Read Northwest Gbaya JEREMII 9 Bible Online

JEREMII 9 - Northwest Gbaya bible

JEREMII 9

¹Ho! A̧‘m kpá so ŋma fara mɛ hu̧si tɛ‘m sɛnɛ ŋga-gbárà mɛ hee o wi-ba-war ga, mi tɛ̀ɛ́ yak dukbíí kɔ‘m e ɓɔn hi̧i̧! Wa lɛŋ nɛ́ o wi-nɛ-ɗoŋ o géé-sɔ̧; wa lɛŋ nɛ́ o wi-e-ɗɔra tɛ ŋmaa.

²GASA WAN tɔ̧a: «Leɓe-wa ɔ hee kusaa a'i ŋgaŋa ga; mɔ nɛ̀ wa de zaŋnu’ɛ lɛŋ, nɛ́ ndela, kpasawen bo na. Wa de kànà nɛ́ ɗaŋmɔ siti siti, ɓɛɛ kɔ‘m, wa iŋ am na!

³Kóó o ndé a̧ mbó ta nɛ̀ o gbama-sɛm kɔ‘i, k’ɛ́nɛ́ e ta nɛ̀ ŋma nya'nɛ́ kóó kpɔk na; wen k’ɛ̀nɛ̀ tɔ̧́ k’ɛnɛ‘e a̧ nɛ́ nya'nɛ́ wó, ɓɛɛ nɛ́ a̧‘i a̧ tɛ de ɗaŋmɔ in'nɛɛ; kóó nɛ́ gbama-sɛm k’ɛnɛ mbɛt, a̧ kai ndaa'nɛ́‘i.

⁴O ndè lɛŋ ɔr nɛ̀ sɛm kɔ‘i; ŋma bíí nɛ̀ tɔ̧ kpasawen bo na. Ndela hira tɛ wa kaɗi, ɗoŋ wa nyɛi̧a tɛ dee ɗaŋmɔ kaɗi, wa nyɛm mɛ pii ɗoŋ ɓɔna.

⁵GASA WAN'e, mɔ kɔ-wa lɛŋ nɛ́ mɔɔ-ŋgai in ɔra ŋmaa; wa kɔ̧ mɛ iŋ am na.»

⁶Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ mɔ'ɔ: «Mi tɛ we wa hee mɔ'ɔ nɛ‘i nɔi̧ nɛ̀ boi nɛ̀ wee’ɛ ga; hegɔ‘i mi tɛ ba zu'm dúk nɛ̀ dukbíí kɔ‘m wen zu ɗaŋ kɔ-wa.

⁷Ndàrà-nú o wi nɔ‘i duk nɛ́ góó-gbɛ-wi; mɔ nɛ wa tɔ̧ lɛŋ nɛ́ ɔrmɔ. Wen mɛ kɔ̧ nú-wa nɛ́ gba de ɔ̧ɔ̧-nyɔ̧ɔ̧-mɔ, ɓɛɛ wan mɛ kɔ̧ see-wa, nɛ́ tuia-pɛr ha̧ o sɛm kɔ-wa.

⁸GASA WAN'e, mi beka de ŋmaa in o wi nɔ'ɔ na? Mi beka kifi er ɗaŋmɔ ha̧ o pɛrti tugun bíí'ɛ na nde?»

⁹«Mi tɛ hi̧i̧ kɔ̧a̧ nɛ̀ zu o kaya nɛnɛ, mi tɛ ai nú zu fara-dai o mɔ-dai nɛ̀ mɔ bia wee sɛnɛ ŋgai kotoro, nɛ̀ ŋma bíí ɓir sɛnɛ ɓɔna, nɛ̀‘i zii hiɗimɔ ko mɔ-dai sɛnɛ ɓɔna mbɛt. O mɔ nɛ̀‘i sa'e o nɔ̧́í̧ in o saɗi lɛŋ yuu mɔ yak, ŋma oi-mɔ duk na.

¹⁰Mi tɛ de ha̧ Jerusalɛm mɛ kifi bɛɛ-oi, in fara-yaa ko o gba-toyo, ɓɛɛ o ye mɛ nù Juda tɛ kifi duk nɛ́ géé zaŋbɛɛ, nɛ̀ ŋma bíí beka duk sɛnɛ na.

¹¹Kà ŋma wi-iŋ-mɔ nɛ́ bòó sɛnɛ, a̧ a̧ zíí mgbara mɔ nɛ GASA WAN tɔ̧ɔ̧ tɛ ha̧a̧nú kɔ‘i ha̧ a̧, ɓɛɛ a̧ a̧ wé ɗoŋ-aa yaknɛ‘e: mɔ nɛ dee ha̧ nù mɛ bìì wee ɗaŋ ŋgai kotoro, nɛ̀ ŋma bíí ɓir sɛnɛ ɓɔna’ɛ nɛ́ ge?»

