Read Northwest Gbaya O AIA-NÚ 1 Bible Online

O AIA-NÚ 1 - Northwest Gbaya bible

O AIA-NÚ 1

¹Ho, Jerusalɛm! Ye nɛ o bíí ya so sɛnɛ hegɔ tululu’ɛ, nɛ́ mɔ'ɔ nɛ duk ɛ̀nɛ̀ ɓoree’ɛ! A̧ duk ɛ̧ɛ̧ hee ko-gera ga ɓɛɛ gɔ! Wi nɛ nin hu̧r so mgbara o gasa nù'ɛ, nɛ duk so nɛ́ bem ko wannu mgbara o dɔka-a’ɛ, nɛ́ mɔ'ɔ nɛ̀ yee tɛ tom-bara’ɛ!

²Ɛ̧ɛ̧ kinii kànà nɛ́ kɔ̧a̧ a̧ a̧ hi̧i̧ mɔ sa̧ nɛnɛ gbɛ̧ŋkɛ̧nyɛ̧ŋ, ɓɛɛ o ɗɔɔ yí-a lɛŋ fok nɛ miikɔ̧a rɔtɛ-rɔtɛ; o gbama-yari kɔ̧-a̧ nɛ kɔ̧ɔ̧ so a̧, kóó ŋma kpɔk mɛ ha̧ nɔɔ-ŋgiɗi ha̧ a̧ bo na. Wa lɛŋ kifa nɛ o wi-sɛn-a, in o wan-e-ɗɔra tɛ-a.

³Ɗoŋ tika-a ko Juda in ɗoŋ tom nɛ wa pi̧i̧ zu a, wa baa a̧ yaknɛ nɛ bara-biro; a̧ duk mgbara o gɔni-duk mɛ, mgbák fara duk kɔ̧-a̧ bo na. O wi-usi-bɔnɛ ha̧ a̧ kɛra a̧, ɓɛɛ fara-yu-mɔ si sɛnɛ bo na.

⁴O yuwar Siɔŋ ya kpúŋ-kpúŋ hee o be-oi-fio ga; o bíí gar yɔyɛ ɓɔna, o nú garo ya wékéké, o wi-ɗafi-sɔ̧ lɛŋ gɔfi nɛ mɔ, ɓɛɛ o be-zɔŋa ya kúrúm-kúrúm. Oee tu̧u̧-see ko Siɔŋ wa!

⁵O wisɛn gana a̧, ɓɛɛ ya nɛ desee; wen GASA WAN usi nɛ bɔnɛ ha̧ a̧, wen dee ŋgazu kɔ̧-a̧ nyɛmna. O wisɛn gbina o bem kɔ̧-a̧ gbut yaknɛ nɛ bara-biro.

⁶Tu̧u̧-tɛ-mɔ ko Siɔŋ nɛ duka so hee gba de be-zɔŋa ga, bo ɓɔna; o be-wan ya hee o kɔɗɛ[1] nɛ kpa fara-nyɔŋ-mɔ na ga; wa yuu mɔ nɛ oi gbina gba̧a̧-tɛ ti o wan-ndak-wa.

⁷Ŋgimbi bɔnɛ yambala-a'i, tɛ́ Jerusalɛm mbaŋa ɗoŋ wese bɔtɛ mɛ ti; ŋgimbi nɛ o wisɛn kɔ̧-a̧ gana nɛ a̧, ŋma bíí-gbak-a̧ bo na; o wi-sɛn-a zɔka tika-a kɔ̧-a̧, ɓɛɛ zɛkɛɗi a̧ mam nɛnɛ.

⁸Jerusalɛm dee ɗaŋmɔ nyɛm see na, ɓɛɛ a̧ kifi duk nɛ zuku-paa. O bíí nɛ duka so mɛ zɔn a̧ nɛti fɛŋ nɛ a̧ kinii, wen wa zɔk a̧ duk nɛ mgbii. War kɔ̧-a̧, a̧ gɔfi nɛ mɔ, zik nɛ ɗoŋ-aa e ha̧ wa.

⁹Mɔɔ-búù kɔ̧-a̧‘i zakata tɛ laa kɔ̧-a̧; a̧ ta so mɔ zu mɔ nɛ tɛ̀ɛ́ kpa a̧ nɛ ɗoŋ na. Tika-a kɔ̧-a̧‘i gɔna ɗɛɗɛ bíí batɛ, ɓɛɛ wi-ha̧-nɔɔ-ŋgiɗi ha̧ a̧ bo na. A̧ tɔ̧a̧: «GASA WAN, ɛ̀nɛ̀ zɔ́k mɔɔ-búù nɛ tika zu'm; wisɛn kɔ‘m gana'm.»

¹⁰O wisɛn kɔ̧-a̧ kaia o demɔ kɔ̧-a̧ lɛŋ; a̧ zɔka o gɔni-duk fara yee kɔ̧ Tua ko Sɔ̧ kɔ̧-a̧: mɛ nɛ o tugun bíí nɛ GASA WAN gɔna so geŋa'e, ká wa ye zaŋ mɔi̧a-a ko o bíí kɔ‘i na.

¹¹Dukbíí kɔ̧-a̧ nɛ oi-aa lɛŋ gɔfi nɛ mɔ, kii nɛ mɔɔ-nyɔŋ; wa ha̧ nɛ o demɔ kɔ-wa mɛ kpa nɛ nyɔŋmɔ sɛka de ká wa kpasa. «GASA WAN, ɛ̀nɛ̀ zɔ́k ea'm nɛ wa e tɛ geemɔ'ɛ.»

