zíí wen kɔ̧-a̧.

³Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl h’ɛnɛ nɛ́ mɔ'ɔ: Ɛ̀nɛ̀ ɗáfí yuwar naŋanɔ in deemɔ k’ɛnɛ nɛ̀ de-a wen ha̧‘m mɛ duk in'nɛɛ sɛn fara’ɛ.[7]

⁴K’ɛ́nɛ́ ɔr tɛ‘nɛ́ tɔ̧ nɛnɛ‘e: ‹Tua ko GASA WAN, Tua ko GASA WAN a̧a̧ hɛ̧ɛ̧› na.

⁵«Ɛ̀nɛ̀ ɗáfí yuwar naŋanɔ in deemɔ k’ɛnɛ; ɛ̀nɛ̀ kɛ̧́ mgbara mɔ nɛ̀ yuwar-a ha̧ o bíí lɛŋ.

⁶K’ɛ́nɛ́ nyɔŋ yí o gɛnɛ, o be-oi in o ko-gera na; k’ɛ́nɛ́ gbɛ o bíí nɛ̀ wen bo zu wa na sɛn fara’ɛ na; k’ɛ́nɛ́ nɛ ɗoŋ o ŋma sɔ̧ na, wen k’ɛnɛ tɛ̀ɛ́ kpa bɔnɛ.

⁷Ɓɛɛ hegɔ, mi tɛ duk in'nɛɛ sɛn fara’ɛ, tɛ́ nù n'am ha̧a̧ so ha̧ o dáà k’ɛnɛ mɛ duk nɛ́ kɔ-wa kpoo nɛ kpoo.

⁸«Ɓɛɛ ɛ́nɛ́ duk tɛ nɛ́ɛ́ ɗoŋ wen ndela nɛ̀ gba̧a̧-a̧ bo na.

⁹Ɛ́nɛ́ zú̧ nɛ́ mɔ, gbɛ nɛ̀ zu, de nɛ̀ dàlà, kan nɛ̀ mɔ nɛ̀ ndela, dɔ nɛ̀ kpoo-sɔ̧ ha̧ Bal, ndak nɛ̀ ɗoŋ o ŋma sɔ̧ n’ɛnɛ iŋ na mbɛt.

¹⁰Ɗoŋ mɔ‘i, ɛ́nɛ́ tɛ̀ɛ̀ mɛ yor ti'm kɔ̧ Tua nɛ̀ nin-am duk sɛnɛ'ɛ tɔ̧ nɛnɛ‘e: ‹Ɛɛ kpasa kaɗi,› ɓɛɛ ɛnɛ nɛ́ mɔ'ɔ n’ɛ̀nɛ̀ ɓɔn tɛ o ɗaŋmɔ k’ɛnɛ nɔ‘i siti’ɛ!

¹¹GASA WAN tɔ̧a: Ɛ́nɛ́ ba k’ɛnɛ Tua’ɛ nɛ̀ nin-am duk sɛnɛ'ɛ e nɛ̀ di̧i̧ ko o wi-kai-mɔ er wi. Kɔ‘m, mi zɔka mɔ‘i hegɔ.

¹²Ɛ̀nɛ̀ nɛ́ sɛn Silo, fara nɛ̀ duka so nɛ́ fara kɔ‘m, fara n'am dee so ha̧ nin-am mɛ duk sɛnɛ nɛti, ɓɛɛ ɛ̀nɛ̀ zɔ́k mɔ n'am dee in a̧ wen zu ɗaŋ ko Israɛl, dukbíí kɔ‘m.

¹³GASA WAN'e, zɔ́k, zu o ɗaŋmɔ nɔ'ɔ lɛŋ n’ɛnɛ dea’ɛ, mi tɔ̧ɔ̧ wen h’ɛnɛ war nɛ̀ dɔka-a, ɓɛɛ ɛnɛ kɔ̧ zia-a na; mi saa'nɛ́, ɓɛɛ ɛnɛ kifi nú na mbɛt.