¹²GASA WAN'e: «Wa ee usamɔ kɔ‘m n'am ee ti wa duk. Wa tɛ̀ɛ́ zii so nɛ tiger-am, mɛ nɛ̀ ɗoŋ-aa,

¹³ɓɛɛ nɛ́ mɔ'ɔ nɛ̀ wa ɓɔna tɛ ŋgaia see-wa, ndaɗi nɛ̀ ɗoŋ o sɔ̧ Bal nɛ̀ o dáà kɔ-wa usa so ha̧ wa.

¹⁴Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mi tɛ de ha̧ wa mɛ nyɔŋ paŋmɔ, mi tɛ ɔn wa tɛ yì.

¹⁵Mi tɛ pɛsi wa dam zaŋnu mgbara o tugun bíí nɛ̀ wa iŋ nɛti na, in nɛ̀ o dáà kɔ-wa iŋ so na mbɛt, ɓɛɛ mi tɛ e gba-paa ɗoŋ wa hɔ ŋgimbi nɛ̀ wa tɛ kum lɛŋ.»

¹⁶Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ‘i. «Ɛ̀nɛ̀ mɔ́í̧ o okoo-hi̧i̧-fio pii ti! Ɛ̀nɛ̀ hók o wan-ɗekeri-gima-fio! Wa a̧ tɛ́ɛ̀ dé gima-fio!

¹⁷Wa a̧ tɛ́ nɛ̀ haya-a; wa a̧ hí̧í̧ kɔ̧a̧-fio zu yɛ. Mi̧i̧kɔ̧a a̧ gár yí-ɛ́ɛ́, ha̧ yí-ɛ́ɛ́ a̧ fók nɛ̀ mi̧i̧kɔ̧a.»

¹⁸Wi zii nɛ ŋma aia-nú nɛ̀ Siɔŋ mɛ tɛnɛ nɛ̀ tɔ̧‘e: «Ho! Ɛɛ kuma, búù baa yɛ kaɗi! Ɛɛ tɛ e nù k’ɛɛ duk! Wa gbina o tua k’ɛɛ a nù.»

¹⁹O okoo, ɛ̀nɛ̀ zíí wen ko GASA WAN; wen kɔ̧-a̧ a̧ yé zer'nɛ́. Ɛ̀nɛ̀ úsí hi̧a kɔ̧a̧, áí nɛ̀ nú ha̧ o sɛm k’ɛnɛ mbɛt.

²⁰Fio ye nɛ̀ o woi-tua k’ɛɛ, ye nɛnɛ sɛn kɔ̧ o de tua k’ɛɛ. A̧ tɛ̀ɛ̀ ɓar o bem k’ɛɛ nɛ̀ mgbara kira nɛnɛ, in o be-ŋgaiwi nɛ̀ bee-gara.

²¹«Ɓɛɛ kɔ-mɛ Jeremii, mɛ̀ tɔ̧́ wen’ɛ nɛ̀ duk nɛ́ wen kɔ‘m GASA WAN'e: O wɔr gbisi mbɔɗɔnu sinɛ hee mbɔra zao sɛn kpɛɛfɔ ga, hee ŋma nyɔnɔ nɛ̀‘i gɔma a nù, nɛ̀ wi-dɔra-a bo na ga.»

²²Wen nɛ̀ GASA WAN tɔ̧ nɛ́ mɔ'ɔ: «Ká wi-iŋ-mɔ ŋmaŋ tɛ zu iŋamɔ kɔ‘i na! Ká wan-ŋgai ŋmaŋ tɛ zu ŋgai kɔ‘i na! Ká wan-mbɔi ŋmaŋ tɛ zu mbɔi kɔ‘i na mbɛt!

²³Kà ŋma bíí á̧ kɔ̧ɔ̧ mɛ ŋmaŋ tɛ, a̧ a̧ ŋmáŋ tɛ-a wen nɛ̀ kɔ̧ zaŋ-aa gɔna mɛ iŋ am, mi GASA WAN, nɛ̀ de mɔ nɛ̀ de-a, nɛ̀ kɔ̧ɔ̧mɔ, nɛ̀ yuwar-a zu nù'ɛ. Nɛ̀ mbetɛ, mɔ nɛ̀ dee tɛ‘m a̧‘i. Nɛ́ GASA WAN a̧ tɔ̧ wen’ɛ.»

²⁴«Ŋma ŋgimbi, mi tɛ kifi er ha̧ o wi nɛ gɔna-bɔr kɔ-wa duk nɛ́ do-mɔ ɓɛɛ. GASA WAN tɔ̧ɔ̧ hegɔ!

²⁵Mi tɛ de ŋmaa in o be Egiptɛ, o be Juda, o be Edɔm, o be Amɔŋ, o be Mɔab, ká bá nɛ̀ o yàá-kpui-ká̧-yí nɛ̀ ɔ ŋga-gbárà mɛ, wen o dɔka tugun bíí lɛŋ gɔn bɔr na,[11] ɓɛɛ ko o be Israɛl mbɛt gɔn nɛ bɔr wen do war-tɛ-wa, nɛ̀ bó nɛ́ wen GASA WAN na.»