¹²«Ɛ́nɛ́ o wi-ɓir-war nɔ'ɔ, ɛ̀nɛ̀ zɔ́k mɔ pii hɛ̧ɛ̧: n’ɛ̀nɛ̀ duk nɛnɛ'ɛ, nɛ́ o a̧ zɔka ɛ̧ɛ̧ pɛrti bɔnɛ n'am zɔk, nɛ̀ GASA WAN pi̧i̧ zu'm, wese ŋga nyimsea kɔ̧-a̧'ɛ o?

¹³A̧ pi̧i̧ wee nɛ ŋgɔn mɛ, ye tɛ‘m, ba gba̧a̧-tɛ‘m; [2] a̧ tuia pɛr ha̧‘m, ɓɛɛ ba naŋ-am yo'm nɛ nu. A̧ dee ha̧ gɛ̧ɛ̧mɔ mɛ ba'm, ɓɛɛ wese lɛŋ tɛ‘m diti diti ɗɔ́ŋ-ɗɔ́ŋ.

¹⁴«A̧ hɛra kpáŋá ɗaŋmɔ kɔ‘m ger-am; kpáŋá‘i nɛ́ a̧ a̧ dee nɛ̀ er-a, ɓɛɛ ba ŋgai kɔ‘m lɛŋ yinɛ. GASA WAN pi̧i̧ am er o bíí nɛ ŋgaia gan am.

¹⁵«GASA WAN ndaka o ŋga wi-gbin-biro kɔ‘m katɛ‘m yinɛ lɛŋ; a̧ baa keta in o wi-biro kɔ̧-a̧, wen ɗaŋa o daŋa ŋgai wi-biro kɔ‘m yinɛ. GASA WAN hɔna Juda nɛ hɔɔ so ŋmaa in gba de be-zɔŋa, hee waya nyak-dɔ̧ɔ̧ nɛ‘i ɓar’ɛ ga.

¹⁶«Mɛ̀ nɛ́ wen mɔ‘i a̧‘m hi̧i̧ nɛ kɔ̧a̧ wen-aa; yí‘m gar nɛ miikɔ̧a sususu gee, wen ŋma wi-gai-am bo na, ŋma wi-ha̧-nɔɔ-ŋgiɗi ha̧‘m bo na mbɛt. O bem kɔ‘m sakala hegɔ kúsúk, wen o wisɛn ŋgaia gan wa.»

¹⁷«Siɔŋ yɛk nɛ er, ɓɛɛ wi-ha̧-nɔɔ-ŋgiɗi ha̧ a̧ bo na. GASA WAN foo o wisɛn fara lɛŋ a zu Jakob; kà wa zɔk Jerusalɛm, ɓɛɛ tɛ-wa gara u̧nunu.

¹⁸«GASA WAN nɛ wi-de-mɔ nɛ yuwar-a; nɛ́ mi'i yɔɔ kaya ti a̧ ɛ̧. O dukbíí nɔ'ɔ, ɛ́nɛ́ lɛŋ ɛ̀nɛ̀ zii, ɛ̀nɛ̀ zɔ́k bɔnɛ‘i nɛ ba tɛ‘m'i; wa kaia o be-zɔŋa in o be-ŋgaiwi kɔ‘m yaknɛ nɛ bara-biro.

¹⁹«Mi saa o wi nɛ kɔ̧ɔ̧ so'm, ɓɛɛ wa tɛ́ɛ̀ gbak am na. O wi-ɗafi-sɔ̧ in o wi-tɔ̧-mbɔrɔ kɔ‘m kuma saaye lɛŋ, fara kii nyɔŋmɔ kpasi nɛ tɛ-wa.

²⁰«Ɛ̀nɛ̀ zɔ́k ŋga bɔnɛ kɔ‘m, GASA WAN! Tɛ‘m lɛŋ nɛ naka mɔ; see-am ŋmana dun kɔ̧ nú‘m oi ŋgazu kɔ‘m! Nɛ̀ zan wa gɔm nɛ o bem kɔ‘m nɛ gba-paa kum nɛ wa a nu, nɛ̀ kɔ̧ tua nɛ gee fio hegɔ ŋgoɗoso mbɛt.

²¹«Kànà nɛ́ giti gɔfamɔ kɔ‘m a̧‘i zii; gee ŋma bíí mɛ ha̧ nɔɔ-ŋgiɗi ha̧‘m bo na! O wisɛn kɔ‘m lɛŋ ya nɛ desee, zu bɔnɛ kɔ‘m'i. Ɓɛɛ nɛ́ ɛnɛ'ɛ dee ha̧ mɔ‘i mɛ tik zu'm; ɓɛɛ war kɔ‘m, ɛ̀nɛ̀ dé ha̧ mɔ‘i nɛ kpaa'm'i mɛ kpa wa mbɛt!

²²«Tɛ‘nɛ́ a̧ mbaŋ ɗoŋ ɗaŋ kɔ-wa, ɓɛɛ ɛ̀nɛ̀ pí̧ bɔnɛ zu wa hee mɔ'ɔ n’ɛnɛ dee in am wen o dɔka ɗaŋmɔ kɔ‘m ga, wen mi gɔfi nɛ mɔ nyɛmna; gba̧a̧-tɛ‘m lɛŋ gbina.»