¹⁴Ɓɛɛ hegɔ, Tua nɛ̀ nin-am duk sɛnɛ, wan n’ɛnɛ e nɛ̀ ta'i, in fara n'am ha̧a̧ h’ɛnɛ in o dáà k’ɛnɛ‘i, kànà nɛ́ kalemɔ n'am dee in Silo a̧‘m tɛ de in fara’ɛ mbɛt.

¹⁵Mi tɛ pi̧‘nɛ́ taŋ nyɛi nɛ‘m hee mɔ'ɔ n'am pi̧i̧ so nɛ̀ o nya'nɛ́, o bezaŋ Efraim taŋ ga.»

¹⁶«Ɓɛɛ kɔ-mɛ Jeremii, ká mɛ́ am mɔ mgbara'm in o wi nɔ'ɔ na, ká mɛ́ ai nú kɔfi nɛ̀ Sɔ̧ wen wa na; ká mɛ́ yɔ ŋgimbi kɔ-mɛ gɔm nɛ̀ er ha̧‘m na, wen mi beka zii aia-nú kɔ-mɛ na.

¹⁷Mɛ́ zɔ́k kɔ-mɛ mɔ nɛ wa de nɛ̀ saaye Juda in nɛ̀ o mgbara kira Jerusalɛm nɛnɛ‘i na:

¹⁸o bem kii kɔ‘i nɛ́ gua, o dáà kɔ-wa ye kɔ‘i nɛ́ wee, ɓɛɛ o kóò vata kɔ‘i nɛ́ fuu wen gíí makala ha̧ sɔ̧ nɛ̀ wa sa'e ‹Ko-wan mɛ́ yiwese›.[8] Ɛ́nɛ́ a nɛ zɛzɛ ha̧ o ŋma sɔ̧, ɓɛɛ nɛ́ tɛ́ mɔ‘i ɛ̀nɛ̀ tu̧ nɛ̀ see-am.

¹⁹GASA WAN tɔ̧a: Mɔ‘i, nɛ́ mi a̧ wa tu̧ see-aa náà, kóó wa tu̧ nɛ́ see-wa nɛ̀ tɛ-wa nde? Foe tɛ̀ɛ́ de so nɛ́ wa ɛ̧!»

²⁰Ɓɛɛ GASA WAN Sɔ̧ tɔ̧: «Nyimsea in tu̧u̧-see kɔ‘m tɛ tik zu fara’ɛ, zu o bíí in o saɗi, gu nɛ̀ o te in o nyɔnɔ: nɛ́ ŋma wee nɛ̀ beka bi na.»

²¹Wen nɛ̀ GASA WAN, Sɔ̧ ko Israɛl nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «Ɛ̀nɛ̀ káí o dɔɔ-kpoo-sɔ̧ k’ɛnɛ a zu o wan mɛ ɗafi sɔ̧ k’ɛnɛ, ɓɛɛ ɛ̀nɛ̀ nyɔ́ŋ mɔ k’ɛnɛ.

²²Ŋgimbi n'am kaia nɛ̀ o dáà k’ɛnɛ gbonɛ nɛ̀ nú Egiptɛ, mi ak ɗafa-sɔ̧ in kpoo-sɔ̧ er wa na.

²³Mɔ n'am aka er-wa nɛ́ mɔ'ɔ kpɔk ɓɛɛ: ‹Ɛ̀nɛ̀ zíí wen nú‘m, ɓɛɛ mi tɛ duk nɛ́ Sɔ̧ k’ɛnɛ, ɓɛɛ ɛ́nɛ́ tɛ duk nɛ́ dukbíí kɔ‘m. Ɛ̀nɛ̀ bá nɛ́ yuwar n'am usi h’ɛnɛ‘i, ɓɛɛ ɛ́nɛ́ tɛ ya nɛ̀ de-a!›

²⁴Wa zii wen nú‘m na, wa yeŋ zer pii tɛ‘m na, ɓɛɛ wa dee nɛ́ mɔ nɛ̀ see-wa kɔ̧a̧ tɛ ɗaŋ ŋgazu kɔ-wa. Wa tɛ̀ɛ́ zɔk nɛ́ mɔ pii tɛ‘m, ɓɛɛ nɛ́ mɔ'ɔ nɛ̀ wa zika nɛ́ ɗoŋ e ha̧‘m.

²⁵Ku̧u̧naŋ-a tɛ ŋgimbi nɛ̀ o dáà kɔ-wa gboo nɛnɛ nɛ̀ nú Egiptɛ mɛ‘i hɔ sɔsɔɔ‘i, mi mbosi toma o wi-de-tom, o wi-tɔ̧-wen oi nú‘m ha̧ wa wese lɛŋ na.

²⁶Ɓɛɛ wa zii wen nú‘m na, wa yeŋ zer pii tɛ‘m na mbɛt; wa ŋgaia see-wa, ɓɛɛ wa tɛ́ɛ̀ ɗaŋ gan ko o dáà kɔ-wa.

²⁷«Mɛ́ tɛ tɔ̧ mgbara wen nɔ'ɔ lɛŋ ha̧ wa, ɓɛɛ wa beka zii wen kɔ-mɛ na; mɛ tɛ sa wa, wa beka kɔ̧ sara nú-mɛ́ na mbɛt.

²⁸Hegɔ‘i, mɛ tɔ̧ ha̧ wa ndé, wa nɛ́ dukbíí nɛ̀ zii wen nú GASA WAN Sɔ̧ kɔ-wa na, wa kpɛk usamɔ kɔ̧-a̧ na mbɛt; kpasawen yɔa, ɓɛɛ ŋma géé taamɔ wen kpasawen bo tɛ-wa na mbɛt.»

²⁹«Juda, mɛ̀ gɔ́n mui̧-zu-mɛ[9] nɛ̀ zi̧a hegɔ‘i a taŋ, mɛ̀ bíí gima ai nɛ̀ nú nɛ̀ zu o kaya[10] nɛ̀ ya kotoro nɛnɛ'ɛ; mɛ́ nɛ́ tugun bíí tɛ ŋgimbi’ɛ nɛ̀ a̧ŋa nyimsea kɔ‘m a ŋgɔn, mɛ́ dé tɛ‘m ɓɔna, sa'm pi̧ mɛ taŋ.»

³⁰Ɓɛɛ GASA WAN tɔ̧‘e: «O be Juda dee ɗaŋmɔ n'am sɛna, wa kaia nɛ́ o ndiŋmɔ a kɔ̧ Tua nɛ̀ nin-am duk sɛnɛ, fɛŋ nɛ̀ Tua'i.

³¹Wa mboo fara-ɗafi-sɔ̧ Tafɛt sɛn kɔ̧ ɗɔŋgɔ Bɛn-Hinɔm ha̧ mɛ duk nɛ́ fara-dɔ o bem in o boko-bem kɔ-wa; bó nɛ́ mi'i aka wa mɛ de hegɔ na, taamɔ kɔ‘m bo a̧‘i̧ na ndó-ndó-ndó.»

³²GASA WAN'e, «Ŋma ŋgimbi tɛ hɔ nɛ̀ wa beka sa fara'i'e ‹Tafɛt› kóó ‹Ɗɔŋgɔ Bɛn-Hinɔm› ɓɔna, ɓɛɛ wa tɛ sa a̧ nɛ́ ‹Ɗɔŋgɔ-gbɛ-wi›, ɓɛɛ hee mɔ'ɔ nɛ̀ fara beka bo na ga, Tafɛt'i tɛ kifi nɛ́ fara-gun-fio.

³³Wɔr o bíí nɔ'ɔ tɛ dɔk fara'i nɛ̀ tɛ duk nɛ́ nyɔŋmɔ ko o nɔ̧́í̧ in o saɗi, ɓɛɛ ŋma bíí nɛ̀ tɛ ndak o saɗi nɔ‘i yinɛ bo na.

³⁴Mi tɛ de ha̧ ger gima-tortɛ in nyɛŋɛ mɛ kpe sɛn Juda hɔ mgbara o kira Jerusalɛm mɛ; wi beka zii gima-desee ko wi-ba-kóò, kà bó nɛ̀ gima-tortɛ-baa-wíì ɓɔna, wen nù‘i tɛ kifi nɛ́ géé bɛɛ-oi sɔɔ géè.»